1 कोरिन्थि 9 - Dhimal NT

छाल्न्हाका चात्याको खाबारा

¹ का जेदोङ चालि खाङलाउ बुङ स्वतन्तरो हिघा, का एमि छाल्न्हाका चात्या हिघा, कालाउ का केलाइको प्रभु येसु ख्रिस्टहेङ तिङका हिघा। कालाउ नेलाइ प्रभुता काङको कामको नतिजा हिसुना।

² हेथेते द्‍याङगेलाइ कासेहेङ साल्न्हाका चात्या मामानिलाउ बुङ नेलाइते मानिसुखेना। हाइपालिपानु का दोङ नेलाइहेङ सुसमाचार हिङपाका हिघाखा, कालाउ नेलाइ प्रभुता खाङधुरि पाका काथाहोइ दोङ का साल्न्हाका चात्या हिघा दोअ्तेङ प्रामान पिखे।

³ काङको छाल्का चात्या जेङका खाबारा ह्रुता प्रस्न पाका द्‍याङगेलाइहेङ काङको या दोङ जबाफ हि।

⁴ बार्नाबास कालाउ कासेहेङ पाक्का दोङ केलाइको पाका कामको भाअ्सिङ नेलाइसो चाका-आम्का कालाउ आर्थिक साघाइ निङका खाबारा हि।

⁵ आरु छाल्न्हाका चात्यागेलाइ, प्रभुको ओनेगेलाइ कालाउ पतुरुस (केफास) भाइपा केलाइहेङ बुङ ताइको बे चुम्पुतेङ हानिलि खाबारा हि।

⁶ का कालाउ बार्नाबासहेङ आरु छाल्न्हाका चात्यागेलाइ भाइपा साघाइ निङलि खाबारा हि कालाउ ताइमिङ जिबन चालाइलिको भाअ्सिङ काम पालि मागोइयाङ।

⁷ सिपालाइ सेनाता हिलाउ ताइको खर्च ताइमिङ तिरिलि मागोइखे। आङगुर थिङका द्‍याङ आङगुर चालि निङखे। कालाउ लाखुरिया ताइको भेडा पोसितेङ दुधे आम्लि द्वाङ।

⁸ या गोताङ काथागेलाइ का द्‍याङको बिचारहोइ खिनिङ दोअ्का माको, कालाउ मोसाको व्यवस्था बुङ इन्सिकाङ दोअ्खे।

⁹ हाइपालिपानु मोसाको व्यवस्थाता लेखेका हि, “दाउनि पाका पियाको नुइता मुखाउरि माटुसु।” हाइ नाअ् सोचिखेना कि, परमेस्वर पियागेलाइको खिनिङ चिन्ता पाखे? माको मापाखे।

¹⁰ हाइ वा केलाइको भाअ्सिङ दोङ इदोइ दोअ्का माको रो? एइ केलाइको भाअ्सिङ दोङ इदोइ लेखेका हि। हाइपालिपानु चोइका कालाउ दाउनि पाका से उमको आधे भाग निङलि आसहोइ चोइखे कालाउ दाउनि पाखे।

¹¹ केलाइ इम्बालाइको माझाता आत्मिक चालाइ बिका हिनाहि, ओदोङ भाअ्सिङ केलाइ नेलाइसो आधे आमेनेगेलाइ निङलि आस पानाखे।

¹² जेसापा आरुगेलाइ नेलाइसो हाइ दोङ निङखे पानु, निसित दोङ बार्नाबास कालाउ का इम्बालाइ खान्तेङ झन हेन्जा निङका योग्यको हिनाहि। कालाउ केलाइ इङको पिलि गोयाङ दोअ्तेङ कर मापानाहि। भरु ख्रिस्टको सुसमाचार हिङपालि हिदोइ बुङ बाधा मापोरियाको दोअ्तेङ दोङ केलाइ गोताङ काथा सिहितेङ हिनाहि।

¹³ नेलाइहेङ थाहा दोङ हि कि, मुन्दिरता सेवा पाका मुन्दिरसोङ चालि आम्लि निनाङ। कालाउ बेदिता सेवा पाकालाइ बेदिसोङ ताइको भाग निनावा।

¹⁴ एन्सादोङ सुसमाचार प्राचार पाकालाइ सुसमाचार हिङका द्‍याङगेलाइसो दोङ ताइको जिबन चालाइयाको दोअ्का प्रभुको आग्या हि।

¹⁵ कालाउ इदोइ होकगेलाइ मध्येसो का हिदोइ बुङ ह्रुका मान्थुघा, कालाउ का काङको भाअ्सिङ इसिकाङ व्यवास्था जेनाको दोअ्तेङ का इदोइ लेखेका मान्थुघा। एसा पालि खान्तेङ भरु का सिलि दोङ बेस हि, हाइपालिपानु काङको ख्याल का ताइमिङ ताअ्खा दोअ्तेङ हासु बुङ कासेहेङ घमन्ड पालिसो रोकिलि माद्वावा।

¹⁶ जेसापा का सुसमाचार प्राचार पाघा पानु, इङकोता का घमन्ड पाका हाइ दोङ कारन मान्थु। हाइपालिपानु इदोइ काङको कर्तब्य दोङ हि। जेसापा का सुसमाचार प्राचार मापाकानु का बार्का समस्याता परियाङका।

¹⁷ हाइपालिपानु जेसापा का इदोइ काम ताइकोङ इच्छाहोइ पाकानु इदोइसो का हाइ दोङ इनाम निङका आस पाधाङका। कालाउ इदोइ कामहेङ काङको इच्छा माजेङतेङ भरु कर्तब्य सम्झितेङ पादोङखा, कालाउ परमेस्वर दोङ कासेहेङ इदोइ कामको जिम्मा पिकानु का हिदोइ बुङ इनामको आस मापाङका।

¹⁸ एन्सा जेङनु काङको इनाम हाइ वाला? काङको इनाम केवल इदोइ झोको खिनिङ हि कि, एन्साङ सुसमाचार प्राचार पालि निनाको, कालाउ बुङ कासेहेङ सुसमाचार प्राचार पातेङ ताइमि बान्चिलिको भाअ्सिङ नेलाइसो साघाइ निङलि होक हि।

¹⁹ याको मतलब या हि कि, इम्बालाइ कासेहेङ ताका तिरिकानाङ का द्‍याङगेलाइको आग्या केम्लि बाध्ये माजेनाङका, कालाउ का झाराङको बान्धाइति जेङका हिघा, कालाउकि का हेन्जाहेङ येसु ख्रिस्टको खाङधुरिता चुमालि द्वाको।

²⁰ यहुदिगेलाइको माझाता काम पालाउ इम्बालाइ ख्रिस्टता खाङधुरि पाको दोअ्तेङ का यहुदिगेलाइ भाइपाङ जेङघा। जेलाउ का मोसाको व्यवस्था मानिकालाइको माझाता हिघाखा, इम्बालाइ बुङ ख्रिस्टता खाङधुरि पाको दोअ्तेङ का बुङ ओबालाइको व्यवस्थाहेङ मानिघा।

²¹ एसा पासोङ गैर-यहुदिगेलाइको माझाता काम पालाउ इम्बालाइ ख्रिस्टता खाङधुरि पाको दोअ्तेङ का बुङ मोसाको व्यवस्था मान्थुका गैर-यहुदिगेलाइ भाइपा जेङघा। याको मतलब या माको कि, का हेलाउ बुङ परमेस्वरको व्यवस्था मामानिखा, हाइपालिपानु का ते ख्रिस्टको व्यवस्था जेलाउ बुङ मानिखा।

²² खाङधुरिता हुइकालाइको माझाता काम पालाउ इम्बालाइ खाङधुरिता आझाइ बाराकाताङ हानाको दोअ्तेङ का बुङ खाङधुरिता हुइकालाइ भाइका जेङघा। कालाउ का एसापा गोताङ द्‍याङको माझाता झाराङ ख्रिस्टता उद्दार निनाको दोअ्तेङ झाराङको भाअ्सिङ का गोताङ थोक जेङघा।

²³ सुसमाचारको आसिसगेलाइ का बुङ निङलि द्वाको दोअ्तेङ येसु ख्रिस्टको सुसमाचारको भाअ्सिङ का इदोइ गोताङ थोक पाखा।

²⁴ नेलाइहेङ थाहा दोङ हि कि, धाअ्काता झाराङ धाअ्खे, कालाउ लाङ पुरुस्कार निङका चाहि एमि खिनिङ द्‍याङ हिखे। एसा पासोङ केलाइ झाराङ परमेस्वरहेङ लेङचापाका काम पालि गोइखे, कालाउकि केलाइ इनाम निङलि द्वाको जेदोङ परमेस्वर केलाइहेङ भबिस्यता प्याङ।

²⁵ धाअ्काता भाग ह्रुलि गोइका खेलाडिगेलाइ जिउहेङ काबुता पालि आभ्यास पाखे। इम्बालाइते जितिलि कालाउ साम्मान निङलि एन्सा पाखे, इम्बालाइते चुतेङ हानिका ल्हाफाको माला निङखे जेदोङ हेन्जा सोमोइ थेकापा माहिखे। कालाउ केलाइ चाहि साम्मान कालाउ जेलाउ बुङ हिका आसिसको भाअ्सिङ इसिका पानाखे।

²⁶ जेसाङ धाअ्का द्‍याङ लक्स्यता ताअ्तेङ धाअ्खे कालाउ भुकुन्दिहोइ दानाइका द्‍याङ धेरमाहेङ काबुता ताअ्खे, एन्साङ दोङ का बुङ ताइको खान्धुराइ जिबनहेङ येसु ख्रिस्टता काबुता ताअ्का हिघा।

²⁷ का ताइको जिउहेङ काबुता ताअ्खा, कालाउकि का ताइको इच्छाहेङ काबुता ताअ्लि द्वाको, माकुनुते आरुहेङ सुसमाचार प्राचार पालाउ का ताइमिङ चाहि हाइ दोङ इनाम मानिनाङका।