याकुब 3 - धिमाल

देतोङहेङ बसता ताअ्‌लि

¹ काङको मोन्‍दाताका दादाओने बाइओनेगेलाइ, नेलाइता झाराङ हेन्‍जाङ द्‌याङगेलाइ मास्‍टर जेङलि माभोसु। हाइपानु केलाइ मास्‍टर जेङकालाइको निया हेन्‍जाङ बाराका ज्‍याङ दोअ्‌तेङ नेलाइ गेसुखेना।

² केलाइ झाराङ हेन्‍जा बिराम पान्‍हाखे। कालाउ जाइ ताइमि धुइलाउ बिराम मापाखे, इङको धरमाति द्‌याङ एइ। इन्‍सिका द्‌याङ दोङ ताइमिहेङ बसता ताअ्‌लि दोखे।

³ केलाइ ओह्‍याँहेङ आधिनता ताअ्‌लिको भाअ्‌सिङ इङकोको नुइता लागाम लागाइ पिन्‍हाखे पानु इङकोहेङ जेसो मन जेङखे इन्‍सोङ चुम्‍पुलि दोखे।

⁴ कालाउ एन्‍साङ पातेङ चिजाहाजगेलाइ भेरमाको चालहोइ चलेलाउ बुङ चिजाहाज चालाइका चिजाहाजगेलाइहेङ एलोङ म्‍हुइका खेवाहोइ जेसो मन जेङखे इन्‍सोङ चुम्‍पुलि दोखे।

⁵ कालाउ देतोङ बुङ इन्‍सिकाङ एइ। इदोइ जिउको एलोङ म्‍हुइका आङ जेङलाउ बुङ बाबारका काथा पातेङ तुजुक पाखे। एसाङ पातेङ एलोङ म्‍हुइका मेहोइ बुङ बाबारका झार दोङ ओअ्‌पालि दोखे।

⁶ देतोङ बुङ मे भाइकाङ एइ रो इदोइ जिउको आङगेलाइता झाराङ खाङतेङ दुरजन एइ। या गोताङ जिउहेङ आखेका पापिखे रो ताइकोङ ज्‍यानहेङ दोङ मे चोअ्‌पितेङ पातेलको मेता ओअ्‌पापिखे।

⁷ द्‍याङ गोताङ खाल्‍को गुपुसगेलाइ, जिह्‍याँजुइल्‍हेङ, सेसालाइका जिबगेलाइ रो जाहादिको हायागेलाइहेङ तह लागाइलि दोखे। एबालाइहेङ द्‍याङगेलाइ दोङ तह लागाइका हि।

⁸ कालाउ देतोङहेङ हासुङ तह लागाइलि मादोखे। इदोइ दुरजन, तह मालागिका रो थिलिगोइका बिसहोइ पोङघाका हिखे।

⁹ इदोङ देतोङसोङ केलाइ प्रभु रो परमेस्‍वर आबाहेङ बाखिनन्‍हाखे। यासोङ परमेस्‍वरको आकारता सिरजाइका द्‍याङगेलाइहेङ साराप पिन्‍हाखे।

¹⁰ एलोङदोङ नुइसो सहसाम्‍पा रो साराप ओल्‍हेखे काङको दादाओनेगेलाइ एसा माजेङलि गोइका एइ।

¹¹ हाइ एलोङदोङ मुलसो ताका रो खाका चि ओल्‍हिखे कुनु?

¹² काङको दादाओने बाइओनेगेलाइ, दुमरिको सिङता जाइतुन रो आङगुरको सिङता दुमरि सेलि मादोखे। कालाउ खाका चिको मुलसो बुङ ताका चि मुरलि मादोखे।

परमेस्‍वरसो निङका आकिल

¹³ नेलाइको माझाता हासुङ आकिलहिका रो बुझाकि द्‌याङ हि पानु वा ताइको ज्‍यानता नोइतेङ द्‌याङगेलाइको माझाता रेम्‍का काम पातेङ तिम्‍पाको।

¹⁴ कालाउ एदि नेलाइको कोन्‍धाङता आखेका काथा, बोमिहेङ मि तु:पाका रो ताइको खिनिङ भालाइ खाङका हि पानु ताइको आकिलता तुजुक पातेङ सतको खिलापता कुकरम मापासु।

¹⁵ इसिका आकिल परमेस्‍वरसो लोका माको, कालाउ इदोइ ते दुनियाको, हाङसाको रो दियाबलसको आकिल एइ।

¹⁶ हाइपानु जेता ताइको खिनिङ भालाइ भोखे, इन्‍ता गोलमाल रो गोताङ खालको आखेका कामगेलाइ जेङखे।

¹⁷ कालाउ जेदोङ आकिल सादेलसो लोखे, इङको पुनित, सुका पिका, नोइका रो मिलिका हिखे। इसिका आकिल दायाहोइ पोङघाका हिखे रो इङको रेम्‍का कामको फल सेपाखे। कालाउ इदोइ पछेपात रो छल मापाका जेङखे।

¹⁸ कालाउ सुकाका चुमाकालाइ मिलापताको काम पातेङ रेम्‍का फल सेपाखे।