गलाति 3 - धिमालनियम रो खान्धुर 1 ओइ माबुझिका गलातिगेलाइ, नेलाइहेङ हासु मुहुनि लागाइतेङ बसता चुमाहि? का नेलाइहेङ इसु ख्रिस्ट कुरुसता सिका काथा गोताङ रेम्फा दोअ्पिका हिघाखा। 2 का नेलाइहेङ एलोङ काथा हिअ्लि भोखा, हाइ नेलाइ नियम मानितेङ पुनित हाङसा निङका हिघासुन्हा ना रेम्काबानाल हिङतेङ खान्धुर पातेङ निङका हिघासुन्हा? 3 हाइ नेलाइ पुनित हाङसासो सुरु पाका खान्धुरि ज्यान ताइको कामसो दोपालि भोसुखेना? 4 आहाँ एन्सा हेअ्लाउ माज्याङ। नेलाइ हेन्जाङ काथा भोगेका हिसुन्हा। हाइ इङको गोताङ बिथाको जेङहि कुनु? का आस पाखा इङको बिथाको माजेङहि। 5 परमेस्वर पुनित हाङसा पितेङ नेलाइको माझाता भारभुसाइका काम पाहि। हाइ इदोइ नेलाइ नियम मानितेङ जेङका एइ ना रेम्काबानाल हिङतेङ खान्धुर पानाङ जेङका एइ? 6 आब्राहामको बारेता धरम किताबता इसिका लेखेका हि, “वा परमेस्वरहेङ खान्धुर पाहि रो इदोइ वाको भाअ्सिङ धरमाति गान्देन्हाका हिघाहि।” 7 इदोइखातिर जाजाइ परमेस्वरहेङ खान्धुर पाखे, एम्बालाइ दोङ आब्राहामको जाहान एइ दोअ्तेङ नेलाइ गेसु। 8 धरमकिताबता बो जात्याको द्याङगेलाइ बुङ खान्धुरसो परमेस्वर धरमाति बान्हायावा दोअ्तेङ लेखेन्हाका हिघाहि। एन्साङ पातेङ लाम्फा दोङ रेम्काबानालता परमेस्वर आब्राहामहेङ एसा दोअ्का हिघाहि, “नासोङ सुमिङको गोताङ जात्याको द्याङगेलाइ बुङ सहसाम्पा निनावा।” 9 इदोइखातिर आब्राहाम परमेस्वरहेङ खान्धुर पातेङ सहसाम्पा निङका भाइपाङ एन्साङ पातेङ बोमि बुङ ख्रिस्टहेङ खान्धुर पातेङ सहसाम्पा निनावा। 10 जाइ नियम मानितेङ धरमाति जेङलि भोखे एम्बालाइ झाराङ साराप निङचावा। हाइपानु धरमकिताबता इसिका लेखेन्हाका हि, “नियमता लेखेन्हाका गोताङ काथागेलाइता माहिकालाइ रो इङकोहेङ मामानेकालाइ झाराङ साराप निङचावा।” 11 परमेस्वरको आगाता नियमसो हासु बुङ धरमाति माजेङखे। हाइदोनु धरमकिताबता इसिका लेखेन्हाका हि, “धरमाति द्याङगेलाइ चाहिँ खान्धुरसो दोङ सिन्हुतावा।” 12 परमेस्वरता खान्धुर पाका रो नियम मानेका भेभेनेङ काथा एइ। धरम किताबता इसिका लेखेन्हाका हि, “जाइ नियम मान्यावा वा इङकोङसो दोङ सिन्हुतावा।” 13 नियम केलाइता साराप चुमाहि कालाउ ख्रिस्ट इङको साराप ताइमिङ र्हुतेङ केलाइहेङ छुटकारा पिहि। हाइदोनु धरमकिताबता इसिका लेखेन्हाका हि “जाइ सिङता तोइन्हाखे इङको साराप निङचाका हिखे।” 14 इदोइखातिर आब्राहामहेङ पिका सहसाम्पा ख्रिस्ट इसुसो बो जात्याको द्याङगेलाइ निनाको रो परमेस्वर कबोल पाका पुनित हाङसा केलाइ खान्धुरसो निङलि द्वाको दोअ्तेङ ख्रिस्ट केलाइहेङ दाम तिरितेङ छुटकारा पिहि। नियम रो कबोल 15 दादाओने बाइओनेगेलाइ, द्याङको पाका आनिबानिसो का नेलाइहेङ एलोङ काथा दोअ्खा। एदि न्हेमि द्याङ हिदि बुङ काथाता मन्जुर जेङतेङ सहिछाप पाखे पानु, न्हुअ्सो एम्बालाइ हिदिङ काथा थपेलि रो घातेपालि बुङ माद्वावा। 16 परमेस्वर आब्राहाम रो वाको खाल दोफा कबोल पाका हिघाहि। धरम किताब “खालगेलाइहेङ” मादोअ्खे, इदोइसो ते हेन्जाङ द्यागेलाइहेङ बुझिपाखे। कालाउ धरम किताब “नाङको खालहेङ” दोअ्खे, इदोसोचाहिँ एमि द्याङहेङ खिनिङ बुझिपाखे, जाइ इसु ख्रिस्ट हि। 17 काङको दोअ्लि भोका काथाको माने इदोइ एइ, परमेस्वर आब्राहामदोफा पाका कबोलता सहिछाप पालिदोका हि। कालाउ द्यासाइ एकुरिते बाअ्सारन्हुअ्सो लोका मोसाको नियमहेङ इङको कबोल खारिज पालि माद्वावा। 18 हाइदोनु परमेस्वरको प्याङका दोअ्का खाबारा नियम मानितेङ निङनु ते इङको कबोल दोङ माजेङहि। कालाउ इदोइ ते परमेस्वर कबोल पातेङ आब्राहामहेङ पिलिङदोका हि। 19 एन्सानु परमेस्वर नियम हाइपालि पिहि कुनु? वा केलाइहेङ कुकरम नाल्पालि पिहि कालाउ कबोल पाका आब्राहामको खाल ख्रिस्ट मालोपाधाउ खिनिङ पिहि। परमेस्वर इदोइ नियम सादेलचरगेलाइसो मोसाहेङ पिहि। हाइपानु मोसाचाहिँ द्याङ रो परमेस्वरको माझाको धुइका द्याङ हिघाखे। 20 एदि न्हेमि द्याङ मिलिलि भोखे पानु इङको पहर माझाको खामाल गोइखे। कालाउ परमेस्वर ताइमिङ आब्राहामदोफा कबोल पानाङ वासेहेङ हिदिङ माझाको खामाल मागोइहि। नियमको काम 21 एन्सानु हाइ नियम परमेस्वरको कबोलको खिलापि एइ कुनु? आहाँ हेअ्लाउ मोको! एदि द्याङगेलाइ असिम ज्यान निनाको दोअ्तेङ नियम पिका हिनु, इदोइ नियम दोङ द्याङगेलाइ परमेस्वरको आगाता धरमाति जेङधावा। 22 कालाउ इसु ख्रिस्टता खान्धुर पाकालाइहेङ कबोल पाका सहसाम्पा खान्धुर पाकालाइ दोङ निनाको दोअ्तेङ गोताङ दुनिया कुकरमको आधिनता हि दोअ्तेङ धरमकिताब दोअ्खे। 23 कालाउ ख्रिस्टता खान्धुर पाका खान्तेङ लाम्फा केलाइ नियमको आधिनता हिघान्हाहि रो खान्धुर देखाल माजेङपाधाउ केलाइ थुन्हिन्हाका हिघान्हाहि। 24 इदोइखातिर खान्धुरसो केलाइ धरमाति जेङलि द्वाको दोअ्तेङ ख्रिस्ट मालोपाधाउ नियम दोङ केलाइहेङ सामर्हाइघाहि। 25 कालाउ एला ख्रिस्टहेङ खान्धुर पाका पहर लोनाङ एलासो ओसो नियम केलाइहेङ सामर्हाइलि मागोयाङ। परमेस्वरको जाहानगेलाइ 26 एला नेलाइ झाराङ खान्धुरसो दोङ ख्रिस्ट इसुता परमेस्वरको जाहान जेङका हिसुन्हा। 27 हाइदोनु ख्रिस्टता चिभुअ्का झाराङ नावा धाबा लागाइका भाइपाङ ख्रिस्टको बानिबेहोरा र्हुका हिसुन्हा। 28 एला यहुदि रो बो जात्या, बान्धाइ रो फुका, वाबाल रो बेबाल, एसामान हिसुन्हा। हाइदोनु ख्रिस्ट इसुता नेलाइ एलोङ दोङ जेङका हिसुन्हा। 29 एदि नेलाइ ख्रिस्टको द्याङ हिसुन्हा पानु, नेलाइ आब्राहामको खाल एइ। कालाउ कबोलआन्सार हाकवाला बुङ एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.