1 कोरिन्थि 11 - Dhimal NT

बेजानको पुरिङ थुम्का बारेता

¹ जेसाङ का ख्रिस्टहेङ पिताइखा एन्साङ पातेङ नेलाइ बुङ काङको उधारनहेङ पिताइसु।

² का नेलाइको बाखिन पाखा, हाइपालिपानु नेलाइ जेलाउ बुङ गोताङ कासेहेङ फोम पासुखेना, कालाउ काङको पिका सिक्स्यागेलाइ नेलाइ ठिकसो केम्सुखेना।

³ कालाउ नेलाइ एनोङ काथा गिसु दोअ्का का भोखा, कि झाराङ द्‍याङको पुरिङ येसु ख्रिस्ट हिका हि, कालाउ बेजानको पुरिङ वाको के दोङ हि, कालाउ ख्रिस्टको पुरिङ परमेस्वर हिका हि।

⁴ प्रार्थाना पालाउ माकुनु मन्डलिता परमेस्वरको बचन दोअ्लाउ ताइको पुरिङ थुम्का गोताङ वाजान ताइको पुरिङको आनादार पाखे, जाइ चाहि ख्रिस्ट हि।

⁵ कालाउ पुरिङ फाङगाइपा ताअ्तेङ प्रार्थाना पाका माकुनु मन्डलिता परमेस्वरको बचन दोअ्का बेजान ताइको पुरिङ के को आपामान पाखे। हाइपालिपानु या वा ताइको पुसुङ मुन्डाइतेङ ताइको आपामान पाका भाइका हि।

⁶ जेसापा हिदोइ बुङ बेजान ताइको पुरिङ माथुम्नु, भरु वा गोताङ पुसुङ सिपाको। कालाउ पुसुङ सिपालि कि मुन्डाइलि बेजानको भाअ्सिङ लेदरलुका काथा जेङखे पानु, वा ताइको पुरिङता नोसोइ तुअ्ताको।

⁷ वाजान ताइको पुरिङ ठुम्लि माएल, हाइपालिपानु वा परमेस्वरको महिमा कालाउ स्वरुप हि, कालाउ बेजान चाहि ताइको के को सोभा हि।

⁸ हाइपालिपानु लाङतिता जेलाउ परमेस्वर लाङ वाजान कालाउ बेजानहेङ बानाइलाउ, वाजानहेङ बेजानको जिउसो बानाइका माको, भरु बेजानहेङ वाजानको जिउसो बानाइहि।

⁹ कालाउ वाजान बेजानको भाअ्सिङ सिरजाइन्हाका माको, कालाउ बेजान वाजानहेङ साघाइलिको भाअ्सिङ सिरजाइहि।

¹⁰ इङको भाअ्सिङ बेजान ताइको पुरिङ नोसोइ होइ ठुम्लि गोइखे। या तिङपालि कि वा ताइको के को आधिनता हि। हाइपालिपानु स्वर्गदुतगेलाइ बुङ केलाइहेङ खाङदोङखे।

¹¹ कालाउ बुङ प्रभुता खाङधुरि पाकाको माझाता वाजानसो बेजान स्वतन्तरो माजेङखे, ना ते बेजानसो वाजान स्वतन्तरो जेङखे।

¹² जेलाउ कि परमेस्वर लाङति वाजानसो लाङति बेजान बानाइहि, एला बेजान वाजानहेङ जोलोम पिखे, कालाउ गोताङको मुलि परमेस्वर दोङ हि।

¹³ का भोखा कि नेलाइ ताइमिङ निर्नय पासु कि, बेजान मन्डलिता परमेस्वर दोफा प्रार्थाना पालाउ ताइको पुरिङ ठुम्लि कि माठुम्लि।

¹⁴ वाजान ह्रिङका पुसुङ ताअ्हि पानु इङको वाको भाअ्सिङ लेदेर लुका काथा हि, हाइपालिपानु स्वाभाबिक रुपहोइ या आसाल माको।

¹⁵ कालाउ ह्रिङका पुसुङ हिलि बेजानको भाअ्सिङ सम्मानको काथा जेङखे, हाइपालिपानु बेजानहेङ ताइको पुसुङ थुम्लिको भाअ्सिङ पिका हि। कालाउ बेजानको पुसुङ दोङ वाको सोभा हि।

¹⁶ कालाउ हासु बुङ इदोइ बिसोइता काङको दोफा गालाबाजि पालि भोखे पानु, केलाइको हिदोइ बुङ इसिका मुन्धुम मान्थु ना ते परमेस्वरको मन्डलिगेलाइको दोङ हि।

¹⁷ एला इदोइ आदेस पिलाउ का नेलाइको बाखिन मापाङका, हाइपालिपानु नेलाइ मन्डलिता आराधाना पालि जोम्लाउ रेम्का चाहि मापास्वाना, भरु झन नेलाइ मारेम्का कि पास्वाना।

¹⁸ हाइपालिपानु लाङ काथाते, का हिङदोङखा, कि मन्डलिता आराधानाको भाअ्सिङ नेलाइ जोम्लाउ नेलाइको माझाता खेङन्हास्वाना, कालाउ आधे जोसो इङको काथागेलाइ जातिङको बुङ वाला।

¹⁹ नेलाइ मध्ये सत्ये द्‍याङगेलाइ नाल्लिको भाअ्सिङ नेलाइता खेङन्हालि बुङ आवस्यक हि।

²⁰ जेलाउ नेलाइ झाराङ केलाइको प्रभु येसुको सिकाहेङ फोम पालि ए दोफाङ जोम्तेङ चास्वाना आम्स्वाना इङको चाहि बास्ताबता प्रभुको भोज माको।

²¹ हाइपालिपानु कासेहेङ दोअ्न्हाका हि कि नेलाइ चालि योम्लाउ हासुहेङ बुङ मापिसिङ चासुखेना, इङको को नतिजा आधिमि म्हितुपाङ हिखे कालाउ आधिमि चाहि गोराहोइ म्हाका हिखे। ओदोङ भाअ्सिङ इन्सिका उम चाहि प्रभुको आदार योग्य माजेङखे।

²² हाइ नेलाइको चालि-आम्लिको भाअ्सिङ ता-ताइमिको साअ् मान्थु रो? हाइ नेलाइ परमेस्वरको मन्डलिहेङ तुच्स थानिसुखेना कालाउ हाइ दोङ मान्थुकालाइहेङ आपमान पासुखेना? का नेलाइहेङ हाइ दोअ्लि? हाइ का याको भाअ्सिङ नेलाइको बाखिन पालि? का सिलाउ बुङ बाखिन मापाङका।

प्रभु-भोज

²³ का नेलाइहेङ पिका सिक्स्या इदोइ दोङ हि, जेदोङ का प्रभुसो निङका हिघा, इङको नेलाइहेङ सुम्पिका हिघा, कि जेदोङ न्हिसिन्ता प्रभु येसु रिम निन्चाहि, कोकोङ न्हिसिन्ता वा तोले ह्रुहि,

²⁴ कालाउ वा धन्यबाद पिलि दोअ्तेङ वा तोले पोङहि, कालाउ दोअ्हि, “इदोइ तोले काङको जिउहेङ तिङपाखे जेदोङ नेलाइको भाअ्सिङ हि, या काङको सिकाको फोम पालिको भाअ्सिङ पासु।”

²⁵ एन्साङ पातेङ इम्बालाइ चालि दोतेङ येसु आङगुरको रसहोइ पोङघाका जाम बात्ति चुम्तेङ एसा दोअ्हि, “इदोइ जाम बात्ति काङको हितिता हिका नावा बाचा हि। जेलाउ-जेलाउ नेलाइ इदोइ आम्स्वाना काङको सिकाको फोमता आम्तेङ हिसु।”

²⁶ हाइपालिपानु जेलाउ बुङ नेलाइ इदोइ तोले चास्वाना कालाउ इदोइ जाम बात्तिसो आङगुरको रस आम्स्वाना, प्रभु मालोपा भरि नेलाइ प्रभुको सिकाको घोसाना पास्वाना।

²⁷ ओदोङ भाअ्सिङ जाइ आयोग्य रितसो प्रभुको तोले चाखे, कालाउ प्रभुको जाम बात्तिसो आङगुरको रस आम्खे, उङको द्‍याङ प्रभुको जिउ कालाउ हितिको बिरोधता पाप पावा।

²⁸ ओदोङ भाअ्सिङ गोताङ द्‍याङ ताइको सोच चाहि आसल हि मान्थु दोअ्तेङ जाचियाको, कालाउ खिनिङ वा तोले चाको, कालाउ जाम बात्तिसो आङगुरको रस आम्माको।

²⁹ हाइपालिपानु जाइ प्रभुको जिउहेङ मानाल्सिङ चाखे कालाउ आम्खे वा इङको चाका कालाउ आम्का कारनसो ताइमिङ ताङ दन्ड चुमावा।

³⁰ नेलाइ मध्येसो हेन्जाङ जोसो मासाधिका कालाउ हुइका हिसुना, कालाउ हेथेते चाहि सिलि दोहोइ, हाइपालिपानु इङको चाहि परमेस्वरको दन्ड दोङ हि।

³¹ जेसापा केलाइ लाम्फाङ ताइमिहेङ ठिकसो जाचिहेपानु, परमेस्वर केलाइहेङ दन्ड माप्याङ।

³² कालाउ प्रभु केलाइहेङ दन्ड कालाउ आनुसासन पिखे, कालाउकि केलाइहेङ परमेस्वर सुमिङको द्‍याङगेलाइ दोफाङ न्याय माप्याको।

³³ ओदोङ भाअ्सिङ काङको खान्धुराइ ओनेगेलाइ, नेलाइ मन्डलिता प्रभु भोज चालि जोम्लाउ एमिसो-भेनेङहेङ ह्रुम्सु कालाउ ए दोफाङ चासु।

³⁴ जेसापा आधिमि म्हितुका हि पानु ताइकोङ साअ्ता चाको, कालाउकि नेलाइ ए दोफाङ जोम्लाउ ए सामान व्यवभार पासु कालाउ परमेस्वर नेलाइहेङ दन्ड मापियाङ। आरु काथागेलाइको बारेता चाहि का लोका बेला दोङ मिलि पाङका।