मत्ति 24 - धिमालदोका दिनाको चिनोगेलाइ ( मर्कुस १३:१-१३ ; लुका २१:५-१९ ) 1 इसु थानसो ओल्हेतेङ हानेलि तोमलाउ वाको चात्यागेलाइ वासेहेङ थानको साअ्गेलाइ तिम्पालिको भाअ्सिङ वाको भेर्पा लोहि। 2 कालाउ बुङ इसु एम्बालाइहेङ दोअ्हि, “नेलाइ इदोइ गोताङ तिङसुखेना माको कुनु? जातिङको, का नेलाइहेङ दोअ्खा, एलोङ उन्ठुइर्हुता भेनेङ उन्ठुइ बुङ माह्यावा, इङको गोताङ र्हाअ्तेङ थालन्हावा।” 3 इङकोन्हुअ्सो इसु जाइतुन आरदाङता हानितेङ योम्तेङहिलाउ चात्यागेलाइ सिपापा लोतेङ वासेहेङ हिअ्हि, “मास्टर, केलाइहेङ दोअ्, इदोइ काथा हेअ्लाउ जेनावा? कालाउ नाङको लोका रो इदोइ जुगको आखिरको चिनो केलाइ हेसापा गिलि द्वाङ?” 4 कालाउ इसु एम्बालाइहेङ दोअ्हि, “होसपातेङ हिसु, हासु बुङ नेलाइहेङ माआवाइपाको 5 हाइदोनु हेअ्मि काङको मिङर्हुतेङ ‘का ख्रिस्ट हिघा’ दोअ्तेङ लावा रो हेन्जाङहेङ आवाइपावा। 6 नेलाइ धुमगेलाइ जेङका रो धुमजेङका काथागेलाइ हिङस्वाना। माथिसु, इदोइ जेङलि दोङ गोयाङ, कालाउ बुङ दोकादिना ते इङको दोङ पहर माज्याङ। 7 हाइदोनु जात्याको खिलापता जात्या रो सारभिको खिलापता सारभि ल्होकावा। थामेथामेता आनिकाल रो भुइचाल हानावा। 8 कालाउ बुङ इदोइ गोताङ तु:को थालनि खिनिङ ज्यावा। 9 “कालाउ एम्बालाइ नेलाइहेङ रिमावा रो साजाइ पिलि चुमप्वावा, नेलाइहेङ सेअ्तावा रो काङको मिङको भाअ्सिङ गोताङ जात्याको द्याङगेलाइ नेलाइहेङ खानि माकिअ्तावा। 10 इङको पहर हेन्जाङ ताइको खान्धुरहेङ लाअ्तावा। एमि भेनेङहेङ बाइमानि पातेङ सुमप्यावा रो खानि माकिअ्तावा। 11 हेन्जा द्याङगेलाइ ‘का दोङ आगाधुइका हिघा’ दोअ्तेङ धाटाइकालाइ ओल्ह्यावा रो हेन्जाङ द्याङहेङ आवाइपावा। 12 आसाति काम हेन्जाङ बार्हेनाङसिङ एमिभेनेङहेङ माया पालि लाअ्तावा। 13 कालाउ बुङ न्हुअ्थिकापा थिर हिकालाइचाहिँ बान्चेपावा। 14 कालाउ सादेलको सारभिको इदोइ रेम्काबानाल दुनियाको गोताङ जात्यागेलाइता दासिको भाअ्सिङ हिम्पावा। इङकोन्हुअ्सो दोकादिना ल्वावा। थिकाभाइका तु:को पहर ( मर्कुस १३:१४-२३ ; लुका २१:२०-२४ ) 15 “इदोइखातिर आगाधुइका दानिएलसो ‘थानको पुनित थामेता दिगमिगजेङका काथा ताअ्का हि’ दोअ्का नेलाइ तिङस्वाना। (याको माने पर्हेकालाइ ग्याको)। 16 कालाउ यहुदियाता हिकालाइ लाखभारि खाअ्ताको। 17 बुरजाता हिकालाइ ताइको साअ्ता हिका आनेमाने ओल्हेपालि लेता माखुअ्ताको। 18 मिलिङबारिता हिका ताइको धाबा नानि घुरितेङ माल्वाको। 19 गान्धितेअ्कालाइ रो कोल्हेता जामालहिका आमाइगेलाइहेङ इङको पहर हेन्जा तु: ज्यावा। 20 कालाउ बुङ चुङदिङता रो माइसाका दिनाता नेलाइ खाअ्लि मागोयाको दोअ्तेङ पुकार पासु 21 हाइपानु इङको पहर इसिका बारा आपत जेनावा, जाइ दुनियाको लाङसो एलाथिकापा जेङका मान्थु, ना आरोङ हेअ्लाउ जेनावा। 22 इङको दिना मापोतोपाका हिनु हासुङ द्याङ सिन्हुलि मादोधावा, कालाउ बुङ साल्तेङ दिङगिल्कालाइको भाअ्सिङ इङको दिना पोतोपावा। 23 “कालाउ नेलाइहेङ हासुङ ‘खाङसु, ख्रिस्ट इता हि’ माकोनु ‘इन्ता हि’ दोअ्नु नेलाइ खान्धुर मापासु। 24 हाइपानु ‘कादोङ ख्रिस्ट’ हिघा दोअ्तेङ रो ‘कादोङ आगाधुइका’ हिघा दोअ्तेङ ढाटाइकालाइ ओल्हेतेङ लावा। जेङलि दोनु साल्तेङ दिङगिल्कालाइहेङ बुङ भाडकाइलि बाबारका भारभुसाइका काम रो सरबङको कामगेलाइ तिङपावा। 25 फोम पासु, का नेलाइहेङ लाम्फासोङ दोअ्पिका हिघा। 26 “द्याङगेलाइ नेलाइहेङ, ‘खाङसु, वा उदादाङका थामेता हि’ दोअ्लाउ बुङ नेलाइ बाहार ओल्हेतेङ मान्हेसु। कालाउ ‘खाङसु, वा लिअ्ता कोठागेलाइता हि’ दोअ्लाउ बुङ खान्धुर मापासु 27 हाइपानु जेसापा बिजुलि नुहेँसो चिल्कालाउ दिहेँथिकापाङ फाइसालाम्खे, एन्सा दोङ का द्याङको चान लोलाउ ज्यावा। 28 जेता सिकाजिउ हिखे, इन्ता सिघुनगेलाइ बुङ जोमावा! द्याङको चान तिङका दिना ( मर्कुस १३:२४-२७ ; लुका २१:२५-२८ ) 29 “इङको आपतको दिनाको ओदोङघरिन्हुअ्सो, बेला कितिकिति तावा, तालि फाइसालामलि लाअ्तावा। फुरुगेलाइ आदेलसो हुलावा रो आतेलको सरबङगेलाइ हेङगालाइन्हावा। 30 कालाउ द्याङको चानको चिनो आतेलता तिनावा रो सुमिङता गोताङ जात्यागेलाइ बिलाप पावा। एम्बालाइ का द्याङको चानहेङ आतेलको बादेलगेलाइता सरबङ रो बारा प्रतापसो लोतेङहिका तिनावा। 31 वा ताइको सादेलचरगेलाइहेङ धुतुरुको बारा गालाता दिङगिलावा। एम्बालाइ आतेललेता हिका सुमिङको चारपाहाङसो वाको साल्कालाइहेङ जोम्पावा। दुमिरिको सिङसो बिद्या ( मर्कुस १३:२८-३१ ; लुका २१:२९-३३ ) 32 “एला दुमिरिको सिङसो इदोइ बिद्या धिरसु: जेलाउ इङकोको दालेङ नोनो जेनावा रो नावा ल्हाअ्बा दोरावा, कालाउ धाङका पहर लोहोइ दोअ्तेङ नेलाइ गेसुखेना। 33 एन्सा दोङ नेलाइ बुङ जेलाउ इदोइ गोताङ काथा जेङका तिङस्वाना, कालाउ वा भेर्पाङ, फिनुताङ हि दोअ्तेङ गेसु। 34 जातिङको, का नेलाइहेङ दोअ्खा, इदोइ गोताङ मापोङघापाधाउ इदोइ खालको द्याङगेलाइ मुअ्तेङ मान्हावा। 35 आदेल रो सुमिङ मुअ्तेङ हानावा, कालाउ बुङ काङको कथन मुअ्तेङ मान्हावा। चालाक जेङलिगोइका बिद्या ( मर्कुस १३:३२-३७ ; लुका १७:२६-३० , ३४-३६ ) 36 “कालाउ बुङ इङको दिना रो पहर हेअ्लाउ ल्वाङ इङको हासुङ मागेखे। ना सादेलचरगेलाइ, ना का द्याङको चान दोङ गेखा। इदोइ काथाको बारेता परमेस्वर आबा खिनिङ गेखे। 37 का द्याङको चानको लोका बुङ नोआको दिनागेलाइभाइपाङ जेनावा। 38 हाइपानु जेसापा सुमिङ चिता दुबिकाखान्तेङ लाम्फा नोआ चिजाहाजलिअ्ता दुल्का दिनाथिकापा, द्याङगेलाइ चातेङहिका, आम्तेङहिका रो बिहु पातेङहिका पादोङघाखे। 39 कालाउ बाने लोतेङ एम्बालाइ झाराङहेङ झोपातेङ माचुम्पुपाधाउ एम्बालाइ हाइदोङ मागेहि। का द्याङको चान लोलाउ बुङ एन्साङ ज्यावा। 40 “इङको पहर न्हेमि मिलिङता ह्यावा, एमि चुमप्वावा रो भेनेङ लाअ्धिन्हावा। 41 न्हेमि बेबालाइ जान्ता म्हाइतेङहिका ह्यावा, एमि चुमप्वावा रो भेनेङ लाअ्धेन्हावा। 42 “इदोइखातिर नाङघातेङ हिसु, हाइपानु हिदोइ दिना नेलाइको प्रभु ल्वावा, इङको नेलाइ मागेस्वाना। 43 कालाउ बुङ इदोइ गेसु, साअ्को गिर्हि खुका न्हिसिङको हिदोइ पहरता लोखे दोअ्तेङ गिका हिनु, वा नाङघातेङ हिधावा रो ताइको साअ् खुलि मापिधावा। 44 इदोइखातिर नेलाइ बुङ त्यार हिसु, हाइपानु का द्याङको चान नेलाइ माचिताइका पहरता ल्वावा। रेम्का रो मारेम्का कामत्या ( लुका १२:४१-४८ ) 45 “खान्धुरि रो आकिलहिका कामत्या हासु एइ, जाइहेङ इङकोको गिर्हि ताइको जाहानको कामत्यालाइहेङ मुनासिपमुनासिप पहरता चालि प्याको दोअ्तेङ खाटाइका हिखे। 46 इङको कामत्या सहसाम्पा निङका ज्यावा, जाइहेङ गिर्हि लोलाउ एन्साङ पातेङहिका फतुर लागायावा। 47 जातिङको, का नेलाइहेङ दोअ्खा, गिर्हि इङकोहेङ ताइको गोताङ टाकाकाउरिको जिम्मा प्यावा। 48 कालाउ बुङ इङको आसाति कामत्या ‘काङको गिर्हि बेलोम तावा’ दोअ्का गेतेङ, 49 ताइमिदोफाङ काम पाका कामत्यागेलाइहेङ दान्हाइलि, म्हाकालाइदोफा चालि रो आम्लि पानु, 50 इङको कामत्याको गिर्हि इङको माचिताइका दिना रो मागिका पहरता थुकालिल्वावा। 51 कालाउ गिर्हि चिम्काटागेलाइको माझा थालप्यावा। जेता द्याङगेलाइ खारावा रो तासि रेअ्तावा।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.