लुका 23 - धिमालइसुहेङ पिलातसकोता चुमपुका ( मत्ति २७:१-२ , ११-१४ ; मर्कुस १५:१-५ ; युहन्ना १८:२८-३८ ) 1 इङकोन्हुअ्सो माहासभाको झाराङ सदस्यगेलाइ इसुहेङ रोमि बाडाहाकिम पिलातसकोता चुमपुहि। 2 कालाउ एम्बालाइ वासेहेङ फतुर लागाइतेङ दोअ्हि, “या ताइमिहेङ ‘का युहुदिगेलाइहेङ मुक्ति पिका राजा ख्रिस्ट दोअ्खे। कालाउ रोमि सारकारहेङ तिरो तिरिलि मागोयाङ’ दोअ्तेङ झाराङ द्याङगेलाइहेङ उल्काइका केलाइ निङन्हाहि।” 3 एम्बालाइको काथा हिङतेङ पिलातस इसुहेङ हिअ्हि, “हाइ ना यहुदि गेलाइको राजा हिना?” इसु दोअ्हि, “इङको ते ना ताइमिङ दोअ्दोङ खेना।” 4 पिलातस मुल धामिगेलाइ रो इन्ता जोम्का द्याङगेलाइहेङ दोअ्हि, “इदोइ द्याङहेङ का फतुर लागाइका थामे हाइ दोङ मातिङखा।” 5 कालाउ एम्बालाइ र्हिकाइतेङ दोअ्हि, “या गालिलसो सुरु पातेङ गोताङ यहुदिया रो इता बुङ ताइमिङ धिरपातेङ द्याङगेलाइहेङ केउपादोङखे।” 6 कालाउ पिलातस इदोइ काथा हिङतेङ, “हाइ इदोइ द्याङ गालिल माउजाकोङ बे?” दोअ्तेङ हिअ्हि। इसुहेङ हेरोदकोता चुमपुका 7 इसु राजा हेरोदको थामेको द्याङ दोअ्का काथा पिलातस गेतेङ वा इसुहेङ हेरोद एन्टिपासकोता दिङगिल्हि। इङको पहर हेरोद ताइमि बुङ यरुसलेमता दोङ हिघाहि। 8 इसुहेङ तिङलि निङलाउ हेरोद हेन्जाङ लेन्चा हि। हाइदोनु वा इसुको बारेता हिङका हिघाहि रो हेन्जाङ दिनासो वासेहेङ खाङलि मन पाका हिघाहि। वा इसुको भारभुसाइका काम पाका खाङलि निनाङका दोअ्तेङ आस पातेङ हिघाहि। 9 वा इसुहेङ हेन्जाङ काथा हिअ्हि कालाउ इसु हिदिङ बुङ जाबाफ मापिहि। 10 मुल धामिगेलाइ रो धरम मास्टरगेलाइ इसुको खिलापता ल्होतेङ हेन्जाङ माजेङका काथा पातेङ फतुर लागाइलि तेङहि। 11 इङकोन्हुअ्सो राजा हेरोद रो वाको पलटन इसुहेङ राउचिघातेङ लेङपिहि। ओबालाइ राजाको लागाइका धाबा भाइका इसुहेङ लागाइ पितेङ पिलातसकोता दोङ दिङगिल्हि। 12 लाम्फा हेरोद रो पिलातस मामिलिसुघाखे कालाउ इङको दिनासो एम्बालाइ मिलिलि तेङहि। इसुहेङ सेअ्लि भोका ( मत्ति २७:१५-२६ ; मर्कुस १५:६-१५ ; युहन्ना १८:३९-१९:१६ ) 13 कालाउ इङकोन्हुअ्सो पिलातस मुल धामिगेलाइ, यहुदि आगुवागेलाइ रो जानतागेलाइहेङ काइतेङ दोअ्हि, 14 “द्याङगेलाइहेङ उल्काइहि दोअ्तेङ नेलाइ यासिहेङ काङकोता चुमासुन्हा। का यासिहेङ नेलाइकोङ आगाता इदोइ द्याङहेङ केरकार पाहोइका। कालाउ नेलाइको दोअ्का भाइपाङ फतुर लागाइका काथा याकोता हाइ दोङ मानिङघा। 15 राजा हेरोद बुङ हाइदोङ फतुर लागाइका थामे मानिङतेङ यासिहेङ केलाइकोता दोङ घुरिपागिल्हि। खाङसु, या सिलिगोइका हाइ दोङ कसुर पानाङ मान्थु। 16 एन्साजेङलाउ एला का यासिहेङ कोर्रा लागाइतेङ लाअ्प्याङका।” 17 [हाइदोनु यहुदिगेलाइको लाअ्पिका पारबाता रोमि सारकार एमि काइदिहेङ लाअ्पिलि गोइघाखे।] 18 कालाउ झाराङ द्याङगेलाइ बाबारका गालापातेङ एसा दोअ्हि, “यासेहेङ जेसापालाउ बुङ सेअ्लि गोयाङ! भुरुङ केलाइको भाअ्सिङ बारब्बाहेङ लाअ्पि!” 19 (बारब्बाचाहिँ मुलुकद्रोहि हिघाहि रो द्याङगेलाइ सेअ्का अभियोगता वा थुनाता थुना निन्चाका हिघाहि।) 20 इसुहेङ लाअ्पिका ठहरसो पिलातस इन्ता हिका द्याङगेलाइहेङ आरोङ गावाइहि। 21 कालाउ एम्बालाइ झाराङ एखेताङ र्हिकाइतेङ दोअ्हि, “वासेहेङ कुरुसता टाङगाइ! कुरुसता टाङगाइ!” 22 कालाउ आरोङ सुम्खेता पिलातस एम्बालाइहेङ दोअ्हि, “हाइपालि? या हाइ कसुर पाका हि? काते यासिहेङ सेअ्लि दोङ गोयाङ दोअ्तेङ हाइदोङ फतुर लागाइका थामे मातिङखा। इङकोखातिर का यासिहेङ कोर्रा लागाइतेङ लाअ्प्याङका।” 23 कालाउ एम्बालाइ झन बारा गाला ओल्हेपातेङ दोअ्हि, “वासेहेङ कुरुसता टाङगाइलि दोङ गोयाङ!” एसापा द्याङगेलाइ र्हिकाइतेसाङ जितिहि। 24 कालाउ पिलातस इसुहेङ एम्बालाइको दोअ्का भाइपाङ पालि हुकुम पिहि। 25 वा उत्पात माचाइका द्याङ सेअ्का अभियोगता थुनानिङचाका बारब्बाहेङ लाअ्पिहि रो इसुहेङ चाहिँ हाइपाखे पाको दोअ्तेङ ओबालाइको खुरता लाअ्पिहि। इसुहेङ कुरुसता टाङगाइका ( मत्ति २७:३२-४४ ; मर्कुस १५:२१-३२ ; युहन्ना १९:१७-२७ ) 26 सिपाल्हाइ इसुहेङ इन्तासो चुमपुतेङ हानेलाउ दामाता कुरेनि दोअ्का थामेको सिमोनहेङ दुसुहि। वा ताइको देरासो यरुसलेम पुर भारि लोदोङघाखे। कालाउ सिपाल्हाइ इङकोहेङ रिम्तेङ इसुको कुरुस फालि लागाइतेङ इसुको न्हुअ् न्हुअ् तेलि लागाइहि। 27 हेन्जाङ द्याङगेलाइ इसुहेङ पिताइ दोङ घाहि। बेबालाइ बुङ खारतेङ रो बिलाप पातेङ इसुहेङ पिताइ दोङ घाहि। 28 एम्बालाइभारि घुरितेङ इसु दोअ्हि, “ओइ यरुसलेमको चामिन्दिगेलाइ, काङको भाअ्सिङ माको भुरुङ ताइमिको भाअ्सिङ रो ताइको चान चामिन्दिको भाअ्सिङ खारसु! 29 हाइदोनु इङको दिना बुङ लोदोङखे, जेलाउ द्याङगेलाइ ‘जामाल माजेङका कोखेगेलाइ रो दुदु आम्पालि मागोइका बेबालाइ आसिस निङकालाइ’ दोअ्तावा। 30 इङको पहर द्याङगेलाइ लाखगेलाइहेङ ‘केलाइ र्हुता हुल’ रो आरदाङगेलाइहेङ ‘केलाइहेङ पुराइ’ दोअ्तेङ दोअ्तावा। 31 हाइदोनु सिन्हुका सिङ हिलाउ ते एम्बालाइ एसा पाखे दोअ्नु झन सिङ सेङनु हाइ पाङ?” 32 कालाउ एम्बालाइ न्हेमि कसुरिहेङ बुङ इसु दोफाङ कुरुसता टाङगाइलि चुमपुदोङ घाहि। 33 एम्बालाइ खप्परे दोअ्का थामेता थुकालि लोहि। इन्ता एम्बालाइ इसुहेङ कुरुसता टाङगाइहि रो इङको न्हेमि कसुरिहेङ बुङ एमिहेङ वाको दाम्पाहा रो भेनेङहेङ केपाहा कुरुसता टाङगाइहि। 34 इङको पहर इसु दोअ्हि, “आबा, एम्बालाइहेङ माफ पि हाइदोनु एम्बालाइ हाइ पादोङखे इदोइ एम्बालाइ मागेखे।” कालाउ सिपाल्हाइ इसुको धाबा बाखाराइलि भाअ्सिङ चिथा ह्वाअ्हि। 35 द्याङगेलाइ जाअ्तेङ खाङतेङ हिघाखे। हाकिमगेलाइ वासेहेङ खिसि पातेङ दोअ्हि, “या बोमिहेङ सिन्हुपाहि, इदोइ परमेस्वरको ख्रिस्ट रो वाको साल्तेङ दिङगिल्का जन एइ पानु या ताइमिहेङ सिन्हुपाको।” 36 पलटनगेलाइ लोतेङ वासेहेङ पुर्हिका अङगुरको निघार आम्लिपितेङ गिला पातेङ दोअ्हि, 37 “यदि ना यहुदिगेलाइको राजा हिनु ते ताइमिहेङ सिन्हुपा।” 38 वाको पुरिङ र्हुता कुरुसता “या यहुदिगेलाइको राजा” दोअ्तेङ लेखेका फाला तोइतेङ ताअ्पिका हिघाहि। 39 इसु दोसाङ ताङगाइतेङ ताअ्का न्हेमि आपाराधिता एमि इसुहेङ गिला पातेङ दोअ्हि, “हाइ ना दोङ मुक्ति पिका ख्रिस्ट माको? एन्सानु ते ताइमिहेङ सिन्हुपा रो केलाइहेङ बुङ सिन्हुपा।” 40 कालाउ भेनेङ आपाराधि वासेहेङ चेरतेङ दोअ्हि, “ना परमेस्वरहेङ माथिखेना? ना बुङ ते वाकोङ भाइपा डाँड भोगिदोङखेना। 41 केलाइ ते मारेम्का काम पानाङसिङ इदि डाँड भोगेदोङन्हाखे। कालाउ खाङ, वा ते हिदि बुङ मारेम्का काम पानाङ दोङ मान्थुघाहि।” 42 इङकोन्हुअ्सो वा इसुहेङ दोअ्हि, “इसु, ना राजा जेङतेङ ताइको सारभिता घुरिलाउ कासेहेङ बुङ फोमपा।” 43 इसु वासेहेङ दोअ्हि, “का नासेहेङ दोअ्खा, नानि दोङ ना काङकोदोसा सादेलता ह्याना।” इसुको सास हानेका ( मत्ति २७:४५-५६ ; मर्कुस १५:३३-४१ ; युहन्ना १९:२८-३० ) 44 नितिमाको तेन्हे बजे जेङका हिघाहि। इङको पहरसो सुम बजेथिकापा गोताङ थामेता कितिकितिहि। 45 एन्सालाउ साने बुङ फाइसालामका मापिहि। थानलिअ्ता टाङगाइका पारदा न्हे टुकारा जेङतेङ थेअ्हि। 46 कालाउ बारा गालापातेङ इसु र्हिकाइतेङ दोअ्हि, “आबा, का काङको आत्माहेङ नाङकोङ खुर्ता पिखा!” इदोइ दोअ्तेङ वा सास लाअ्हि। 47 इसिका जेङका तिङतेङ रोमि पलटनको कप्तान परमेस्वरको परसङसा पातेङ दोअ्हि, “जातिङको इदोइ द्याङ धरम हिघाखे।” 48 कालाउ इन्ता खाङलि लोका द्याङगेलाइ इसिका बारदात जेङका तिङतेङ एम्बालाइ तुम्ताथेतेङ खारकाताङ ताताइको साअ्भारि घुरिहि। 49 इसुहेङ नाल्का रो गालिलसो वासेहेङ पिताइतेङ लोका बेबालाइ दुरेसोङ जाअ्तेङ इदोइ गोताङ बारदातगेलाइ खाङतेङ हिघाखे। इसुहेङ तोमता ताअ्का ( मत्ति २७:५७-६१ ; मर्कुस १५:४२-४७ ; युहन्ना १९:३८-४२ ) 50-51 महासभाको सदस्यगेलाइता यहुदिया माउजाको अरिमाथिया पुरसो लोका एमि योसेफ मिङ हिका द्याङ हिघाखे। वा रेम्का रो इमानि द्याङ हिघाखे रो वा सादेलको सारभिहेङ र्हुम्तेङ हिघाखे। माहासभाको द्याङगेलाइ इसुहेङ सेअ्लि ठहर पालाउ वा बिरोध पाका हिघाखे। 52 एला योसेफ पिलातसकोता हानितेङ इसुको सिका जिउ चुमपुलि हुकुम र्हेहि। 53 हुकुम निङतेङसाङ वा इसुको सिका जिउहेङ कुरुससो लेता खुअ्पाहि। कालाउ सिका जिउहेङ रेम्का सुतेको धाबाता लुन्दाइतेङ उन्ठुइता कोपेतेङ गुफाभाइपा बान्हाइतेङ ताअ्का तोमता ताअ्हि। इङको तोमता इङको खान्तेङ लाम्फा हासुको बुङ सिका जिउ ताअ्का मान्थुघाहि। 54 इङको दिनाचाहिँ त्यारपाका दिना दोअ्का पुनित माइसाका दिनाको लाङदिना हिघाहि। कालाउ पुनित माइसाका दिना लोलि तोम्का हिघाहि। 55 गालिल माउजासो इसुहेङ पिताइतेङ लोका बेबालाइ बुङ योसेफदोफाङ हानिहि रो तोमता इसुको सिका जिउहेङ ताअ्का खाङहि। 56 इङकोन्हुअ्सो एम्बालाइ साअ् घुरितेङ इसुको सिका जिउता लागाइका माला मालाका मलम रो आतर त्यार पाहि। कालाउ जुम्नि पुनित माइसाका दिना हिनाङ सिङ एम्बालाइ नियम मानितेङ माइसा चाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.