याकुब 5 - धिमालधनिगेलाइहेङ चेतानि 1 धनिगेलाइ काङको काथा हिङसु, नेलाइर्हुता लोलितोम्का तु:गेलाइको भाअ्सिङ खारसु रो बिलाप पासु। 2 नेलाइको टाकाकाउरि आइका हि रो नेलाइको धाबाखेन्तारागेलाइ पेअ्सा चाका हि। 3 नेलाइको सोना रुपाता काइ लागेका हि, इङकोङ काइ दोङ नेलाइको खिलापता दासि ज्यावा रो मे भाइपाङ नेलाइको जिउ चावा। कालाउ नेलाइ आखिर दिनागेलाइता ताकाकाउरि जोम्पाका हिसुन्हा। 4 हिङसु, नेलाइको मिलिङता काम पाकालाइको पिलिगोइका जेला एला बुङ पिकाङ मान्थुसुन्हा। इङकोङ जेला नेलाइको खिलापता दासि प्यावा। कालाउ इङको कामपाकालाइको खारका परमप्रभु परमेस्वरको न्हातोङ थिकापा थुकालि दोहोइ। 5 नेलाइ इदोइ दुनियाता मोजमाजा पाका हिसुन्हा रो सेअ्लिको भाअ्सिङ पोसेका मेअ्सा भाइपाङ नेलाइ तोइका हिसुन्हा। 6 कालाउ नेलाइको खिलापता हाइदोङ माधुइका धरमातिहेङ बुङ दुस लागाइतेङ नेलाइ सेअ्का हिसुन्हा। पिरगेलाइ सहेका 7 इदोइभाअ्सिङ दादाओने बाइओनेगेलाइ, प्रभु मालोपाधाउ र्हुम्तेङ हिसु। खाङसु, मिलिङ चोइकालाइ ताइको मोलहिका बालि सोपेरपालिको भाअ्सिङ चुङदिङ रो बाअ्सारको वाइहेङ र्हुमतेङ हिखे। 8 एन्साङ पातेङ नेलाइ बुङ र्हुमतेङ हिसु। ताइको आस मासेअ्सु हाइदोनु प्रभु लोकादिना भेरपाङ हि। 9 दादाओने बाइओनेगेलाइ, एमि भेनेङको खिलापता मागानगानाइसु, माकोनुते नेलाइ दुसि जेङस्वाना। खाङसु, नियापाका फिनुताङ लोलि दोका हि। 10 दादाओने बाइओनेगेलाइ, प्रभुको मिङता धिरपाका आगाधुइकालाइहेङ फोमपासु। एम्बालाइ हेथे तु: सहितेङ झाराङको भाअ्सिङ नामुना जेङका हि। 11 केलाइ सहितेङ हिकालाइहेङ सहसाम्पा निङका दोअ्न्हाखे। नेलाइ अय्युबको सहेकाको बारेता हिङकाङ हिसुन्हा रो प्रभु हेसापा वासेहेङ दायाहि इङको नेलाइ तिङकाङ हिसुन्हा। कालाउ प्रभु हेथे दाया रो मायाहोइ पोङघाका हि। 12 काङको दादाओने बाइओनेगेलाइ, झाराङ खान्तेङ बाराका काथाचाहिँ नेलाइ सादेलको, सुमिङको रो बो हिदिङ काथाता केरा माचासु। नेलाइ “एइ” नु “एइ” दोअ्सु “माको” नु “माको” दोअ्सु। कालाउ खिनिङ नेलाइ दुसि माजेङस्वाना। खान्धुरको पुकार 13 नेलाइता हासुङ तु: भोगिदोङखे पानु, इङको पुकार पाको। नेलाइता हासुङ सुकापा हि पानु, इङको परमेस्वरहेङ बाखिन्तेङ ले लेकाको। 14 नेलाइता हासुङ मेसाधुअ्का हि पानु, इङको मन्डलिको आगुवागेलाइहेङ कायाको रो एम्बालाइ प्रभुको मिङता चुइति लागाइपितेङ इङकोको भाअ्सिङ पुकार पाप्याको। 15 प्रभुको मिङता खान्धुर पातेङ मासाअ्धेकाहेङ पुकार पापिनु प्रभु इङकोहेङ एल्पावा। एदि इङको कुकरम पाका हि पानु प्रभु इङकोहेङ माफ प्यावा। 16 इदोइखातिर नेलाइ एमि भेनेङदोफा ताताइको कुकरम मानेसु। नेलाइ एल्लि एमि भेनेङको भाअ्सिङ पुकार पासु। हाइपानु धरमाति द्याङको पुकार सरबङ हिका जेङखे रो या बाराका काम पालि दोखे। 17 एलिया बुङ केलाइभाइकाङ द्याङ हिघाखे। इङको वाइ माल्वाको दोअ्तेङ कोन्धाङसो दोङ पुकार पालाउ सुम बाअ्सार तु माहिनाथिकापा सुमिङता वाइ मालोहि। 18 इङको वाइ ल्वाको दोअ्तेङ आरोङ पुकार पालाउ आदेलसो वाइ लोहि रो भोनो बालि पिहि। 19 दादाओने बाइओनेगेलाइ, एदि हासुङ सतसो बान्दालाइतेङ हानेहि पानु हासुङ इङकोहेङ घुरिपातेङ चुमाको। 20 इङको ग्याको, जाइ एमि कुकरमिहेङ मारेम्का दामासो घुरिपातेङ चुमाहि पानु इङकोहेङ सिकासो बान्चिपावा रो इङकोको पाका गोताङ कुकरमगेलाइ परमेस्वर माफ पाप्यावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.