लुका 22 - धिमालयहुदि आगुवागेलाइ इसुहेङ सेअ्लि भोका ( मत्ति २६:१-५ , १४-१६ ; मर्कुस १४:१-२ , १०-११ ; युहन्ना ११:४५-५३ ) 1 सोडा मामिसालाइका तोले चाका लाअ्पिका पारबा लोलि तोम्का हिघाहि। 2 मुल धामिगेलाइ रो धरम मास्टरगेलाइ इसुहेङ सेअ्लि खाङघाखे। कालाउ द्याङगेलाइ दोफा थिनाङसिङ वासेहेङ सिकापा सेअ्का दाउभोलि तेङहि। 3 इङकोङ पहर इसुको तेन्हे चात्यागेलाइता एमि यहुदा इस्करियोत दोअ्का चात्याको मनता दियाबलस दुल्हि। 4 कालाउ वा मुल धामिगेलाइ रो थानको पलटनकोता हानितेङ “इसुहेङ हेसापा रिम्पापिलि द्वाङका” दोअ्तेङ एम्बालाइदोफा मतो पाहि। 5 इदोइ हिङतेङ एम्बालाइ लेङचातेङ वासेहेङ टाका पिलि राजि जेङहि। 6 इदोइ काथाता यहुदा बुङ राजि जेङहि रो द्याङगेलाइ मागेसिङ इसुहेङ सिकापा रिम्पालि दाउ भोलि तेङहि। लाअ्पिका पारबा ( मत्ति २६:१७-३० ; मर्कुस १४:१२-२६ ; युहन्ना १३:२१-३० ; १ कोरिन्थि ११:२३-२५ ) 7 कालाउ साउरि मामिसालाइका तोले चाका पारबाको दिना लोहि। जेदोङ दिना लाअ्पिका पारबाको भेडा भोक पिलि गोइघाखे। 8 इसु पत्रुस रो युहन्नाहेङ एसा दोअ्तेङ दिङगिल्हि, “हानेतेङ केलाइको भाअ्सिङ लाअ्पिका पारबाको भातेर त्यार पासु।” 9 इङको न्हेमि वासेहेङ हिअ्हि, “केलाइ इदोइ भातेर हिता त्यार पाङ?” 10 वा एम्बालाइहेङ दोअ्हि, “नेलाइ यरुसलेम पुर दुल्तेङसाङ घाल्सेता चि चुमतेङ हानिका एमि द्याङहेङ दुसुस्वाना। वा जेदोङ साअ्ता दुलावा नेलाइबुङ इन्ताथिकापा वासेहेङ पिताइतेङ हानेसु। 11 कालाउ नेलाइ इङको साअ् धनिहेङ दोअ्सु, ‘का ताइको चात्यागेलाइदोफा लाअ्पिका पारबा मानेका कोठा हिसो हि?’ दोअ्तेङ मास्टर नासेहेङ हिअ्लि दिङगिल्का हि। 12 कालाउ वा नेलाइहेङ र्हुताको तालाता साजाइतेङ ताअ्का फाराका कोठा तिमप्यावा। इन्ता दोङ लाअ्पिका पारबाको भात्यार त्यार पासु।” 13 एम्बालाइ हानेलाउ गोताङ काथा इसुको दोअ्का भाइपाङ निङहि। कालाउ एम्बालाइ लाअ्पिका पारबाको भात्यार इन्ताङ दोङ त्यार पाहि। 14 इङको भात्यार चाका पहर जेङकान्हुअ्सो इसु वाको साल्तेङ दिङगिल्कलाइदोफा चालि योम्हि। 15 कालाउ इसु एम्बालाइहेङ दोअ्हि, “पिर भोगिकाखान्तेङ लाम्फा का नेलाइदोफा लाअ्पिका पारबाको इदोइ भात्यार चालि बारा मन पाका हिघाखा। 16 एला का नेलाइहेङ दोअ्ताङका, सादेलको सारभिता इदोइ भात्यारको माने पुरा माजेम्पाधाउ का आरोङ इदोइ भात्यार माचाङका।” 17 कालाउ इङकोन्हुअ्सो इसु पेला चुमतेङ परमेस्वरहेङ च्याबास पितेङ दोअ्हि, “इदोइ र्हुसु रो नेलाइ झाराङ बाखाराइतेङ आम्सु। 18 का नेलाइहेङ दोअ्ताङका, एलाउसो सादेलको सारभि मालोपाधाउ का आरोङ अङगुरको निघार माआमाङका।” 19 इङकोन्हुअ्सो इसु तोले र्हुतेङ परमेस्वरहेङ च्याबास पितेङ वासेहेङ पेङहि रो चात्यागेलाइहेङ पितेङ दोअ्हि, “नेलाइहेङ पिका इदोइ काङको जिउ। एलासोउसो काङको फोमपालिको भाअ्सिङ एसापा दोङ चासु।” 20 एन्सा दोङ चाकान्हुअ्सो वा अङगुरको रस हिका पेला चुमतेङ चात्यागेलाइहेङ दोअ्हि, “इदोइ पेलाता हिका अङगुरको रस काङको हितिता धेउन्हाका नेलाइको भाअ्सिङ नावा केरा। इदोइ हिति नेलाइको भाअ्सिङ झोपाका हि। 21 “कालाउ खाङसु, कासेहेङ रिम्पालिभोका द्याङ काङकोदोफाङ चालि योम्का हि। 22 परमेस्वर लाम्फा दोङ लाल्सा पाका भाइपाङ का द्याङको चान सिलिदोङ गोयाङ। कालाउ धिकार हि, इङको द्याङहेङ! जाइ का द्याङको चानहेङ रिम्पावा।” 23 इदोइ काथा हिङतेङ चात्यागेलाइ “इसिका काम पाका हासु वाला?” दोअ्तेङ ता ताइमिताङ हिअ्लि तेङहि। झाराङ खान्तेङ बारा हासु? ( मत्ति २०:२५-२८ ; १९:२८ ; मर्कुस १०:४२-४५ ) 24 इङकोन्हुअ्सो चात्यागेलाइको माझाता झाराङ खान्तेङ बारा हासु दोअ्तेङ ता ताताइमिताङ गालबाजि जेङलि तेङहि। 25 इसु एम्बालाइहेङ दोअ्हि, “इदोइ दुनियाको राजागेलाइ चाहिँ ताइको रैतिगेलाइर्हुता सारभि पाखे रो खाबरा पाकालाइ ताइमिहेङ रेम्का दोअ्लि लागाइखे। 26 कालाउ नेलाइता चाहिँ इसिका माजेङसु। नेलाइता जाइ झाराङखान्तेङ बारालि भोखे वा झाराङखान्तेङ म्हुइका ज्याको। आगुवा जेङलि भोकाचाहिँ बोमिको सेवा पाको। 27 हाइदोनु बाराका हासु? चालि योम्का मालिक ना चालि पिका कामत्या? हाइ चालि योम्का मालिक माको? कालाउ काते नेलाइको माझाता चालि पिका कामत्या भाइपा जेङका हिघा। 28 “काङको गोताङ पिरको पहरता बुङ नेलाइ कादोफाङ हिसुन्हा। 29 काङको आबा कासेहेङ राज पालि खाबरा पिकाहि। एन्सा दोङ का बुङ नेलाइहेङ राज पालि खाबरा प्याङका। 30 काङको सारभिता नेलाइ कादोफाङ योम्तेङ चास्वाना। कालाउ गादिता योम्तेङ इस्राएलको तेन्हे खालको न्याय पास्वाना।” पत्रुस इसुहेङ मानाल्खा दोअ्का ( मत्ति २६:३१-३५ ; मर्कुस १४:२७-३१ ; युहन्ना १३:३६-३८ ) 31 इङकोन्हुअ्सो इसु दोअ्हि, “सिमोन, ओइ सिमोन हिङ! दियाबलस नेलाइ झाराङहेङ गहम याअ्का भाइपाङ याअ्तेङ कासो खेङलिको भाअ्सिङ परमेस्वरदोफा खाबरा र्हेका हि। 32 कालाउ नाङको खान्धुर मारामाको दोअ्तेङ का पुकार पाका हिघा। आरोङ काङकोता घुरिकान्हुअ्सो ना ताइको दादाओनेगेलाइहेङ बुङ खान्धुरता बोल्याका जेङलि साघाइ।” 33 पत्रुस दोअ्हि, “प्रभु, का नाङको दोफा थुनाता हिलि रो सिलि सुदाङ त्यार हिघा।” 34 कालाउ इसु दोअ्हि, “पत्रुस, जातिङको का नासेहेङ दोअ्ताङका; ना कासेहेङ सुम्खे थिकापा मामा नाल्खा दोअ्तेङ माको मादोअ्पाधाउ जुम्नि र्हिमा धाङगाइ माओकावा।” टाका, झोला रो कातिको बारेता 35 इसु चात्यागेलाइहेङ दोअ्हि, “जेलाउ नेलाइहेङ झोला, जुता रो टाकाबिना दिङगिल्घा; हाइ नेलाइहेङ हाइदोङ काथाको हरजा जेङहि?” एम्बालाइ दोअ्हि, “आहाँ माजेङहि।” 36 कालाउ इसु एम्बालाइहेङ दोअ्हि, “एलाचाहिँ टाका हिकालाइ टाका चुमाको, झोला हिकालाइ झोला चुमाको कालाउ काति मान्थुनु ताइको गुअ्का पिअ्तेङ लाउ बुङ काति चोलाको! 37 हाइदोनु का नेलाइहेङ दोअ्खा, धरम किताबता ‘वा आपाराधिगेलाइदोफा गान्देन्हाहि’ दोअ्तेङ लेखेन्हाका काथा काङको ज्यानता पोङघा जेङलि दोङ गोयाङ। जातिङको काङको बारेता लेखेन्हाका काथा पुरा बुङ जेङदोङ खे।” 38 चात्यागेलाइ दोअ्हि, “प्रभु, केलाइ दोफा इता न्हेलोङ काति हि।” इसु दोअ्हि, “इङको नु थेमाङ!” जैतुन आरदाङता इसुको पुकार ( मत्ति २६:३६-४६ ; मर्कुस १४:३२-४२ ) 39 इसु जेलाउभाइपा यरुसलेम पुरसो आसा दुरे हिका जैतुन दोअ्का आरदाङता हानिहि। वाको चात्यागेलाइ बुङ वाकोङदोफा हानिहि। 40 इङको थामेता थुकातेङ वा चात्यागेलाइहेङ दोअ्हि, “नेलाइ पुकार पातेङ हिसु रो जाचता मापरेसु।” 41 इङकोन्हुअ्सो इसु आसा उसो हानेतेङ तिर्हो थोतेङ पुकार पालि तेङहि। 42 वा दोअ्हि, “आबा, नाङको लाल्सा हिनु इदोइ पिरको बाति काङकोसो लाअ्पापि। कालाउ काङको लाल्सा माको, नाङको लाल्सा पुरा ज्याको।” 43 कालाउ सादेलसो एमि सादेलसो काथा चुमाका लोतेङ वासेहेङ बल रो सहिका सरबङ पिहि। 44 इसुको कोन्धाङ हेन्जाङ तु:तेङ पोङघाका हिघाहि कालाउ वा आरोङ हेन्जाङ पुकार पालि तेङहि। वाको भेम्ति हितिको थोपाभाइपा भोनोता ह्याअ्दोङ घाहि। 45 इसु पुकार पालि दोपातेङ चात्यागेलाइ हिका थामेता घुरितेङ लोलाउ एम्बालाइ ताइकोङ मन तु:पातेङ जिमतेङ हिका तिङहि। 46 वा एम्बालाइहेङ नाङघापातेङ दोअ्हि, “नेलाइ हाइपालि निन्धातेङ हिसुन्हा? ल्होसु रो दियाबलसको जाचेका पहरता कुकरमता वालालि मागोयाको दोअ्तेङ पुकार पासु!” इसु रिम निङचाका ( मत्ति २६:४७-५६ ; मर्कुस १४:४३-५० ; युहन्ना १८:३-११ ) 47 इसु इदोइ काथा दोअ्कादोअ्काताङ द्याङगेलाइको ए हुल द्याङगेलाइ इन्ता थुकालिलोहि। तेन्हे चात्याता यहुदा इस्करियोत दोअ्का एमि चात्याचाहिँ इङको द्याङगेलाइको आगा जेङतेङ इसुहेङ चुमाइलि वाको भेर्पा लोहि। 48 कालाउ इसु वासेहेङ दोअ्हि, “यहुदा, हाइ चुमाइतेङ ना का द्याङको चानहेङ धोका प्याना?” 49 कालाउ वाको भेर्पा हिका बो चात्यागेलाइ इन्ता लोलि तोम्का खातारा तिङतेङ इसुहेङ दोअ्हि, “प्रभु, हाइ केलाइ काति चालाइलि गोयाङ बे?” 50 एमि चात्याचाहिँ काति चालाइहि रो मुल धामिको कामत्याको दाम्पाहाको न्हातोङ दोङ पुक्कापापिहि। 51 कालाउ इसु, “जेङहोइ, लाअ्पि!” दोअ्तेङ इङको द्याङको न्हातोङ साइतेङ एल्पापिहि। 52 इसुहेङ रिम्लि लोकालाइता मुल धामिगेलाइ, पलटन, थानको चाउकिदार रो बो यहुदि आगुवागेलाइ हिघाहि। इसु एम्बालाइहेङ दोअ्हि, “हाइ का डाका? नेलाइ लाठि रो काति चुमतेङ कासेहेङ रिम्लि लोसुन्हा? 53 का दिनाङभाइपा थान्ता नेलाइदोफाङ हिघाखा। इङको पहर नेलाइ कासेहेङ रिम्लि आट मापासुन्हा! कालाउ एला नेलाइको काम पाका पहर लोहि रो दियाबलसको सरबङहोइ सारभि पाका पहर बुङ इदोइ दोङ।” पत्रुस इसुहेङ मामानेका ( मत्ति २६:५७-५८ , ६९-७५ ; मर्कुस १४:५३-५४ , ६६-७२ ; युहन्ना १८:१२-१८ , २५-२७ ) 54 इङकोन्हुअ्सो इङको द्याङगेलाइ इसुहेङ रिम्तेङ झाराङ खान्तेङ बारा धामिको साअ्ता चुमपुहि। पत्रुस बुङ दुरेसो वासेहेङ पिताइहि। 55 इन्ता द्याङगेलाइ सालेङता मे धोतेङ एम्दोङ घाहि। कालाउ पत्रुस लोतेङ एम्बालाइदोफाङ योम्हि। 56 एमि कामत्याइनि पत्रुसहेङ मे एम्तेङहिका तिङतेङ रेम्फा खाङतेङ दोअ्हि, “इदि द्याङ बुङ ते इसुदोफाङ हिघाखे।” 57 कालाउ पत्रुस दोअ्हि, “आनाउ, का वासेहेङ मानाल्खा।” 58 ए घुरिङन्हुअ्सो भेनेङ एमि वासेहेङ तिङतेङ दोअ्हि, “ना बुङ ते एम्बालाइकोङ सानाइति हिघाना।” पत्रुस दोअ्हि, “का ते माको!” 59 ए घान्टा झोको न्हुअ्सो भेनेङ एमि द्याङ दोअ्हि, “जातिङकोङ इदि द्याङ इसु दोफाङ हिघाहि। हाइदोनु या बुङ ते गालिल माउजाता हिका द्याङ दोङ रो।” 60 कालाउ पत्रुस दोअ्हि, “ना हाइ काथा दोअ्दोङ खेना? का ते हाइदोङ मागेखा!” वा एसा दोअ्तेङसाङ धाङगाइ ओहि। 61 इङकोङ पहर प्रभु इसु घुरितेङ पत्रुसहेङ खाङहि। कालाउ जुम्नि र्हिमा धाङगाइ ओकाखान्तेङ लाम्फा दोङ ना कासेहेङ सुम्खे थिकापा मामा नाल्खा दोअ्ताना दोअ्तेङ प्रभु इसुको दोअ्का काथा पत्रुस फोमपाहि। 62 कालाउ वा बाहार हानेतेङ घोनोघोपा खारहि। इसुको बादनाम ( मत्ति २६:६७-६८ ; मर्कुस १४:६५ ) 63 इसुहेङ र्हुम्का पलटन वासेहेङ गिल्ला पाहि रो दान्हाइहि। 64 कालाउ वाको मिँ थुम्पितेङ दान्हाइतेङ हिअ्हि, “ते दोअ्, नासेहेङ हासु दान्हाइहि?” 65 एसापा एम्बालाइ इसुहेङ जेङका माजेङका काथा पातेङ गिला पाहि। इसु महासभा को आगाता ( मत्ति २६:५९-६८ ; मर्कुस १४:५५-६५ ; युहन्ना १८:१९-२४ ) 66 कालाउ यहुदि आगुवा, मुल धामि रो धरम मास्टरगेलाइ ए र्हिमाङ जोम्हि। एम्बालाइ इसुहेङ माहासभता चुमातेङ दोअ्हि, 67 “ना मुक्ति पिका राजा ख्रिस्ट हिनु ते केलाइहेङ दोअ्।” इसु एम्बालाइहेङ दोअ्हि, “का दोअ्लाउ बुङ नेलाइ काङको काथा मासाअ्स्वाना। 68 का हाइदोङ हिअ्लाउ बुङ नेलाइ जावाफ मापिस्वाना। 69 कालाउ एला का द्याङको चान परमेस्वरको सरबङको दाम्पाहा योमाङका।” 70 कालाउ एम्बालाइ झाराङ दोअ्हि, “एन्सानु, ना दोङ परमेस्वरको चान हिना कुनु?” वा दोअ्हि, “नेलाइ दोअ्का भाइपाङ का वा दोङ।” 71 वाको काथा हिङतेङ एम्बालाइ दोअ्हि, “एला याको खिलापता केलाइहेङ बो हाइदोङ दासि मागोयाङ। हाइदोनु वाकोङ नुइसो केलाइ हिङन्हाहोइ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.