गलाति 2 - धिमालपावल रो बो साल्तेङ दिङगिल्कालाइ 1 तेद्या बाअ्सारन्हुअ्सो का रो बारनाबास यरुसलेम हानेन्हाहि। इन्ता हानेलाउ तितसहेङ बुङ दोसाङ चुमपुका हिघाखा। 2 परमेस्वर कासेहेङ हाने दोअ्नाङसिङ का इन्ता हानेघा। काङको पातेङहिका काम बिथाको माज्याको दोअ्तेङ बोजात्यागेलाइहेङ पारचार पाका रेम्काबानाल दोङ मन्डलिको आगुवागेलाइ दोअ्तेङ नालन्हाकालाइहेङ हिङपाघा। हाइदोनु केलाइको बिद्याचाहिँ एलोङदोङ एइ दोअ्तेङ एम्बालाइ ग्याको रो काङको पाका काम बिथाको माज्याको दोअ्तेङ का एन्सा पाघा। 3 कालाउ तितस बोजात्या हिघाखे रो वा का दोफाङ हिलाउ बुङ इन्ताको खान्धुरिगेलाइ इङकोहेङ खतना जेङलि गोयाङ दोअ्तेङ हासुङ कर मालागाइहि। 4 कालाउबुङ हेथे धाताइका खान्धुरिगेलाइ एइ दोअ्कालाइ तितसहेङ खाताना पापालि भोघाखे। एम्बालाइ मागेपासिङ केलाइ लिअ्ता दुल्तेङ ख्रिस्ट इसुता केलाइको निङका छुटकाराको चेवा पाहि। कालाउ केलाइहेङ नियम साअ्पालि लागाइलि भोहि। 5 कालाउ एम्बालाइको खान्धुर पाका रेम्काबानालाको सत बानाल हाइदोङ माफेरेन्हाको दोअ्तेङ केलाइ एम्बालाइको काथा मामाहिङपिन्हाहि। 6 कालाउ यरुसलेमता हिका इङको आगुवा दोअ्तेङ नाल्कालाइ काङको पारचार पाका रेम्काबानालता हाइदोङ नावा साल्हा मापिहि। इदोइखातिर एम्बालाइ जेथे बारालाउ बुङ कासेहेङ हाइदोङ माज्याङ। हाइदोनु परमेस्वर हासुहेङ बुङ पछेपात मापाखे। 7 कालाउ परमेस्वर पत्रुसहेङ यहुदिगेलाइकोता खाटाइका भाइपाङ वा दोङ कासेहेङ बुङ बोजात्याता रेम्काबानाल पारचार पालि खाटाइका याकुब, पत्रुस रो युहन्ना गेहि। 8 पत्रुसहेङ यहुदिगेलाइको माझाता रेम्काबानाल पारचार पालि साल्तेङ दिङगिल्का बान्हाइका परमेस्वर दोङ कासेहेङ बुङ बो जात्यागेलाइको माझाता रेम्काबानाल पारचार पालि साल्तेङ दिङगिल्का बान्हाइका एइ। 9 इदोइ काङको भाअ्सिङ परमेस्वरको बाराका निगाहा एइ। इदोइ काथाहेङ याकुब, पत्रुस रो युहन्ना भाइका मन्डलिको मुल आगुवागेलाइ दोअ्तेङ नालन्हाकालाइ बुङ साअ्का हि। इदोइखातिर एम्बालाइ बारनाबास रो कासेहेङ खुर मिलिपातेङ ताइको मिलापता चुमाहि। केलाइचाहिँ बो जात्याको माझाता रो एम्बालाइचाहिँ यहुदिगेलाइको माझाता काम पालि राजि जेङन्हाहि। 10 कोलाउ एम्बालाइ हारजाता हिका निरधोगेलाइहेङ साघाइलि गोयाङ दोअ्का काथा खिनिङ केलाइहेङ दोअ्हि। एन्सा पालि काङको बुङ लाल्सा हिघाहि। पावल पत्रुसको दुस तिङपापिका 11 पत्रुस एन्टिओखिया पुरता लोका पहरता का झाराङको आगाता वाको दुस तिङपापिघा। हाइदोनु वाको पाका बेभार दुसि हिघाखे। 12 याकुबको दिङगिल्का द्याङगेलाइ लोकाखाङतेङ लाम्फा पत्रुस बोजात्याको खान्धुरिगेलाइ दोफा योम्तेङ चाघाखे। कालाउ जेलाउ यहुदि खान्धुरिगेलाइ लोहि, कोलाउ पत्रुस एम्बालाइ दोफा योम्तेङ चालि लाअ्हि रो सङगत बुङ पालि लाअ्हि। हाइदोनु वा खाताना पालि गोयाङ दोअ्कालाइदोफा थिघाखे। 13 कालाउ इन्ता हिका यहुदि खान्धुरिगेलाइ बुङ पत्रुसको पाका आन्सार दोङ पालि तेङहि। एसा जेङलाउ बारनाबास बुङ बोजात्याको खान्धुरिगेलाइदोफा सङगत पालि दोङ लाअ्हि। 14 कालाउ जेलाउ रेम्काबानालको सत काथाता एम्बालाइ माचलेका तिङघा, कोलाउ एम्बालाइ झाराङको आगाता का पत्रुसहेङ दोअ्घा, “ना यहुदि जेङतेङ बुङ यहुदिभाइपा माजेङसिङ बोजात्यागेलाइभाइपाङ चलिखेना पानु, बोजात्यागेलाइहेङ यहुदिभाइपाङ चलेलि हेसापा कर लागाइखेना?” 15 केलाइ ते जोलोमसोङ यहुदि रो नियम मामानेका बो जात्यागेलाइ भाइका कुकरमि माको। 16 कालाउ केलाइ गेन्हाखे, हिदिङ बुङ द्याङ नियम मानितेङ परमेस्वरको आगाता हेअ्लाउ धरमाति जेङलि मादोखे। कालाउ इसु ख्रिस्टहेङ खान्धुर पातेङ खिनिङ वा धरमाति जेङलि दोखे। एन्साङ पातेङ केलाइ बुङ नियम मानितेङ माको, कालाउ धरमाति जेङलि द्वाको दोअ्तेङ ख्रिस्ट इसुहेङ खान्धुर पाका हिन्हाहि। 17 एदि केलाइ ख्रिस्टहेङ खान्धुर पातेङ परमेस्वरको आगाता धरमाति जेङलि भोलाउ केलाइ यहुदिगेलाइ बुङ बो जात्याको द्याङगेलाइ भाइपाङ कुकरमि दोङ जेङन्हाहि पानु हाइ ख्रिस्ट केलाइहेङ कुकरम पालि लागाइहि कुनु? आँहा इसिका हेअ्लाउ जेङलि माद्वाङ! 18 का नियम साअ्लि लाअ्का हिघा रो आरोङ इङकोङ नियम मानेखा पानु ताइमिङ कुकरमि हिघा दोअ्तेङ तिङपाखा। 19 का लाम्फा नियमहेङ मानेलि भोलाउ इदोङ नियम कासेहेङ दुसिहि। इदोइखातिर का परमेस्वरको भाअ्सिङ सिन्हुलि नियम मानेलि लाअ्घा। 20 का ख्रिस्टदोफाङ काङको ज्यानको पुरुना आनिबानि कुरुसताङ टाङगाइका हिघा। एलासो ओसो सिन्हुका का माको, कालाउ ख्रिस्ट काता सिन्हुतावा। जेदोङ ज्यान जिउता का एला सिन्हुताङका, इङको परमेस्वरको चानता खान्धुर पातेङ सिन्हुताङका। हाइपानु जाइ कासेहेङ माया पाहि रो काङको भाअ्सिङ ताइमिहेङ क्रुसता चार्हाइहि। 21 का परमेस्वरको निगाहाहेङ पान्साइलि माद्वाङका। हाइपानु नियमसो धरमाति जेङन्हाखे पानुते ख्रिस्ट बिथाता सिहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.