तितस 2 - धिमालजातिङको बिद्या 1 ना चाहिँ जातिङको बिद्याता हिका काथा धिरपा। 2 वाराङ द्याङगेलाइहेङ ताइको मनहेङ आधिनता ताअ्का, इजत मान हिका, रेम्फा बिचार पाका, खान्धुरता बोल्याका, मायारो पाका रो गोताङ काथा सहेलि दोका हिलि गोयाङ दोअ्तेङ धिरपा। 3 एसाङ पातेङ बेराङगेलाइ परमेस्वरहेङ मान पाका ज्यान सालाको। एम्बालाइ बोमिहेङ बिथाको दुस मालाग्याको। एबालाइ गोराको बसता मावालाको रो रेम्का काथागेलाइको बिद्या प्याको। 4 कालाउ खिनिङ इङको बेराङगेलाइ धानि बेबालाइहेङ एम्बालाइको केअ् रो जामालाइहेङ दाया पालि धिरपालि द्वावा, 5 कालाउ ताइमिङहेङ काबुता ताअ्का, पुनित मन हिका, दायाका, रेम्फा साअ्द्वार पाका रो केअ्को आधिनता हिका बिद्या प्यावा। एम्बालाइ एन्सा पाहि पानु परमेस्वरको बिद्याको बादनामि जेङलि मानिनावा। 6 एन्सा दोङ धानागेलाइहेङ बुङ ताइमिङहेङ बसता ताअ्का बिद्या पि। 7 ना दोङ गोताङ काथाता रेम्का कामको नामुना जेङतेङ एम्बालाइहेङ तिम्पा। ना धिरपालाउ इमानि जेङतेङ हेन्जाङ ल्हिका काथा धिरपा। 8 बिद्या पिलाउ जातिङको रो ल्हिका, हासुङ पोलि मादोका बिद्यागेलाइ पि। एन्सा जेङनु दुस्मनगेलाइ बुङ हाइदोङ दोअ्लि मादोतेङ ताइमिङ लेदेरता पर्यावा। 9 कामत्यागेलाइ बुङ ताइको गिर्हिगेलाइको आधिनता हितेङ एम्बालाइहेङ गोताङ कामता लेङचा पालि गोयाङ दोअ्तेङ धिरपा। एम्बालाइ गिर्हिदोफा नुइ मालाग्याको। 10 एम्बालाइ हिदिङ थोक माख्वाको, कालाउ दिनाङ रेम्का रो खान्धुरि जेङतेङ ह्याको। एसापा एम्बालाइ हिदिमाजेङ काथाता बुङ केलाइहेङ छुटकारा पिका परमेस्वरकोङ बिद्याको सोबाइ बार्हेपाको। 11 हाइदोनु परमेस्वरको निगाहा झाराङ द्याङगेलाइहेङ छुटकारा पिलिको भाअ्सिङ दोङ देखाल जेङका एइ। 12 इदोइ निगाहाहोइ केलाइहेङ मारेम्का ज्यान रो दुनियाको लाल्सा लाअ्लि धिरपाखे रो इदोइ निगाहाको भाअ्सिङ केलाइ ताइमिङहेङ काबुता ताअ्तेङ इदोइ दुनियाता जातिङको रो धरमाति ज्यान दोपालि द्वाङ। 13 एसापा केलाइ सहसाम्पाको आस निङका दिना र्हुम्तेङ हिन्हाहि। इङको दिना केलाइको बाराका परमेस्वर रो छुटकारा पिका इसु ख्रिस्टको बाराका प्रताप तिङन्हावा। 14 इसु ख्रिस्ट केलाइहेङ गोताङ खालको कुकरमसो छुटकारा पिलिको भाअ्सिङ दोङ ताइको सास पिहि। वा केलाइहेङ पुनित पालि ताइको बान्हाइहि रो रेम्का काम पालिको भाअ्सिङ बोल्याका बान्हाइलि एसा पाहि। 15 ना इदोइ बिद्यागेलाइ धिरपा रो खाबारासो एम्बालाइहेङ आरति पि कालाउ हाकाराइ। हासुङ बुङ नासेहेङ हेला पालि मानिनाको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.