याकुब 2 - धिमालभेदभाब मापासु 1 काङको दादाओने बाइओनेगेलाइ, नेलाइ मानसो पोङघाका केलाइको प्रभु इसु ख्रिस्टता खान्धुर पाकालाइ हिनाङसिङ नेलाइ बाहारको आकार खान्तेङ हासुहेङ बुङ पछेपात मापासु। 2 नेलाइको कचहरिता आधेमि रेरेम्का धाबा रो सोनाको आउँथि लागाइका धनि द्याङ कालाउ थेअ्कामेअ्का होङका निरधन द्याङ बुङ ल्वावा। 3 इङको पहर नेलाइ रेरेम्का धाबा होङका धनि द्याङहेङ मान पातेङ दोअ्स्वाना, “इता रेम्का थामेता योमलि लोउ” कालाउ निरधनहेङ चाहिँ “थामे मान्थु इन्ताङ जाअ्तेङहि” माकोनु “इता काङको खोकोइभेर्पा योम” दोअ्स्वाना। 4 एन्सा पासुन्हा पानु नेलाइहेङ ताइकोङ माझाता भेदभाब रो मारेम्का बिचार पातेङ दुस लाग्यावा। 5 काङको मोन्दाताका दादाओने बाइओनेगेलाइ, हिङसु हाइ परमेस्वर दुनियाको निरधनहेङ खान्धुरता धनि बान्हाइलि रो कबोल पाका सारभि वासेहेङ इन्ताना पाकालाइहेङ पिलि मासाल्हि कुनु? 6 कालाउ नेलाइ ते निरधनगेलाइहेङ बादनाम पाका हिसुन्हा। हाइ धनिगेलाइ नेलाइहेङ आतिचार मापाखे कुनु? हाइ एम्बालाइ नेलाइहेङ नियापाका थामेता माचुम्पुखे कुनु? 7 जेदोङ मिङसो नेलाइ काइन्हाका हिसुन्हा, हाइ एम्बालाइ इङकोङ मानपालि गोइका मिङको बादनामि मापाखे कुनु? 8 जातिङको नेलाइ “ताइको भेरपाकोहेङ ताइमिहेङ भाइपाङ माया पासु” दोअ्का पुनित धरमकिताबता लेखेन्हाका परमेस्वरको सारभिको नियमहेङ साअ्सुन्हा पानु नेलाइ रेम्काङ पासुखेना। 9 कालाउ एदि नेलाइ भेदभाब पासुन्हा पानु नेलाइ कुकरम पास्वाना रो नियमसो आपाराधि ठर्हाइन्हास्वाना। 10 हाइपानु जाइ गोताङ नियम साअ्तेङ बुङ एलोङ काथाता चुकिखे पानु, इङको नियमको गोताङ काथाता दुस ठर्हाइन्हाखे। 11 हाइपानु जाइ “बेबिचार मापासु” दोअ्हि, वा “मासेअ्सु” बुङ दोअ्हि। एदि नेलाइ कासबिरि मापास्वाना कालाउ सेअ्सुन्हा पानु, नेलाइ नियमको आपराधि जेङका हिसुन्हा। 12 इदोइखातिर नेलाइ जेदोङ धुइस्वाना रो बेभार पास्वाना पानु छुटकारा पिका नियमसो नेलाइको निया ज्यावा। 13 हाइपानु जेदोङ द्याङ बोमिहेङ मादायाखे, इङकोको निया बुङ इङकोङआन्सार जेङखे। कालाउ जाइ बोमिहेङ दायाखे, इङकोङ आन्सार परमेस्वर निया पावा। खान्धुर रो काम 14 काङको दादाओने बाइओनेगेलाइ, जेदोङ द्याङ का खान्धुर पाखा दोअ्खे, कालाउ खान्धुरमाफिक कामचाहिँ मापाखे पानु, हाइ रेम्का जेङहि कुनु? हाइ इङकोको खान्धुरहोइ इङकोहेङ बान्चेपालि द्वावा कुनु? 15 एदि हिदिङ दादाओने कोलाउ बाइओनेदोफा चाका रो होङका बुङ मान्थु पानु, 16 नेलाइता हासुङ इङकोहेङ, “सुबिस्तासो हाने, रेम्का लागाइ रो ताका चा” दोअ्खे कालाउ गोइका काथा मापिखे पानु इङकोहेङ हाइ लाभ जेङहि कुनु? 17 एसापा खान्धुर बुङ कामसो मातिङखे पानु इङको खान्धुर सिका भाइकाङ बिथाको जेङखे। 18 कालाउ आधेमि दोअ्तावा, “नादोसा खान्धुर हि, कादोसा कामगेलाइ हि।” काममाकोसिङको नाङको खान्धुर कासेहेङ तिम्पा, कालाउ काङको पाका कामसो का ताइको खान्धुर नासेहेङ तिम्पाङका। 19 परमेस्वर एलोङ हि दोअ्तेङ नेलाइ खान्धुर पासुखेना। इदोइ रेम्काङ काथा एइ। इसिकाङ खान्धुर दुरजन हाङसागेलाइ बुङ पाखे कालाउ एम्बालाइ थितेङ फिरखे। 20 निरबुदिगेलाइ एइ, काम माकोसिङको खान्धुर बेकारको जेङखे दोअ्तेङ हाइ नेलाइ मागेसुना? 21 जेलाउ केलाइको खाल आब्राहाम ताइको ए खिनिङ चान इसहाकहेङ भोक पिका थामेता भोकपिलि भोहि, कोलाउ इङको ताइको कामसो दोङ धरमाति ठार्हाइन्हाका माको कुनु? 22 आब्राहामको खान्धुर वाको कामता नारिन्हाहि रो वाको कामसो वाको खान्धुर पोङघाहि दोअ्तेङ हाइ नेलाइ मातिङसुखेना? 23 एसापा धरमकिताबता लेखेन्हाका कथन पोङघाहि, “आब्राहाम परमेस्वरता खान्धुर पाहि रो इदोइ वाको भाअ्सिङ धरमातिता गान्देन्हाहि।” इदोइभाअ्सिङ वा परमेस्वरको सानाइति दोअ्न्हाहि। 24 एला बुङ नेलाइ तिङसुखेना, द्याङ खान्धुरसो खिनिङ माको, खान्धुर आन्सारको काम पातेङ खिनिङ परमेस्वरको नजरता धरमाति ठहर्हाइन्हाखे। 25 एन्साङ पातेङ कासबिरि राहाब बुङ भेदर्हुकालाइहेङ ताइको साअ्ता म्होअ्तेङ भेनेङ दामा दिङगिल्हि, कालाउ ताइको कामसो इङको धरमाति ठहर्हाइन्हाहि। 26 जेसापा जिउ हाङसासो खेङन्हालाउ सिखे, एन्साङ पातेङ खान्धुर बुङ कामगेलाइसो खेङन्हालाउ सिखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.