गलाति 4 - धिमाल1 का दोअ्खा, हाकवाला बुङ जामाल हिपाधाउ ताइ आबाको ताका काउरिको गिर्हिदोङ जेङलाउ बुङ बान्धाइभाइपा खिनिङ जेङखे। 2 कालाउ वाको आबाको दोअ्का बोइसा माजेङपाधाउ वासेहेङ सामर्हाइका द्याङगेलाइकोङ आधिनता हिखे। 3 एन्साङ पातेङ केलाइ बुङ ख्रिस्ट लोका खान्तेङ लाम्फा जामालाइ भाइकाङ हिघान्हाहि रो दुनियाको बिथाको बिद्याको आधिनता हिघान्हाहि। 4 कालाउ परमेस्वरको दोअ्काङ पहरता ताइको चानहेङ केलाइको माझाता दिङगिल्हि। वा एअ्मि बेजानको कोखसो जोन्मेलाउ नियमको आधिनता जोन्मेहि। 5 परमेस्वर नियमको आधिनसो केलाइहेङ दाम तिरितेङ छुटकाराको भाअ्सिङ रो वाको जाहानको खाबारा निङलि द्वाको दोअ्तेङ ख्रिस्टहेङ केलाइकोता दिङगिल्हि। 6 केलाइ परमेस्वरकोङ खाल एइ दोअ्तेङ तिङपालि वा ताइको चानको हाङसा केलाइको कोन्धाङता ताअ्पिका हि। इङकोङ हाङसा केलाइको कोन्धाङसो वासेहेङ “काङको आबा” दोअ्खे। 7 इदोइखातिर एलासो ओसो नेलाइ बान्धाइ माको, कालाउ नेलाइ झाराङ परमेस्वरको चान हिसुन्हा। कालाउ नेलाइ परमेस्वरको चान हिसुन्हा पानु, नेलाइ हाकवाला बुङ एइ। पावल गलातिगेलाइहेङ फोमपाखे 8 नेलाइ परमेस्वरहेङ नाल्का खान्तेङ लाम्फा बिथाको दिरगेलाइको बान्धाइ हिघान्हाहि। कालाउ जातिङकोङ दोअ्लि गोइनु एम्बालाइ परमेस्वर दोङ माको। 9 कालाउ एला ते नेलाइ परमेस्वरहेङ नाल्का हिसुन्हा रो परमेस्वर नेलाइहेङ नाल्का हि। कालाउ नेलाइ हेसापा लाम्फाको दुनियाको बिथाको बिद्या भारि घुरितेङ हानेलि भोसुखेना? नेलाइ आरोङ हाइपालि एम्बालाइको बान्धाइ जेङलि भोसुखेना? 10 नेलाइ नियमता दोअ्काभाइपाङ बिसेस दिना, माहिन्हा रो बाअ्सारगेलाइ मानेसुखेना। 11 नेलाइको भाअ्सिङ काङको भेम्ति ह्याअ्पाका बिथाको जेङहि बे दोअ्तेङ कासेहेङ सुरता लागेखे। 12 दादाओने बाइओनेगेलाइ, नेलाइ बुङ का भाइपाङ जेङसु दोअ्तेङ पुकार पाखा। हाइदोनु का बुङ नेलाइभाइपाङ नियमको आधिनता हितेङ फुका जेङका हिघा। का नेलाइकोता लाङ खेप लोलाउ नेलाइ कासेहेङ हेन्जाङ रेम्का पाका हिघासुन्हा। 13 नेलाइ दोङ गेसुखेना, का बिमार जेङनाङ लाम्फा रेम्काबानाल हिङपालि नेलाइकोता लोघा। 14 इङको पहर काङको मासाअ्धेकासो नेलाइहेङ मासुकाका जेङलाउ बुङ कासेहेङ दिगमिग पातेङ इन्कार मापासुन्हा। कालाउ सादेलचर रो इसु ख्रिस्टहेङ भाइपा कासेहेङ बुङ स्वागत पासुन्हा। 15 इङको पहर नेलाइ हेथे लेङचाका हिघासुन्हा। एला इङको लेङ हिसो राम्हि कुनु? का एला बुङ फोमपाचाखा, गोताङ खाल्को साघाउनि कासेहेङ पासुन्हा। एन्सालाउ नेलाइ कासेहेङ नेलाइको मिँ पिलि गोइलाउ बुङ पिलि त्यार जेङसुधाना। 16 एला का जातिङको काथा धुइतेङ हाइ नेलाइको दुस्मन जेङघा कुनु? 17 असत बिद्या धिरपाकालाइ नेलाइहेङ ताइको बान्हाइलि हेन्जाङ हाउसेखे। कालाउ एम्बालाइ रेम्का चिताइतेङ एन्सा पाका माको। कालाउ एम्बालाइ कासो नेलाइहेङ खेङतेङ ताइको बान्हाइलि भोखे। 18 एला का नेलाइदोफा हिलाउ खिनिङ माको, कालाउ नेलाइदोफा का माहिलाउ बुङ एम्बालाइ नेलाइको भाअ्सिङ रेम्का काम पालि हाउसेनु झन रेम्काङ एइ। 19 काङको म्हुइका जामालाइ, जामाल जोन्माइलाउ आमाइहेङ जेसापा तु: जेङखे, कासिहेङ बुङ इन्सिकाङ पिर चेताइ जेङदोङखे। नेलाइता ख्रिस्टको आनिबानि माजेङपाधाउ बेथा लागेका बेबाल भाइपाङ कासेहेङ तु: लागेतेङ हि। 20 एला दोङ का इन्ता नेलाइदोफाङ हिका हिनु एसापा कारासो दोअ्लि मागोइधावा। कालाउ दुरेसो नेलाइको भाअ्सिङ हाइ पाङका दोअ्तेङ का आवाइका हिघा। हागार रो सारा 21 नेलाइता हेअ्मि नियमको आधिनता हिलि भोसुखेना। ते दोसु परमेस्वर मोसासो पिका नियमता हाइ लेखेन्हाका हि, नेलाइ मागेसुखेना? 22 धरमकिताबता इसिका लेखेन्हाका हि, “आब्राहामको न्हेमि चानगेलाइ हिघाखे। एम्बालाइता एमि बान्धाइति हागार पाहाको रो भेनेङचाहिँ फुका सारा पाहाको हिघाहि।” 23 बान्धाइति हागार पाहाको चान द्याको लाल्साआन्सार जोन्मिका हिघाहि। कालाउ फुका सारा पाहाको चानचाहिँ परमेस्वरको कबोलसो जोन्मेका हिघाहि। 24 इदोइसोङ केलाइ बुझिलि द्वाङ, इङको न्हेमि बेबालाइ परमेस्वरदोफाको न्हे कबोलहेङ बुझिपाखे। बान्धाइति हागार ते सिनाइ आरदाङ भाइकाङ हि। इन्ता परमेस्वर द्याङगेलाइहेङ नियम पिका हिघाहि। कालाउ इङकोङ नियमसो द्याङगेलाइहेङ बान्धाइ बान्हाइहि। 25 एन्सानु बान्धाइति हागारचाहिँ अरब मुलुकको सिनाइ आरदाङ भाइकाङ एइ। इङकोहेङ एलाको यरुसलेम पुरदोफा बुङ दाजेलि द्वाङ। हाइदोनु यरुसलेमता हिकालाइ रो मोसाहेङ पिका नियम मानेका यहुदिगेलाइ ते इङको नियमको बान्धाइ एइ। 26 कालाउ साराहेङ चाहिँ सादेलर्हुताको यरुसलेमदोफा दाजेलि द्वाङ। हाइदोनु इङको बान्धाइति माजेङसिङ फुका हि। कालाउ इङको दोङ केलाइ झाराङको आमाइ एइ। 27 धरमकिताबता इसिका लेखेन्हाका हिः “चानचामिन्दि जोन्माइलि मागोइका बान्झि बेबाल लेङचा। तु: निङचाका मागेका बेबाल लेङचा। हाइदोनु केअ् हिकालाइको खान्तेङ मान्थुकाको खालगेलाइ हेन्जा जेनावा।” 28 दादाओने बाइओनेगेलाइ, केलाइ बुङ इसहाक भाइकाङ एइ। हाइदोनु वा परमेस्वरको कबोल आन्सार जोन्मिका एइ। कालाउ केलाइ बुङ कबोल आन्सार आब्राहामको खाल जेङका हिन्हाहि। 29 कालाउ जेसापा द्याङको लाल्सासो जोन्मिका इस्माइल परमेस्वरको हाङसाको सरबङसो जोन्मिका इसहाकहेङ तु: पिका हिघाहि। एन्साङ पातेङ नियम पिताइलि गोयाङ दोअ्कालाइ एला ख्रिस्टहेङ पिताइकालाइहेङ तु: पिदोङखे। 30 धरमकिताबता इसिका लेखेन्हाका हि, “बान्धाइति रो वाको चानहेङ ओल्हेपागिल्सु। हाइदोनु बान्धाइतिको चान फुका बेबालको चानदोफा हाइदोङ खाबारा मानिनावा।” 31 इदोइखातिर दादाओने बाइओनेगेलाइ, केलाइ बान्धाइतिसो जोन्मिका खालगेलाइ माको। कालाउ फुका बेबालसो जोन्मिका खालगेलाइ एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.