1 कोरिन्थि 1 - Dhimal NT

¹ का, पावल इदोइ पात्तारा लेखेदोङखा। का येसु ख्रिस्टको छाल्न्हाका चात्या जेङलिको भाअ्सिङ परमेस्वरको इच्छासो काइन्हाका हिघा। कालाउ का इता केलाइको दोफाङको खान्धुराइ ओने सोस्थेनस दोफा हिघा।

² का इदोइ पात्तारा नाअ् कोरिन्थि सहरता हिका खान्धुराइगेलाइहेङ लेखेदोङखा, जाइहेङ परमेस्वर ताइको द्‍याङगेलाइ जेङलि येसु ख्रिस्टता खेङका हि। वा दोङ नेलाइहेङ येसु ख्रिस्टता वाको पबित्तरो द्‍याङगेलाइ जेङलि काइका हि, जेसाङ वा येसु ख्रिस्टता हिका खान्धुराइगेलाइहेङ पबित्तरो पाहि। हाइपालिपानु गोताङ थामेता वा केलाइ झाराङको प्रभु हि।

³ का प्रार्थाना पाखा कि केलाइको आबा परमेस्वर कालाउ प्रभु येसु ख्रिस्ट नेलाइहेङ आनुग्रह कालाउ सान्ति प्याको।

पावलको धन्यबाद

⁴ का परमेस्वरहेङ जेलाउ बुङ धन्यबाद प्याङका हाइपालिपानु वाको नुगामारि आनुग्रह पाहासो नेलाइहेङ हेन्जा आसिस पिहि। जेलाउसो नेलाइ येसु ख्रिस्टता खाङधुरि पासुन्हा।

⁵ हाइपालिपानु नेलाइ येसु ख्रिस्टता हिसुन्हा, ओदोङ भाअ्सिङ परमेस्वर नेलाइहेङ हेन्जा आत्मिक बरदानगेलाइ पिका हि। इङकोता परमेस्वरको बचन प्राचार पाका कालाउ गोताङ काथाको ग्यान बुङ लोखे।

⁶ येसु ख्रिस्टको बारेता नेलाइको साक्सि नेलाइहेङ पिका बरदानगेलाइ पाहासो सत्ये प्रमानित जेङका हि।

⁷ ओदोङ भाअ्सिङ नेलाइहेङ पबित्तरो आत्माहोइ गोताङ आत्मिकि बरदानगेलाइ पिका हि, जेदोङ नेलाइ केलाइको प्रभु येसु ख्रिस्टको आरोङ लोलि तोम्का दामा खाङसुखेना।

⁸ केलाइको येसु ख्रिस्टको लोका दिनाता नेलाइहेङ हाइ दोङ मादुसिका जेनाको दोअ्तेङ परमेस्वर नेलाइहेङ खाङधुरिता बल्लियाका बानाइयाङ।

⁹ परमेस्वर इसिका पावा, हाइपालिपानु वा ताइमि दोअ्का काथा पालि खाङधुरि योग्य हि, कालाउ वा दोङ नेलाइहेङ ताइको चान येसु ख्रिस्ट दोफा सङगतिता काइका हि।

¹⁰ एला खान्धुराइ ओनेगेलाइ, केलाइको प्रभु येसु ख्रिस्टको खाबारासो का नेलाइहेङ बिन्ति पाखा, कि नेलाइ झाराङ एमिसो-भेनेङ दोफा सहमति जेङसु कालाउ ए-जेङसु कालाउ नेलाइ ता-ताइमिता मिलिसु। कालाउ नेलाइ एनोङ दोङ बिचार कालाउ एनोङ दोङ मनको जेङतेङ हिसु।

¹¹ हाइपालिपानु काङको खान्धुराइ ओनेगेलाइ, नेलाइकोता नुइ-नुइ लागिका हि दोअ्का काथा क्लोएको जाहानसो का नेलाइको बारेता हिङका हिघा।

¹² का दोअ्लि खाङका माने इदोइ दोङ हि, कि नेलाइ मध्ये आधिमि “का पावलको सिक्स्याहेङ पिताइखा”, आधिमि “का आपुल्लोसको सिक्स्याहेङ पिताइखा”, आधिमि “का पतरुसको सिक्स्याहेङ पिताइखा” कालाउ आधिमि “का ख्रिस्टको सिक्स्याहेङ पिताइखा” दोअ्सुखेना रे।

¹³ या रेम्का माको, हाइपालिपानु येसु ख्रिस्ट भेनेङ-भेनेङ जेरता बाखाराइका मान्थु। का पावल माको, जाइ नेलाइको भाअ्सिङ क्रुस्टता सिपिहि। कालाउ नेलाइ का पावलको मिङता बप्तिस्ता बुङ माह्रु सुन्हा।

¹⁴ का परमेस्वरहेङ धन्यबाद पिखा, कि नेलाइ मध्येसो क्रिस्पस कालाउ गायस ओनेगेलाइ बाहेक का हासुहेङ बुङ बप्तिस्ता पिका मान्थुघा।

¹⁵ ओदोङ भाअ्सिङ का ताइको चात्या बानाइलि नेलाइ हासु बुङ काङको मिङता बप्तिस्ता ह्रुन्हाहि दोअ्लि मादोस्वाना।

¹⁶ एइ, का स्तिफनको जाहानहेङ खिनिङ बप्तिस्ता पिका हिघा। कालाउ या बाहेक का हासुहेङ बुङ बप्तिस्ता पिका हिघा या मान्थुघा इङको काथा कासेहेङ फोम मान्थु।

¹⁷ हाइपालिपानु ख्रिस्ट कासेहेङ बप्तिस्ता पिलि दिङगिल्का मान्थु, भरु सुसमाचार प्राचार पालि दिङगिल्का हि। जेलाउ का प्राचार पाखा का ताइको बुद्दिको प्रयोग मापाखा, माकुनुते द्‍याङगेलाइ काङको बुद्दिहेङ तिङतेङ खाङधुरि पावा कालाउ इम्बालाइ क्रुस्टता येसु ख्रिस्टको सिकाको सरबुङ मागियाङ।

ख्रिस्ट दोङ परमेस्वरको ग्यान कालाउ सरबुङ

¹⁸ हाइपालिपानु परमेस्वरसो साजाइ निङका द्‍याङगेलाइको भाअ्सिङ क्रुस्टता येसु ख्रिस्टको सिकाको सिक्स्या हाइ दोङ महत्वको माहिखे, कालाउ केलाइ मुक्ति निङकालाइको भाअ्सिङ या परमेस्वरको सरबुङको प्रामान दोङ हि।

¹⁹ हाइपालिपानु धर्मसास्तरता परमेस्वर दोअ्का हि, “का तिङपाङका, कि इदोइ सुमिङता बुद्दिमान हिघा दोअ्का बिचार बास्ताबता आनाइ बिचार दोङ हि, कालाउ का इम्बालाइहेङ तिङपाङका, कि इम्बालाइ बास्ताबता बुद्दिमानि मान्थु।”

²⁰ एन्सा पानु केलाइ बुद्दिमानि द्‍याङगेलाइको बारेता हाइ दोअ्लि द्वाङ? केलाइ व्यवस्था धिरपाका द्‍याङगेलाइको बारेता हाइ दोअ्लि द्वाङ? कालाउ नुइ धुइलि आगाल धाअ्का सुमिङको द्‍याङगेलाइको बारेता हाइ दोअ्लि द्वाङ? परमेस्वर उङको झाराङहेङ आनाइ तिङपाका हि कालाउ इम्बालाइको बुद्दिहेङ बेकामको तिङपाका हि।

²¹ हाइपालिपानु परमेस्वर ताइको बुद्दि पाहासो थाहा गिहि, कि सुमिङको द्‍याङगेलाइ ताइको बुद्दिहोइ परमेस्वरहेङ नाल्लि मादोखे, ओदोङ भाअ्सिङ परमेस्वर केलाइको सुसमाचारको प्राचार खान्धुराइगेलाइहेङ बान्चिपालिको भाअ्सिङ प्रयोग पाहि, कालाउ आधिमिहेङ इदोइ आनाइ भाइका लागिखे।

²² या यहुदिगेलाइको भाअ्सिङ आनाइ भाइका हि, हाइपालिपानु इम्बालाइ इदोइ सत्ये हि दोअ्तेङ स्वर्गसो एनोङ चिन्हा भोखे, एसासोङ गैर-यहुदिगेलाइ बुङ द्‍याङको बुद्दि भोखे।

²³ कालाउ केलाइ चाहि ख्रिस्ट क्रुस्टता सिहि कालाउ केलाइहेङ केलाइको पापसो लाअ्पाहि दोअ्तेङ प्राचार पानाखे, जाइ यहुदिगेलाइको भाअ्सिङ बाधा कालाउ गैर-यहुदिगेलाइको भाअ्सिङ आनाइ हि।

²⁴ कालाउ परमेस्वर दोङ काइका यहुदि कालाउ गैर-यहुदिगेलाइको भाअ्सिङ ख्रिस्ट दोङ परमेस्वरको सरबुङ कालाउ परमेस्वरको बुद्दि हि।

²⁵ हाइपालिपानु जेदोङ काथा परमेस्वरको आनाइ भाइका तिङखे इङको द्‍याङगेलाइको बुद्दि खान्तेङ बार्का हि, कालाउ जेदोङ काथा परमेस्वरको हुइका भाइका तिङखे इङको द्‍याङको सरबुङ खान्तेङ सरबुङसाइका हि।

²⁶ खान्धुराइ ओनेगेलाइ, नेलाइहेङ परमेस्वर काइलाउ हिसिका हिघासुखेना इङको फोम पासु, सुमिङको इस्तर आन्सार नेलाइ मध्ये हेन्जा बुद्दिमानि मान्थु घासुखेना कालाउ आगुवागेलाइ बुङ मान्थु घासुखेना कालाउ हिकाचाका साअ्ता बुङ जोलोमका मान्थु घासुखेना।

²⁷ कालाउ परमेस्वर बुद्दिमानि द्‍याङगेलाइहेङ लेदेरपालि सुमिङता आनाइ थानिका द्‍याङगेलाइहेङ साल्हि, कालाउ बलियाकाहेङ लेदेरपालि परमेस्वर सुमिङको हुइका द्‍याङगेलाइहेङ छाल्हि।

²⁸ कालाउ परमेस्वर उङको द्‍याङगेलाइहेङ साल्हि जाइहेङ सुमिङको द्‍याङगेलाइ तुच्स थानिहि कालाउ निच द्‍याङ कालाउ इता थेकापा कि काम मालागिका द्‍याङगेलाइहेङ बुङ परमेस्वर छाल्हि।

²⁹ परमेस्वर एसा पाहि कालाउकि हासु बुङ परमेस्वरको आगाता घमन्ड मापाको।

³⁰ कालाउ परमेस्वर नेलाइहेङ येसु ख्रिस्ट दोफा ए-बानाइका हि। कालाउ येसु ख्रिस्ट पाहासोङ केलाइहेङ ताइको बुद्दि पिका हि। कालाउ परमेस्वर दोङ केलाइहेङ वाको नजरता धर्मि बानाइका हि। कालाउ ख्रिस्ट पाहासो दोङ केलाइहेङ पबित्तरो बानाइका हि, कालाउ वा दोङ केलाइहेङ पापसो लाअ्पाका हि।

³¹ जेसाङ धर्मसास्तर लेखेका हि, “जेसापा हासु बुङ घमन्ड पालि भोखे पानु प्रभु दोङ पाका कामता दोङ घमन्ड पाको।”