गलाति 5 - धिमालख्रिस्टता फुका 1 ख्रिस्ट केलाइहेङ फुका जेङलिको भाअ्सिङ छुटकारा पिका हि। इदोइखातिर नेलाइ बोल्याका जेङतेङ जाअ्सु रो आरोङ बान्धाइको जुङगेलेता मानारेन्हासु। 2 हिङसु, का पावल नेलाइहेङ दोअ्खा, नेलाइ खतना पासुन्हा पानु, ख्रिस्ट नेलाइको भाअ्सिङ पाका काम बिथाको ज्यावा। 3 आरोङ का नेलाइहेङ दोअ्खा, एदि नेलाइ परमेस्वरको आगाता धरमाति द्याङ जेङलि खाताना पासुखेना पानु, नियमता हिका गोताङ थोक नेलाइ मानेलि लाचार जेङस्वाना। 4 नियम मानितेङ परमेस्वरको आगा धरमाति जेङलि भोकालाइ ख्रिस्टसो खेङन्हाका हिसुन्हा। कालाउ नेलाइ परमेस्वरको निगाहासो दुरे जेङका हिसुन्हा। 5 केलाइहेङ खान्धुरसो परमेस्वरको आगाता धरमाति जेङलि आस पालि पुनित हाङसा केलाइहेङ साघाइखे। 6 हाइदोनु खाताना पालाउ बुङ मापालाउ बुङ ख्रिस्ट इसुता हाइदोङ फारा माजेङखे। कालाउ मुल काथा ते केलाइको खान्धुरको खातिर बोमिगेलाइहेङ माया पान्हाखे। 7 नेलाइ रेम्फाङ पादोङ सुघाना, कालाउ सतहेङ मानेलि हासु नेलाइहेङ रोकेहि? 8 इसिका छल पाका काम ते नेलाइहेङ काइका परमेस्वरसो लोका माको। 9 हुसपासु, आतुइसा साउरि गोताङ तोलेहेङ फुलिपाका भाइपाङ, असत बिद्याहोइ हेन्जाङ द्याङगेलाइको खान्धुरहेङ मुअ्पापिखे। 10 का प्रभुता खान्धुर पाखा, नेलाइ काङको माकोसिङ भेनेङ बिचार मार्हुस्वाना। नेलाइहेङ तु: पिका हासुङ हिलाउ बुङ परमेस्वर ताइमिङ इङकोहेङ दार प्यावा। 11 दादाओने बाइओनेगेलाइ, का एला बुङ खाताना पालिगोयाङ दोअ्तेङ पारचार पादोङखा पानु, हाइपालि यहुदिगेलाइ कासिहेङ आरोङ सान्ताइका पादोङखे कुनु? का द्याङगेलाइहेङ खाताना पालि गोयाङ दोअ्तेङ पारचार पाघा पानु ख्रिस्ट कुरुसता सिका काथाहोइ हासुको बुङ मन मातु:कावा। 12 नेलाइहेङ सान्ताइकालाइ ते खाताना खिनिङ माको भुरुङ गोरासोङ पोतेङ थाल्गिलाउ रेम्का जेनावा। 13 दादाओने बाइओनेगेलाइ, नेलाइहेङ ते परमेस्वर यहुदि चालचलनसो फुका जेङलिको भाअ्सिङ साल्का एइ। कालाउ इङको फुकाहेङ कुकरमि आनिबानिको भाअ्सिङ माचालाइसु। भुरुङ नेलाइ एमि भेनेङहेङ माया पातेङ साघाइसु। 14 हाइदोनु नेलाइ एलोङ हुकुम साअ्सुन्हा पानु, गोताङ नियम साअ्स्वाना। इङको हुकुमचाहिँ इसिका हि, “ना ताइको भेरपाकोहेङ ताइमिहेङ भाइपाङ माया पा।” 15 कालाउ नेलाइ ताताइमिता चेरसुतेङ एमि भेनेङहेङ चेर ताम्पापिसुखेना पानु हुस पासु, माकोनुते नेलाइ ताताइमिता मुअ्तेङ हानेस्वाना। पुनित हाङसा रो द्याङको आनिबानि 16 इङकोखातिर का नेलाइहेङ दोअ्खा, पुनित हाङसाको आधिनता हिगिल्सु रो कुकरमि लाल्सा मापोङघा पासु। 17 हाइपानु केलाइको मारेम्का लाल्साको पालि खाङका काथा पुनित हाङसाको खिलापता रो पुनित हाङसाको पालि खाङका काथा केलाइको कुकरमि लाल्साको खिलापता हिखे। इदोइ न्हे सरबङ ए भेनेङको खिलापता ल्होखे। कालाउ केलाइको दुरजन बिचारहोइ पातेङ केलाइको पालि भोका रेम्का काम बुङ पालि मादोन्हाखे। 18 कालाउ नेलाइ पुनित हाङसाको आधिनता हिघिल्सुखेना पानु नेलाइ नियमको आधिनता मान्थुस्वाना। 19 कुकरमिको आनिबानिको कामगेलाइ इदोङ एइ: दुराचार पालि, अपुनित फोम पालि, सारा जेङलि, 20 दिर पुजिलि, तुनामुना पालि, दुस्मनि पालि, झागारा पालि, इख पालि, चेर ताम्पालि, ताइको खिनिङ भालाइ भोलि, बेमेल चुमालि, पछेबिपछे पालि, 21 दाहा पालि, म्हालि, मोजमाजा पालि रो इसिकाङ बो काम पालि। इन्सिका काम पाका परमेस्वरको सारभिको हाकवाला जेङलि मानिनावा दोअ्तेङ का लाम्फा बुङ नेलाइहेङ चेतानि पिका हिघाखा रो एला बुङ चेतानि पिदोङखा। 22 कालाउ पुनित हाङसाको आधिनता हिगिल्कालाइको ज्यानता इदोइ काथागेलाइ हिखे : माया पालि, लेङचालि, बेराजा पालि, साहेलि दो:लि, दाया पालि रो भालाइ पालि, भर परेका जेङलि, 23 नोइका जेङलि रो ताइमिहेङ आधिनता ताअ्लि दोङ एइ। कालाउ इसिका काथागेलाइको खिलापता हिदिङ नियम दोङ मान्थु। 24 कालाउ ख्रिस्ट इसुहेङ खान्धुर पाकालाइ ताइको कुकरमि आनिबानिदोफाङ दुरजन लाल्सागेलाइ बुङ कुरुसता टाङगाइतेङ सेअ्का हि। 25 पुनित हाङसा केलाइहेङ नावा ज्यान पिनाङसिङ वाको आधिनता ह्याइने। 26 केलाइ ए भेनेङदोफा तुजुक पाका, चेर ताम्पाका रो दाहा पाका काम हेअ्लाउ मापाइने। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.