1 कोरिन्थि 3 - Dhimal NT

मन्डलि खेङन्हाका

¹ खान्धुराइ ओनेगेलाइ, का नेलाइ दोफा पबित्तरो आत्मा हिकालाइ भाइपा नुइ धुइलि मादोघा, भरु सुमिङको द्‍याङगेलाइ दोफा भाइपाङ धुइघा, कालाउ येसु ख्रिस्टको खाङधुरिता म्हुइका जामाललाइ भाइपा नेलाइ दोफा नुइ धुइलि गोइहि।

² लाम्फा का नेलाइहेङ परमेस्वरको बचन साधारन तरिकाहोइ धिरपाका हिघाखा, जेसाङ हासु बुङ म्हुइका जामालहेङ दुधे आम्पाखे। कालाउ का परमेस्वरको बचन लिता सोङ धिरपाका मान्थुघाखा, जेदोङ चाहि जाराउका उम भाइका हि, हाइपालिपानु नेलाइ इङको को भाअ्सिङ तियार जेङका मान्थु घासुखेना, कालाउ एला बुङ तियार मान्थु सुन्हा।

³ हाइपालिपानु नेलाइ एलाङ बुङ सुमिङको द्‍याङगेलाइ भाइपा जिबन जियाइसुखेना। कालाउ नेलाइको माझाता डाहा कालाउ चेरसुका हिदोङ हि, इङकोहोइ तिङपाखे कि नेलाइ आझाइ बुङ सुमिङको द्‍याङगेलाइ भाइपा जियाइका हिसुन्हा। हाइ एन्सानु नेलाइ परमेस्वरहेङ खाङधुरि मापाका द्‍याङगेलाइ भाइपा बान्चितेङ हिसुन्हा?

⁴ हाइपालिपानु हासु बुङ का “पावलको सिक्स्याहेङ पिताइखा” कालाउ भेनेङ दोअ्खे, “का आपुल्लोसको सिक्स्याहेङ पिताइखा” दोअ्न्हाखे पानु, हाइ नेलाइ सुमिङको द्‍याङगेलाइ भाइपा माभाइसुन्हा रो?

⁵ आपुल्लोस हासु रो? कालाउ का पावल हासु रो? किधिन्हेमिते परमेस्वरको सेवक खिनिङ हिनाहि, जाइ नेलाइहेङ येसु ख्रिस्टको खाङधुरिता चुमाहि। केलाइ झाराङ ते परमेस्वर केलाइहेङ खाटाइका काम खिनिङ पान्हाखे।

⁶ का दोङ नेलाइहेङ लाम्फा सुसमाचार प्राचार पाघा, कालाउ न्हुसो आपुल्लोस ओदोङ काम जारि तातेङ नेलाइहेङ खाङधुरिता बल्लियाका जेङलि साघाइहि, कालाउ परमेस्वर दोङ नेलाइहेङ आत्माता बारालि साघाइहि।

⁷ ओदोङ भाअ्सिङ सुसमाचार प्राचार पाका द्‍याङ कालाउ खाङधुरिता बल्लियाका बानाइलि साघाइका बार्का माको, भरु परमेस्वर खिनिङ बार्का हि, जाइ नेलाइहेङ आत्माता बारालि साघाइखे।

⁸ का नेलाइहेङ सुसमाचार प्राचार पाघा कालाउ आपोल्लोस ओदोङ काम जारि ताअ्हि, ओदोङ भाअ्सिङ केलाइ ए-सामान हिन्हाहि। परमेस्वर झाराङहेङ ता-ताइको मेहेनत आन्सार इनाम प्यावा।

⁹ हाइपालिपानु केलाइ झाराङ काम पाका परमेस्वरको खेतालागेलाइ हिन्हाहि, कालाउ नाअ् कोरिन्थ सहरको खान्धुराइगेलाइ चाहि परमेस्वरको मिलिङ भाइका हिसुन्हा, कालाउ का नेलाइको तुलाना इङको साअ् दोफा पालि द्वाङका जेदोङ साअ् परमेस्वर धाम्लि तोम्का हि।

¹⁰ परमेस्वर पिका बरदान आन्सार साअ् धाम्का सिपालु मिस्तिरि भाइपाङ का साअ्को जग योम्पाघा, कालाउ बोगेलाइ चाहि इङको ह्रुता साअ् धाम्काताङ हानिखे। इङको ह्रुता साअ् धाम्का गोताङ द्‍याङ हेसा धाम्लि गोइका हि दोअ्तेङ रेम्फा बिचार पाको।

¹¹ जेदोङ जग योम्पालि दोका हि उङको येसु ख्रिस्ट हि, इङको बाहेक हिदोइ बुङ द्‍याङ भेनेङ जग योम्पालि मादोखे।

¹² जेसापा हासु बुङ परमेस्वर पिका ठिक सिक्स्या धिरपाखे पानु, इम्बालाइ जाङका आमेनेगेलाइ सोना, चान्दि, जाङका उन्ठुइगेलाइहोइ साअ् धाम्का भाइका दोङ हि। कालाउ जेसापा इम्बालाइ धाताइका सिक्स्या धिरपाखे पानु, इम्बालाइ सोस्ट आमेनेगेलाइ फाला, घासि, नारा मिलिपातेङ साअ् धाम्का भाइका दोङ हि।

¹³ गोताङ द्‍याङको रेम्का मारेम्का काम परमेस्वर न्याय पाका दिनाता जाचिन्हाङ, हाइपालिपानु इङको दिना इम्बालाइको पाका काम हिसिका हि, मेता ह्वातेङ जाचियाङ।

¹⁴ जेसापा जग योम्पाका द्‍याङको काम मेता माओहे पानु वा इनाम निनावा।

¹⁵ जेसापा हिदोइ बुङ द्‍याङको काम परमेस्वर रेम्का मान्थु दोअ्नु, वा हाइ दोङ बुङ इनाम मानिनाङ, कालाउ वा ताइको आनान्त जिबन मागुमाइपाङ जेदोङ परमेस्वर वासेहेङ पिका हि।

¹⁶ नेलाइहेङ थाहा दोङ हि, नेलाइ परमेस्वरको मुन्दिर हिसुना, कालाउ पबित्तरो आत्मा नेलाइता बासा हिखे।

¹⁷ जेसापा हासु बुङ परमेस्वरको द्‍याङगेलाइको एक्ताहेङ नासा पाखे, वासेहेङ परमेस्वर साजाइ प्याङ। हाइपालिपानु परमेस्वरको मुन्दिर पबित्तरो हिखे, कालाउ इङको मुन्दिर चाहि नेलाइ दोङ हिसुन्हा।

¹⁸ हासु बुङ ताइमिहेङ धोका माप्याको, नेलाइ मध्येसो हासुलाउ बुङ इदोइ सुमिङता ताइमिहेङ बुद्दिमानि सम्झिखे पानु, उङको हाइ दोङ मागिका जेनाको, कालाउकि वा परमेस्वरको आगाता जातिङकोङ बुद्दिमानि जेङलि द्वाको।

¹⁹ हाइपालिपानु सुमिङको बुद्दि परमेस्वरको आगाता आनाइ दोङ हि, हाइपालिपानु धर्मसास्तरता लेखेका हि, “परमेस्वर बुद्दिमानि द्‍याङगेलाइहेङ ओबालाइकोङ ताइको चालाखता फसेपावा।”

²⁰ भेनेङ थामेता धर्मसास्तरता इसिका बुङ लेखेका हि, “बुद्दिमानि द्‍याङको बिचार बेकामको जेङखे दोअ्का प्रभु गिखे।”

²¹ ओदोङ भाअ्सिङ हासु बुङ खास आगुवा द्‍याङहेङ पिताइयाङका दोअ्तेङ घमन्ड मापाको। हाइ पानु परमेस्वर गोताङ आनेमाने नेलाइको भालाइको भाअ्सिङ पिका हि।

²² चाहे पावल, आपुल्लोस, पतरुस, इदोइ सुमिङको आमेनेगेलाइ, जिबन माकुनु सिका, बर्तमान, भबिस्यता, या गोताङ काथा परमेस्वर नेलाइको भालाइको भाअ्सिङ दोङ पिका हि।

²³ कालाउ नेलाइ येसु ख्रिस्टको आधिनता हिसुन्हा, कालाउ येसु ख्रिस्ट चाहि परमेस्वरको आधिनता हि।