फिलिप्पि 3 - धिमालजातिङको खान्धुर 1 आखिरता दादाओने बाइओनेगेलाइ, प्रभुता लेङचासु। नेलाइहेङ इङकोङ काथागेलाइ घुरिघुरि लेखेतेङहिलि का माज्याह्वाखा। कालाउ इदोइसो ते नेलाइको खान्धुरहेङ सिन्हुपावा। 2 दुरजन काम पाकालाइसो हुसपातेङ हिसु। एम्बालाइ खियागेलाइ भाइकाङ हिखे रो बोमिको जिउ चिखाराम्लि भोखे। 3 कालाउ केलाइ जातिङकोङ खाताना पान्हाका हिन्हाहि। हाइदोनु केलाइ परमेस्वरहेङ पुनित हाङसासो पुजिन्हाखे। केलाइ हिदिङ द्याङगेलाइको चालचलनता माको, ख्रिस्ट इसुता भर पान्हाखे। 4 एदि द्याङगेलाइको चालचलनता भर पाका हिनु का झाराङखान्तेङ हेन्जा भर पालि दोधाङका। 5 हाइदोनु का जोन्मिका येअ्निता काङको खाताना जेङका हिघाहि। का बेन्यामिन खालको इस्राएलि हिघाखा। काङको आबा आमाइ हिब्रु हिनाङ का बुङ हिब्रु दोङ हिघाखा। का फरिसि दलको द्याङ हिनाङ मोसाको नियम हेन्जाङ मानेलि गोइघाखे। 6 का यहुदि धरमहेङ मानेघाखा रो ख्रिस्टको मन्डलिहेङ सान्ताइघाखा। का जेदोङ नियम मानिका हिघाखा इङकोसो हासुङ ताइको दुस माअ्पालि मादोधावा। 7 ख्रिस्टहेङ मानिम्पाधाउ का ताइको भाअ्सिङ इङको गोताङ काथा लाभ फोमपाघाखा। कालाउ बुङ एला ते ख्रिस्टहेङ निङतेङ वाको आगाता बिथाको जेङहि दोअ्तेङ फोमपाखा। 8 इङको खिनिङ माको, इसु ख्रिस्ट काङको प्रभुहेङ रेम्फा नाल्लि निङलि दोङ बाराका काथा फोमपाखा रो बो गोताङ काथा बिथाको मानेखा। कालाउ वासेहेङ निङलिको भाअ्सिङ दोङ का गोताङ काथा लाअ्का हिघा। इदोइ गोताङ काथा धुलामुला भाइपाङ फोमपाका हिघा। 9 एन्साङ पातेङ वाकोङ जेङलि लाल्सा पाखा। का मोसाको नियम मानेतेङ परमेस्वरको आगाता धरमाति जेङलि मादोघा। कालाउ बुङ एला ख्रिस्टहेङ खान्धुर पानाङ परमेस्वर कासेहेङ धरमाति ठार्हाइका एइ। हाइपानु इदोइ धरमाति काथा खान्धुरता खेअ्का हि। 10 का ख्रिस्टहेङ नाल्लि रो वासेहेङ सिकासो आरोङ सिन्हुपाका सरबङहेङ गिलि भोखा। कालाउ वा तु: पिर भोगिका भाइपाङ का बुङ तु: पिर भोगितेङ वाको सिकाता वा भाइपाङ जेङलि भोखा। 11 कालाउ जेसालाउ बुङ का ख्रिस्ट भाइपाङ सिकासो आरोङ सिन्हुलि द्वाको दोअ्तेङ आस पाखा। धेयभारि आगा बार्हेलि 12 का धेयता लाम्फादोङ थुकातेङ पुरा जेङहोइका दोअ्तेङ दोअ्का माको। कालाउ का ख्रिस्ट इसु भाइपाङ जेङलि हेन्जाङ चेस्ता पादोङखा। हाइदोनु वा इदोङ कामको भाअ्सिङ दोङ कासेहेङ साल्हि। 13 दादाओने बाइओनेगेलाइ, का इदोइ गोताङ थोक लाम्फा दोङ पोङघा पाहोइका दोअ्तेङ मादोअ्ताङका। कालाउ का दोका काथागेलाइ निलतेङ लाङ काथागेलाइ निङलि चेस्ता पाङका। 14 इदोइखातिर का सादेलको इनाम जितिलिको भाअ्सिङ धाअ्दोङखा। परमेस्वर याको भाअ्सिङ ख्रिस्ट इसुसो असिमको ज्यान निङलि कासेहेङ काइका एइ। 15 केलाइ खान्धुरता बोल्याका जेङकालाइचाहिँ झाराङ ए मनको ज्याइने। एदि नेलाइ हिहिङ काथाता बिमति ताअ्सुखेना पानु परमेस्वर दोङ नेलाइहेङ इङको बुङ देखाल पाप्यावा। 16 जेदोङ जेङलाउ बुङ परमेस्वर केलाइहेङ लाम्फा जेदोङ देखालपाका हि इङकोता दोङ थिर जेङतेङ ह्याइने। 17 दादाओने बाइओनेगेलाइ, नेलाइ बुङ केलाइ भाइपाङ जेङसु। केलाइ नेलाइको भाअ्सिङ रेम्का नामुना जेङका हिन्हाहि। कालाइ नेलाइ बुङ इदोङ नामुनाआन्सार चलेकालाइहेङ पिताइसु। 18 हेन्जाङ द्याङगेलाइ ताइको आनिबानिहोइ दोङ एम्बालाइ ख्रिस्टको कुरुसता पाका कामको खिलाप पाखे। का इसिका द्याङगेलाइको बारेता घुरिघुरि नेलाइहेङ दोअ्तेङ लोका हिघा। कालाउ एला बुङ खारतेङ नेलाइहेङ दोअ्दोङखा। 19 आखिरता परमेस्वर एम्बालाइहेङ मुअ्पावा। हाइदोनु एम्बालाइ ख्रिस्टको इछा माको कालाउ ताइको जिउको इछागेलाइको चाकर पाखे। एम्बालाइ लेदेरलि गोइका काथागेलाइता तुजुक पाखे। एम्बालाइ परमेस्वरको काथाता माको कालाउ बुङ दुनियाको काथाता लागेका हिखे। 20 कालाउ केलाइ सादेलता हिका द्याङगेलाइ एइ। केलाइको प्रभु इसु ख्रिस्ट सादेलसो ल्वावा दोअ्तेङ वाको दामा खाङतेङ हिन्हाहि। वा दोङ केलाइहेङ छुटकारा प्यावा। 21 वादोफा गोताङ थोकगेलाइ र्हुता राज पाका सरबङ हि। इङकोङ सरबङहोइ दोङ वा केलाइको इदोइ सिका जिउहेङ वाको भाइपाङ प्रतापि जिउ बान्हायावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.