मत्ति 21 - धिमालयरुसलेमता लोलाउ इसुहेङ जय पाका ( मर्कुस ११:१-११ ; लुका १९:२८-४० ; युहन्ना १२:१२-१९ ) 1 जेलाउ ओबालाइ यरुसलेमको भेर्पा जाइतुन आरदाङको बेथफागे देराता थुकालिलोहि, कालाउ इसु न्हेमि चात्यागेलाइहेङ एसा दोअ्तेङ दिङगिल्हि, 2 “नेलाइ भेर्पाको देराता हानेसु। इन्ता थुकातेसाङ नेलाइ एलोङ गाधा रो इङकोको चान धेउतेङ ताअ्का निङस्वाना। इङकोहेङ खाइतेङ काङकोता चुमासु। 3 एदि हासुङ नेलाइहेङ हाइ दोअ्नु ‘प्रभुहेङ याको जरुरि हि’ दोअ्सु रो वा ओदोङघरि इङको पिगिलावा।” 4 आगाधुइकासो धुइका कथन पोङघाको दोअ्तेङ इदोइ जेङका हि: 5 “सियोनको द्याङगेलाइहेङ दोअ्सु, खाङसु, नेलाइको राजा नेलाइकोता लोदोङखे, वा नोइका जेङतेङ गाधाता, गाधाको चानर्हुता दोङ धोल्तेङ लोदोङखे।” 6 कालाउ चात्यागेलाइ हानेहि रो इसुको दोअ्का भाइपाङ पाहि। 7 एम्बालाइ गाधाको चान आमा दोफाङ चुमाहि, एम्बालाइको गान्धिता ताइको धाबा दाअ्पिहि, इसु एम्बालाइर्हुता योम्हि। 8 हेन्जाङ द्याङगेलाइ ताइको धाबा दामाता दाअ्हि रो बोगेलाइ सिङको दालेङ पेङतेङ दामाता दाअ्पिहि। 9 इसुको आगा रो न्हुअ् तेका झाराङ द्याङगेलाइ एसा दोअ्तेङ र्हिकाइहि, “दाउदको खालको जय ज्याको! परमप्रभुको मिङता लोकालाइ सहसाम्पा निनाको!” 10 जेलाउ इसु यरुसलेमता दुल्हि, गोताङ पुरता खलबलि जेङहि। द्याङगेलाइ हिअ्लि तेङहि, “इदोइ हासु?” 11 इन्ता हिका द्याङगेलाइ जावाफ पिहि, “या गालिल माउजाको नासरत पुरसो लोका आगाधुइका इसु एइ।” इसु थानता हानेका ( मर्कुस ११:१५-१९ ; लुका १९:४५-४८ ; युहन्ना २:१३-२२ ) 12 कालाउ इसु परमेस्वरको थानता हानेहि। वा थानता चोलतेङपिअ्तेङ पाका झाराङहेङ गिल्गिल्हि। वा टाका सोकालाइको टेबुल रो पारेउ पिअ्कालाइको योम्का थामे थाइपिगिल्हि। 13 वा एम्बालाइहेङ दोअ्हि, “धरमकिताबता इसिका लेखेका हि: ‘काङको साअ् पुकार पाका साअ् जेङलि गोयाङ।’ कालाउ बुङ नेलाइ यासिहेङ डाकुगेलाइको आडा बान्हाइका हिसुन्हा।” 14 इङकोन्हुअ्सो कान्हा रो नेङगारागेलाइ थानता इसुकोता लोहि रो वा एम्बालाइहेङ एल्पाहि। 15 कालाउ बुङ जेलाउ मुल धामिगेलाइ, धरममास्टरगेलाइ चाहिँ वाको पाका भारभुसाइका काम तिङहि रो जामालाइ चोमालाइ थानता “दाउदको सान्तानको जय ज्याको!” दोअ्तेङ र्हिकाइका हिङहि, कालाउ एम्बालाइ चेरताम्पाहि। 16 एम्बालाइ इसुहेङ दोअ्हि, “हिङदोङसुखेना, एबालाइ हाइ दोअ्दोङखे?” कालाउ इसु एम्बालाइहेङ दोअ्हि, “हिङदोङखा, कालाउ बुङ ‘जामालाइ चोमालाइ रो दुदु आम्कालाइको नुइसो ना बाखिन्लि लागाइका हिन्हा’ दोअ्तेङ हाइ नेलाइ धरमकिताबता पर्हेका मान्थुसुन्हा?” 17 कालाउ एम्बालाइहेङ लाअ्तेङ वा यरुसलेम पुरसो ओल्हितेङ बेथानिया देराता हानेहि रो इन्ताङ बासा हि। मासेका डुम्रिको सिङ ( मर्कुस ११:१२-१४ , २०-२४ ) 18 ए र्हिमाङ यरुसलेम पुरभारि घुरिलाउ इसु म्हितुहि। 19 दामाको भेर्पा दुमिरिको सिङ तिङहि। वा इङको सिङको भेर्पा जाअ्हि, कालाउ बुङ इङकोता ल्हाअ्बाबिना बो हाइदोङ मानिङहि। कालाउ वा इङकोहेङ दोअ्हि, “एलासो नाता हेअ्लाउ फल मास्याको।” इङको दुमिरिको सिङ ओदोङघरि सेङहि। 20 इदोइ तिङतेङ चात्यागेलाइ भारभुसाइतेङ दोअ्हि, “इदोइ दुमिरिको सिङ हेसापा उदोङघरि सेङहि?” 21 इसु एम्बालाइहेङ दोअ्हि, “जातिङको, का नेलाइहेङ दोअ्खा, नेलाइ खान्धुर पातेङ हेअ्लाउ साङका मापासुन्हा पानु, दुमिरिको सिङहेङ जेदोङ पान्हाहि इङको खिनिङ माको, कालाउ बुङ इदोइ आरदाङहेङ बुङ ‘उअ्न्हातेङ जाहादिता हुल’ दोअ्नु एन्साङ ज्यावा। 22 खान्धुर पातेङ पुकारता जेदोङ र्हेस्वाना इङको नेलाइ निङस्वाना।” इसुको खाबराको बारेता हिअ्का ( मर्कुस ११:२७-३३ ; लुका २०:१-८ ) 23 इसु थान्ता दुल्हि कालाउ वा बिद्या पिलाउ मुल धामिगेलाइ, धरम मास्टरगेलाइ वाकोता लोतेङ दोअ्हि, “हिदोइ खाबाराहोइ ना निङतेङ इदोइ कामगेलाइ पादोङखेना? रो हासु नासेहेङ इदोइ खाबरा पिहि?” 24 इसु एम्बालाइहेङ दोअ्हि, “का बुङ नेलाइहेङ एलोङ काथा हिअ्ताङका। कासेहेङ इङकोको जावाफ पिसुन्हा पानु, का हिदोइ खाबाराहोइ इदोइ काम पाखा, इङको नेलाइहेङ दोअ्प्याङका। 25 ते दोअ्सु, युहन्नाको चिभुअ्लि हितासो जेङहि? परमेस्वर ना द्याङसो?” एम्बालाइ ताताइमिता एसा दोअ्तेङ काथा पालि तेङहि, “एला केलाइ हाइ दोअ्लि वाला? ‘परमेस्वरसो’ दोअ्ताङ पानु, ‘नेलाइ युहन्नाहेङ हाइपालि खान्धुर मापासुन्हा?’ दोअ्तेङ वा हिअ्तावा। 26 कालाउ बुङ ‘द्याङगेलाइसो’ दोअ्ताङ पानु, केलाइ द्याङगेलाइपाहासो थिन्हाखे। हाइदोनु झाराङ युहन्नाहेङ आगाधुइका दोअ्तेङ मानेखे।” 27 इदोइखातिर एम्बालाइ इसुहेङ उतर दोअ्हि, “केलाइ मागिन्हाखे।” कालाउ इसु दोअ्हि, “का बुङ हिदोइ खाबाराहोइ इदोइ काम पाखा, इङको नेलाइहेङ मादोताङका।” न्हेलोङ चानको तुलना 28 कालाउ इसु आरोङ दोअ्हि, “नेलाइ हाइ ठहर पासुखेना? एमि द्याङको न्हेमि चान हिघाखे। वा जेठाकोता लोतेङ दोअ्हि, ‘चान, हानितेङ नानि आङगुरबारिता काम पापि।’ 29 वा दोअ्हि, ‘का मान्हाङका।’ कालाउ बुङ न्हुअ्सो हानेका मन पातेङ वा हानेहि। 30 भेनेङ चानकोता लोतेङ वा एन्साङ दोअ्हि। चान दोअ्हि, ‘आबा, का हानाङका।’ कालाउ बुङ मान्हेहि। 31 एला इदोइ न्हेमिता हिदोइचाहिँ आबाको दोअ्का साअ्हि?” एम्बालाइ दोअ्हि, “दादा चाहिँ।” इसु एम्बालाइहेङ दोअ्हि, “जातिङको, का नेलाइहेङ दोअ्खा, तिरो ल्होपाकालाइ रो कासबिरिगेलाइ नेलाइखान्तेङ लाम्फा सादेलको सारभिता दुलावा। 32 हाइपानु युहन्ना नेलाइकोता रेम्का दामा तिम्पालि लोहि, कालाउ बुङ नेलाइ वासेहेङ खान्धुर मापासुन्हा। भुरुङ तिरो ल्होपाका रो कासबिरिगेलाइ वासिहेङ खान्धुर पाहि। नेलाइ इदोइ तिङतेङ बुङ कुकरम पालि मालाअ्सुन्हा, कालाउ वासेहेङ खान्धुर मापासुन्हा।” आध्यारगेलाइको तुलना ( मर्कुस १२:१-१२ ; लुका २०:९-१९ ) 33 इसु एम्बालाइहेङ दोअ्हि, “भेनेङ तुलना हिङसु। हासुङ एमि गिर्हि हिघाहि। जाइ बारिता आङगुर थिङहि रो इङकोको कोरबितिङ बेर्हेम खोराइहि। इन्ता किसमिस पेलिका एलोङ कोल ताअ्हि रो एलोङ चान्चा बान्हाइपिहि। कालाउ आध्यरगेलाइहेङ आध्या पितेङ बोमुलुक हानेहि। 34 जेलाउ किसमिस सान्तेका पहर जेङहि, वा ताइको आध्यारगेलाइकोता ताइ निङका भाग र्हुलि ताइ कामत्यागेलाइहेङ दिङगिल्हि। 35 कालाउ बुङ आध्यारगेलाइ वाको कामत्यागेलाइहेङ रिमतेङ एमिहेङ दान्हाइहि, भेनेङहेङ सेअ्हि रो भेनेङहेङ उन्ठुइहोइ तोहि। 36 आरोङ वा लाम्फाको खान्तेङ हेन्जा कामत्यागेलाइ दिङगिल्हि। एम्बालाइहेङ बुङ आध्यारगेलाइ इनसिकाङ आनिबानि पाहि। 37 “न्हुअ्सो वा ‘काङको चानहेङ ते एम्बालाइ मान पाङ’ दोअ्तेङ, ताइकोङ चानहेङ आध्यारगेलाइकोता दिङगिल्हि। 38 “कालाउ बुङ एम्बालाइ चानहेङ तिङतेङ ताताइमिता दोअ्हि, ‘या ते गिर्हिकोङ चान। लोसु, इङकोहेङ सेअ्ताइने रो इङकोको टाका काउरि ताइको बान्हाइने।’ 39 कालाउ एम्बालाइ इङकोहेङ रिम्तेङ आङगुरबारि बाहार चुमपुतेङ सेअ्हि।” 40 इसु हिअ्हि, “ते दोअ्सु, जेलाउ आङगुरबारिको गिर्हि ल्वावा कालाउ वा आध्यारगेलाइहेङ हाइ पावा?” 41 एम्बालाइ वासेहेङ दोअ्हि, “वा इङको आसातिगेलाइहेङ हेन्जाङ तु: पितेङ सेअ्तावा रो आङगुरबारि बो आध्यारगेलाइहेङ काम्हाइलि प्यावा। इङको कामाइकालाइ गिर्हिहेङ ताइ निङका भाग पहरताङ प्यावा।” 42 इसु एम्बालाइहेङ दोअ्हि, “हाइ नेलाइ धरमकिताबता पर्हेका मान्थुसुन्हा? जेदोङ उन्ठुइहेङ साअ् धाम्कालाइ खारेज पाहि, इङकोचाहिँ कोन्हाको मुल उन्ठुइ जेङहि, इदोइ काम ते परमप्रभु दोङ पाका हि, कालाउ केलाइको नजरता इदोइ भारभुसाइका हि। 43 “इदोइखातिर का नेलाइहेङ दोअ्खा, सादेलको सारभि नेलाइसो घिङतेङ परमेस्वरको लाल्साआन्सार चोलिका जात्याहेङ प्यावा। 44 इदोइ उन्ठुइर्हुता हुल्काचाहिँ चारामचुरुम तावा। कालाउ जाइर्हुता इङको उन्ठुइ हुलावा, वासेहेङ चाप्पापावा।” 45 जेलाउ मुल धामिगेलाइ रो फरिसिगेलाइ इसुको तुलना हिङहि, कालाउ एम्बालाइकोङ बारेता वा इदोइ दोअ्का हिघाहि दोअ्तेङ गेहि। 46 एम्बालाइ वासेहेङ रिम्लि भोहि कालाउ बुङ एम्बालाइ द्याङगेलाइदोफा थिहि, हाइदोनु द्याङगेलाइ इसुहेङ एमि आगाधुइका एइ दोअ्तेङ मानेघाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.