युहन्ना 6 - धिमालइसु नाहाजारहेङ चापाका ( मत्ति १४:१३-२१ ; मर्कुस ६:३०-४४ ; लुका ९:१०-१७ ) 1 इङकोन्हुअ्सो इसु गालिलको चावान्दि पारातेङ ओदोइपार हानिहि। (जाइहेङ तिबेरियासको चावान्दि बुङ दोअ्खे।) 2 कालाउ द्याङगेलाइको एलोङ बाराका चेअ्सु वासेहेङ पिताइलि तेङहि। हाइदोनु वा मासाअ्धेकालाइहेङ एल्पाका एम्बालाइ तिङका हिघाखे। 3 इसु आरदाङर्हुता हानेहि रो ताइको चात्यागेलाइदोफा इन्ता योम्हि। 4 इङको पहर यहुदिगेलाइको लाअ्पिका पारबा लोलि तोम्का हिघाहि। 5 द्याङगेलाइको बारा चेअ्सु ताइमिभारि लोका तिङतेङ इसु ताइको चात्या फिलिपहेङ दोअ्हि, “इदोइ द्याङगेलाइहेङ चापालि केलाइ हितासो तोले चोलतेङ चुमालि द्वाङ?” 6 इसु वाको जाच पालि इदोइ दोअ्का हिघाहि, हाइदोनु वा जेदोङ पालि भोका हिघाखे, इङको वा गेघाखे। 7 फिलिप वासेहेङ दोअ्हि, “इता हिका झाराङहेङ आतुतुइपा तोले बाख्राइलाउ बुङ न्हेसाइ रुपाको टाकाको तोलेहोइ एम्बालाइहेङ माथेमावा।” 8 इसुको चात्यागेलाइता ए मि, सिमोन पत्रुसको ओने अन्द्रियास दोअ्हि, 9 “इता ए मि वाजानदोफा उवाको नालोङ तोले रो न्हेलोङ हाया हि। कालाउ बुङ इदोइ हेन्जाङको भाअ्सिङ इदोइहोइ हाइ थेमावा कुनु?” 10 इसु दोअ्हि, “द्याङगेलाइहेङ योम्लि लागाइसु।” इन्ता हेन्जा घासि हिका चाउर हिघाहि रो एम्बालाइ झाराङ द्याङगेलाइहेङ इन्ताङ योम्पाहि। इन्ता योम्कालाइता वाबालाइ खिनिङ नाहाजार हिघाखे। 11 कोलाउ इसु नालोङ तोले रो न्हेलोङ हाया र्हुतेङ परमेस्वरहेङ च्याबास पिकान्हुअ्सो इन्ता योम्कालाइहेङ बाख्राइपिलि लागाइहि। 12 जेलाउ एम्बालाइ घाइपाङ चाहि, कोलाउ वा ताइको चात्यागेलाइहेङ दोअ्हि, “दाइका जोम्पासु रो आतुइसा बुङ मानासाको।” 13 एम्बालाइ चातेङ दाइका उवाको नालोङ तोले रो न्हेलोङ हायाको पेङन्हाका टुकारा जोम्पालाउ तेन्हे डाल्हो पोङघाहि। 14 इसुको पाका सरबङहिका कामगेलाइ तिङतेङ द्याङगेलाइ दोअ्हि, “जातिङको, दुनियाता ल्वाङ दोअ्तेङ केलाइको आस पाका आगाधुइका वा दोङ हि।” 15 एम्बालाइ लोतेङ वासेहेङ बलजफ्ति चुम्पुतेङ राजा बान्हाइलि भोदोङखे दोअ्का गेतेङ इसु आरोङ एक्लाङ आरदाङभारि हानेहि। इसु चिर्हुता तेका ( मत्ति १४:२२-३३ ; मर्कुस ६:४५-५२ ) 16 दिलिमा जेङकान्हुअ्सो इसुको चात्यागेलाइ जाहादिभारि हानेहि। 17 कालाउ नाउता धोल्तेङ एम्बालाइ जाहादि उदोइपार कफर्नहुमभारि हानेलि तेङहि। इङको पहर कितिकितिका जेङका हिघाहि रो इसु एलाथिकापा एम्बालाइकोता लोनाङ मान्थुघाहि। 18 कालाउ बाराका भेर्मा लोनाङ, जाहादिको लहर उलालि तेङहि। 19 ना तु किलोमिटर नाउ ख्याइतेङ हानेकान्हुअ्सो एम्बालाइ इसुहेङ जाहादिर्हुता तेतेङ नाउको भेर्पा लोतेङहिका तिङहि, कालाउ एम्बालाइ थिहि। 20 इसु एम्बालाइहेङ दोअ्हि, “का एइ, माथिसु।” 21 चात्यागेलाइ वासेहेङ लेङचातेङ नाउता धोल्पाहि रो इङकोन्हुअ्सो एम्बालाइ हानिका थामेता नाउ थुकालिलोहि। 22 जाहादि ओदोइपार हिका द्याङगेलाइ जुम्निदिना इन्ता एलोङ खिनिङ नाउ हिका तिङहि। एम्बालाइ गेघाखे, इसु ताइको चात्यागेलाइदोफा नाउता धोल्का मान्थुघाखे, कुलाउ वाको चात्यागेलाइ खिनिङ हानेका हिघाखे। 23 कोलाउ तिबेरियाससो बो नाउगेलाइ इङको थामेको भेर्पा लोहि, जेता प्रभु च्याबास पिकान्हुअ्सो एम्बालाइ तोले चाका हिघाखे। 24 इसु रो वाको चात्यागेलाइ इन्ता माहिका गेतेङ इङको द्याङगेलाइ इसुहेङ भोतेङ नाउगेलाइता धोल्तेङ कफर्नहुमता हानेहि। ज्यानको तोले 25 एम्बालाइ इसुहेङ जाहादि ओदोइपार दुसुतेङ वासेहेङ हिअ्हि, “मास्टर, ना इता हेअ्लाउ लोन्हा?” 26 इसु एम्बालाइहेङ दोअ्हि, “जातिङको का नेलाइहेङ दोअ्खा, नेलाइ चिनोगेलाइ तिङतेङ माको, कुलाउ घाइपाङ तोले चाका खातिर कासेहेङ भोसुखेना। 27 मुअ्तेङ हानेका चाकाको भाअ्सिङ मिनेत मापासु, कुलाउ असिम ज्यानथिकापा हिका चाकाको भाअ्सिङ मिनेत पासु, जाइ द्याङको चान नेलाइहेङ प्यावा। हाइदोनु याकोङ भाअ्सिङ परमेस्वर आबा वासेहेङ खाटाइतेङ दिङगिल्का एइ।” 28 एम्बालाइ वासेहेङ हिअ्हि, “परमेस्वरको चाहापाका काम पालि केलाइ हाइ पालिगोयाङ?” 29 इसु एम्बालाइहेङ दोअ्हि, “परमेस्वरको काम इदोङ एइ: जाइहेङ वा दिङगिल्हि वार्हुता खान्धुर पासु।” 30 एम्बालाइ वासेहेङ दोअ्हि, “ना हाइ चिनो तिङपाना, इङको केलाइ खानाङ रो नासेहेङ खान्धुर पाङ? ना हाइ पाना? 31 केलाइको आबाखालगेलाइ उदादाङका थामेता मन्न चाहि, जेसापा लेखेन्हाका हि, ‘वा एम्बालाइहेङ चालि सादेलसो तोले पिहि।’” 32 इसु एम्बालाइहेङ दोअ्हि, “का नेलाइहेङ दोअ्खा, नेलाइहेङ सादेलसो तोले पिका मोसा माको, कुलाउ सादेलसो नेलाइहेङ जातिङको तोले पिका काङको आबा हि। 33 हाइदोनु परमेस्वरको तोले इङकोङ एइ, जाइ सादेलसो खुअ्तेङलोखे रो दुनियाहेङ ज्यान पिखे।” 34 एम्बालाइ वासेहेङ दोअ्हि, “मास्टर, इङको तोले केलाइहेङ दिनाङ पि।” 35 इसु एम्बालाइहेङ दोअ्हि, “ज्यानको तोले का एइ। काता लोका माम्हित्वावा रो कासेहेङ खान्धुर पाका हेअ्लाउ आम्लिमाकिअ्तावा। 36 का नेलाइहेङ दोअ्काङ हिघा, नेलाइ कासेहेङ तिङका हिसुन्हा रो बुङ खान्धुर मापासुखेना। 37 आबा कासेहेङ पिका झाराङ काता ल्वावा रो काता लोका हासुहेङ बुङ हिदिङ रितहोइ का मालाअ्ताङका। 38 ताइको लाल्सा पोङघा पालि का सादेलसो लोका माको, कुलाउ कासेहेङ दिङगिल्काको लाल्सा पोङघा पालि लोका एइ। 39 कासेहेङ दिङगिल्काको लाल्सा इदोइ एइ, वा कासेहेङ पिकालाइता हासुङहेङ बुङ का लाअ्लि मागोयाको रो एम्बालाइहेङ आखिरि दिनाता सिन्हु पालि द्वाको। 40 हाइदोनु काङको आबाको लाल्सा इदोइ एइ, चानहेङ खाङका रो वासेहेङ खान्धुर पाका झाराङ असिम ज्यान निनाको। कालाउ का इङकोहेङ आखिरि दिनाता सिन्हु पाङका।” 41 यहुदि आगुवागेलाइ इसुको खिलापता गनगन पालि तेङहि, हाइदोनु वा दोअ्का हिघाहि, “सादेलसो खुअ्तेङलोका तोले का दोङ एइ।” 42 एम्बालाइ दोअ्हि, “हाइ या योसेफको चान इसु माको? याको आबा रो आमाइहेङ केलाइ मानालन्हाखे कुनु? एला या हेसापा ‘का सादेलसो खुअ्तेङलोका एइ’ दोअ्तेङ दोअ्खे?” 43 इसु एम्बालाइहेङ दोअ्हि, “नेलाइ ताताइमिता कचकच मापासु। 44 कासेहेङ दिङगिल्का आबा मातान्हेहि पानु हासु बुङ काता लोलि माद्वावा। का इङकोहेङ आखिरि दिनाता सिन्हु पाङका। 45 ‘कालाउ इङको झाराङ परमेस्वरसो धिरपान्हावा’ दोअ्तेङ आगाधुइकाको किताबता लेखेन्हाका हि। झाराङ जाइ आबासो हिङखे रो धिर्खे इङको काता लावा। 46 आबाहेङ हिदिङ द्याङ तिङका मान्थु, खालि वा खिनिङ तिङका हि, जाइ परमेस्वरसो लोका एइ, वाआङ आबाहेङ तिङका हि। 47 “जातिङको का नेलाइहेङ दोअ्खा, जाइ खान्धुर पाखे इङकोदोफा असिम ज्यान हि। 48 का ज्यानको तोले एइ। 49 नेलाइको खालगेलाइ उदादाङका थामेता मन्न चालाउ बुङ एम्बालाइ सितेङ हान्हेहि। 50 सादेलसो खुअ्तेङलोका तोले इदोइ एइ, जाइ इदोइ चाखे इङको मास्यावा। 51 सादेलसो खुअ्तेङलोका सिन्हुका तोले का दोङ एइ। हासुङ इदोइ तोले चाहि पानु इङको दिनाङ सिन्हुतावा। जेदोङ तोले का दुनियाको ज्यानको भाअ्सिङ प्याङका, इङकोचाहिँ काङको जिउ एइ।” 52 कोलाउ यहुदिगेलाइ, “इदोइ द्याङ हेसापा केलाइहेङ ताइको जिउ चालि पिलि द्वावा?” दोअ्तेङ ताताइमिता सावालजावाफ पालि तेङहि। 53 इसु एम्बालाइहेङ दोअ्हि, “जातिङको, का नेलाइहेङ दोअ्खा, नेलाइ का द्याङको चानको जिउ माचानु रो वाको हिति माआम्नु, नेलाइता ज्यान माह्यावा। 54 काङको जिउ चाका रो काङको हिति आम्कादोफा असिम ज्यान हि रो आखिरको दिनाता का इङकोहेङ सिन्हु पाङका। 55 हाइदोनु काङको जिउ जातिङको चाका आनेमाने एइ रो काङको हिति जातिङको आम्का आनेमाने एइ। 56 काङको जिउ चाका रो काङको हिति आम्काचाहिँ काता ह्यावा रो का इङकोता ह्याङका। 57 जेसापा सिन्हुका आबा कासेहेङ दिङगिल्हि रो का आबाको खातिर सिन्ह्वाङका, एन्साङ पातेङ कासेहेङ चाका बुङ काङको खातिर सिन्हुतावा। 58 सादेलसो लोका इदोइ तोले इन्सिका माको, जाइ नेलाइको आबाखालगेलाइ चालाउ बुङ सितेङ हानेहि। इदोइ तोले चाकाचाहिँ दिनाङ सिन्हुतावा।” 59 इसु इदोइ काथा कफर्नहुमको कचहरिसाअ्ता बिद्या पिलाउ दोअ्का एइ। चात्यागेलाइ इसुहेङ लाअ्का 60 इदोइ हिङकान्हुअ्सो इसुको चात्यागेलाइता हेअ्मि दोअ्हि, “इदोइ कथन थाङका हि, हासु इदोइ हिङलि द्वावा कुनु?” 61 इसुको चात्यागेलाइ इदोइ बारेता कचकच पादोङखे दोअ्का गितेङ वा एम्बालाइहेङ दोअ्हि, “हाइ इदोइ काथा नेलाइको भाअ्सिङ बोखेकाको खातिर जेङदोङखे? 62 नेलाइ का द्याङको चानहेङ लाम्फा जेता हिघाघा इन्ता ताङकाताङपाका तिङसुन्हा पानु हाइ पास्वाना? 63 ज्यान पिका आत्मा हि, जिउसो हाइदोङ लाभ माजेङखे। जेदोङ बचन का नेलाइदोफा धुइका हिघा, इङको आत्मा रो ज्यान एइ। 64 कुलाउ नेलाइता हेअ्मि हि, जाइ कासेहेङ खान्धुर मापाखे।” (हाइदोनु खान्धुर मापाकालाइ हासुहासु एइ रो वासेहेङ जाल पाका हासु ज्यावा दोअ्तेङ इसु लाम्फासोङ गेघाहि।) 65 कालाउ इसु दोअ्हि, “इदोङखातिर का नेलाइहेङ दोअ्का एइ, एदि आबासो पिका मान्थु पानु हासुङ द्याङ काङकोता लोलि माद्वावा।” 66 इङकोन्हुअ्सो इसुको चात्यागेलाइता हेअ् मि न्हुअ्सो पासाइहि रो वाकोदोफा हिगिल्लि लाअ्हि। 67 इसु ताइको तेन्हेङ चात्यागेलाइहेङ दोअ्हि, “हाइ नेलाइ बुङ कासेहेङ लाअ्तेङ हानेस्वाना?” 68 कोलाउ सिमोन पत्रुस दोअ्हि, “प्रभु, केलाइ हासुकोता हानाङ? नाङकोदोसा असिम ज्यानको बचन हि। 69 हाइपानु केलाइ खान्धुर पाका हिन्हाहि रो गेका हिन्हाहि, ना परमेस्वरको पुनित द्याङ हिन्हा।” 70 इसु एम्बालाइहेङ दोअ्हि, “हाइ का ताइमिङ नेलाइ तेन्हेङ मिहेङ साल्का माको कुनु? नेलाइता ए मिचाहिँ दियाबलस एइ।” 71 इदोइ इसु सिमोन इस्करियोतको चान यहुदाको बारेता दोअ्का हिघाहि। हाइदोनु तेन्हेता ए मि जेङतेङ बुङ इङको वासेहेङ जाल पिलि तोम्का हिघाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.