गलाति 6 - धिमालझाराङको भालाइ पालि 1 दादाओने बाइओनेगेलाइ, एदि हासुङ कुकरमको जालेता परेहि पानु नेलाइ पुनित हाङसाको आधिनता चलिकालाइ नोइका जेङतेङ इङकोहेङ सुधिर पासु। इदोइता ताइमिङ बुङ मारेम्का कामता मावालाताइने दोअ्तेङ हुस पासु। माकोनु ते नेलाइ बुङ कुकरमता वालालि दोस्वाना। 2 एमि भेनेङहेङ तु:ता साघाइसु। एसा पासुन्हा पानु नेलाइ ख्रिस्टको हुकुमहेङ पोङघा पास्वाना। 3 एदि हिदिङ द्याङ ताइमि बाराका मान्थुलाउ बुङ ताइमि बाराका हिघा दोअ्तेङ फोमपाखे पानु इङको ताइमिङहेङ दोङ छल पाखे। 4 नेलाइ झाराङ ताइमिङको पाका काम बोमिको पाका कामदोफा मादाज्याको। कालाउ ताइको काम ताइमिङ जाच्याको रो रेम्का हि पानु इङको तुजुक पाको। 5 हाइदोनु केलाइ झाराङ ताइको कामको ल्हिका ताइमिङ तोल्हेलि गोयाङ। 6 परमेस्वरको कथन निङका झाराङ वा दोफा हिका गोताङ रेम्का थोकगेलाइ कथन धिरपाकादोफा बाखाराइयाको। 7 ताइमिङ ताइमिङहेङ छल मापासु, परमेस्वरहेङ हासुङ बुङ धाताइलि माद्वावा। हाइदोनु द्याङ जेदोङ थिङखे इङकोङ उब्जा चेकावा। 8 एदि हासुङ कुकरमि आनिबानिको काथाता खिनिङ मन लागाइखे पानु, इङको मुअ्पाका काथा खिनिङ चुमाखे। कालाउ जाइ पुनित हाङसाको काथाता मन लागाइखे पानु इङको पुनित हाङसासो असिम ज्यान निनावा। 9 केलाइ झाराङ भालाइको काम पालि हेअ्लाउ मालाअ्ताइने। हाइदोनु इदोइताङ लागितेङहिन्हाहि पानु परमेस्वरको पहरता केलाइ इनाम निनाङ। 10 इदोइखातिर माउका निङतेङसाङ केलाइ झाराङको भालाइ पातेङ हानाइने। खास पातेङ एम्बालाइ जाइ ख्रिस्ट इसुहेङ खान्धुर पाका हि। पावलको आखिरि साल्हा 11 खाङसु, का ताइकोङ खुरहोइ हेथे बाबारका आछेरता नेलाइहेङ इदोइ लेखेदोङखा। 12 द्याङगेलाइको आगाता रेम्का जेङलि भोकालाइ दोङ नेलाइहेङ खतना पालिगोयाङ दोअ्तेङ कर लागाइखे। इदोइ काथा एम्बालाइ कुरुसता पिका ख्रिस्टको भोकसो खिनिङ छुटकारा निङखे दोअ्का पारचार पालाउ सान्ताइका ल्वाङ बे दोअ्तेङ एम्बालाइ थिखे। 13 जाइ खाताना पालि गोयाङ दोअ्खे, एम्बालाइ ताइमिङ नियम मासाअ्खे रो नेलाइहेङ चाहिँ खाताना पापालि भोखे। कालाउ एम्बालाइ ताइको लाल्सा पोङघा पापालि दो:नु एम्बालाइ ताइमिता तुजुक पाखे। 14 कालाउ काचाहिँ बो काथाता माको, इसु ख्रिस्टको कुरुसता खिनिङ तुजुक पाखा। हाइदोनु वाको कुरुससो पातेङ काङको भाअ्सिङ दुनियाको लाभ रो लाल्सागेलाइ सिका हि रो का दुनियाको भाअ्सिङ सिका हिघा। 15 केलाइ खाताना पालाउ बुङ, मापालाउ बुङ हाइदोङ मान्थु। कालाउ द्याङगेलाइ परमेस्वरसो नावा ज्यान निङलि दोङ मुल काथा एइ। 16 कालाउ जाइ इदोइ नियमता चलिखे, एम्बालाइहेङ परमेस्वर दायातेङ सुकाका प्यावा। कालाउ इङको द्याङगेलाइ दोङ परमेस्वरको ताइको द्याङगेलाइ जेनावा। 17 एलासो ओसो हासुङ कासेहेङ तु: माप्याको। हाइदोनु काङको जिउता हिका पेचाराको दागागेलाइसो का इसुको बान्धाइ एइ दोअ्तेङ नाल्पाखे। 18 दादाओने बाइओनेगेलाइ, केलाइको प्रभु इसु ख्रिस्टको निगाहा नेलाइदोफा दिनाङ ह्याको। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.