कलस्सि 3 - धिमाल1 इदोइखातिर नेलाइ बुङ ख्रिस्टदोफाङ सिन्हुतेङ ल्होका हिनु दिनाङ सादेलकोङ काथागेलाइ भोसु। जेता ख्रिस्ट परमेस्वरको दाम्पाहा योम्का हि। 2 सुमिङता हिका काथागेलाइता माको कालाउ सादेलको काथाता ताइको मन लागाइसु। 3 हाइदोनु नेलाइको लाम्फाको कुकरमि ज्यान सिलिदोका हि रो एला नेलाइको नावा ज्यान बुङ परमेस्वरता ख्रिस्टदोफाङ म्होअ्न्हातेङ हि। 4 नेलाइहेङ नावा ज्यान पिका ते ख्रिस्ट दोङ हि। वा इदोइ सुमिङता द्याङगेलाइकोता तिङन्हालाउ नेलाइ बुङ वा दोफाङ तिङन्हास्वाना रो वा दोफाङ मानता आसि र्हुस्वाना। पुरुना रो नावा ज्यान 5 इदोइखातिर नेलाइको कुकरमि बिचारसो ओल्हेका दुरजन काथागेलाइ पालि लाअ्सु। इदोइचाहिँ: दुराचार पालि, अपुनित काथाता लागिलि, लेदरपाका लाल्सा पालि, मारेम्का बिचार पालि रो दिअ्लि। कालाउ दिअ्लि ते गोइका चिजहेङ पुजिका भाइकाङ जेङखे। 6 इदोङ काथागेलाइ पालाउ दोङ परमेस्वरको चेर वाको हुकुम मामानेकालाइर्हुता पर्यावा। 7 ए पहर नेलाइ बुङ इसिकाङ हिघासुन्हा रो इङसिकाङ दुरजन काथागेलाइता चलेसुघान्हा। 8 कालाउ एला नेलाइ चेर दाहा पाका, दाहा पाका, सिकाका, निन्दा पाका रो ताइको नुइसो आखेका काथा पाका इसिका गोताङ बानिगेलाइ लाअ्लिङ गोइस्वाना। 9 नेलाइ हासुहेङ बुङ ढाटाइका काम मापासु। हाइदोनु नेलाइको पुरुना कुकरमि आनिबानि रो इङकोको गोताङ दुरजन कामगेलाइ लाअ्लिदोका हिसुन्हा। 10 कालाउ नेलाइ परमेस्वरको बान्हाइका नावा ज्यान र्हुसुहोइना। कालाउ नेलाइ सिरजाइका परमेस्वरहेङ नाल्तेङ वा भाइकाङ जेङदोङसुखेना। 11 इदोइखातिर परमेस्वर केलाइहेङ नावा द्याङ बान्हाइका हि रो द्याङ द्याङको माझाता हाइदोङ फाराका मान्थु। इता यहुदि रो बोजात्या हिलाउ बुङ, खाताना पाका रो खाताना मापाका हिलाउ बुङ, मापर्हेका रो असभे हिलाउ बुङ, बान्धाइ रो फुक्का हिलाउ बुङ एम्बालाइता हाइदोङ फाराक माज्यावा। कालाउ ख्रिस्ट चाहिँ झाराङखान्तेङ बाराका हि रो वा केलाइ झाराङता बासा हिखे। 12 इदोइखातिर परमेस्वर माया पातेङ नेलाइहेङ साल्हि रो पुनित जनगेलाइ बान्हाइहि। कालाउ नेलाइ तु:ता परेकालाउहेङ साघाइसु, दाया माया पासु, सोझाका जेङसु, नोइका रो धिर जेङसु। 13 नेलाइ एमि भेनेङहेङ सहेसु रो हासुङको खिलापता हाइदोङ काथा हि पानु माफ पासु। जेसापा प्रभु नेलाइहेङ माफ पाहि, नेलाइ बुङ एमि भेनेङहेङ माफ पासु। 14 इदोइ र्हुताको गोताङ काथागेलाइ खान्तेङ मुल काथाचाहिँ नेलाइ एमि भेनेङहेङ इन्ताना पासु। इदोङ दाया माया दोङ केलाइ झाराङहेङ मिलापता चुमाखे। 15 कालाउ ख्रिस्टको सुबिस्ता नेलाइको कोन्धाङता सारभि पाको। परमेस्वर नेलाइहेङ एलोङदोङ जिउता बेराजापा हिसु दोअ्तेङ काइका एइ। इदोङ काथाको भाअ्सिङ दोङ नेलाइ वासेहेङ च्याबास चार्हाइसु। 16 ख्रिस्टको कथन नेलाइको कोन्धाङता इस्तुङ ह्याको। इङकोङ कथनको गोताङ आकिलहोइ ए भेनेङहेङ धिरपाका रो साल्हा पिका जेङसु। ताइको कोन्धाङसोङ च्याबासि जेङतेङ परमेस्वरको पिका भेभेनेङ लेगेलाइ लेतेङ वासेहेङ बाखिन्सु। 17 नेलाइ जेदोङ दोअ्लाउ बुङ, जेदोङ पालाउ बुङ, गोताङ काथा प्रभु इसुकोङ मिङता पासु। कालाउ वासो दोङ परमेस्वर आबाहेङ च्याबास चार्हाइसु। ख्रिस्टियान ज्यान 18 बेअ्गेलाइ, नेलाइ प्रभुहेङ मोन्दातापाङ ताइ केअ्को आधिनता हिसु। 19 केअ्गेलाइ, नेलाइ ताइ बेअ्गेलाइहेङ इन्ताना पासु रो मासान्ताइसु। 20 जामालाइ, नेलाइ ताइको आबा आमाइको दोअ्का काथागेलाइ मानेसु। हाइदोनु एसा पालाउ परमेस्वर लेङचावा। 21 आबागेलाइ, नेलाइ ताइको चान चामिन्दिको चेर माताङपापिसु। माकोनु ते एम्बालाइको मन थुरावा। 22 बान्धाइगेलाइ, नेलाइ ताइको मालिकगेलाइको दोअ्का गोताङ काथागेलाइ मानेसु। मालिकहेङ लेङचापालिको भाअ्सिङ खिनिङ माको, कालाउ प्रभुदोफा थितेङ सोझा मनसो काम पासु। 23 नेलाइ जेदोङ पासुखेना द्याङको भाअ्सिङ माको, कालाउ प्रभुहेङ पाका भाइपाङ मन पितेङ पासु। 24 हाइदोनु नेलाइ गेसुखेना, नेलाइहेङ प्रभु इनाम प्यावा। इङको इनाम चाहिँ वाको पाका कबोलको सहसाम्पा एइ। कालाउ नेलाइ जाइहेङ चाकर पासुखेना वा दोङ प्रभु ख्रिस्ट हि। 25 जाइ मारेम्का काम पावा इङको दार भोग्यावा। हाइदोनु परमेस्वर हासुकोङ पछेपात मापावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.