1 कोरिन्थि 14 - Dhimal NT

आगमबानि कालाउ भासाको बरदानगेलाइ

¹ एमिसो भेनेङहेङ प्रेम पालि जेलाउ बुङ कोसिस पासु, कालाउ आत्मिक बरदानगेलाइ निङका बार्का इच्छा ताअ्सु, खास पातेङ आगमबानि पालिको भाअ्सिङ।

² हाइपालिपानु परिपरिको भासाता धुइका द्‍याङगेलाइ दोफा माको, कालाउ वा परमेस्वर दोफा धुइखे। वा हाइ दोअ्खे हासु दोङ हाइ बुङ माबुझिखे, वा पबित्तरो आत्माको सरबुङसो म्होन्हाका को काथागेलाइ धुइखे।

³ कालाउ आगमबानि धुइकालाइ खान्धुराइगेलाइहेङ खाङधुरिता बल्लियाका बानाइलि, हाउसा पिलि कालाउ सान्ति पिलिको भाअ्सिङ वा धुइखे।

⁴ बो भासा धुइकालाइ ताइकोङ खाङधुरिहेङ बल्लियाका बानाइखे। कालाउ आगमबानि पाका द्‍याङ मन्डलिको खान्धुराइगेलाइ खाङधुरिहेङ बल्लियाका बानाइखे।

⁵ नेलाइ झाराङ परिपरिको भासा धुइसु दोअ्का का इच्छा पाखा, कालाउ इङको खान्तेङ झन इस्तु नेलाइ आगमबानि पाका का इच्छा पाखा। जेसापा परिपरिको भाअ्सा धुइका द्‍याङ मन्डलिता खान्धुराइगेलाइको खाङधुरि बल्लियाका बानाइलिको भाअ्सिङ वा दोअ्का काथाको ब्याख्या मापाखे पानु, जाइ परमेस्वरको बचन मन्डलिता हिङपाखे वा आझाइ रेम्का काम पाका हिखे।

⁶ ओदोङ भाअ्सिङ खान्धुराइ ओनेगेलाइ, जेसापा का नेलाइकोता लोतेङ परिपरिको भासाता धुइघा पानु, नेलाइहेङ काङकोसो हाइ फाइदा जेनावा रो? भरु जेसापा नेलाइकोता का हिदोइ बुङ काथाको प्राकास माकुनु आधे मुख्य ग्यान माकुनु आगमबानि चुमाघा पानु काङकोसो नेलाइहेङ फाइदा जेनावा।

⁷ एन्साङ पातेङ जेलाउ नाअ् बाजागेलाइ भाइकाङ मुरलि माकुनु तुनजाइ धुइपाखे, जेसापा नाअ् रेम्फासो पोदोको धुन माधुइपानु, बोगेलाइ हेसा मुरलिको पोदो माकुनु तुनजाइको पोदो हि दोअ्तेङ नाल्लि द्वावा? हासु बुङ नाअ् हाइ धुइपाखे दोअ्तेङ नाल्लि मादोखे।

⁸ धुमको भाअ्सिङ, जेसापा सानाइको पोदोको धुन झालाझालापा माहिङनु, सिपालाइ धुम पालिको भाअ्सिङ तियार जेङलि मादोखे।

⁹ एन्साङ पातेङ नेलाइ धुइका काथागेलाइ द्‍याङगेलाइ माबुझिनु, या भेरमाता ब्यर्थाता धुइतेङ हिका भाइकाङ जेनाङ।

¹⁰ इदोइ सुमिङता हेन्जाङ खाल्को भाअ्सा हि। कालाउ गोताङ भासाको आर्था हि।

¹¹ कालाउ जेसापा केलाइ आरुको धुइका भाअ्सा माबुझिनु, इम्बालाइ केलाइको भाअ्सिङ बिदेसिगेलाइ भाइकाङ जेनावा, कालाउ केलाइ इम्बालाइको भाअ्सिङ बिदेसिगेलाइ भाइकाङ जेनाङ।

¹² एसापा दोङ नेलाइ बुङ पबित्तरो आत्माको बरदानगेलाइको बारका इच्छा पासुखेना पानु, नेलाइ मन्डलिता खान्धुराइगेलाइको खाङधुरि बल्लियाका बानाइलि इच्छा बुङ पासु।

¹³ ओदोङ भाअ्सिङ परिपरिको भासा धुइकालाइ इङको को माने खोलिलि द्वाको दोअ्तेङ बरदानको भाअ्सिङ प्रार्थाना पाको।

¹⁴ हाइपालिपानु का परिपरिको भासाता पार्थाना पाखा पानु, काङको आत्मा प्रार्थाना पाखे, कालाउ मन चाहि इङकोता माझ्वाइखे। हाइपालिपानु इङको भाअ्सा का माबुझिखा।

¹⁵ ओदोङ भाअ्सिङ का पबित्तरो आत्माको आगुवाइसो प्रार्थाना पालि भोखा। कालाउ का हाइ दोअ्तेङ हिघा आरु बुङ बुझिका का भोखा। कालाउ जेलाउ का मनता ले लेखा, का भोखा कि इङको ले पबित्तरो आत्मासो ह्याको। कालाउ या बुङ आवस्यक हि कि, का हाइ लेदोङखा इङको आरुगेलाइ बुङ बुझियाको।

¹⁶ जेसाङ हिदोइ बुङ नावा द्‍याङ नेलाइको मन्डलिता लोखे कालाउ जेलाउ नेलाइ आराधानाता परमेस्वरको बाखानाइ आत्माहोइ पादोङ सुखेना, जेसापा इङको द्‍याङ नेलाइको दोअ्का माबुझिखे कि, नेलाइ परमेस्वरको बाखानाइ पासुखेना, कालाउ वा हेसा थाहा गिलि कि हेलाउ नाङको दोअ्का काथाता आमेन दोअ्लि?

¹⁷ नाङको धन्यबादको प्रार्थाना ओसारापाङ रेम्फा हिलाउ बुङ, कालाउ या होइ आरु द्‍याङहेङ ताइको खाङधुरिता बल्लियाका बानाइलि मासाघाइखे।

¹⁸ का परमेस्वरहेङ धन्यबाद पिखा, हाइपालिपानु झाराङ खान्तेङ हेन्जा का परिपरिको भासाता धुइखा।

¹⁹ कालाउ बुङ का मन्डलिको समुहता परिपरिको भासाता हाजारौ सब्दगेलाइ धुइलि खान्तेङ, भरु का नालोङ सब्द होइ लाउ बुङ बो गेलाइहेङ सिक्स्या पिका कालाउ बुझिका भासाता धुइलि भोखा।

²⁰ खान्धुराइ ओनेगेलाइ, इदोइ काथागेलाइता नेलाइको सोचिका बिचारगेलाइता जामाललाइ भाइपा माजेङसु। मारेम्का काथागेलाइको भाअ्सिङ जामाललाइ भाइपा आन्जान जेङसु, कालाउ इसिका खाल्को काथा बुझिलिको भाअ्सिङ वाराङ द्‍याङ भाइपा जेङसु।

²¹ हाइपालिपानु धर्मसास्तरता प्रभु दोअ्खे, “का बिदेसि द्‍याङगेलाइको भासासो ताइको द्‍याङगेलाइ दोफा नुइ धुइयाङका, कालाउ बो द्‍याङगेलाइसो का इम्बालाइ दोफा धुइयाङका, कालाउ बुङ इम्बालाइ काङको काथा माहिनाङ।”

²² ओदोङ भाअ्सिङ परिपरिको भासागेलाइ खान्धुराइगेलाइको भाअ्सिङ माको, कालाउ खाङधुरि मापाकालाइको भाअ्सिङ चिन्हा दोङ हि। कालाउ आगमबानि चाहि खाङधुरि मापाकालाइको भाअ्सिङ माको, कालाउ खान्धुराइगेलाइको भाअ्सिङ खिनिङ हि।

²³ जेसापा मन्डलिता झाराङ ए दोफाङ जोम्तेङ परिपरिको भासाता धुइहेपानु, कालाउ खाङधुरि मापाका द्‍याङगेलाइ कालाउ नावा द्‍याङगेलाइ इन्ता लोहे पानु, इम्बालाइ नेलाइहेङ जातिङकोङ पागाला द्वावा।

²⁴ कालाउ झाराङ आगमबानि पाकाताङ हिका बेला आधिमि खाङधुरि मापाका माकुनु नावा द्‍याङगेलाइ इन्ता दुल्हि पानु, इम्बालाइ नेलाइको दोअ्का काथा हिङतेङ ताइको पुर्ना स्वभाबहेङ परिबतन पालि भोकावा।

²⁵ परमेस्वरको बचनहोइ इम्बालाइको हृदयता म्होनाका मारेम्का खाराब काथागेलाइहोइ मन तुकावा, कालाउ इम्बालाइ का पापि हिघा दोअ्तेङ पाप पालि लाअ्तावा कालाउ तुघुरतेङ इम्बालाइ परमेस्वरको आराधाना पावा, कालाउ इम्बालाइ “परमेस्वर नेलाइको माझाता हि” दोअ्का घोसाना पावा।

आराधानाता आनुसासन

²⁶ खान्धुराइ ओनेगेलाइ, का दोअ्लि खाङका काथा इदोइ दोङ हि, कि जेलाउ नेलाइ आराधानाको भाअ्सिङ ए दोफाङ जोम्सुखेना, नेलाइ मध्ये आधिमि भजन लेका, आधिमि सिक्स्या पिखे, आधिमि परमेस्वरसो लोका प्रकासको काथा पाखे, आधिमि परिपरिको भासा धुइखे कालाउ आधिमि दोफा इङको को माने खोलि पिका बरदान हिखे। इदोइ गोताङ काथा मन्डलिको खाङधुरिको उन्नतिको भाअ्सिङ हिलि गोइखे।

²⁷ जेसापा हासु बुङ परिपरिको भासाता धुइखे पानु न्हेमि खिनिङ माकुनु इस्तुता सुमि थेकापा पालापालापा धुइयाको, कालाउ इम्बालाइता इङको भासाको माने खोलि पिका हासु बुङ एमि इन्ता हिलि गोइखे।

²⁸ कालाउ माने खोलिका इन्ता हासु बुङ मान्थुनु, बो भाअ्सा धुइका द्‍याङ मन्डलिको सभाता सिकापा ह्याको, कालाउ वा ताइमिङ दोफा कालाउ परमेस्वर दोफा सिकापा धुइयाको।

²⁹ आगमबानि पाकालाइ चाहि न्हेमिसो सुमि खिनिङ ह्याको, कालाउ आरु चाहि इम्बालाइको धुइका काथा ठिक हि कि मान्थु दोअ्तेङ रेम्फासो जाचियाको।

³⁰ कालाउ हासु बुङ मन्डलिता धुइतेङ हिका बेला आरु हासुहेङ बुङ परमेस्वर हिदोइ बुङ काथाको प्रकास पितेङ धुइलि लागाइहे पानु, लाम्फा धुइका द्‍याङ सिकापाङ ह्याको कालाउ भेनेङहेङ धुइलि प्याको।

³¹ नेलाइ झाराङ पालापालापा आगमबानि धुइलि दोस्वाना, कालाउकि झाराङ धिराको कालाउ झाराङ हाउसाइ निनाको।

³² परमेस्वरको बक्तागेलाइ जाइ परमेस्वर पाहासो बचन दोअ्खे वा हिदोइ बेला धुइलि गोइखे माकुनु माधुइलि गोइखे दोअ्तेङ ताइमिहेङ काबुता ताअ्लि दोखे।

³³ हाइपालिपानु परमेस्वर गोलमालको परमेस्वर माको, कालाउ सान्ति कालाउ मिलिपाका परमेस्वर हि। इदोइ नियमगेलाइ पबित्तरो जनगेलाइको गोताङ मन्डलिता पिताइखे।

³⁴ बेजानगेलाइ मन्डलिको सभाता सिकापा ह्याको। हाइपालिपानु इम्बालाइहेङ धुइका आनुमति मान्थु, कालाउ व्यवस्था दोनाङ भाइपा इम्बालाइ आधिनता ह्याको।

³⁵ जेसापा इम्बालाइ हाइ दोङ काथा धिरलि खाङखे पानु इम्बालाइ मन्डलिता माहिताको, भरु साअ्ता हानितेङ ताइको के हेङ हिअ्ताको, हाइपालिपानु मन्डलिता बेबालाइ धुइलि लेदेर लुका काथा दोङ हि।

³⁶ हाइ पालि नेलाइ मध्ये हासु बुङ लाम्फा पिताइका व्यवस्था केम्लि माकिसुखेना? हाइ नेलाइहेङ लागिखे कि, परमेस्वरको बचन दोअ्का नेलाइ लाङ द्‍याङगेलाइ हिसुन्हा रो?

³⁷ हासु बुङ ताइमिहेङ परमेस्वरको बक्ता माकुनु वाको दोफा पबित्तरो आत्माको बरदान हि दोअ्तेङ सम्झिखे पानु, काङको लेखेका काथा प्रभुको आग्या दोङ आग्या हि दोअ्का वासेहेङ थाहा ज्याको।

³⁸ कालाउ जेसापा हासु बुङ काङको दोअ्का काथा मासाअ्खे पानु, वासेहेङ बुङ मासाअ्तावा। आन्जान हिनु,

³⁹ ओदोङ भाअ्सिङ खान्धुराइ ओनेगेलाइ, आगमबानि धुइलि बार्का इच्छा पासु, कालाउ परिपरिको भासाता धुइकालाइहेङ मारोकिसु।

⁴⁰ कालाउ मन्डलिता गोताङ काम ठिक दोफा कालाउ रेम्फा तरिकासो हिलि गोइखे।