मत्ति 4 - धिमालउदादाङका थामेता इसुको जाच ( मर्कुस १:१२-१३ ; लुका ४:१-१३ ) 1 इङकोन्हुअ्सो पुनित हाङसा मासानको राजा दियाबलससो इसुहेङ कुकरमता फासेपालिको भाअ्सिङ उदादाङका थामेता चुमपुन्हाहि। 2 वा न्हेकुरि दिना रो न्हेकुरि दिलिमाथिकापा म्हितुपाङ हिकान्हुअ्सो म्हितुहि। 3 कालाउ दियाबलस वाकोता लोतेङ दोअ्हि, “ना परमेस्वरको चान हिन्हा पानु इदोइ उन्ठुइगेलाइहेङ तोले जेनाको दोअ्तेङ हुकुम पि।” 4 कालाउ बुङ इसु दोअ्हि, “धरमकिताबता एसापा लेखेन्हाका हि, द्याङ तोलेसो खिनिङ माको, कालाउ बुङ परमेस्वरको नुइसो ओल्हेका ए ए कथनहोइ सिन्हुखे।” 5 कालाउ दियाबलस वासेहेङ पुनित पुरता चुमपुतेङ थानको तुपाता जाअ्पाहि 6 रो वासेहेङ दोअ्हि, “ना परमेस्वरको चान हिना पानु, इतासो लेता धासे हाइदोनु धरमकिताबता इसिका लेखेका हि: ‘वा ताइको सादेलचरगेलाइको जिम्माता नासेहेङ प्यावा रो नाङको खोकोइ माबोखेन्हाको दोअ्तेङ एम्बालाइ नासेहेङ खुरखुरताङ खोअ्तावा’” 7 इसु इङकोहेङ दोअ्हि, “लेखेन्हाका हि, ‘ना परमप्रभु ताइको परमेस्वरको जाच मापालि।’” 8 आरोङ दियाबलस इसुहेङ एलोङ हेन्जाङ झाउका आरदाङता चुमपुतेङ दुनियाको गोताङ सारभि रो इङकोको सामर्थ वासेहेङ तिम्पाहि 9 रो वासेहेङ दोअ्हि, “ना तिर्हो थोतेङ कासेहेङ बाखिन्न्हा पानु, इदोइ गोताङ सामान का नासेहेङ प्याङका।” 10 कालाउ इसु इङकोहेङ दोअ्हि, “दियाबलस, ना दुरे हाने! हाइदोनु धरमकिताबता लेखेका हि, ‘ना परमप्रभु ताइको परमेस्वरहेङ खिनिङ बाखिन रो वाको खिनिङ सेवा पा।’” 11 कालाउ दियाबलस इसुहेङ लाअ्तेङ हानेहि रो सादेलचरगेलाइ लोतेङ वाको सेवा सुसार पाहि। इसु गालिलता पारचार पालि तेङका ( मर्कुस १:१४-१५ ; लुका ४:१४-१५ ) 12 युहन्ना थुनाता परिका हि दोअ्का हिङतेङ इसु गालिलभारि हानेहि 13 रो वा नासरत लाअ्तेङ कफर्नहुम पुरता हानितेङ इन्ता हिलि तेङहि। इदोइ पुर जबुलुन रो नप्तालिको माउजाता गालिल चावान्दिको काम्बेता हिघाहि। 14 एसापा आगाधुइका यसैयाको दोअ्का इदोइ कथन एसापा पोङघाहि: 15 “हिङसु, यर्दन झोरा ओदोइपार, गालिल चावान्दिको भेर्पा जबुलुनको मुलुक रो नप्तालिको मुलुकको द्याङगेलाइ, गालिल माउजाता हिका बोजात्यागेलाइ, 16 कितिकितिकाता हिका द्याङगेलाइ एलोङ बाराका जोल्का तिङका हि। सिलि गोइका काथाता थितेङ हिकालाइर्हुता एलोङ जोल्का चिल्काका हि।” 17 इङकोङ पहरसो पारचार पातेङ इसु दोअ्लि तेङहि, “कुकरम पालि लाअ्का मन पासु, हाइदोनु सादेलको सारभि भेर्पाङ लोका हि।” इसुको लाङ चात्यागेलाइ ( मर्कुस १:१६-२० ; लुका ५:१-११ ) 18 एनि गालिल चावान्दिको काम्बेता हिगिल्लाउ इसु पत्रुस दोअ्का सिमोन रो वाको ओने अन्द्रियासहेङ तिङहि। न्हेमिङ ओनेहेङ चावान्दिता जाले थालतेङहिका तिङहि, हाइदोनु एम्बालाइ गोन्धि हिघाखे। 19 इसु एम्बालाइहेङ दोअ्हि, “कासेहेङ पिताइसु, का नेलाइहेङ हाया माको, द्याङगेलाइहेङ काङकोता चुमाका बान्हायाङका।” 20 कालाउ ओदोङघरि जाले लाअ्तेङ एम्बालाइ वासेहेङ पिताइहि। 21 इन्तासो हानेकाहानेकाताङ वा भेनेङ न्हेमि ओने, याकुब रो युहन्नाहेङ दुसुहि। एम्बालाइ ताइको आबा जब्दियादोफा नाउता योमतेङ ताइको जाले जोदोङघाखे। इसु एम्बालाइहेङ बुङ काइहि। 22 कालाउ एम्बालाइ उदोङघरि आबाहेङ नाउताङ लाअ्तेङ वासेहेङ पिताइहि। इसुहेङ हेन्जाङ द्याङगेलाइ पिताइका ( लुका ६:१७-१९ ) 23 कालाउ इसु एम्बालाइको कचहरिसाअ्गेलाइता धिरपातेङ, सादेलको सारभिको रेम्काबानाल हिङपातेङ रो द्याङगेलाइता हिका गोताङ खाल्को रोगगेलाइ एल्पातेङ गालिलको गोताङ थामेगेलाइता घुराइगिल्हि। 24 एन्सा जेङलाउ वाको मिङ गालिल भेर्पा हिका सिरिया मुलुकको गोताङ थामेगेलाइता चारचाराइहि। कालाउ द्याङगेलाइ गोताङ खालको रोगाइका रो बेथासो सान्ताइका मासाअ्धेकालाइहेङ इसुकोता चुमाहि। एम्बालाइता मासान खोअ्का, झाकालोङका रो गाहिलि जेङका हिघाखे। वा एम्बालाइ झाराङहेङ एल्पाहि। 25 कालाउ गालिल माउजा, ते पुर दोअ्का डेकापोलिस, यरुसलेम पुर, यहुदिया माउजा रो यर्दन झोराको ओदोइपारसो लोका हेन्जाङ द्याङगेलाइ वासेहेङ पिताइहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.