1 कोरिन्थि 16 - Dhimal NT

परमेस्वरको जनगेलाइको भाअ्सिङ भेति

¹ एला यरुसेलेमता हिका पबित्तरो जनगेलाइको भाअ्सिङ भेति ल्होपाका नेलाइको हिअ्का प्रस्नको बिसोइता का गलातिया इलाकाको मन्डलिगेलाइहेङ दोअ्का भाइपा पासु।

² गोताङ आइताबार नेलाइ झाराङ ता-ताइको कामाइ आन्सारको आधे ताका खेङतेङ जोम्पाकाताङ ताअ्सु, कालाउकि का लोलाउ भेति ल्होपालि मागोइयाको।

³ कालाउ का लोलि दोतेङ नेलाइ थानिका खाङधुरि योग्य द्‍याङगेलाइहेङ दोङ नेलाइको भेति चुम्तेङ यरुसेलेम सहरता दिङगिल्लाङका कालाउ इन्ताको खान्धुराइगेलाइहेङ नाल्चापालि का इम्बालाइहेङ पात्तारा बुङ पिगिल्लाङका।

⁴ कालाउ जेसापा नेलाइहेङ लागिखे कि का बुङ हानिलि गोयाङ, इम्बालाइ दोफा का बुङ हानाङका।

पावलको निबेदन

⁵ का म्यासिडोनिया प्रदेस हानिलि दोतेङ का नेलाइहेङ भेतिलि ल्वाङका, हाइपालिपानु का म्यासिडोनिया प्रदेस पाहासो हानिदोङखा।

⁶ जेङलि दोनु का नेलाइकोता कोम्हा दिना थेकापा ह्याङका, जेङलि दोनु चुङ दिना भरि हिलि द्वाङका। कालाउ न्हुसो का हिसो हानिलाउ बुङ नेलाइ कासेहेङ साघाइलि दोस्वाना।

⁷ जेसापा परमेस्वरको इच्छा जेङनु, का आतुइसा दिनाको भाअ्सिङ खिनिङ माको, भरु बेलोम्पा थेकापा हिलि नेलाइकोता लोलि आस पाखा।

⁸ कालाउ पेन्तिकोसको पार्बा थेकापा का एफिसस सहरता दोङ ह्याङका।

⁹ हाइपालिपानु बिरोध पाकालाइ द्‍याङ हिलाउ बुङ इता प्रभुको काम पालि कासेहेङ बार्का माउका मिलिका हि।

¹⁰ जेसापा तिमोथि नेलाइकोता कोरिन्थ सहरता लोलाउ, वासेहेङ रेम्फासो ब्यभार पासु। हाइपालिपानु वा बुङ का भाइपाङ प्रभुको काम पातेङ हि।

¹¹ ओदोङ भाअ्सिङ हासु बुङ वासेहेङ हेला मापाको भरु वा काङकोता लोलाउ वासेहेङ रेम्फा साघाइसु। कालाउकि वासेहेङ पाक पालाउ हिदोइ बुङ खाल्को समस्या माजेनाको, हाइपालिपानु खान्धुराइ ओनेगेलाइ दोफा लावा दोअ्तेङ का वासेहेङ ह्रुम्तेङ हिघा।

¹² एला खान्धुराइ ओने आपुल्लोसको बिसोइता कासेहेङ इदोइ दोअ्लि हि, कि का वासेहेङ आरु खान्धुराइ ओनेगेलाइ दोफा मिलितेङ नेलाइ दोफा भेतिलि निकोङ निबेदन पाका हिघाखा, कालाउ वा एला चाहि लोलि हिदोइ बुङ इच्छा मान्थु, कालाउ मौका निङनासाङ वा ल्वाङ।

आम्तिम आदेस

¹³ चङख हिसु, खाङधुरिता द्रिद हिसु। साहासि जेङसु, कालाउ बल्लियाका जेङसु।

¹⁴ गोताङ काम प्रेमसो पासु।

¹⁵ खान्धुराइ ओनेगेलाइ, नेलाइहेङ थाहा दोङ हि, कि स्तिफन कालाउ वाको जाहानगेलाइ आखैया प्रदेसता खाङधुरि पाकालाइ मध्ये लाङति हि। इम्बालाइ पबित्तरो जनगेलाइको सेवाता ताइमिहेङ आर्पन पाका हि।

¹⁶ का नेलाइहेङ बिन्ति पाखा कि, इसिका परिस्रोम पाकालाइको कालाउ ह्रदयसोङ सेवा पाकालाइको आदार पासु।

¹⁷ स्तिफन, फरतुनाट्स कालाउ आखैयाकसको लोकाता का हेन्जा खुसि जेङघा, हाइपालिपानु नेलाइ माहिलाउ ओबालाइ कासेहेङ साघाइका हि।

¹⁸ हाइपालिपानु इम्बालाइ नेलाइहेङ भाइपाङ कासेहेङ हाउसाइ पिहि। ओदोङ भाअ्सिङ नेलाइ इस्का द्‍याङगेलाइको इज्‍जत पालि गोइखे।

¹⁹ एसिया प्रदेसको मन्डलिको खान्धुराइगेलाइ नेलाइहेङ सेउपाखा पिगिल्का हि। आकिलास कालाउ वाको बे प्रिस्किला कालाउ इम्बालाइको साअ्ता जोम्का मन्डलि नेलाइहेङ प्रभुता हार्दिक सेउपाखा पिगिल्का हि।

²⁰ गोताङ खान्धुराइ ओनेगेलाइ नेलाइहेङ सेउपाखा पिगिल्का हि। कालाउ एमिसो भेनेङहेङ सत्ये प्रेमहोइ सेउपासु।

²¹ का पावल, ताइकोङ खुरहोइ इदोइ सेउपाखा लेखेदोङखा।

²² हासु बुङ प्रभुहेङ प्रेम मापाखे पानु, उङको स्रापित ज्याको। हे केलाइको प्रभु, लौउ!

²³ केलाइको प्रभु येसु ख्रिस्टको आनुग्रह नेलाइ दोफा हितेङ ह्याको।

²⁴ येसु ख्रिस्टता हिका नेलाइ झाराङहेङ काङको प्रेम हि। आमेन।