फिलिप्पि 4 - धिमाल1 इदोइखातिर काङको दादाओने बाइओनेगेलाइ, नेलाइ प्रभुता थिर जेङतेङ हिसु। का नेलाइहेङ माया पाखा रो दुसुलि भोखा। नेलाइ कासेहेङ लेङचा पासुन्हा रो नेलाइदोङ काङको कामको इनाम हिसुन्हा। हाउसाको काथागेलाइ 2 का इयोदिया रो सुन्तुखे न्हेमिहेङ दोङ बिम्ति पाखा। निधिमि बाइओने ख्रिस्टदोफा एलोङदोङ मनको जेङतेङ हिसु। 3 काङको खान्धुरिलाएक सानाइति, इङको बेबालाइहेङ साघाइसु। हाइदोनु रेम्काबानाल हिङपालिको भाअ्सिङ एम्बालाइ कादोफाङ काम पाका हिघाखे। कालाउ कादोफा खिनिङ माको, एम्बालाइ क्लेमेस रो बो सानाइतिगेलाइ दोफा बुङ काम पाका हिघाखे। जाइको मिङ ज्यानको किताबता बुङ लेखेन्हाका हि। 4 प्रभुता ए जेङतेङ नेलाइ दिनाङ लेङचासु, का आरोङ बुङ दोअ्खा, प्रभुता लेङचासु। 5 नेलाइ नोइका हिसुन्हा दोअ्तेङ झाराङ द्याङगेलाइ ग्याको। प्रभु मारफाङ लोदोङखे। 6 हिदिङ काथाता बुङ फिकिर मापासु। नेलाइहेङ हारजा जेङका गोताङ काथाको भाअ्सिङ परमेस्वरहेङ पुकार पासु। कालाउ पुकार पालाउ परमेस्वरहेङ च्याबास चार्हाइसु। 7 एसा पासुन्हा पानु परमेस्वरको बेराजा नेलाइको कोन्धाङ रो मनहेङ ख्रिस्ट इसुता जोगाइतेङ ताअ्तावा। नेलाइहेङ परमेस्वरको पिका इदोङ बेराजा हासुङ बुझिलि माद्वावा। 8 एला दादाओने बाइओनेगेलाइ, जेदोङ काथा सत रो मानको हि, जेदोङ काथा नियाको रो पुनित हि, जेदोङ काथा माया लाएक रो निगाहाको हि, जेदोङ काथा रेम्का रो बाखिन्लि गोइका हि, इङकोङ काथाता मन लागाइसु। 9 जेदोङ काथागेलाइ नेलाइ धिरसुन्हा रो र्हुसुन्हा, जेदोङ काथागेलाइ नेलाइ हिङसुन्हा रो काङको पाका तिङसुन्हा, इङकोङ कामगेलाइ नेलाइ पासु। कालाउ बेराजा पिका परमेस्वर नेलाइदोफा हितेङह्यावा। भेटिको भाअ्सिङ च्याबास 10 का प्रभुहेङ हेन्जाङ बाखिन्खा। हाइपानु नेलाइ आरोङ कासेहेङ फोम पालि थालेसुन्हा। जातिङकोङ नेलाइ कासेहेङ फोम पासुखेना, कालाउ इङकोहेङ तिङपाका माउका निङका मान्थुसुघाना। 11 कासेहेङ हारजा जेङहि दोअ्तेङ दुखेसो पाका माको, हाइदोनु हिदिङ हालतता बुङ इङकोता सन्तोक हिलि गेका हिघा। 12 हेन्जा हिलाउ बुङ, आतुइसा हिलाउ बुङ हिदिङ बुङ पहरता हेसापा ज्यान चालाइलि का गेका हिघा। कालाउ घाइलाउ बुङ, म्हितुपा हिलाउ बुङ, का सन्तोक जेङतेङ सिन्हुलि गेका हिघा। 13 ख्रिस्टको पिका सरबङहोइ दोङ इदोइ गोताङ काथा पालि द्वाङका। 14 कालाउबुङ का तु:ता परेका पहर नेलाइ कासेहेङ साघाइतेङ रेम्काङ पासुन्हा। 15 कालाउ का माकेडोनिया माउजा लाअ्तेङ हानेलाउ कासेहेङ साघाइका हुल नेलाइ खिनिङ हिघासुन्हा दोअ्का काथा नेलाइ फिलिप्पिगेलाइ ताइमिङ गेसुखेना। का नेलाइहेङ रेम्काबानाल हिङपाका लाङ पहरता ताका काउरिहोइ साघाइका मन्डलि नेलाइ खिनिङ हिघासुन्हा। 16 जेलाउ का थेसलोनिके पुरता हिघाखा कोलाउ नेलाइ न्हेखेप काङको भाअ्सिङ साघाउनि पिगिल्का हिघासुन्हा। 17 का नेलाइसो भेटि निङलिको भाअ्सिङ एसा दोअ्का माको, कालाउ नेलाइ कासेहेङ साघाइनाङ परमेस्वर नेलाइहेङ सहसाम्पा प्याको दोअ्तेङ का लाल्सा पाखा। 18 का निङलिगोइका खान्तेङ हेन्जा निङका हिघा। नेलाइ इपाफ्रोडिटसको खुरता पिगिल्का भेटि निङतेङ का सन्तोक जेङका हिघा। परमेस्वरहेङ मोन्दाताका रो र्हुलिलाएक भेटि निङतेङ का लेङचाघा। 19 काङको परमेस्वर दोङ नेलाइको हारजा पोङघा पाप्यावा। ख्रिस्ट इसुता हिका वाको इस्तुङ ताकाकाउरिसो दोङ नेलाइहेङ गोइका काथा प्यावा। 20 एला केलाइको परमेस्वर आबाको प्रताप दिना दिनाङ जेङतेङह्याको। आमेन। न्हुअ्सोको सेउपाका 21 ख्रिस्ट इसुहेङ खान्धुर पाका परमेस्वरको पुनित जनगेलाइहेङ काङको सेउपाका दोअ्पिसु। इता कादोफा हिका दादाओनेगेलाइ बुङ नेलाइहेङ सेउपाका पिगिल्का हि। 22 एन्साङ पातेङ इता हिका बो परमेस्वरको पुनित जनगेलाइ बुङ नेलाइहेङ सेउपाका पिगिल्का हि। खास पातेङ रोमि बाराराजाको दारबारता हिकालाइ बुङ नेलाइहेङ सेउपाका पिगिल्का हि। 23 प्रभु इसु ख्रिस्टको निगाहा नेलाइ झाराङता दिनाङ ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.