कलस्सि 1 - धिमाल1 परमेस्वरको लाल्साहोइ ख्रिस्ट इसुको साल्तेङ दिङगिल्का का पावल रो केलाइको ओने तिमोथिसो, 2 कलस्सि पुरता हिका परमेस्वरको पुनित जनगेलाइ रो ख्रिस्टता खान्धुर पातेङहिका दादाओने बाइओनेगेलाइहेङ इदोइ चिथि लेखेदोङन्हाखे। केलाइको परमेस्वर आबा नेलाइहेङ निगाहा रो सुकाका प्याको। च्याबासको पुकार 3 नेलाइको भाअ्सिङ पुकार पालाउ केलाइ ताइको प्रभु इसु ख्रिस्टको आबा परमेस्वरहेङ दिनाङ च्याबास पिन्हाखे 4 हाइदोनु केलाइ ख्रिस्ट इसुता हिका नेलाइको खान्धुर रो परमेस्वरको गोताङ पुनित जनगेलाइहेङ नेलाइको पाका मायाको बारेता बुङ केलाइ हिङका हिन्हाहि। 5 जेदोङचाहिँ नेलाइको भाअ्सिङ सादेलता ताअ्न्हाका इनामको आसको खातिर नेलाइ इसिका खान्धुर रो माया पाका हिसुन्हा। इदोइ आसको बारेता नेलाइ लामफासोङ सतको बचन रेम्काबानालता हिङका हिसुन्हा। 6 कालाउ गोताङ दुनियाता इङको रेम्का बानाल लोका हि रो इङको रेम्काबानालता खान्धुर पातेङ द्याङगेलाइको आनिबानि रेम्का जेङदोङखे। कालाउ परमेस्वरको निगाहासो इङको सत काथा हिङका रो बुझिका दिनासो रेम्काबानाल नेलाइको ज्यानता रेम्का काम जेङदोङखे। 7 इदोइ रेम्काबानाल नेलाइ इपाफ्राससो धिरका हिसुन्हा। वा केलाइदोफाङ काम पाखे रो केलाइ वासेहेङ माया पान्हाखे। केलाइको भाअ्सिङ वा ख्रिस्टको खान्धुरलाएक चाकर एइ। 8 नेलाइ पुनित हाङसाको कामसो बोमिगेलाइहेङ माया पासुखेना दोअ्तेङ वा दोङ केलाइहेङ हिङपाका एइ। 9 इदोइ काथा हिङका दिनासोङ केलाइ नेलाइको भाअ्सिङ दिनाङ पुकार पान्हाखे। पुनित हाङसाको पिका आकिल रो समझसो परमेस्वरको लाल्सा गेसु दोअ्तेङ दोङ केलाइको पारथाना हि। 10 एन्सा पासुन्हा पानु नेलाइ प्रभुहेङ मोन्दाताका काम पातेङ दिनाङ वासेहेङ लेङचा पालि दोस्वाना। कालाउ गोताङ काम रेम्का पातेङ नेलाइको आनिबानि रेम्का जेनावा रो नेलाइ परमेस्वरकोङ आकिलता बार्हेतेङ हानेस्वाना। 11 परमेस्वरको बाराका सरबङको भान्डारसो लोका सरबङ निङतेङ नेलाइ बोल्याका जेङसु दोअ्का केलाइको पुकार हि। एन्सा जेङहि पानु नेलाइ गोताङ काथा लेङचातेङ थिर जेङतेङ सहिलि दोस्वाना। 12 कालाउ परमेस्वर आबा फाइसालाम्काको सारभिता वाको पुनित जनगेलाइको निङका काथा नेलाइ बुङ निङलि दोका बान्हाइकाता वासेहेङ दिनाङ च्याबास चार्हाइसु। 13 परमेस्वर दोङ केलाइहेङ दियाबलसको सरबङसो छुटकारा पिका हि। कालाउ वा केलाइहेङ ताइको दायाका चानको सारभिता चुमाका हि। 14 परमेस्वरको चानसोङ केलाइहेङ छुटकारा पिकाहि रो केलाइको कुकरम माफ पाका हि। ख्रिस्ट झाराङखान्तेङ बाराका 15 परमेस्वरहेङ हासु बुङ तिङलि माद्वा, कालाउ ख्रिस्ट द्याङ जेङतेङ परमेस्वर हिसिका हि दोअ्तेङ तिङपाहि। परमेस्वर गोताङ काथागेलाइ सिरजाइका खान्तेङ लाम्फा दोङ वा हिघाहि। कालाउ वा दोङ गोताङ सिरजाइर्हुता राज पावा। 16 हाइदोनु वा दोङ सादेल रो सुमिङता हिका गोताङ काथा सिरजाइ हि। तिङलि दोका रो तिङलि मादोका सरबङगेलाइ, मालिकगेलाइ, राजपाकालाइ रो खाबारागेलाइ इदोइ गोताङ ख्रिस्टसो रो ख्रिस्टकोङ भाअ्सिङ सिरजाइन्हाका एइ। 17 गोताङ काथा सिरजाइका खान्तेङ लाम्फा दोङ ख्रिस्ट हिघाहि। कालाउ वासो दोङ गोताङ काथागेलाइ चलेखे। 18 मन्डलिचाहिँ वाको जिउ एइ, वाचाहिँ मन्डलिको पुरिङ हि रो वा दोङ केलाइको मन्डलिको मुलेङ हि। कालाउ वा झाराङ खान्तेङ बाराका राजपाका ज्याको दोअ्तेङ परमेस्वर सिकालाइसो झाराङ खान्तेङ लाम्फा वासेहेङ सिन्हुपाहि। 19 हाइदोनु परमेस्वर ताइको गोताङ आनिबानि वाको चानता ताअ्लि दोङ लाल्सा पाहि। 20 कालाउ कुरुसता भोक जेङका ताइको चानको हितिहोइ सुबिस्ता पापातेङ सादेल रो सुमिङता हिका झाराङहेङ ताइमिदोफा मिलाप पापाहि। 21 ए पहर नेलाइ परमेस्वरसो दुरे हिघासुन्हा। नेलाइ मारेम्का बिचार रो मारेम्काङ काम पातेङ परमेस्वरको दुस्मन जेङसुन्हा। 22 कालाउ एला परमेस्वर नेलाइहेङ ताइको आगाता पुनित, चोखो रो दुसमान्थुका दोअ्तेङ वाको चानको ताइकोङ जिउको भोकहोइ नेलाइहेङ वा आरोङ ताइको सानाइति बान्हाइहि। 23 जातिङको नेलाइ थिर रो खान्धुरता बोल्याका जेङतेङ हिसु। नेलाइको हिङका रेम्काबानालता परमेस्वरको कबोल पाका आस पालि मामालाअ्सु। इदोङ रेम्काबानाल दुनियाको झाराङ द्याङगेलाइहेङ हिङपान्हाका हि। कालाउ का पावल इदोङ रेम्काबानाल हिङपालिको भाअ्सिङ चाकर जेङका हिघा। मन्डलिता पावलको सेवा 24 इदोइ पहरता का नेलाइको भाअ्सिङ तु: भोगेलि गोइलाउ का लेङचाका हिघा। हाइदोनु ख्रिस्टको जिउको भाअ्सिङ माकोनु मन्डलिको भाअ्सिङ भोगेलि गोइका तु:गेलाइ का काङको जिउता भोगितेङ पोङघा पाङका। 25 परमेस्वर दोङ कासेहेङ मन्डलिको चाकर बान्हाइहि। कालाउ नेलाइकोङ भालाइको भाअ्सिङ वाको गोताङ कथन हिङपालि जिम्मा पिहि। 26 इदोइ बिद्या जुकजुक रो लाम्फासो हासुङ बुझिलि मादोका म्होअ्न्हाका काथा हिघाहि। एला वा परमेस्वरको पुनित जनगेलाइहेङ याको माने हेपिका हि। 27 एम्बालाइहेङ झाराङ द्याङगेलाइको भाअ्सिङ इङको लिअ्ताको काथा हेथे बाराका हि दोअ्तेङ हेपिका परमेस्वरको उपाइ हिघाहि। कालाउ इङको लिअ्ताको काथाचाहिँ इदोङ एइ: ख्रिस्ट नेलाइको मनता हि रो नेलाइको मानता बासा ह्यावा। 28 इदोइखातिर केलाइ झाराङ द्याङगेलाइहेङ ख्रिस्टको बारेता हिङपान्हाखे। कालाउ झाराङहेङ ख्रिस्टता बोल्याका बान्हाइतेङ परमेस्वरकोता थुकापालि केलाइ गोताङ आकिल बुदिहोइ झाराङ द्याङगेलाइहेङ चेतानि पितेङ धिरपान्हाखे। 29 ख्रिस्ट कासेहेङ पिका सरबङसो दोङ का इदोइ काम मन लागाइतेङ पाखा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.