गलाति 1 - धिमाल1 का पावल साल्तेङ दिङगिल्कासो इदोइ चिथि लेखेदोङखा। का हिदिङ बुङ द्याङगेलाइसो माको कालाउ इसु ख्रिस्ट रो वासेहेङ सिकासो सिन्हुपाका परमेस्वर आबासो दोङ साल्का एइ। 2 का रो कादोफा हिका झाराङ दादाओने बाइओने पाहासो गलाति माउजाता हिका मन्डलिगेलाइको भाअ्सिङ इदोइ चिथि लेखेतेङ पिगिल्दोङखा। 3 परमेस्वर आबा रो केलाइको प्रभु इसु ख्रिस्ट नेलाइहेङ निगाहा रो बेराजा प्याको। 4 केलाइको परमेस्वर आबाको लाल्साआन्सार इदोइ एलाको दुरजन दुनियासो केलाइहेङ छुटकारा पिलि प्रभु इसु ख्रिस्ट ताइमिङहेङ केलाइको कुकरमको भाअ्सिङ ताइको ज्यान भोक पिहि। 5 परमेस्वर आबाहेङ दिनाङ प्रताप जेङतेङह्याको। आमेन। जातिङको रेम्काबानाल एलोङ खिनिङ हि 6 ख्रिस्टको निगाहाता नेलाइहेङ काइका परमेस्वर आबाहेङ लाअ्तेङ नेलाइ बो रेम्काबानालभारि लागिदोङसुखेना दोअ्का हिङतेङ का हेन्जाङ भारभुसाइका हिघा। 7 जातिङको बो हिदिङ रेम्काबानाल दोङ मान्थु। कालाउ इसिका द्याङगेलाइ बुङ हि, जाइ ख्रिस्टको रेम्काबानालहेङ केउपातेङ नेलाइहेङ आवाइपालि खाङखे। 8 कालाउ केलाइको पारचार पाका रेम्काबानाल खान्तेङ भेनेङ रेम्का बानाल पारचार पाखे पानु केलाइ लाउ बुङ सादेलचर लाउ बुङ साराप निङचावा। 9 का इदोइ काथा नेलाइहेङ लाम्फा बुङ दोअ्का हिघाखा रो एला बुङ दोअ्दोङखा। नेलाइ जेदोङ रेम्काबानाल र्हुका हिसुन्हा, बो हासुङ नेलाइहेङ इङको खान्तेङ भेनेङ रेम्काबानाल पारचार पाखे पानु इङको जातिङकोङ साराप निङचावा। 10 का नेलाइहेङ दोअ्खा, एला का द्याङगेलाइको चितबुझिपालि माको, कालाउ का ते परमेस्वरको चित बुझिपालि भो:खा। एदि का द्याङगेलाइको चित बुझिपालि भो:का हिनु का ख्रिस्टको चाकर जेङलि दोङ मादोधाङका। पावल हेसापा साल्तेङ दिङगिल्का जेङहि 11 दादाओने बाइओनेगेलाइ, नेलाइहेङ पारचार पाका रेम्काबानाल द्याङगेलाइसो लोका माको दोअ्तेङ नेलाइ गेसु। 12 का इदोइ रेम्काबानाल हिदिङ द्याङसो निङका माको रो हासुङ धिरपाका बुङ माको। कालाउ इसु ख्रिस्ट ताइमिङ दोङ इदोइ रेम्काबानाल देखाल पाका एइ। 13 का यहुदि धरमता हिलाउ हिसिका द्याङ हिघाखा दोअ्तेङ नेलाइदोङ गेसुखेना। इङकोपहर हेसापा का परमेस्वरको मन्डलिको द्याङगेलाइहेङ सान्ताइघा रो इङकोहेङ मुअ्पालि भोघा। 14 इङको पहर का दोसाङको सानाइतिगेलाइहेङ काल्हाङतेङ का यहुदि धरमता आगा लाङका हिघाखा। कालाउ काङको आबा खालको रितता का हेन्जाङ जोसिका हिघाखा। 15 कालाउ परमेस्वर ताइ लेङहोइ का जोन्मिकाखान्तेङ लाम्फा दोङ ताइको निगाहासो कासेहेङ खेङहि रो वाको ताइकोङ काम पालि काइहि। 16 परमेस्वर दोङ कासो बो जात्याको माझाता रेम्काबानाल पारचार ज्याको दोअ्तेङ ताइको चानहेङ काता देखाल पाहि। इङको पहर का हिदिङ द्याङदोफा बुङ मतो र्हुलि मान्हेघा। 17 का खान्तेङ लाम्फाको साल्तेङ दिङगिल्कालाइदोफा बुङ साल्हा र्हुलि यरुसलेम माहानेघा। भुरुङ ओदोङघरि अरब मुलुकता हानेघा रो इङको न्हुअ्सो दमस्कस पुरता घुरितेङ लोघा। 18 कोलाउ सुम बाअ्सारन्हुअ्सो खिनिङ का पत्रुस हेङ दुसुलि यरुसलेम हानेघा रो इन्ता का वा दोफाङ तेना दिनाथिकापा हिघा। 19 का इन्ता हिलाउ प्रभुको ओने याकुबहेङ खिनिङ दुसुघा रो बो हिदिङ साल्तेङ दिङगिल्काहेङ मादुसुघा। 20 काङको लेखेका काथागेलाइ जातिङको एइ दोअ्का काथा का परमेस्वरको आगाता नेलाइहेङ माढाटाइसिङ दोअ्दोङखा। 21 इङकोन्हुअ्सो का सिरिया रो किलिकियाको थामेगेलाइता हानेघा। 22 इङको पहरथिकापा यहुदिया मन्डलिको ख्रिस्टता खान्धुर पाका द्याङगेलाइ कासेहेङ तिङकाङ मान्थुघाहि। 23 एम्बालाइ इसिका खिनिङ हिङका हिघाखे, “लाम्फा केलाइहेङ सान्ताइका द्याङ जेदोङ खान्धुरहेङ मुअ्पालि भोका हिघाखे, एला इङको इङकोङ खान्धुर पारचार पादोङखे।” 24 एसापा एम्बालाइ का फेरेन्हाका खातिर परमेस्वरहेङ बाखिन्हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.