कलस्सि 4 - धिमाल1 मालिकगेलाइ, नेलाइ ताइको कामत्यागेलाइहेङ पछेपात मापासिङ रेम्का बेभार पासु। नेलाइ बुङ सादेलता ताइको मालिक हि दोअ्का काथा मानिल्सु। बो आरतिगेलाइ 2 नेलाइ दिनाङ पुकार पातेङ हिसु। पुकार पालाउ नेलाइ परमेस्वरहेङ च्याबास चार्हाइतेङ मन लागाइतेङ पुकार पासु। 3 का रेमकाबानाल पारचार पानाङसिङ थुना निङचाका हिघा। कालाउ ख्रिस्टको बारेता म्होअ्न्हातेङ हिका काथा दोअ्पिलि रो वाको रेम्काबानाल पारचार पालिको भाअ्सिङ परमेस्वर केलाइहेङ माउका प्याको दोअ्तेङ पुकार पापिसु। 4 कोलाउ का जेसापा बुझिपालि गोइका हि, एन्सा दोङ धुइलि द्वाको दोअ्तेङ काङको भाअ्सिङ बुङ नेलाइ पुकार पापिसु। 5 इसुता खान्धुर मापाकालाइदोफा बेभार पालाउ आकिल थेम्पातेङ पासु। कालाउ नेलाइको निङका गोताङ माउकाहेङ एन्साङ माथाल्सु। 6 देसे सारहेङ ताका बान्हाइका भाइपाङ नेलाइ धुइलाउ तापा धुइसु। एन्सा पासुन्हा पानु नेलाइ झाराङहेङ रेम्फा जावाफ पिलि दोस्वाना। न्हुअ्सोको सेउपाका 7 केलाइको मोन्दाताका ओने तुखिकस दोङ काङको गोताङ काथा नेलाइहेङ हिङपावा। वा बुङ केलाइदोफाङ हितेङ प्रभुको सेवा पाका खान्धुरलाएक चाकर एइ। 8 इदोइखातिर का वासेहेङ नेलाइकोता दिङगिल्दोङखा। कोलाउ वा दोङ केलाइको बारेता गोताङ काथा दोअ्पितेङ नेलाइहेङ हाउसा प्यावा। 9 वा दोफा ओनेसिमस बुङ नेलाइकोता लोदोङखे। वा बुङ एमि मोन्दाताका खान्धुरलाएक ओने एइ। कालाउ वा नेलाइकोङ हुलको एइ। जेलाउ इङको न्हेमि नेलाइकोता ल्वावा कोलाउ नेलाइहेङ इताको गोताङ काथागेलाइ हिङपावा। 10 कादोफाङ थुनाता हिका अरिस्तारखस नेलाइहेङ सेउपाका पिगिल्का हि। बारनाबासको ओने मर्कुस बुङ सेउपाका पिगिल्का हि। वाको बारेता का लाम्फा दोङ नेलाइहेङ दोअ्पिहोइका। वा नेलाइकोता लोलाउ वासेहेङ रेम्फा स्वागत पासु। 11 युस्तस मिङ हिका इसु बुङ नेलाइहेङ सेउपाका पिगिल्का हि। परमेस्वरको सारभि बार्हेपालि कादोफाङ काम पाका यहुदि खान्धुरिगेलाइता इदोङ सुमि खिनिङ एइ। जातिङको एबालाइ कासेहेङ हेन्जाङ हाउसा पिका हि। 12 नेलाइकोङ एमि ओने, ख्रिस्ट इसुको चाकर इपाफ्रास बुङ नेलाइहेङ सेउपाका पिगिल्का हि। नेलाइ हाङसाता बोल्याका जेङतेङ थिर जेङसु रो परमेस्वरको भोका गोताङ काथा पाक्का ग्याको दोअ्तेङ वा दिनाङ पुकार पाखे। 13 वा नेलाइको भाअ्सिङ, लाउडिकिया रो हिरापोलिस पुरता हिका द्याङगेलाइको भाअ्सिङ हेन्जाङ भेम्ति ह्याअ्पाका हि। इङको काथा ताइकोङ मिहोइ तिङका हिनाङ का इदोइ दोअ्लि द्वाङका। 14 केलाइको मोन्दाताका बोइद्या लुका रो डेमास बुङ नेलाइहेङ सेउपाका पिगिल्का हि। 15 लाउडिकियाता हिका ओनेगेलाइहेङ कालाउ नुम्फासहेङ रो वाको साअ्ता जोम्का मन्डलिहेङ केलाइको सेउपाका हिम्पापिसु। 16 नेलाइ इदोइ चिथि पर्हेलिदोकान्हुअ्सो लाउडिकियाता हिका मन्डलिहेङ बुङ पर्हेलि पिसु। एन्साङ पातेङ लाउडिकियाको चिथि बुङ नेलाइ पर्हेसु। 17 कालाउ प्रभुको जिमा पिका काम ना पोङघा पालि गोयाना दोअ्तेङ अरखिप्पसहेङ दोअ्पिसु। 18 का पावलसो नेलाइहेङ इदोइ सेउपाका ताइकोङ खुरहोइ लेखेतेङ पिगिल्दोङखा। का थुनाता परेका हिघा दोअ्का काथा बुङ नेलाइदोङ गेसुखेना। कालाउ नेलाइता परमेस्वरको निगाहा ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.