1 कोरिन्थि 7 - Dhimal NT

बिहुको बारेता

¹ नेलाइ कासेहेङ लेखेका काथागेलाइको बिसोइता एला का दोअ्खा, केलाइ बिहु मापाका दोङ रेम्का हि।

² कालाउ कासिबिरिता मापरियाको दोअ्तेङ झाराङ वाजान बिहु पाको कालाउ ताइको बे दोफा खाङधुरि योग्य ह्याको, कालाउ गोताङ बेजान बिहु पाको कालाउ ताइको के दोफा खाङधुरि योग्य ह्याको।

³ के ताइको कर्तब्य पुरा पाको, कालाउ एसापा दोङ बे ताइको कर्तब्य पुरा पाको।

⁴ ताइको जिउ ह्रुता बे को हिदोइ बुङ खाबारा मान्थुखे, कालाउ वाको जिउ ह्रुता वाको के को खाबारा हिखे। कालाउ एसापा दोङ ताइको जिउ ह्रुता के को हिदोइ बुङ खाबारा माहिखे, कालाउ वाको जिउ ह्रुता वाको बे को खाबारा हिखे।

⁵ के बे को जिउको सामान्दासो फारापा माहिसु, फारापा हिलाउ ता-ताइमिता साल्लाहा पातेङ आतुइसा सोमोइको भाअ्सिङ खिनिङ हिसु, कालाउकि नेलाइ आधे सोमोइ प्रार्थाना पालि दोसु। कालाउ आरोङ नेलाइ के-बे ए दोफाङ हिसु। कालाउकि साइतान नेलाइहेङ कासिबिरिको परिक्स्याता फासेपालि माद्वाको, माकुनुते नेलाइ ताइको इच्छागेलाइ काबुता ताअ्लि मादोस्वाना।

⁶ का इदोइ नेलाइहेङ आग्याको रुपता माको, भरु साल्लाहा को रुपता दोअ्दोङखा।

⁷ का ते मन पाखा, कि झाराङ द्‍याङ का भाइपाङ बिहु मापाका ह्याको। कालाउ झाराङहेङ परमेस्वरसो भेनेङ-भेनेङ बरदान मिलिका हि, परमेस्वर आधिमिहेङ बिहुको बरदान पिखे कालाउ आधिमिहेङ चाहि बिहु मापासिङ हिका बरदान पिखे।

⁸ एला का बिहु माजेङकालाइहेङ कालाउ के सिकालाइहेङ साल्लाहा प्याङका, नेलाइ बुङ का भाइपाङ बिहु मापासिङ एक्लाङ हिलि रेम्का जेनाङ।

⁹ कालाउ ओबालाइ ताइमिहेङ काबुता ताअ्लि मादोहे पानु बिहु पाको। हाइपालिपानु मारेम्का जिउको इच्छाता सितपिताइलि खान्तेङ भरु बिहु पालि रेम्का हि।

¹⁰ एला का बिहु पाकालाइहेङ इदोइ आग्या प्याङका, इदोइ आग्या काङकोसो माको, कालाउ येसु प्रभुको हि, कि बे ताइको केसो खाति मापोकाको।

¹¹ कालाउ जेसापा खाति पोहे पानु, वा आरोङ भेनेङ बिहु मापाको, भरु ताइको के दोफा आरोङ मिलिस्वाको। कालाउ के बुङ ताइको बे हेङ खाति मापोकाको।

¹² एला का आरु खान्धुराइगेलाइको काथा पादोङखा, जाइ खाङधुरि मापाकालाइ दोफा बिहु पाका हि। या काङको भनाइ हि, कालाउ प्रभुको आग्या माको, जेसापा हिदोइ बुङ खान्धुराइ ओनेको बे खाङधुरि मापाका हि, कालाउ वा दोफाङ हिलि खाङखे पानु, वा ताइको बे हेङ खाति मापोकाको।

¹³ कालाउ जेसापा हिदोइ बुङ बेबालको के प्रभुता खाङधुरि मापाका हि, कालाउ वा ताइको बे दोफाङ हिलि खाङखे पानु, वा ताइको के हेङ खाति मापोकाको।

¹⁴ खाङधुरि मापाका के हेङ परमेस्वर ताइकोङ पबित्तरो द्‍याङ भाइपा थानिखे, हाइपालिपानु वाको बे खान्धुराइ हि। कालाउ एन्साङ दोङ खाङधुरि मापाका बे हेङ परमेस्वर ताइकोङ द्‍याङ भाइपा थानिखे, हाइपालिपानु वाको के खान्धुराइ हि। जेसापा एन्सा माजेङनु इम्बालाइको चान-चामिन्दिगेलाइ परमेस्वरको माजेङधाङ। कालाउ एला इम्बालाइको चान-चामिन्दिगेलाइ बुङ परमेस्वरको जेङका हि।

¹⁵ कालाउ खाङधुरि मापाका ताइको खाङधुरि पाका के माकुनु बे हेङ खाति पोलि खाङखे पानु प्याको। एन्सा जेङलाउ खाङधुरि पाका के माकुनु बे इम्बालाइको बिहुको सामान्दासो स्वतन्तरो जेङखे, हाइपालिपानु परमेस्वर केलाइहेङ मिलि पालि काइका हि।

¹⁶ बे गेलाइहेङ थाहा ह्याको कि, नेलाइको कारनहोइ नेलाइको के बद्लिलि द्वावा। कालाउ एन्साङ दोङ के गेलाइहेङ थाहा ह्याको कि, नेलाइको कारनहोइ नेलाइको बे बद्लिलि द्वावा।

¹⁷ का दोअ्तेङ हिका काथागेलाइको निचोड इदोइ दोङ हि कि, परमेस्वर झाराङहेङ जिसकाङ आवस्थाता काइका हिघाहि, इम्बालाइ उसकाङ आवस्थाता जिबन जियाइयाको। का गोताङ मन्डलिगेलाइता धिरपाका सिक्स्या इदोइ दोङ हि।

¹⁸ उधारनको भाअ्सिङ जेलाउ हिदोइ बुङ यहुदि प्रभुता खाङधुरि पाखे, का यहुदि माको दोअ्लि मागोयाङ। एन्साङ पातेङ हिदोइ बुङ गैर-यहुदि प्रभुता खाङधुरि पाखे पानु, वा यहुदि जेङलि खाताना पालि मागोयाङ।

¹⁹ द्‍याङ खाताना पाका हि कि मान्थु इङको हिदोइ बुङ बार्का काथा माको, कालाउ मुख्य काथाते परमेस्वरको आग्या केम्लि दोङ हि।

²⁰ झाराङ द्‍याङ इन्सिकाङ आवस्थाता ह्याको, जेदोङ आवस्थाता वासेहेङ परमेस्वर काइहि।

²¹ परमेस्वर नासेहेङ काइलाउ नाअ् बान्धाइति हिघाखेना पानु निरास मामाने, कालाउ जेसापा नासेहेङ स्वतन्तरो हिका मौका मिलि हेपानु इङको फाइदा ल्होपा।

²² हाइपालिपानु प्रभु काइलाउ जेदोङ द्‍याङ बान्धाइति हिघाहि, एला वासेहेङ प्रभु पापको सरबुङसो स्वतन्तरो बानाइका हि। एन्साङ पातेङ प्रभु काइलाउ जेदोङ द्‍याङ स्वतन्तरो हिघाहि, उङको एला ख्रिस्टको बान्धाइति जेङका हि।

²³ परमेस्वर नेलाइहेङ दाम तिरितेङ चोल्का हि, ओदोङ भाअ्सिङ द्‍याङको बान्धाइति माजेङसु, कालाउ परमेस्वरको बान्धाइति जेङसु।

²⁴ खान्धुराइ ओनेगेलाइ, जिसिकाङ आबास्थाता परमेस्वर नेलाइहेङ काइका हिघाहि, इन्सिकाङ आबास्थाता परमेस्वर दोफा हिलि गोइखे।

²⁵ एला का धानिगेलाइको बिसोइता कासेहेङ प्रभुसो हिदोइ बुङ आग्या मिलिका मान्थु। कालाउ प्रभु कासेहेङ ताइको क्रिपासो पिका बुद्दि निङकानाङ का भोरोसा योग्य जेङतेङ नेलाइहेङ साल्लाहा प्याङका।

²⁶ हाइपालिपानु इदोइ दिनागेलाइ खान्धुराइगेलाइ गोताङ थामेता दुख जेङतेङ हि, ओदोङ भाअ्सिङ काङको बिचारता नेलाइ बिहु मापाकालाइ बिहु मापासिङ हिलि रेम्का जेनाङ वाला।

²⁷ जेसापा नेलाइको बे हि पानु, वासेहेङ खाति पोका बिचार मापा। कालाउ जेसापा नेलाइको बिहु दोङ जेङका मान्थु हिहे पानु, बिहु पालि बिचार मापासु।

²⁸ कालाउ नेलाइ बिहु पासुना पानु इङको पाप माको, कालाउ धानि बेजान बिहु पानु बुङ इङको पाप माको। कालाउ बुङ बिहु पाकालाइ चाहि इदोइ सुमिङता हिलाउ जिबनता दुख निनावा, कालाउ का नेलाइहेङ यासो जोगाइलि भोखा।

²⁹ खान्धुराइ ओनेगेलाइ, काङको दोअ्लि खाङका काथा या दोङ हि, कि इदोइ सुमिङता केलाइ दोफा हेन्जा सोमोइ मान्थु, ओदोङ भाअ्सिङ बे हि या मान्थु दोअ्तेङ चिन्ता मापासु, भरु प्रभुको सेवा हेसा पालि दोअ्खे दोअ्तेङ इङको बिसोइता सोचिसु।

³⁰ सोक पाकालाइ माकुनु खुसि हिकालाइ माकुनु ताइको भाअ्सिङ आनेमाने चोल्कालाइ इम्बालाइ इदोइ काथाको चिन्ता मापाको। हाइपालिपानु इम्बालाइ नेलाइहेङ प्रभुको सेवा पालि निल्पावा।

³¹ कालाउ केलाइ दोफा या सुमिङता जेदोङ बुङ हि, इङकोहेङ हेन्जा चासो माप्याइने, हाइपालिपानु इदोइ सुमिङको गोताङ काथा हेन्जा बेर थेकापा माह्याङ।

³² नेलाइ इदोइ सुमिङको लान्सासो मुक्त जेङका का भोखा। बिहु माजेङका वाजान प्रभुहेङ हेसा लेङचापालि दोअ्तेङ प्रभुकोङ बिसोइता सोचिखे।

³³ कालाउ बिहु जेङका वाजान बे हेङ हेसा खुसि ताअ्लि दोअ्तेङ सुमिङको काथाता ध्यान पिखे।

³⁴ इसिका द्‍याङ न्हेनोङ काथाको बिसोइता सोचिखे, कि हेसा परमेस्वरको सेवा पालि कालाउ हेसा बे हेङ खुसि बानाइलि। बिहु माजेङका बेजान जिउ कालाउ आत्माता हेसा प्रभुहेङ सुम्पियाङ कालाउ हेसा प्रभुको सेवा पालि दोअ्का बिसोइता सोचिखे। कालाउ बिहु जेङका बेजान हेसा ताइको के हेङ खुसि ताअ्लि दोअ्तेङ सुमिङको काथाता ध्यान पिखे।

³⁵ इदोइ काथा नेलाइ ह्रुता प्रतिबन्ध लागाइलिको भाअ्सिङ माको, भरु नेलाइको भालाइको भाअ्सिङ दोअ्तेङ हिघा, इदोइ उदेस्यहोइ कि, नेलाइ ए-मनको जेङतेङ प्रभुको सेवा पालि दोसु।

³⁶ जेसापा हिदोइ बुङ द्‍याङ ताइमि दोफा बिहु पालि ह्रेलि दोका बेजान दोफा मारेम्का ब्यभाहार पाका थानिखे। कालाउ उङको बेजानको उमेर बेराङ जेङकाताङ हानिका हिहे पानु, वा बिहु पालि भोनु वा बिहु पालि द्वाङ। इङकोता हिदोइ बुङ पाप मान्थु, इम्बालाइको बिहु जेङलि गोयाङ।

³⁷ कालाउ उङको द्‍याङ ताइको मन पाक्का पाका हि पानु, जाइ हासुको बुङ करकापता परिका मान्थु, कालाउ ताइको इच्छाहेङ काबुता ताअ्लि द्वाङ, कालाउ वा बिहु पालि ह्रेका बेजान बिहु मापालि निर्नय पालि दोका हिहे पानु, इन्सिका द्‍याङ बुङ ठिक पाखे।

³⁸ एसापा जाइ धानिहेङ बिहु पाखे, वा ठिक पाखे, कालाउ जाइ बिहु मापाखे, वा झन आसल पाखे।

³⁹ के बान्चिपा थेकापा के दोफाङ बे हिलि गोइखे। कालाउ के सिहि पानु न्हुसो वा इच्छा पाका द्‍याङ दोफा वा बिहु पालि द्वाङ। कालाउ वा चाहि प्रभुता खाङधुरि पाका द्‍याङ हिलि गोइखे।

⁴⁰ कालाउ वा आरोङ बिहु मापासिङ हिहे पानु झन खुसि जेनावा। इदोइ काङको बिचार हि, कालाउ का सोचिखा कि परमेस्वरको आत्माहोइ कासेहेङ थोङखे।