तितस 1 - धिमाल1 का पावल परमेस्वरकोङ बान्धाइ रो ख्रिस्ट इसुकोङ साल्तेङ दिङगिल्का इदोइ चिथि लेखेदोङखा। परमेस्वर कासेहेङ साल्हि रो वाको साल्तेङ दिङगिल्कालाइको खान्धुर बार्हेपालि दिङगिल्हि। कालाउ परमेस्वरहेङ मोन्दाताका ज्यानदोफा मिलिका सतभारि एम्बालाइहेङ थुकापालि बुङ कासेहेङ खाटाइहि। 2 इदोइ सतचाहिँ असिम ज्यानको आसता आरेन्हाका हि। हेअ्लाउ बुङ असत माधुइका परमेस्वर सिरजाइ जेङकाखान्तेङ लाम्फा दोङ केलाइहेङ इदोइ ज्यान प्याङका दोअ्तेङ कबोल पाका हिघाहि। 3 कालाउ उचित पहरता दोङ वा इदोइ रेम्काबानाल देखाल पाहि। इदोङ रेम्काबानाल हिङपाका जिमा केलाइहेङ छुटकारा पिका परमेस्वरको हुकुम आन्सार कासेहेङ पिहि। 4 कादोफा एलोङदोङ खाल्को खान्धुरता हिका काङको जातिङको चान तितसहेङ इदोइ चिथि लेखेदोङखा। परमेस्वर आबा रो केलाइहेङ छुटकारा पिका ख्रिस्ट इसु नासेहेङ निगाहा रो सान्ति प्याको। क्रेटता तितसको काम 5 इन्ता दाइतेङ हिका काम पोङघा पालि रो काङको आर्हाइका आन्सार गोताङ पुरता मन्डलिको आगुवागेलाइ भाराना पालि का नासेहेङ क्रेटता लाअ्धिघा। 6 मन्डलिको आगुवाहेङ हासुङ बुङ दुस मालागाइका रो एलोङ खिनिङ बेअ् हिका ह्याको। इङकोको चानचामिन्दिगेलाइ खान्धुरि, चालचलन रेम्का हिका रो दोअ्का साअ्का ह्याको। 7 हाइदोनु मन्डलिको आगुवा परमेस्वरको कामको जिमा र्हुका हिखे। इदोइभाअ्सिङ इङको हिदिङ दुस मान्थुका द्याङ हिलिगोयाङ। इङको ताइमिङ पाका, मारफाङ चेरताम्पाका, म्हाका, चेरसुका रो मारेम्का काम पातेङ टाका कामाइका हिलिमागोयाङ। 8 इङको बान्सालाइहेङ मान पाका, रेम्का काम पालि मोन्दाताका, हुस ताअ्तेङ काम पाका, नियाइ, पुनित रो ताइमिङहेङ बसता ताअ्का हिलिगोयाङ। 9 ताइमिको निङका जातिङको बिद्याता लागेतेङ हिका रो बोमिहेङ बुङ इदोइ बिद्या पितेङ बल पिलि दोका जेङलिगोयाङ। एसापा इदोइ बिद्या धिरपाका माफिक हिलिगोयाङ कालाउ याको खिलाप पाकालाइको बिरामहेङ तिम्पापिलि द्वाना। 10 हाइदोनु हेन्जाङ द्याङगेलाइ छलपाका, बिथाको काथा पाका, धाताइकाइ हिखे। इसिकालाइता ते खास पातेङ खाताना पालिगोयाङ दोअ्कालाइ दोङ हि। 11 एबालाइको नुइता बिजाला मालागाइसिङ माज्याङ हाइदोनु एम्बालाइ ते धिरपालिङ माएल्का काथागेलाइ धिरपातेङ पुराङ साअ् जाहानता उपदर्या माचाइका हि। खालि ताकाकाउरि कामाइलिको भाअ्सिङ एम्बालाइ एसा पाका एइ। 12 एम्बालाइता क्रेटको एमि आगाधुइका एसा दोअ्का हि, “क्रेटको द्याङगेलाइ झाराङ असत धुइका, झार गुपुस भाइकाङ, कुर्ह्या रो दुअ्कालाइ हिखे।” 13 इदोइ काथा जातिङको। इदोइभाअ्सिङ एम्बालाइहेङ बेस्मारि हाकाराइ रो एम्बालाइता पाका खान्धुर लोलि द्वाको। 14 एला यहुदिको निङपिकाकाथा रो सतहेङ मासाअ्का द्याङगेलाइको बान्हाइका हुकुम मामासाअ्। 15 पुनित द्याङगेलाइको भाअ्सिङ गोताङ थोक पुनितदोङ हि। कालाउ अपुनित रो खान्धुर मापाकालाइको भाअ्सिङ खिनिङ हिदिङ काथा बुङ पुनित मान्थु। हाइदोनु एम्बालाइको मन रो आकिलसुदाङ अपुनित हि। 16 एम्बालाइ परमेस्वरहेङ नाल्का हिघा दोअ्तेङ जिकिर पाखे, कालाउ एम्बालाइको कामहोइ चाहिँ परमेस्वरहेङ इन्कार पाखे दोअ्का तिङपाखे। एम्बालाइ ते दिगमिगहिका, आटेरिगेलाइ हि रो हिदिङ बुङ रेम्का काम पालि लाएकको मान्थु। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.