याकुब 4 - धिमालपरमेस्वरता चार्हाइका 1 नेलाइको माझाता काचिङगल रो धुम हितासो लोखे? हाइ इदोइ गोताङ काथागेलाइ नेलाइको मन लिअ्ता चेरसुका मारेम्का बिचारसो माओल्हेखे कुनु? जेदोङचाहिँ नेलाइको मनलिअ्ता जेलाउ बुङ हिखे। 2 नेलाइ निङलि लाल्सा ते पासुखेना कालाउ बुङ मानिङसुखेना। एन्साङ पातेङ नेलाइ इङको निङलिकोभाअ्सिङ सेअ्सुखेना रो दिअ्सुखेना कालाउ बुङ मानिङसुखेना। नेलाइ चेरसुलाउ बुङ रो धुम पालाउ बुङ नेलाइ मानिङसुखेना, हाइदोनु नेलाइ परमेस्वरदोफा मार्हेसुखेना। 3 नेलाइ र्हेसुखेना कालाउ मानिङसुखेना, हाइपानु नेलाइ ताइको लाल्सा पोङघा पालिको भाअ्सिङ खिनिङ दुरजन बिचारसो परमेस्वरदोफा र्हेसुखेना। 4 ओइ बेबिचार पाकालाइ, जाइ दुनियाहेङ माया पाखे वा परमेस्वरको बाइरि जेङखे दोअ्तेङ हाइ नेलाइ मागेसुखेना? हाइदोनु जाइ दुनियादोफा सानाइति जेङलि भोखे इङको ताइमिहेङ परमेस्वरको दुस्मन बान्हाइखे। 5 “परमेस्वर केलाइलिअ्ता ताअ्पिका पुनित हङसको भाअ्सिङ वा हेन्जाङ चेर ताङपाखे” दोअ्तेङ धरमकिताबता लेखिन्हाका काथा बेकारको मादोसु। 6 कालाउ वा केलाइहेङ हेन्जाङ निगाहा प्यावा। हाइपानु पुनित धरमकिताबता इसिका लेखेन्हाका हि, “परमेस्वर तुजुक पाकालाइको खिलाप पाखे, कालाउ नोइकालाइर्हुता निगाहा पावा।” 7 इदोइखातिर ताइमिहेङ परमेस्वरको आधिनता ताअ्सु। दियाबलसको खिलाप पासु रो इङको नेलाइसो खाअ्तावा। 8 नेलाइ परमेस्वरको भेरपा लोसु रो वा बुङ नेलाइको भेरपा ल्वावा। ओइ कुकरमिगेलाइ, ताइको खुर झासु। ओइ दोमन पाकालाइ, नेलाइको कोन्धाङ चोखाइसु। 9 नेलाइ खारसु, र्हिकाइसु रो बिलाप पासु। नेलाइको लेङ बिलापता रो नेलाइको सुकाका तु:ता फेरिन्हाको। 10 कालाउ नेलाइ प्रभुको आगाता नोइका जेङसुन्हा पानु वा नेलाइहेङ तोल्हायावा। बोमिको निया मापासु 11 दादाओने बाइओनेगेलाइ, हासुङको खिलापता मारेम्का काथा माधुइसु। जाइ ताइको खान्धुरि दादाओने बाइओनेको खिलापता आखेका काथा धुइतेङ एम्बालाइहेङ दुसिखे पानु, इङको नियमको खिलापता धुइखे रो नियमहेङ दुसिखे। कालाउ एदि नेलाइ नियमहेङ दुसिसुखेना पानु ते नियममाफिक माचलेसुखेना, कालाउ नियमको नियापाका कि जेङसुन्हा। 12 हाइदोनु परमेस्वर खिनिङ नियम पिका रो निया पाका हि, जाइ बान्चेपालि रो मुअ्पालि बुङ दोखे। कालाउ ताइको भेरपाकोहेङ दुसिका नेलाइ हासु एइ? तुजुक पाकालाइहेङ चेतानि 13 नेलाइ “नानि माकोनु जुम्नि हिदिङ पुरता हानाङ रो इन्ता ए बाअ्सार हितेङ पाइकार पाङ कालाउ टाका कामायाङ” दोअ्कालाइ काङको काथा रेम्फा हिङसु। 14 जुम्नि हाइ ज्याङ दोअ्तेङ नेलाइ हाइदोङ मागेसुखेना। नेलाइको ज्यान हिसिका हि? नेलाइ ते कुकुह्वा भाइका हिसुन्हा रो जाइ इघुरिङको भाअ्सिङ देखाल पिखे कालाउ राम्खे। 15 नेलाइ दोअ्लि गोइका काथा ते इसिका हि, “परमेस्वरको लाल्सा जेङनु केलाइ बान्चेतेङ एसा पाङ रो ओसा पाङ।” 16 कालाउ नेलाइ तुजुक पातेङ धामास लागाइसुखेना। एसापा तुजुक पातेङ धामास लागाइलि रेम्का माको। 17 इदोइखातिर जाइ भालाइ पालि गेतेङ बुङ एन्सा मापानु इङको कुकरम पाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.