याकुब 1 - धिमाल1 परमेस्वर रो प्रभु इसु ख्रिस्टको चाकर का याकुबसो इदोइ चिथि चारबितिङ राइन्हातेङ हिका इस्राएलको तेन्हे खालहेङ लेखेदोङखा। नेलाइ झाराङहेङ सेउपाखा। खान्धुर रो आकिल 2 काङको दादाओने बाइओनेगेलाइ, नेलाइर्हुता जिसिकाङ तु: पिरगेलाइ लोलाउ बुङ लेङचासु। 3 हाइपानु नेलाइ गेसुखेना, जेलाउ नेलाइको खान्धुरको जाच जेनावा, कोलाउ नेलाइको तु: पिर सहिका सरबङ बार्हावा। 4 कालाउ नेलाइ गोताङ थोक सहेलि धिरलिगोइस्वाना, एन्साङ नेलाइ हिदिङ काथाको बुङ हारजा माजेङसिङ नेलाइ गोताङ थोकता बोल्याका जेङस्वाना। 5 एदि नेलाइता हासुङहेङ आकिल गोइका हिनु परमेस्वरदोफा र्हेकाको रो वा इङकोहेङ लेङचातेङ प्यावा। 6 कालाउ र्हेलाउ साङका मापासिङ खान्धुर ताअ्तेङ र्हेकाको। साङखा पाका द्याङ ते भेरमाहोइ हेङगालाइका जाहादिको साल्काभाइकाङ जेनावा। 7 इन्सिका द्याङ ते प्रभुसो हिदिङ काथा निनाङका दोअ्तेङ माचिताइलाउ बुङ ज्याङ। 8 हाइपानु इसिका दोमन मन हिका द्याङ गोताङ काथाता थिर मान्थुखे। निरधन रो धनि 9 निरधन दादाओने बाइओनेगेलाइ, नेलाइ लेङचासु। हाइपानु परमेस्वर नेलाइहेङ तोलह्यावा। 10 एन्साङ पातेङ धनि दादाओने बाइओनेगेलाइ, नेलाइ म्हुइलि गोइलाउ बुङ लेङचासु। हाइदोनु धनि द्याङगेलाइ ते झार ल्हेअ्भाइपाङ चुअ्तेङहानावा। 11 जेसापा चेरेङगापा सानेलाउ ल्हेअ् सेङतेङ हुल्खे। कालाउ इङको ल्हेअ्को कोइन्हाका दोङ राम्खे। 12 जाइ तु: पिर सहेलि दोखे इङको द्याङ सहसाम्पा निङका हिखे। जाइ जाँचता थिर हिखे रो परमेस्वरहेङ माया पाखे इङको वा कबोल पाका ज्यानको ताज निनावा। 13 इसिका तु: पिर जेङलाउ हासुङ बुङ कासेहेङ परमेस्वर जाच पाहि मादोअ्ताको। हाइदोनु परमेस्वर आखेका काथाको जाचता मावालाखे रो बोमिहेङ बुङ जाचता मावालापाखे। 14 कालाउ झाराङ द्याङगेलाइ ताइकोङ आखेका आनिबानिता मनलागाइतेङ जाचता वालाखे। 15 इदोइखातिर ताइको मन आखेका काथाता लागाइतेङ कुकरम जोन्माइखे। कालाउ इङकोङ कुकरम बार्हेतेङ इङको सिका चुमाखे। 16 काङको दायाका दादाओने बाइओनेगेलाइ, नेलाइ ताइमिङहेङ छल मापासु। 17 जेथे बुङ रेम्का रो पुरा बर सादेलसो लोखे। इङकोङ बर फाइसालाम्का परमेस्वर आबा केलाइहेङ पिखे। वा हेअ्लाउ बुङ माफेरिन्हाखे रो वा नाते फेरिन्हाका स्याइर्हेभाइका दोङ हि। 18 केलाइ सिरजाइको लाङ सेकागेलाइभाइपाङ जेङलि द्वाको दोअ्तेङ वा ताइकोङ लाल्सासो सत कथनहोइ केलाइहेङ नावा पातेङ सिरजाइका हि। हिङलि रो साअ्लि 19 मोन्दाताका दादाओने बाइओनेगेलाइ, नेलाइ इदोइ काथा गेतेङ हिसु: मन लागाइतेङ हिङका, हुस पातेङ धुइका रो मारफाङ माचेरताम्पाका जेङसु। 20 हाइदोनु द्याङको चेरहोइ परमेस्वरको मोन्दाताका कामता खिचोला पिखे। 21 इदोइभाअ्सिङ गोताङ इसिका मारेम्का आनिबानि रो दिगमिगजेङका बानिसो फारापा हिसु। नोइका जेङतेङ नेलाइको कोन्धाङता ताअ्का परमेस्वरको कथनको दोअ्का भाइपा पासु। हाइदोनु नेलाइहेङ जोगाइका ते इङकोङ एइ। 22 परमेस्वरको कथन साअ्का जेङसु रो हिङका खिनिङ जेङतेङ ताइमिङहेङ छल मापासु। 23 कथन हिङतेङ मासाअ्काचाहिँ आइनाता ताइको र्हाइ खाङका द्याङ भाइकाङ जेङखे। 24 हाइपानु इङको ताइमिङहेङ आइनाता खाङखे रो हानेखे। इघुरिङन्हुअ्सो ताइमि हिसिका हिघाखा दोअ्तेङ निल्खे। 25 कालाउ जाइ छुटकारापिका पुरा नियम हिङतेङ मानिल्खे कालाउ मन पातेङ हिङखे रो साअ्खे, इङकोको गोताङ कामता परमेस्वर सहसाम्पा प्यावा। 26 एदि हासुङ ताइमि धरमाति हिघा दोअ्खे, कालाउ बुङ ताइको देतोङहेङ आधिनता माताअ्खे पानु वा ताइमिहेङ छल पाखे कालाउ वाको धरम करम बिथाको जेङखे। 27 परमेस्वर आबाहेङ मोन्दाताका जातिङको काथा इदोङ एइः तु:ता वालाका राँदि रो माउर्या माउर्याइनिहेङ सामर्हाइलि रो दुनियाको मारेम्का काथासो खेङन्हालि एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.