1 कोरिन्थि 10 - Dhimal NT

इस्राएललिको इतिहाससो चेताउनि

¹ खान्धुराइ ओनेगेलाइ, नेलाइ या काथा फोम पासु दोअ्का का भोखा, कि हेन्जाङ लाम्फा चाका-मान्दा थामेता केलाइको पुर्खागेलाइहेङ हाइ जेङहि। परमेस्वर इम्बालाइ झाराङहेङ बादेल दिङगिल्तेङ आगुवाइ पाहि, कालाउ वा लाल समुन्द्रसो सेङका भोनोइ भाइपा पातेङ ओदोइ पार चुम्पुहि।

² केलाइको गोताङ पुर्खागेलाइ चाका-मान्दा थामेता बादेलको खाम्बासो आगुवाइ जेङलि कालाउ लाल समुन्द्र पार पालि आनुभब पाका हिघाहि। इङको इम्बालाइको भाअ्सिङ बप्तिस्ता ह्रुतेङ मोसाहेङ पिताइका भाइका हिघाहि।

³ ओबालाइ झाराङ परमेस्वर स्वर्गसो पिका तोले चाहि।

⁴ कालाउ इम्बालाइ झाराङ परमेस्वरको पिका चि आम्हि, जेदोङ चाहि रा सो लोका हिघाहि, कालाउ इङको रा चाहि ख्रिस्ट दोफा तुलाना पालि द्वाङ जाइ इम्बालाइ दोफाङ हिगिल्हि कालाउ झाराङहेङ जिबन पिहि।

⁵ कालाउ बुङ इम्बालाइ मध्ये हेन्जाङ दोफा परमेस्वर माहाउसा हि, कालाउ इम्बालाइ चाका-मान्दा थामेता दोङ सिहि।

⁶ हेन्जा लाम्फा केलाइको पुर्खागेलाइ दोफा जेदोङ जेङका हिघाहि इङको काथा केलाइको चेताउनिको भाअ्सिङ दोङ हि। जेसापा केलाइ बुङ इन्सिकाङ मारेम्का इच्छागेलाइ पानाखे पानु केलाइहेङ बुङ इन्सिकाङ जेनाङ।

⁷ कालाउ ओबालाइ मध्ये हेथेते मुर्ति पुजा पाका भाइपा नेलाइ मापासु। जेसाङ धर्मसास्तरता लेखेका हि, “द्‍याङगेलाइ चालि कालाउ आम्लि योमि, कालाउ मोज्मज्जा पालि तेङहि।”

⁸ केलाइ कासिबिरिता माफस्याइने, जेसाङ इम्बालाइ मध्ये हेथेते कासिबिरिता फसेहि, कालाउ एनिताङ ए कुरि सुम हाजार द्‍याङगेलाइ सिहि।

⁹ केलाइ प्रभुहेङ जाचिलि माएल, जेसाङ इम्बालाइ मध्ये हेथेते जाचिहि, कालाउ पुय्याँगेलाइ चोहि कालाउ सिहि।

¹⁰ कालाउ केलाइ गनगन पालि माएल, जेसाङ इम्बालाइ मध्ये हेथेते पाहि, कालाउ परमेस्वर दिङगिल्का स्वर्गदुत पाहासो मारा पाहि।

¹¹ इदोइ काथा इम्बालाइहेङ चेताउनिको रुपता जेङका हिघाहि, कालाउ केलाइहेङ चेताउनि पिलि लेखेका हि। कालाउ केलाइ इदोइ सुमिङको आखिरि दिनागेलाइता जियाइतेङ हिन्हाहि।

¹² ओदोङ भाअ्सिङ जेदोङ खान्धुराइ का ते खाङधुरिता बल्लियाका हिघा दोअ्तेङ भानाइखे, वा होस ताअ्ताको माकुनुते वा ताइमिङ पापता लोनावा।

¹³ द्‍याङगेलाइहेङ आइ लागिका जाच बाहेक आरु जाचता नेलाइ परिका मान्थु सुन्हा। कालाउ परमेस्वर खाङधुरि योग्य हि, वा केलाइ सहिलि दोका खान्तेङ हेन्जा जाचता परिलि माप्याङ, जेलाउ केलाइ जाचता परिन्हाखे, वा केलाइहेङ जेलाउ बुङ खाअ्का दामा बुङ प्यावा। कालाउकि केलाइ इदोङ सहिलि द्वाको।

मुर्ति पुजाको बिसोइता

¹⁴ ओदोङ भाअ्सिङ काङको आनाउ सानाइतिगेलाइ, मुर्ति पुजागेलाइसो हेन्जाङ दुरे हिसु।

¹⁵ बुद्दिमान द्‍याङगेलाइहेङ भाइपाङ पातेङ का दोअ्खा, काङको दोअ्का काथा नेलाइ ताइमिङ बिचार पासु:

¹⁶ जेलाउ केलाइ प्रभु भोजको जाम बाति चुम्तेङ केलाइ परमेस्वरहेङ धन्यबाद पिनाखे केलाइ इन्तासो आम्नाखे, केलाइ ख्रिस्टको हितिता झ्वाइनाखे। कालाउ जेलाउ केलाइ तोले पोङतेङ चानाखे, केलाइ ख्रिस्टको जिउता झ्वाइनाखे।

¹⁷ हाइपालिपानु एनोङ तोलेहोइ जानाइखे कि, केलाइ हेन्जाङ हिलाउ बुङ ख्रिस्टता एनोङ दोङ जिउ हिनाहि। हाइपालिपानु केलाइ झाराङ एनोङ दोङ तोलेसो चानाखे।

¹⁸ इस्राएलको द्‍याङगेलाइको बारेता सोचिसु, परमेस्वरहेङ चाढाइका चाकालाइ परमेस्वरको आराधानाता झ्वाइनाखे। एसासोङ जाइ मुर्तिहेङ चाढाइका आमेने चाखे, वा मुर्ति पुजाता बुङ झ्वाइनाखे।

¹⁹ काङको दोअ्लि खाङका इदोइ माको? हाइ मुर्तिता चाढाइका आमेने हाइ दोङ दाम हि रो? हाइ मुर्तिगेलाइ दोङ जातिङको परमेस्वर हि रो? माको।

²⁰ का दोअ्लि खाङका काथा हाइ पानु, मुर्ति पुजा पाका द्‍याङगेलाइ परमेस्वरहेङ माको, भरु भुत-आत्माहेङ भोग पिखे। ओदोङ भाअ्सिङ नेलाइ बुङ भुत-आत्मागेलाइ दोफा माझ्वाइनासु दोअ्का का चाहिखा।

²¹ नेलाइ एनोङ दोङ सोमोइता भुत-आत्माहेङ भोग पिका चाका-आम्का आमेने कालाउ प्रभु भोजसो चालि-आम्लि मादोस्वाना।

²² जेसापा केलाइ एन्सा पान्हाहि पानु केलाइ प्रभुहेङ हेन्जा चेर ताम्पा प्याङ, कालाउ केलाइ प्रभु खान्तेङ बल्लियाका मान्थुन्हाहि।

खान्धुराइगेलाइको स्वतन्तरो

²³ नेलाइ दोअ्सुखेना केलाइ गोताङ काथा पालि द्वाङ। एइ कालाउ गोताङ काथा केलाइको एल्का माको। केलाइ हाइ दोङ पालि द्वाङ, कालाउ गोताङ काथागेलाइहोइ परमेस्वरता केलाइको खाङधुरि बल्लियाका बानाइयाङ।

²⁴ हासु बुङ ताइको खिनिङ रेम्फा ज्याको मादोअ्सु, भरु बोगेलाइको बुङ भालाइ पासु।

²⁵ जेलाउ नेलाइ दोकानगेलाइसो बिहा चोल्तेङ चुमासुखेना, इङको मुन्दिरता भोग पितेङ चुमाका हि कि दोअ्तेङ मासोचिसु, भरु हाइ दोङ मासोचिसिङ चासु।

²⁶ नेलाइ इदोइ चालि दोस्वाना, हाइपालिपानु धर्मसास्तरता इसिका लेखेका हि, “प्रिथिबि कालाउ इता हिका गोताङ आमेनेगेलाइ प्रभुको दोङ हि।”

²⁷ जेसापा हिदोइ बुङ खाङधुरि मापाका द्‍याङ नेलाइहेङ चालि काइनु नेलाइहेङ हानिलि मन जेङनु हानिसु, कालाउ जेलाउ वा नेलाइहेङ चालि पिखे नेलाइ हाइ या मुर्तिहेङ भोग पिका ते माको दोअ्तेङ माहिसिङ चाअ्। कालाउकि नेलाइ इङको मुर्तिहेङ चाढाइका बे दोअ्तेङ ताइमिहेङ दुसिका मासोचियाको।

^28-29 कालाउ जेसापा हिदोइ बुङ द्‍याङ नेलाइहेङ इदोइ ते मुर्तिता चाढाइका चाका आमेने हि दोअ्हे पानु माचा, नाअ् सोचिकाता माको, भरु भेनेङ द्‍याङ सोचितेङ दोअ्काता वाको भाअ्सिङ माचासु। हाइपालिपानु नेलाइको स्वतन्तरोता भेनेङ द्‍याङको बिचारसो मादुसियाको।

³⁰ जेसापा का धन्यबाद पितेङ चाअ्खा पानु, का धन्यबाद पितेङ चाका आमेनेता हाइ पालि आरु कासेहेङ दुसिखे?

³¹ ओदोङ भाअ्सिङ जोबाफ चाहि इदोइ दोङ कि, नेलाइ चासु माकुनु आम्सु, कालाउ जेदोङ पासु, इदोइ गोताङ परमेस्वरको महिमाको भाअ्सिङ पासु।

³² एसापा दोङ हासुहेङ बुङ पाप पालि लागाइका काम मापासु, चाहे यहुदिगेलाइहेङ माकुनु गैर-यहुदिगेलाइहेङ, चाहे परमेस्वरको मन्डलिगेलाइ ह्याको।

³³ जेसाङ का बुङ काङको पाका गोताङ कामता गोताङ द्‍याङगेलाइहेङ लेङचापालि कोसिस पाखा, नेलाइ बुङ का भाइपाङ पासु, हाइपालिपानु का काङको भाअ्सिङ खिनिङ रेम्का पालि कोसिस पाका मान्थुघा, भरु आरु द्‍याङगेलाइको भाअ्सिङ बुङ, कालाउकि इम्बालाइको बुङ मुक्ति जेनाको।