कलस्सि 2 - धिमाल1 जातिङको का ते नेलाइको भाअ्सिङ, लाउडिकियाको द्याङगेलाइको भाअ्सिङ रो कासेहेङ मानाल्का झाराङको भाअ्सिङ बुङ हेथे हेन्जा तु: भोगितेङ काम पादोङखा दोअ्का काथा का नेलाइहेङ गिपालि भोखा। 2 नेलाइ आर निङसु रो मायाता दोफाङ धेउन्हासु दोअ्तेङ का एसा पाका एइ। एन्सा जेङलाउ नेलाइ हाङसाता हेन्जाङ बोल्याका जेङतेङ परमेस्वरको गोताङ लिअ्ताको काथा बुझिलि दोस्वाना। कालाउ इङको लिअ्ताको काथा चाहिँ ख्रिस्ट हि। 3 वाता दोङ परमेस्वरको हेन्जाङ मोलहिका गोताङ आकिल रो बुदिगेलाइ म्होअ्न्हा हि। 4 इदोइखातिर का नेलाइहेङ दोअ्खा, लाल्चा तिम्पातेङ पाका काथासो नेलाइहेङ हासु बुङ माआवाइपाको। 5 हाइदोनु का नेलाइसो दुरे हिलाउ बुङ काङको मन ते दिनाङ नेलाइदोफाङ हिखे। कालाउ नेलाइ एलोङदोङ मन जेङतेङ हिका रो ख्रिस्टता नेलाइको खान्धुर हेन्जाङ बोल्याका हिका तिङतेङ का हेन्जाङ लेङचाखा। ख्रिस्टता निङका ज्यान 6 इदोइखातिर नेलाइ ख्रिस्ट इसुहेङ प्रभु दोअ्तेङ मानेका हिसुन्हा एन्साङ पातेङ नेलाइ वाता थिर जेङतेङ हिसु। 7 जेसापा सिङ भोनोता जारि जोतेङ बोल्याका जेङखे, नेलाइ बुङ खान्धुरता बोल्याका जेङतेङ हानेसु। कालाउ नेलाइहेङ धिरपाका आन्सार खान्धुरता बोल्याका जेङसु रो परमेस्वरहेङ दिनाङ च्याबास चार्हाइसु। 8 नेलाइ मिन्हापातेङ हिसु, कालाउ हासु बुङ असत रो बिथाको काथा पातेङ नेलाइहेङ आस्तिता मादेपाको। इसिका काथागेलाइ ख्रिस्टसो माको द्याङगेलाइको रितिथिति रो दुनियाको बिद्यासो लोखे। 9 हाइदोनु ख्रिस्ट द्याङको आकारता हिलाउ बुङ परमेस्वरता हिका गोताङ आनिबानि वाता हि। 10 कालाउ ख्रिस्टता नेलाइ पुरा ज्यान निङका हिसुन्हा। वा दोङ गोताङ मातिङका सरबङ रो खाबारा र्हुता राज पावा। 11 खाताना पालाउ जिउसो बिह्या खेङन्हाका भाइपाङ ख्रिस्टको खतनासो नेलाइको कुकरम पाका मनहेङ खेङपिका हि। इदोइ ते द्याङको खुरसो जेङका माको, कालाउ ख्रिस्टसो जेङका एइ। 12 जेलाउ नेलाइ चिभुअ्का र्हुसुन्हा कोलाउ नेलाइ बुङ ख्रिस्टदोफाङ लिअ्न्हाका भाइकाङ हिघासुन्हा रो वा दोफाङ सिन्हुसुन्हा। हाइदोनु नेलाइ सिका ख्रिस्टहेङ सिन्हुपाका परमेस्वरको सरबङता खान्धुरि पासुन्हा। 13 नेलाइ लाम्फा कुकरमि हिघासुन्हा रो इङकोङ कुकरमको खातिर नेलाइ हाङसाता सिका हिघासुन्हा। कालाउ एला परमेस्वर नेलाइको गोताङ कुकरमगेलाइहेङ माफ पापितेङ नेलाइहेङ ख्रिस्टदोफाङ सिन्हुपाका हि। 14 कालाउ परमेस्वर केलाइको खिलापता लेखेन्हाका गोताङ कानुनता दाबि पाका दुस चिथिगेलाइहेङ खारेज पाहि रो वा इङकोहेङ कुरुसता बालसरि काटि तातेङ मुअ्पापिहि। 15 कालाउ परमेस्वर दुरजन सरबङ रो खाबारा घिङहि कालाउ ख्रिस्ट कुरुसता जितितेङ एम्बालाइहेङ द्याङगेलाइको आगाता लेदेरपाहि। 16 इदोइखातिर चाका रो आम्का, पारबागेलाइ, आँउसि माकोनु माइसाका दिना मानेका काथाता हिदिङ द्याङ नेलाइहेङ दुस मालागायाको। 17 इदोइ गोताङ न्हुअ्सो जेङका काथागेलाइको चिन्हो खिनिङ एइ। कालाउ जातिङको काथा ते ख्रिस्ट दोङ हि। 18 सादेलचरगेलाइहेङ पुजिलि गोइका दोअ्तेङ ताइमिहेङ बाराका फोमपाकालाइ हि। कालाउ “केलाइ इसिकाङ काथागेलाइ नजर निङका हिन्हाहि” दोअ्तेङ गफि जेङतेङ नोइका भाइपाङ तिङपाकालाइ दोङ एसा दोअ्खे। इसिका द्याङगेलाइ बिथाता तुजुक पाखे। एम्बालाइ नेलाइहेङ इसिका छलपाका काथाता आवाइपातेङ नेलाइ निङलिगोइका इनाम मागुमाइपासु। 19 एम्बालाइ ते ख्रिस्टदोफा हाइदोङ सामान्दा माताअ्खे। वाचाहिँ केलाइको पुरिङ हि, जाइ चाहिँ मन्डलि एइ। वा दोङ जिउहेङ बोल्याका बान्हाइखे रो जिउको आङगेलाइहेङ एदोफाङ जोरेतेङ ताअ्खे। कालाउ परमेस्वरको लाल्सा आन्सार केलाइको जिउ बार्हेतेङ हानेखे। ख्रिस्टदोफाङ सिन्हाहि रो ख्रिस्टदोफाङ सिन्हुताङ 20 नेलाइ ख्रिस्ट इसुता खान्धुरि पातेङ वादोफाङ सितेङ इदोइ दुनियाको कुकरमि द्याङगेलाइ भाइका जेङतेङ हाइपालि बान्चितेङ हिसुखेना? कालाउ इदोइ दुनियाको नियमगेलाइको आगाता हाइपालि म्हुइलि भोसुखेना? 21 हाइपालि नेलाइ चा:लि माएल, चालि माएल रो साइलि माएल दोअ्का नियमगेलाइ मानेसुखेना? 22 इदोइ काथागेलाइ ते चालाइकाता चालाइकाताङ राम्तेङ हानेखे। कालाउ इसिका काथागेलाइ ते द्याङगेलाइको बान्हाइका बिद्या रो नियम खिनिङ एइ। 23 इसिका नियमगेलाइते सोबाइका रो आकिलहिका तिङखे, कालाउ बुङ इदोइ द्याङको बान्हाइका धरमाति नियमगेलाइ खिनिङ एइ। याहोइ द्याङगेलाइहेङ नोइका जेङका आल पाखे रो जिउहेङ तु: पिखे। कालाउ धरमाति द्याङगेलाइहेङ दुरजन कामगेलाइ पालि हेअ्लाउ मानाहि मापाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.