1 कोरिन्थि 15 - Dhimal NT

येसु सिकासो सिन्चालका

¹ खान्धुराइ ओनेगेलाइ, का नेलाइहेङ प्राचार पाका सुसमाचार का नेलाइहेङ फोम पापालि भोखा, जेदोङ सुसमाचारता नेलाइ खाङधुरि पासुन्हा, कालाउ जाइ नेलाइ एला थेकापा बुङ खाङधुरि पातेङ हिसुन्हा।

² जेसापा का प्राचार पाका सुसमाचारता नेलाइ खाङधुरि पातेङ हिसुना पानु, परमेस्वर इङको सुसमाचार पाहासो नेलाइहेङ बान्चि पावा, माकुनुते नेलाइ खाङधुरि पाका ब्यर्थ जेनावा।

³ हाइपालिपानु जेदोङ महत्वय पुर्न सन्‍देस का परमेस्वरसो निङघा, इङको मुख्य सन्‍देस का नेलाइहेङ दोअ्घा। इङको सन्‍देस चाहि धर्मसास्तर दोनाङ भाइपा ख्रिस्ट केलाइको पापको भाअ्सिङ सिपिहि।

⁴ वासेहेङ लिहि, कालाउ धर्मसास्तर दोनाङ भाइपा सुम्निको दिनाता वा आरोङ सिकासो सिन्चाल्हि।

⁵ वा पतरुस (केफास) कालाउ तेन्हे चात्यागेलाइकोता देखाल जेङहि।

⁶ कालाउ न्हुसो वा एनोङ दोङ सोमोइता नासाइ खान्तेङ हेन्जा खान्धुराइ ओनेगेलाइकोता एखेताङ देखाल जेङहि, इङको मध्ये हेन्जा जसो एला थेकापा हिदोङ हि कालाउ आधिमि चाहि सिलि दोका हि।

⁷ कालाउ न्हुसो याकुब कालाउ झाराङ साल्न्हाका चात्यागेलाइकोता वा देखाल जेङहि।

⁸ आम्तिमता वा काङकोता बुङ देखाल जेङपिहि, जाइ कि ठिक सोमोइता जोलोम माजेङका जामाल भाइका मान्थु।

⁹ हाइपालिपानु साल्न्हाका चात्यागेलाइ मध्ये का झाराङ खान्तेङ तुच्स हिघा, का साल्न्हाका चात्या दोअ्लि योग्य मान्थुघा। हाइपालिपानु का परमेस्वरको मन्डलिको खान्धुराइगेलाइहेङ सान्ताइघा।

¹⁰ कालाउ का परमेस्वरको आनुग्रहहोइ छाल्न्हाका चात्या हिघा, कालाउ वाको आनुग्रह काङको जिबनता प्रभाबकारि हिघाहि। भरु का ते छाल्का चात्यागेलाइ खान्तेङ इस्तु परिस्रोम पाघा। कालाउ बुङ का माको, कालाउ परमेस्वरको आनुग्रहहोइ कासेहेङ साघाइहि।

¹¹ ओदोङ भाअ्सिङ का दोङ ह्याको चाहे छाल्का चात्यागेलाइ ज्याको, नेलाइ केलाइ ख्रिस्टको बारेता एनोङ सन्‍देस प्राचार पानाहि, जेदोङ नेलाइ बुङ खाङधुरि पाका हिसुन्हा।

सिकालाइको सिन्चालका

¹² एला का नेलाइहेङ इदोइ काथा दोअ्लि भोखा, केलाइ झाराङ नेलाइहेङ ख्रिस्ट सिहि कालाउ आरोङ सिन्चाल्हि दोअ्तेङ प्राचार पानाहि, ओदोङ भाअ्सिङ नेलाइ मध्ये हासु बुङ इसिका दोअ्लि माएल कि परमेस्वर खान्धुराइगेलाइ सितेङ न्हुसो इम्बालाइहेङ आरोङ मासिन्चालपाङ।

¹³ जेसापा सिकालाइ मासिन्चाल्हि पानुते येसु ख्रिस्ट बुङ सिकासो सिन्चालका माको।

¹⁴ कालाउ जेसापा ख्रिस्ट सिकासो आरोङ सिन्चाल्का माकुनुते केलाइ पाका प्राचार कालाउ नेलाइको खाङधुरि बुङ ब्यर्थ जेनावा।

¹⁵ जेसापा सिकालाइ मासिन्चाल नुते, केलाइ परमेस्वरको बारेता धाताइका काथागेलाइ दोअ्न्हाहि, हाइपालिपानु परमेस्वर ख्रिस्टहेङ सिकासो सिन्चाल पाहि दोअ्तेङ केलाइ दोङ साक्सि पिका हिन्हाहि। कालाउ सिकालाइ मासिन्चाल नुते परमेस्वर ख्रिस्टहेङ सिकालाइसो मासिन्चाल पाधाङ।

¹⁶ का आरोङ दोअ्ताङका, जेसापा सिकालाइ मासिन्चाल्हि पानुते येसु ख्रिस्ट बुङ सिकासो सिन्चाल्का माको।

¹⁷ येसु ख्रिस्ट सिकासो आरोङ मासिन्चाल्का नुते नेलाइको खाङधुरि ब्यर्थ जेनावा, कालाउ नेलाइ एला थेकापा बुङ ताइको पापता बान्चितेङ हिसुना।

¹⁸ जेसापा येसु ख्रिस्ट सिकासो बुङ आरोङ मासिन्चाल्का नुते, ख्रिस्टता खाङधुरि पाकालाइ बुङ सिकासो आरोङ मासिन्हुताङ, कालाउ परमेस्वरसो जेलालाउको भाअ्सिङ खेङन्हावा।

¹⁹ जेसापा केलाइ इदोइ जिबनको भाअ्सिङ खिनिङ ख्रिस्टता आस ताअ्न्हाखे कालाउ न्हुसोको जिबनको आस मान्थुनु, द्‍याङगेलाइ इदोइ सुमिङको गोताङ द्‍याङ खान्तेङ केलाइ इस्तु दायाताको।

²⁰ कालाउ सत्ये चाहि या हि कि, परमेस्वर दोङ लाम्फा ख्रिस्टहेङ सिकालाइसो आरोङ सिन्चाल्पाका हि। कालाउ पाक्का बुङ वा सिका द्‍याङगेलाइहेङ सिकासो सिन्चाल्पाङ।

²¹ हाइपालिपानु जेसाङ आदम मिङ पाका द्‍याङसो सुमिङता सिका लोहि, एन्साङ दोङ सिकालाइको जिबन बुङ भेनेङ द्‍याङ, ख्रिस्ट पाहासो दोङ लोहि।

²² कालाउ जेसाङ एमि द्‍याङ आदमको पापको कारन झाराङ द्‍याङ सिलि गोइखे। एन्साङ पातेङ दोङ भेनेङ द्‍याङ येसु ख्रिस्ट पाहासो झाराङ सिकालाइ आरोङ नावा जिबन सिन्चाङ।

²³ कालाउ झाराङ ता-ताइको पाला आन्सार सिन्चाल्याङ: येसु ख्रिस्ट चाहि सिकासो झाराङ खान्तेङ लाङ सिन्चाल्हि, कालाउ न्हुसो आरोङ ख्रिस्ट लोलाउ वाकोता खाङधुरि पाकालाइ सिकासो आरोङ सिन्चाल्याङ।

²⁴ जेलाउ ख्रिस्ट गोताङ खाबारागेलाइ कालाउ सरबुङगेलाइ नासा पावा, कालाउ न्हुसो सुमिङको आन्ता जेनावा, कालाउ वा आबा परमेस्वरहेङ खाबारा सुम्पियाङ।

²⁵ हाइपालिपानु परमेस्वर ताइको गोताङ सतुरुगेलाइहेङ पुरा रुपसो माहारिपा धाउ ख्रिस्ट इङको सासनता सासन पालि गोइका हि।

²⁶ झाराङ खान्तेङ न्हुसो हारिपालि गोइका सतरु चाहि सिलि दोङ हि।

²⁷ जेसाङ धर्मसास्तर दोअ्खे कि, परमेस्वर गोताङ काथा ख्रिस्टको आधिनता ताअ्खे, इदोइता परमेस्वर ताइमिङ माझ्वाइखे, हाइपालिपानु परमेस्वर दोङ गोताङ काथागेलाइ ख्रिस्टको आधिनता ताअ्का हि।

²⁸ जेलाउ गोताङ काथा परमेस्वरको चान ख्रिस्टको आधिनता हिखे, चान ताइमिहेङ परमेस्वरको आधिनता ताअ्खे, कालाउकि परमेस्वर जाइ गोताङ काथा वाको आधिनता ताअ्हि वा दोङ गोताङ काथा ह्रुता सासन पाको।

²⁹ जेसापा एला सिकालाइ आरोङ मासिन्चाल पानु सिका द्‍याङको भाअ्सिङ बप्तिस्ता ह्रुका हाइ आर्था जेङहि? जेसापा परमेस्वर इङको सिकालाइहेङ आरोङ मासिन्चाल पाहे पानु, इम्बालाइ हाइ पालि आझाइ बुङ इङको मुन्धुम मानिखे?

³⁰ केलाइको भाअ्सिङ जेसापा सिकालाइ आरोङ मासिन्चाल पाहे पानु, ताइमिहेङ खाताराता पारिलि आनाइ जेङलि भाइका हि।

³¹ खान्धुराइ ओनेगेलाइ, कासेहेङ दिनाङ सेअ्ताङबे दोअ्तेङ खाताराता हिघाखा। इदोइ सत्ये हि, जेसाङ का केलाइको प्रभु येसु ख्रिस्टता नेलाइको कारन गर्ब पाखा।

³² इता एफिसस सहरता काङको सतुरुगेलाइ झारभारिको गपुसगेलाइ भाइका हि जाइ कासेहेङ हान्ति पालि भोखे। का आझाइ हाइ पालि इसिका सहिलि जेसापा काङको इनाम इदोइ सुमिङता खिनिङ हि। जेसापा या सत्ये हि कि का आरोङ आम्तिम दिनाता सिन्चालाङका, या काथा रेम्कानुते का आनान्द पालि गोयाङ जेसाङ भनाइ हि, “केलाइ चानाहि कालाउ आम्न्हाहि, हाइपालिपानु जुम्निते केलाइ सियाङ।”

³³ इन्सिका काथा पाकालाइसो धोका माचासु, “मारेम्का सङगतहोइ आसल द्‍याङ बुङ बिग्रिखे।”

³⁴ जेदोङ काथा रेम्का हि इङकोता ध्यान पिसु कालाउ एला उसो पाप मापासु, हाइपालिपानु नेलाइ मध्ये हेथेहेङ ते परमेस्वरहेङ रेम्फासो मानाल्खे। नेलाइहेङ लेदेरपालिको भाअ्सिङ का या दोअ्का हिघा।

सिकासो आरोङ सिन्चाल्का जिउ

³⁵ उधारनको भाअ्सिङ हासु बुङ हिअ्नु, “परमेस्वर हेसा सिकालाइहेङ आरोङ सिन्चाल पावा कालाउ इम्बालाइको जिउ हिसिका हि वाला?”

³⁶ आनाइ माजेङसु, काङको उत्तारा चाहि इदोइ हि कि, चालाइहेङ खाङ लाम्फा चालाइ बिलि गोइखे, कालाउ न्हुसो योखे कालाउ जेलाउ इङको योखे इङको चालाइ मान्थुखे।

³⁷ नेलाइ जेदोङ थिङसुखेना, चाहे इङको गहम, चाहे उम ह्याको इङको चालाइ खिनिङ हि। इङको चालाइ सारसिङ माभाइखे।

³⁸ परमेस्वर ताइको इच्छा आन्सार इङको चालाइहेङ रुप पिखे। कालाउ गोताङ खाल्को चालाइहेङ वाकोङ रुप पिखे।

³⁹ कालाउ इदोइ सुमिङता भेनेङ-भेनेङ खाल्को प्रानि भाइका द्‍याङको जिउ गपुसगेलाइको जिउ भाइका मान्थु। कालाउ जिहाँ-जुइलेङगेलाइको जिउ हायाको जिउ भाइका माहिखे।

⁴⁰ जेसाङ प्रिथिबिता हिका प्रानिगेलाइ भेनेङ जिउ हिखे, एन्साङ दोङ आकासता बुङ हिखे। आकासता हिका काथागेलाइ जिसिकाङ सान्हे, तालि कालाउ फुरुगेलाइको ए खाल्को कोइनाका हि, कालाउ प्रिथिबिता हिका प्रानिगेलाइको ताइकोङ भेनेङ खाल्को कोइनाका हि।

⁴¹ सानेको कोइनाका एनोङ खाल्को, कालाउ तालिको कोइनाका भेनेङ खाल्को, कालाउ फुरुगेलाइको कोइनाका भेनेङ खाल्को हिखे। हाइपालिपानु एनोङ फुरु भेनेङ फुरु खान्तेङ कोइनाका भेनेङ जेङखे।

⁴² कालाउ एन्साङ पातेङ सिकालाइ दोफा बुङ जेनाङ जेलाउ इम्बालाइ आरोङ सिन्चाललाङ। जेदोङ जिउ इम्बालाइ लिखे इङको इसिका जिउ हि जेदोङ आइखे, कालाउ आरोङ जेलाउ इङको सिन्चाललावा इङको जिउ इसिका जेनावा जेदोङ हेलाउ बुङ माआइयावा।

⁴³ जेलाउ केलाइ सियाङ केलाइको जिउगेलाइ लिलाउ मारेम्का कालाउ हुइका जेङखे, कालाउ जेलाउ केलाइ आरोङ सिन्चालन्हाखे केलाइ रेम्का कालाउ सरबुङसाइका जेनाङ।

⁴⁴ जेसाङ केलाइको सिका जिउ लिनाखे, कालाउ इङको जिउ हिति कालाउ बिहाको जेङखे। एन्साङ पातेङ आरोङ सिन्चाल्लाउ जिउगेलाइ जेङखे जेदोङ चाहि परमेस्वरको आत्माहोइ पिखे। कालाउ केलाइको हिति कालाउ बिहाको जिउ परमेस्वरको आत्माहोइ पिका जिउता धाले ल्हाखे।

⁴⁵ ओदोङ भाअ्सिङ धर्मसास्तरता बुङ इसिका लेखेका हि कि, लाङ द्‍याङ आदम सिनुका प्रानि जेङहि। कालाउ न्हुसोको आदम ख्रिस्ट चाहि आनान्त जिबन पिका जेङका हि।

⁴⁶ कालाउ हिति कालाउ बिहाको जिउ चाहि लाङति लोहि, कालाउ न्हुसो चाहि परमेस्वरको पिका जिउ लोहि।

⁴⁷ लाङ द्‍याङ आदम चाहि प्रिथिबिको भोनोइसो बनिका हिघाहि, कालाउ न्हेतेङ आदम जाइ ख्रिस्ट हिका हि वा स्वर्ग पाहासो लोहि।

⁴⁸ प्रिथिबिको भोनोइसो बनिका द्‍याङगेलाइ लाङति द्‍याङ आदम भाइकाङ हि। कालाउ जाइ स्वर्गको द्‍याङ येसु ख्रिस्टहेङ पिताइपुखे इम्बालाइ बुङ वाको भाइपाङ जेङखे।

⁴⁹ जेसाङ केलाइ झाराङ द्‍याङगेलाइ दोफा भोनोइहोइ बनिका आदमको रुप हि, एन्साङ पातेङ एनि केलाइ दोफा स्वर्गसो लोका ख्रिस्टको रुप भाइपा भाङगाइन्हावा।

⁵⁰ खान्धुराइ ओनेगेलाइ, का नेलाइहेङ या दोअ्खा कि, केलाइको हिति कालाउ बिहाहोइ बनिका जिउ परमेस्वरको सासन स्वर्गता हिलि मानिनावा, केलाइको सितेङ हानिका जिउ दोफा परमेस्वरको सासनता हानिलि मादाङ, हाइपालिपानु इन्ता सिका मान्थुखे।

⁵¹ खाङसु, का नेलाइहेङ एनोङ म्होन्हाका काथा दोअ्ताङका, केलाइ मध्ये आधिमि खान्धुराइगेलाइ मासियाङ, कालाउ केलाइ झाराङको जिउ भाङघाइन्हाङ।

⁵² इसिका आचानाक जेनाङ, जेसाङ हासु बुङ ताइको मिसियाँ झिमिक पाखे। जेलाउ आखिरि सानाइ धुइयावा। सिकालाइ जेलाउलाउ बुङ बान्चिलिको भाअ्सिङ सिन्चालावा, कालाउ केलाइ सिन्चाल्कालाइको जिउ बुङ भाङघाइन्हाङ।

⁵³ हाइपालिपानु केलाइको जिउ जेदोङ स्यावा कालाउ आइयावा, या इसिका जिउता भाङघाइन्हालि गोयाङ जेदोङ हेलाउ बुङ मासियाङ कालाउ हेलाउ बुङ माआइयाङ।

⁵⁴ जेलाउ इसिका जेनाङ, कालाउ धर्मसास्तरता परमेस्वरको दोअ्का काथा पुरा जेनावा, “सिका जेलाउलाउको भाअ्सिङ हारियावा, कालाउ इङको को हिदोइ बुङ आस्तित्व माहियाङ।”

⁵⁵ एसापा धर्मसास्तरता लेखेका काथा पुरा जेनावा, “ओइ सिका नाङको बिजोइ हिसो हि? ओइ सिका नाङको चोट पुराइ पाका सरबुङ हिसो हि?”

⁵⁶ द्‍याङ जाति पाप पाकानाङ सिलि गोइखे, कालाउ द्‍याङगेलाइ पाप पाहे पानु दन्ड पिलि गोइखे हाइपालिपानु द्‍याङगेलाइ मोसाको व्यवस्था भङग पाका हि।

⁵⁷ कालाउ परमेस्वरहेङ धन्यबाद ज्याको जाइ केलाइको प्रभु येसु ख्रिस्ट पाहासो केलाइको भाअ्सिङ जेदोङ पाहि इङकोसो केलाइहेङ पाप कालाउ सिका ह्रुता बिजोइ पिका हि।

⁵⁸ ओदोङ भाअ्सिङ काङको आनाउ खान्धुराइ ओनेगेलाइ, ताइको खाङधुरिता बल्लियाका जेङसु कालाउ धाताइका सिक्स्यागेलाइता मालाइसु। कालाउ प्रभुको कामता जेलाउ बुङ लागितेङ हिसु। हाइपालिपानु नेलाइ गिसुखेना कि प्रभुता नेलाइको परिस्रोम ब्यर्थ माजेनाङ।