मत्ति 11 - धिमालइसु रो चिभुअ्लि पिका युहन्ना ( लुका ७:१८-३५ ) 1 इसु ताइको तेन्हे चात्यागेलाइहेङ इदोइ काथा दोअ्कान्हुअ्सो वा भेर्पाको देरागेलाइता द्याङगेलाइहेङ धिरपालि रो रेम्काबानाल हिङपालि हानेहि। 2 जेलाउ चिभुअ्लि पिका युहन्ना झ्यालखानाता हिलाउ ख्रिस्टको पाका कामगेलाइको बारेता हिङहि। कालाउ वा ताइको चात्यागेलाइहेङ इसुकोता हिअ्लि दिङगिल्हि। 3 एम्बालाइ लोतेङ इसुहेङ हिअ्हि, “केलाइ आस पाका ख्रिस्ट ना दोङ हिन्हा? ना केलाइ बोमि हासुङको दामा खानाङ?” 4 इसु एम्बालाइहेङ दोअ्हि, “नेलाइ हिङका रो तिङका काथागेलाइ युहन्नाहेङ दोअ्पिसु, 5 कान्हागेलाइ तिनावा रो नेङगारागेलाइ त्यावा। रोग्याल्होकालाइ एलावा। न्हातोङ माहिङकालाइ हिङलि दोका जेङका हि। सिकालाइ सिन्हुतेङ ल्होका हि रो निरधनगेलाइहेङ रेम्काबानाल हिङपादोङखे। 6 काङको खातिरसो ताइको खान्धुरता धुकचुक मापाकालाइ सहसाम्पा निङकालाइ जेनावा।” 7 जेलाउ चिभुअ्लि पिका युहन्नाको चात्यागेलाइ हानेकान्हुअ्सो इसु चिभुअ्लि पिका युहन्नाको बारेता इन्ता जोम्कालाइहेङ दोअ्लि तेङहि, “नेलाइ उदादाङका थामेता हाइ खाङलि ओल्हेसुन्हा? हाइ भेर्माता हेङगालाइन्हातेङ हिका नालेहेङ? 8 एन्सानु नेलाइ हाइपालि ओल्हेसुन्हा? हाइ जाङका धाबा लागाइका द्याङगेलाइहेङ खाङलि? जाङका धाबा लागाइकालाइ ते राजाको महलता कि हिखे। 9 नेलाइ हाइपालि ओल्हेसुन्हा कुनु? हाइ आगाधुइकाहेङ खाङलि? एइ, का नेलाइहेङ दोअ्खा, आगाधुइकाखान्तेङ बुङ बाराका एमिहेङ तिङका हिसुन्हा। 10 या इङकोङ जाइको बारेता धरमकिताबता लेखेन्हाका हि: ‘खाङ, का ताइको सादेलचरहेङ नाङको आगाआगा दिङगिलाङका, जाइ नाङको आगाता नाङको दामा त्यार पावा।’ 11 “जातिङको, का नेलाइहेङ दोअ्खा, चिभुअ्लि पिका युहन्नाखान्तेङ मानहिका बो हासुङ जोलोम र्हुका मान्थु। कालाउ बुङ सादेलको सारभिता जाइ झाराङखान्तेङ म्हुइका हि, इङको याखान्तेङ मानहिका ज्यावा। 12 चिभुअ्लि पिका युहन्नाको पहरसो एलाथिकापा सादेलको सारभि हापाङ आगाइदोङखे, कालाउ चेरफेअ्का द्याङगेलाइ बोलधाकाङ यासेहेङ रिम्खे। 13 हाइपानु युहन्नाको पहरथिकापा झाराङ आगाधुइकालाइ रो नियमसो सादेलको सारभिको बारेता धुइका हिघाखे। 14 नेलाइ काङको दोअ्का काथाता राजि जेङसुन्हा पानु, लोलिगोइका एलिया युहन्ना दोङ। 15 जाइको हिङका न्हातोङ हि, इङको हिनाको। 16 “एला इदोइ एलाको द्याङगेलाइहेङ का हाइदोफा दाज्याङका? इदोइ ते हातेता घाका म्हुम्हइका जामालाइ चोमालाइभाइका एइ, जाइ एम्बालाइको सानाइतिगेलाइहेङ काइखे रो दोअ्खे: 17 ‘केलाइ नेलाइको भाअ्सिङ बासुलि म्होअ्न्हाहि, कालाउ बुङ नेलाइ मान्हासुन्हा। केलाइ बिलौना पान्हाहि, कालाउ बुङ नेलाइ सुरता मापासुन्हा।’ 18 “कालाउ युहन्ना चातेङ रो आम्तेङ मालोहि, एम्बालाइ वासेहेङ मासान खोअ्का हि दोअ्तेङ दोअ्खे। 19 का द्याङको चान चातेङ रो आम्तेङ लोघा, कालाउ एम्बालाइ कासेहेङ दोअ्खे, ‘खाङसु, जिहुका, हेन्जा गोरा आम्का, तिरो ल्होपाका रो निठुरिगेलाइको सानाइति!’ कालाउ बुङ परमेस्वरको बुदिहेङ मुनासिप हि दोअ्तेङ वाको कामगेलाइसोङ साबित पाखे।” खान्धुर मापाकालाइहेङ चेतानि ( लुका १०:१३-१५ ) 20 जेदोङजेदोङ पुरता इसु हेन्जाङ भारभुसाइका कामगेलाइ पाका हिघाहि। इङको पुरको द्याङगेलाइ ताइको कुकरम लाअ्लि माकिअ्नाङसिङ वा एम्बालाइहेङ हाकाराइतेङ दोअ्लि तेङहि, 21 “धिकार खोराजिन रो बेथसेदा पुरको द्याङगेलाइहेङ! हाइपानु नेलाइता पाका सरबङ हिका कामगेलाइ टुरोस रो सिदोन पुरता पानु एम्बालाइ लाम्फा दोङ बोराको धाबा लागाइतेङ रो बुअ्सुरि लाइतेङ कुकरम पालि लाअ्धावा। 22 कालाउ बुङ का नेलाइहेङ दोअ्खा, निसापको दिनाता नेलाइको खान्तेङ ते टुरोस रो सिदोन पुरको द्याङगेलाइको दासा हेन्जा सहेलि दोका ज्यावा। 23 “ओइ कफर्नहुम पुरको द्याङगेलाइ, हाइ ना सादेलथिकापाङ तोल्हेन्हाना कुनु? ना पातेलथिकापा हुलन्हाना। हाइपानु नाता पाका सरबङ हिका कामगेलाइ सदोम पुरता पाकाहिनु इङको नानिको दिनाथिकापा हितेङहिधावा। 24 कालाउ बुङ का नेलाइहेङ दोअ्खा, निसापको दिनाता नाङको खान्तेङ ते सदोम पुरको दासा हेन्जा सहेलि दोका ज्यावा।” माइकालाइहेङ माइसापाका ( लुका १०:२१-२२ ) 25 इङको पहर इसु दोअ्हि, “ओइ आबा, सादेल रो सुमिङको प्रभु, का नासेहेङ च्याबास पिखा, हाइपानु ना इदोइ काथा आकिलहिका रो आकिलहिकालाइसो म्होअ्तेङ ताअ्न्हा, कालाउ बुङ जामालाइहेङ इदोइ तिङपान्हा। 26 एइ, आबा, हाइपानु नासेहेङ एसाङ पालि रेम्का लागेहि। 27 “काङको आबा गोताङ काथाको जिम्मा कासेहेङ पिका हि। आबाबिना चानहेङ हासुङ मानाल्खे रो चानबिना आबाहेङ हासुङ मानाल्खे। कालाउ बुङ चान जाइहेङ आबा नाल्पालि भोखे, एम्बालाइ खिनिङ आबाहेङ नाल्खे।” 28 “ओइ झाराङ माइका रो ल्हिकाहोइ एरेन्हाकागेलाइ काता लोसु, का नेलाइहेङ माइसा चापाङका। 29 काङको जुङगेले फासु रो कासो धिरसु, हाइदोनु का नोइका रो काङको कोन्धाङ नोम्का हि, कालाउ नेलाइ ताइको आत्माता माइसालि निङस्वाना। 30 हाइपानु काङको जुङगेले सुकाका हि रो काङको बोकाना होम्का हि।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.