लुका 18 - धिमालरान्दि बेबाल रो न्याधिसको तुलना 1 एनि इसु चात्यागेलाइहेङ दिनाङ पुकार पालिगोयाङ रो हरेस माचासु दोअ्तेङ गेपालि एसा दोअ्हि, 2 “हिदिङ पुरता एमि न्याधिस हिघाखे। वा परमेस्वरहेङ बुङ माथिघाखे रो द्याङहेङ बुङ वास्ताङ मापाघाखे। 3 इङकोङ पुरता एमि रान्दि बेबाल बुङ हिघाखे। वा जेलाउ बुङ न्याधिसकोता हानितेङ दोअ्घाहि, ‘काङको झागारियाको रो काङको माझाता हिका झागारा मिलि पापि।’ 4 हेन्जा दिना थिकापा वा रान्दिको काथाङ माहिम्पिहि। कालाउ न्हुअ्सो वा मन मनता फोमपाहि, ‘का परमेस्वरहेङ बुङ माथिका रो द्याङगेलाइहेङ बुङ वास्ताङ मापाखा! 5 कालाउ यिदोइ रान्दि कासेहेङ हेन्जाङ तु: पिनाङसिङ याको न्याय पापिलि गोयाङ। माकुनु ते वा घरि घरि काङकोता लोतेङ कासेहेङ दोङ सान्तायावा।’” 6 कालाउ आरोङ इसु दोअ्हि, “इङको आसाति न्याधिसको काथा फोमपासु। 7 एन्सा दोङ न्हिसिङ नितिमा परमेस्वरहेङ पुकारा पाकालाइ ताइको जनगेलाइहेङ वा न्याय मापाप्यावा कुनु? हाइ वा ताइ द्याङगेलाइहेङ मदत मापासिङ खाङतेङ खिनिङ ह्यावा कुनु? 8 का नेलाइहेङ दोअ्ताङका, वा ताइ द्याङगेलाइहेङ मार्फा न्याय पाप्यावा। कालाउ का द्याङको चान लोलाउ हाइ वा सुमिङता खान्धुर पाकालाइ निनावा?” फरिसि रो पोत ल्होपाकाको तुलना 9 ताइमिहेङ खिनिङ धरम फोमपाका रो बोमिहेङ हेला पाका द्याङगेलाइहेङ इसु तुलनाको आकारता इसिका काथा दोअ्हि, 10 “फरिसि रो लेबि न्हेमि परमेस्वरको थानता पुकार पालि हानिहि। 11 इङको फरिसि आसा उसो जाअ्तेङ एसापा पुकार पालि तेङहि, ‘परमेस्वर आबा, का नासेहेङ च्याबास पिखा; हाइपानु का बो द्याङगेलाइ भाइपा दिअ्का रो बाइमान मान्थुघा। का दुराचार बुङ पानाङ मान्थुघा। कालाउ का इङको लेबि द्याङ भाइका बुङ मान्थुघा। 12 का ए आथारता न्हेखेअ् म्हितुपाङ हिखा रो काङको निङका गोताङ थोकको ते भागको ए भाग नासेहेङ पिखा।’ 13 “कालाउ लेबि द्याङ बुङ दुरेङ जाअ्तेङ सादेल भारि खाङलि आँट दोङ मापासिङ तुम्ता थेतेङ दोअ्हि, ‘परमेस्वर आबा, का भाइका कुकरमिहेङ दाया पा!’” 14 कालाउ इसु काथा दोपातेङ दोअ्हि, “का नेलाइहेङ दोअ्ताङका, इदोइ फरिसि खान्तेङ बुङ लेबि द्याङ परमेस्वरको नजरता धरम जेङतेङ ताइको साअ् घुरिहि। हाइदोनु जाइ ताइमिङहेङ बारा पालि खाङखे वा झाराङ खान्तेङ म्हुयावा। कालाउ जाइ ताइमिहेङ म्हुइ पालि खाङखे वा झाराङ खान्तेङ बारावा।” इसु जामालाइहेङ आसिस पिका ( मत्ति १९:१३-१५ ; मर्कुस १०:१३-१६ ) 15 एनि द्याङगेलाइ ताइको जामालाइहेङ इसु ताइको खुर ताअ्तेङ आसिस प्याको दोअ्तेङ वाकोता चुमाहि। इदोइ तिङतेङ चात्यागेलाइ जामालाइको आबा आमाइहेङ हाकाराइहि। 16 कालाउ इसु एम्बालाइहेङ काइतेङ दोअ्हि, “इदोइ जामालाइहेङ काङकोता लोलि पिसु रो एम्बालाइहेङ मारोकेसु। हाइदोनु सादेलको सारभि इसिकालाइको भाअ्सिङ दोङ दोअ्खे। 17 जातिङको का नेलाइहेङ दोअ्ताङका, सादेलको सारभिहेङ जामालाइ भाइपाङ मार्हुपाधाउ हासु बुङ इङको लिअ्ता दुल्लि मानिनावा।” धनि द्याङ रो सादेलको सारभि ( मत्ति १९:१६-२९ ; मर्कुस १०:१७-३१ ) 18 इन्ता एमि यहुदिगेलाइको हाकिम लोतेङ इसुहेङ हिअ्हि, “रेम्का मास्टर, हेअ्लाउ मानासाका ज्यान निङलि का हाइपालि गोयाङका?” 19 इसु वासेहेङ दोअ्हि, “ना हाइपालि कासेहेङ रेम्का दोखेना? परमेस्वर खिनिङ रेम्का हि; वा बिना बो हासु बुङ रेम्का मान्थु। 20 नासेहेङ परमेस्वरको नियमको हुकुमगेलाइ थाहादोङ हि; दुराचार मापासु, द्याङ मासेअ्सु, माखुसु, ढाटाइतेङ दासि मापिसु कालाउ ताइको आबा आमाइहेङ आदर पासु।” 21 इङको द्याङ दोअ्हि, “इदोइ गोताङ हुकुमगेलाइ ते का आतुइनासोङ मानितेङ लोकाङ हिघा।” 22 इदोइ हिङतेङ इसु वासेहेङ दोअ्हि, “ना आरोङ बुङ एलोङ काम पालि गोइका हिदोङ हि। नाङको दोफा हिका गोताङ टाका काउरि पिअ्तेङ हाइदोङ मान्थुकालाइहेङ बाखाराइपि। कालाउ खिनिङ ना सादेलको टाका निनाना। कालाउ ना लोतेङ कासेहेङ पिताइ।” 23 इदोइ काथा हिङतेङ वा हेन्जाङ मन तु:पाहि हाइदोनु वा हेन्जाङ धनि हिघाखे। 24 वाको मन तु:पाका तिङतेङ इसु दोअ्हि, “खाङ, धनि द्याङहेङ सादेलको सारभिता दुल्लि हिसिका मुस्किल जेङखे माको? 25 हाइदोनु धनि द्याङ सादेलको सारभिता दुल्का खान्तेङ उटहेङ बिन्दुको कानाता दुल्लि सुकातावा!” 26 इदोइ काथा हिङकालाइ इसुहेङ हिअ्हि, “एन्सा जेङनु हासु मुक्ति निङलि द्वाङ कुनु?” 27 इसु एम्बालाइहेङ दोअ्हि, “द्याङगेलाइको पालि मादोका हिदि बुङ कामगेलाइ परमेस्वर खिनिङ पालि द्वावा।” 28 इङकोन्हुअ्सो पत्रुस दोअ्हि, “खाङ, केलाइ ताइको साअ् द्वार दोङ लाअ्तेङ केलाइ नासेहेङ पिताइका हिनाहि।” 29 कालाउ इसु एम्बालाइहेङ दोअ्हि, “जातिङको का नेलाइहेङ दोअ्खा, सादेलको सारभिको भाअ्सिङ जाइ ताइको आबा आमाइ, दादा ओने, बेअ्, चान चामिन्दि रो साअ्द्वार लाअ्कालाइ, 30 एला दोङ इङको खान्तेङ हेन्जा निनावा। कालाउ लोका जुगता हेअ्लाउ मानासाका ज्यान निनावा।” इसु आरोङ ताइको सिका बारेता दोअ्का ( मत्ति २०:१७-१९ ; मर्कुस १०:३२-३४ ) 31 इसु ताइको तेन्हे मुल चात्यागेलाइहेङ एपाहा काइपुतेङ दोअ्हि, “हिङसु, एला केलाइ यरुसलेम भारि हाने न्हाखे। इन्ता आगाधुइकालाइ द्याङको चानको बारेता लेखेका गोताङ काथागेलाइ एला इन्ता पुरा जेनावा। 32 एन्साङ वासेहेङ रिमतेङ बो जात्यागेलाइको खुर्ता सुमप्यावा। एम्बालाइ वासेहेङ गिल्ला पावा, लेदेरपा रो थोअ्तावा। 33 कोर्रा लागाइतेङ क्रुसता टाङगाइतेङ सेअ्तावा। कालाउ वा सुम्निता आरोङ सिकासो सिन्हुतेङ ल्होकावा।” 34 कुलाउ चात्यागेलाइ इदोइ काथागेलाइ एलोङ बुङ मागेहि। हाइदोनु इदोइ काथाको माने एम्बालाइसो म्होअ्का हिघाहि। इदोइखातिर इसु हाइ दोअ्हि दोअ्तेङ एम्बालाइ ठहर दोङ पालि मादोहि। इसु मि मातिङकाहेङ एल्पाका ( मत्ति २०:२९-३४ ; मर्कुस १०:४६-५२ ) 35 इसु यरिहो पुरता थुकालि तोम्लाउ एमि मिँ मातिङका द्याङ दामाको भेर्पा योम्तेङ र्हेतेङ हिघाहि। 36 हेन्जाङ द्याङगेलाइ इङकोङ दामा पाहासो हानिका गेतेङ इङको मि मातिङका द्याङगेलाइहेङ हिअ्हि, “इता हाइ जेङदोङ खे?” 37 द्याङगेलाइ वासेहेङ दोअ्हि, “नासरत दोअ्का थामेको इसु इतासो हानेदोङखे।” 38 इदोइ काथा हिङतेङ इङको मि मातिङका द्याङ र्हिकाइतेङ दोअ्हि, “दाउदको चान इसु, कासेहेङ दाया पा!” 39 आगाआगा हानिका द्याङगेलाइ वासेहेङ “सिकापा हि” दोअ्तेङ हाकाराइहि। कालाउ वा झन र्हिकाइतेङ दोअ्हि, “दाउदको चान, कासेहेङ दाया पा!” 40 कालाउ इङको द्याङ र्हिकाइका हिङतेङ इसु “वासेहेङ इता चुमासु” दोअ्हि। कालाउ द्याङगेलाइ वासेहेङ इसुको भेर्पा चुमालाउ इसु वासेहेङ हिअ्हि, 41 “का नाङको भाअ्सिङ हाइ पापिलि गोयाङ दोअ्तेङ लाल्सा पाखेना?” वा दोअ्हि, “प्रभु, का आरोङ मिँ तिङलि निनाको!” 42 इसु दोअ्हि, “नाङको खान्धुरसो एला ना मिँ तिङका जेङन्हा।” 43 उदोङघरि वा मि तिङका जेङहि रो परमेस्वरको मिङ तोल्हेतेङ इसुहेङ पिताइहि। इदोइ तिङतेङ झाराङ द्याङगेलाइ बुङ परमेस्वरको मिङ तोल्हेहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.