लुका 21 - धिमालरान्दिको चोर्हाइका भेटि ( मर्कुस १२:४१-४४ ) 1 इसु खाङलाउ धनि द्याङगेलाइ थानको दान बाक्साता ता ताइको भेटि चार्हाइतेङ हिघाहि। 2 इसु इन्ता एमि रान्दि बुङ तामाको न्हेपाइसा चार्हाइका तिङहि। 3 इदोइ तिङतेङ इसु दोअ्हि, “का नेलाइहेङ दोअ्खा, इदोइ गरिब रान्दि बेबाल बो झाराङ खान्तेङ हेन्जा भेटि चार्हाइका हि। 4 हाइदोनु ओबालाइ ताइको दाइका टाका काउरिसो भेटि चार्हाइहि। कालाउ इदोइ हाइदोङ मान्थुका रान्दि ते वाकोता हिका गोताङ दोङ चार्हाइ हि।” थान मुअ्का बारेता इसुको दोअ्का ( मत्ति २४:१-१४ ; मर्कुस १३:१-१३ ) 5 एखे वाको चात्यागेलाइ, “रे रेम्का उन्ठुइगेलाइसो बान्हाइका रो द्याङगेलाइ परमेस्वरहेङ चोर्हाइका थोकगेलाइसो बान्हाइका थान हेथे सोबाइका हि!” दोअ्तेङ काथा पादोङघाहि। कालाउ इसु एम्बालाइहेङ दोअ्हि, 6 “एला इसिका पहर बुङ ल्वावा, जेदोङ पहरता इता तिङका साअ्गेलाइको एलोङ उन्ठुइर्हुता भेनेङ उन्ठुइ बुङ माह्यावा। कालाउ इङको गोताङ र्हाअ्न्हावा!” 7 एम्बालाइ इसुहेङ हिअ्हि, “मास्टर, इदोइ हेअ्लाउ जेनाङ? कालाउ इसिका जेङलि तोम्होइ दोअ्तेङ केलाइ हेसापा गेलि?” 8 इसु दोअ्हि, “होसपातेङ हिसु, नेलाइहेङ हासुबुङ ढाटाइलि माद्वाको। हाइदोनु हेन्जाङ द्याङगेलाइ काङको मिङ ओर्हाइतेङ ‘ख्रिस्ट का दोङ’ दोअ्तेङ ल्वावा। कालाउ ‘पहर भेरपाङ हि’ दोअ्तावा। कालाउ एम्बालाइहेङ मापिताइसु। 9 जेलाउ धुम रो चेरसुका काथागेलाइ हिङतेङ नेलाइ माथिसु। हाइदोनु इदोइ घाटानागेलाइ जेङलि दोङ गोयाङ। कालाउ इङको दोङ घरि दुनिया मादोकावा!” 10 इसु आरोङ दोअ्हि, “जात्या जात्याको माझाता धुम ज्यावा। एलोङ सारभि भेनेङ सारभिको खिलापता ल्होकावा। 11 हेन्जाङ थामेगेलाइता बाबारका भुइचाल हानावा। जेसोकोसोङ आनिकाल जेङतेङ माहामारि फाइल्यावा। कालाउ आदेलता थिलिगोइपाङ काथागेलाइ जेङतेङ बा बारा भारभुसाइका चिनोगेलाइ तिनावा। 12 “कुलाउ इदोइ गोताङ काथा जेङका खान्तेङ लाम्फा नेलाइहेङ द्याङगेलाइ काङको मिङको खातिर रिमावा। नेलाइहेङ तु: पितेङ सान्तायावा, कचहरिसाअ्ता चुम्पुतेङ मुदा चालायावा। फतुर लागाइतेङ नेलाइहेङ थुनाता व्हाअ्तावा, कालाउ ओबालाइ नेलाइहेङ बारा हाकिमगेलाइ रो राजागेलाइकोता चुम्पुतेङ जाअ्पावा। 13 इङको पहर नेलाइहेङ काङको बारेता दासि पिलि रेम्का बखत जेनावा। 14 कालाउ नेलाइ ताइमि जोगिलि भाअ्सिङ हाइ दोअ्लि गोयाङ दोअ्तेङ सुर्ता मापासु। 15 हाइदोनु का नेलाइहेङ हाइ दोअ्लि गोइका इङको काथा रो आकिल प्याङका एन्साजेङलाउ नेलाइको हिदि बुङ बिरोधिगेलाइ नेलाइहेङ जितिलि माद्वावा रो नेलाइको कथन बुङ मापोन्हावा। 16 नेलाइको ताइकोङ आबा आमाइ, दादा ओने, ताइद्याङ रो सानाइतिगेलाइ सुदाङ नेलाइहेङ रिम्पावा। कालाउ नेलाइता हेअ्मिहेङ ते एम्बालाइ सेअ्तावा। 17 काङको खातिर झाराङ नेलाइहेङ खाङलि माकिअ्तावा। 18 कालाउ नेलाइको पुरिङको एलोङ पुसिङ बुङ माहुलावा। 19 इदोइ गोताङ काथागेलाइ सहेसुन्हा पानु नेलाइ हेअ्लाउ मानासाका ज्यान निङस्वाना।” यरुसलेम पुर मुअ्का बानाल ( मत्ति २४:१५-२१ ; मर्कुस १३:१४-१९ ) 20 “जेलाउ यरुसलेम पुरहेङ सत्रुको पलटन खोराइका तिङस्वाना, कालाउ नेलाइ गेसु, इदोइ पुरको बेला दोअ्लि तोम्होइ। 21 इङको पहर यहुदिया माउजाता हिकालाइ राभारि धाअ्ताको। पुरलिअ्ता हिकालाइ पुर लाअ्ताको रो देराभारि हिकालाइ पुरता मादुलाको। 22 हाइदोनु धरम किताबता लेखेन्हाका गोताङ काथा पुरा जेङलिको भाअ्सिङ इदोइ डाँडको बेला ल्वावा। 23 इङको पहर कोखेता रो कोल्हेता जामाल हिका बेबालाइ झन मारेम्फाङ तु: निङचावा। मुलुकता मारेम्का तु: ल्वावा रो परमेस्वरको दार इदोइ जात्याको द्याङगेलाइ र्हुता होकावा। 24 दुस्मनगेलाइ एम्बालाइहेङ कातिहोइ पाल्तेङ सेअ्तावा। हेथेहेङ रिम्तेङ बो मुलुकगेलाइता चुमप्वावा। कालाउ बो जात्यागेलाइको बेला पुरा माजेम्पाधाउ एम्बालाइ यरुसलेमहेङ याङतेङ ताअ्तावा। द्याङको चान लोका बारेता ( मत्ति २४:२९-३१ ; मर्कुस १३:२४-२७ ) 25 “सान्हे, तालि रो फुरुगेलाइता भारभुसाइका चिनोगेलाइ तिनावा। जाहादि र्हिकाइका रो बाबारका लहर तिङतेङ सुमिङको गोताङ जात्याको द्याङगेलाइ थितेङ आत्यावा। 26 सुमिङता जेङलि खाङका काथागेलाइ फोमपातेङ द्याङगेलाइ थितेङ झाका लोनावा हाइदोनु आदेलको गोताङ सरबङगेलाइ डगमगाइन्हावा। 27 इङकोन्हुअ्सो का द्याङको चान बादेलता सरबङ रो प्रतापता लोकाताङ पाका द्याङगेलाइ तिनावा। 28 इसिका काथा जेङतेङसाङ माथिसिङ ल्होतेङ र्हुता खाङसु हाइदोनु नेलाइको मुक्ति भेर्पाङ लोदोङखे।” राबरा सिङको बिद्या ( मत्ति २४:३२-३५ ; मर्कुस १३:२८-३१ ) 29 इङकोन्हुअ्सो इसु एम्बालाइहेङ इदोइ तुलनाको आकारता इसिका काथा दोअ्हि, “राबरा रो बो सिङगेलाइहेङ खाङसु, 30 एम्बालाइता म्हुइका नावा ल्हाअ्बा दोर्का तिङनु नेलाइ बाअ्सार लोहोइ दोअ्तेङ गेसुखेना। 31 एन्साङ पातेङ काङको दोअ्का इदोइ गोताङ काथागेलाइ पुरा जेङका तिङलाउ सादेलको सारभि लोलि तोम्होइ दोअ्तेङ नेलाइ गेस्वाना। 32 का नेलाइहेङ दोअ्ताङका, इदोइ गोताङ काथा पुरा माजेम्पाधाउ इदोइ पुस्ता बितितेङ मान्हावा। 33 आदेल रो सुमिङ मुअ्तेङ हानावा कालाउ काङको दोअ्का काथागेलाइ मारामावा। चालाक जेङतेङ हिसु 34 “नेलाइ चालाक जेङतेङ हिसु। हेन्जा भोज भात्यारता मालागेसु। म्हातेङ माहिगिल्सु रो इदोइ ज्यानको भाअ्सिङ सुर्ता मापासु। माकोनुते नेलाइको मन बोधाला तावा। इङको दिना नेलाइ माचिताइका पहरता ल्वावा। 35 हाइदोनु इङको दिना सुमिङता हिका गोताङ द्याङगेलाइ र्हुता ल्वावा। 36 एन्साङ पातेङ जेलालाउ बुङ जागितेङ हिसु। ‘इङको गोताङ थिलिगोइका काथागेलाइसो बान्चेतेङ का द्याङको चानको आगाता जाअ्लि दोःका सरबङ केलाइहेङ पिसु’ दोअ्तेङ नेलाइ परमेस्वरदोफा दिनाङ पुकार पासु।” 37 इङको दिनागेलाइता इसु नितिमा थानता हानेतेङ द्याङगेलाइहेङ धिरपाघाहि कालाउ दिलिमा पुरसो ओल्हेतेङ जैतुन दोअ्का आरदाङता बासाहिलि हानेघाहि। 38 झाराङ द्याङगेलाइ वाको कथन हिङलि ए र्हिमाङ थानता जोम्घाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.