मत्‍ति 3 - धिमाल

चिभुअ्‌लि पिका युहन्‍नाको बानाल

¹ आसा बाअ्‌सार न्‍हुअ्‌सो चिभुअ्‌लि पिका युहन्‍ना यहुदिया माउजाको उदादाङका थामेता लोहि रो एसा दोअ्‌तेङ पारचार पालि तेङहि,

² “कुकरम पालि लाअ्‌सु, हाइदोनु सादेलको सारभि भेर्पा लोका हि।”

³ हाइदोनु आगाधुइका यसैया युहन्‍नाको बारेता एसा दोअ्‌का हिघाखे: “उदादाङका थामेता एमि बारा गालाहोइ र्‍हिकाइदोङखे, ‘परमप्रभुको दामा त्‍यार पासु, वाको दामा सोझापासु।’”

⁴ युहन्‍ना उटको मुइसाको धाबा लागाइघाखे रो केङखेनेता धालेको पेटि धेउघाखे। इङकोको चाकाआनेमाने जिर्‍हाम रो झारमह हिघाहि।

⁵ यरुसलेम पुर, यहुदिया माउजा रो यर्दन झोरा कोरबितिङको गोताङ थामेगेलाइसो द्‍याङगेलाइ वाकोता हानेहि

⁶ रो ताताइको कुकरम मानितेङ यर्दन झोराता युहन्‍नासो चिभुअ्‌लि र्‍हुहि।

⁷ कालाउ बुङ फरिसिगेलाइ रो सदुकिगेलाइता हेअ्‌मि चिभुअ्‌लि र्‍हुलि लोका तिङतेङ वा एम्‍बालाइहेङ दोअ्‌हि, “ओइ पुह्‍याँको चानगेलाइ, लोलि तोम्‍का चेरसो खाअ्‌लि हासु नेलाइहेङ चेतानि पिहि?

⁸ इदोइखातिर कुकरम लाअ्‌का दासि पिलि रेम्‍का काम पासु।

⁹ आब्राहाम दोङ केलाइको आबा हि दोअ्‌तेङ ताताइमिता दोअ्‌तेङ माहिसु। हाइदोनु का नेलाइहेङ दोअ्‌खा, परमेस्‍वर इदोइ उन्‍ठुइसो आब्राहामको भाअ्‌सिङ खाल उब्‍जाइलि द्‍वावा।

¹⁰ एला दोङ सिङको गोराता निसापको दुफे धेल्‍लिङ तोम्‍होइ। इदोइखातिर रेम्‍का फल मासेपाका गोताङ सिङ पाल्‍तेङ उन्‍धिपावा रो मेता थालन्‍हावा।

¹¹ “काचाहिँ नेलाइहेङ कुकरम लाअ्‌लिको भाअ्‌सिङ चिहोइ चिभुअ्‌लि पिखा, कालाउ बुङ कान्‍हुअ्‌सो लोका काखान्‍तेङ सरबङहिका हि, का वाको जुता चुमलि सोबाइका मान्‍थुघा। वा नेलाइहेङ पुनित हाङसा रो मेहोइ चिभुअ्‌लि प्‍यावा।

¹² वाको पाचिका राअ् वाकोङ खुरता हि। वा ताइको खाइर्‍हामहेङ थाइथाइ पावा रो ताइको आनाज भाकारता जोम पावा। कालाउ बुङ पितानाचाहिँ हेअ्‌लाउ मासिका मेता ओअ्‌पावा।”

इसुको चिभुअ्‌लि

¹³ कालाउ इसु गालिल माउजासो युहन्‍नाकोता इङकोसो चिभुअ्‌लि र्‍हुलि यर्दन झोराता लोहि।

¹⁴ कालाउ बुङ युहन्‍ना एसा दोअ्‌तेङ वासेहेङ गोर्‍हाइलि भोहि, “भुरुङ कासेहेङ कि नासो चिभुअ्‌लि र्‍हुलि गोइका हि, हाइ ना काङकोता लोलिगोइका?”

¹⁵ कालाउ बुङ इसु वासेहेङ दोअ्‌हि, “एला एसाङ जेङलि पि। हाइदोनु एसा दोङ केलाइ गोताङ धरम काम पोङघा पालिगोयाङ।” कालाउ युहन्‍ना राजि जेङहि।

¹⁶ इसु चिभुअ्‌लि र्‍हुतेङ ओदोङघरि चिसो ओल्‍हेहि, कालाउ सादेल हेन्‍हाहि रो वा परमेस्‍वरको हाङसाहेङ कुरजाभाइपाङ खुअ्‌तेङहिका रो ताइमिर्‍हुता लोतेङहिका तिङहि।

¹⁷ ओदोङघरि दोङ सादेलसो इसिका गाला हिङहि, “या काङको मोन्‍दाताका चान हि, याकोदोफा का हेन्‍जाङ लेङचाका हिघा।”