साल्न्हाका चात्या 9 - धिमालसाउलको ज्यान फेरेन्हाका ( साल्तेङ दिङगिल्का २२:६-१६ ; २६:१२-१८ ) 1 साउल प्रभुको चात्यागेलाइको खिलापता एला बुङ धम्कि रो सेअ्का धुनता मुल धामिकोता हानेहि। 2 वा प्रभुको दामा पिताइका वाबालाइ रो बेबालाइ जाइहेङ निङलाउ बुङ एम्बालाइहेङ रिम्तेङ यरुसलेमता चुमालि निनाको दोअ्तेङ दमस्कसको कचहरिसाअ्को मिङता पुर्जि र्हेहि। 3 जेलाउ साउल दमस्कसको भेर्पा थुकाहि, एक्कासि सादेलसो एलोङ चोलका वाको कोरबितिङ चिल्काहि। 4 वा भोनोता फेअ्न्हाहि रो वा एसा दोअ्का गाला हिङहि, “साउल, साउल, ना हाइपालि कासेहेङ सान्ताइखेना?” 5 साउल हिअ्हि, “प्रभु, ना हासु हिना?” कालाउ प्रभु दोअ्हि, “का इसु एइ, जाइहेङ ना सान्ताइदोङखेना। 6 कुलाउ ल्होतेङ पुरता हाने, ना जे पालिगोइका इङको नासेहेङ दोअ्प्यावा।” 7 साउलदोफा हानेका द्याङगेलाइ गालाचाहिँ हिङहि, कुलाउ हासुहेङ मातिङनाङ आवाइतेङ जाअ्तेङहि। 8 कोलाउ साउल भोनोसो ल्होहि रो मिँ हेलाउ वा हाइ बुङ मातिङहि। एम्बालाइ वासेहेङ खुर चातेङ थोङतेङ वासेहेङ दमस्कसता चुमाहि। 9 कालाउ वा सुम्नि दिनाथिकापा मातिङका जेङहि रो ना उम चाहि ना चि आम्हि। 10 दमस्कसता हननिया मिङ हिका एमि चात्या हिघाखे। वासेहेङ प्रभु नजरता दोअ्हि, “ओइ हननिया।” वा दोअ्हि, “हाइ प्रभु, का इताङ हिघा।” 11 कोलाउ प्रभु वासेहेङ दोअ्हि, “ल्हो रो सिधा दोअ्का चेअ्का दामाता हाने। इन्ता यहुदाको साअ्ता साउल मिङ हिका टार्ससता हिकाहेङ भो, हाइपानु वा पुकार पादोङखे। 12 वा नजरता हननिया मिङ हिका एमि द्याङ लिअ्ता लोतेङ वा मि तिनाको दोअ्तेङ ताइमिर्हुता खुर ताअ्का तिङका हि।” 13 कुलाउ हननिया दोअ्हि, “प्रभु, इङको द्याङ यरुसलेमता हिका परमेस्वरको पुनित जनगेलाइहेङ हेथे सान्ताइका हिघाखे इङको का हेन्जाङ द्याङगेलाइसो हिङका हिघा। 14 इता बुङ नाङको मिङ र्हुका झाराङहेङ रिम्का खाबारा मुल धामिगेलाइसो वा निङका हि।” 15 कुलाउ प्रभु वासेहेङ दोअ्हि, “हाने, हाइपानु बोजात्यागेलाइ, राजागेलाइ रो इस्राएलको खालको आगाता काङको मिङ पारचार पालि वा साल्का एइ। 16 हाइपानु काङको मिङको भाअ्सिङ वा हेथे पिर सहेलिगोयाङ, इङको का वासेहेङ तिम्पाङका।” 17 कोलाउ हननिया हानेतेङ इङको साअ्लिअ्ता दुल्हि रो वार्हुता ताइको खुर ताअ्तेङ दोअ्हि, “साउल ओने, जेदोङ प्रभु इसु ना लोतेङहिका दामाता नाता तिङन्हाका हिघाहि, वा दोङ ना मिँ तिङका रो पुनित हाङसासो पोङघाका जेङ दोअ्तेङ कासेहेङ दिङगिल्का हि।” 18 कालाउ ओदोङघरि साउलको मिँसो धालेभाइका हुल्हि रो वा आरोङ मिँ तिङका जेङहि। कोलाउ वा ल्होहि रो चिभुअ्लि र्हुहि। 19 कालाउ उम चातेङ बल निङहि। साउल हेन्जाङ दिनाथिकापा दमस्कसता हिका इसुको चात्यागेलाइदोफा हि। साउल दमस्कसता पारचार पाका 20 कालाउ ओदोङघरि वा कचहरिसाअ्गेलाइता, “प्रभु इसु दोङ परमेस्वरको चान एइ” दोअ्तेङ पारचार पालि तेङहि। 21 कोलाउ वाको काथा हिङकालाइ झाराङ भारभुसाइतेङ दोअ्लि तेङहि, “हाइ यरुसलेमता इसुको मिङ र्हुकालाइहेङ मुअ्पालि भोका रो इता बुङ एम्बालाइहेङ धेउतेङ मुल धामिगेलाइकोता चुमपुका ठहरहोइ लोका याआङ माको कुनु?” 22 कुलाउ साउलको पारचार झन सरबङहिका जेङतेङहानेहि। दमस्कसता हिका यहुदिगेलाइहेङ इसु दोङ ख्रिस्ट हि दोअ्का दासि पिलाउ एम्बालाइ हाइदोङ जोबान घुरिपालि मादोहि। 23 कालाउ हेन्जाङ दिनान्हुअ्सो यहुदिगेलाइ वासेहेङ सेअ्लि जाल पालि तेङहि। 24 कुलाउ एम्बालाइको जाल साउल गेहि। यहुदिगेलाइ वासेहेङ सेअ्लि न्हिसिङनितिम पुरको फिनुगेलाइता म्होतेङ हिघाखे। 25 एन्सा जेङलाउ वाको चात्यागेलाइ वासेहेङ न्हिसिङता दोङ दालोता ह्वाअ्तेङ उन्ठुइको बेर्हेमसो खुअ्पागिल्तेङ खाअ्पागिल्हि। साउल यरुसलेमता 26 साउल यरुसलेमता लोकान्हुअ्सो वा इसुको चात्यागेलाइदोफा मिलिलि बल पाहि। कुलाउ एम्बालाइ साउलदोफा थिहि, हाइपानु वा जातिङको इसुको चात्या एइ दोअ्तेङ एम्बालाइ खान्धुर पालि मादोहि। 27 कोलाउ बारनाबास साउलहेङ साल्तेङ दिङगिल्कालाइकोता चुमपुहि। कालाउ साउल प्रभुहेङ दामाता तिङका, प्रभु वादोफा धुइका रो वा दमस्कसता आँटपातेङ इसुको मिङता पारचार पाका काथा एम्बालाइहेङ दोअ्पिहि। 28 साउल यरुसलेमता एम्बालाइदोफाङ हिलि तेङहि रो माथिसिङ प्रभुको मिङता यरुसलेमता पारचार पाहि। 29 वा ग्रिक राउ धुइका यहुदिगेलाइदोफा बहस पाघाखे, कालाउ बुङ एम्बालाइ वासेहेङ सेअ्लि भोघाखे। 30 इदोइ गेतेङ प्रभुता खान्धुर पाका ओनेगेलाइ साउलहेङ कैसरियाता चुमपुहि रो इन्तासो वासेहेङ टार्ससता दिङगिल्पिहि। 31 एन्सापा यहुदिया, गालिल रो सामरियाको गोताङ मन्डलिगेलाइता सुबिस्ता रो मिलाप जेङहि। प्रभुको चात्यागेलाइ पुनित हाङसासो आँट निङतेङ मन्डलि उजाइतेङ हानेहि। पत्रुस लुड्डा रो योप्पाता 32 पत्रुस इसोउसो गोताङ थामेता घुराइतेङ लुड्डाता हिका परमेस्वरको पुनित जनगेलाइकोता बुङ थुकालिलोहि। 33 वा इन्ता एनियास मिङ हिका एमि द्याङहेङ दुसुहि, जाइ येअ् बाअ्सारसो कुज्याजेङतेङ सिदाउसो ल्होलि दोका मान्थुघाहि। 34 पत्रुस इङकोहेङ दोअ्हि, “ओइ एनियास, इसु ख्रिस्ट नासेहेङ एल्पाङ। ल्हो रो नाइको सिदाउ मिलिपा।” कालाउ इङको ओदोङघरि ल्होहि। 35 लुड्डा रो सारोनता हिका झोको झाराङ द्याङगेलाइ इङकोहेङ तिङतेङ प्रभुभारि घुरिहि। 36 योप्पा पुरता तबिता दोअ्का एमि प्रभुता खान्धुरपाका ओने हिघाहि। ग्रिक राउता वासेहेङ डोरकास दोअ्घाखे, जाइको माने नाकुना जेङखे। वा दिनाङ बोमिको भालाइ पाघाखे रो हाइदोङ मान्थुकालाइहेङ साघाइघाखे। 37 वा मासाअ्धेतेङ सिहि। द्याङगेलाइ वाको सिका जिउहेङ चिउपातेङ वासेहेङ र्हुताको एलोङ तालाको कोठाता ताअ्हि। 38 लुड्डा योप्पाको भेर्पा हिनाङसिङ, चात्यागेलाइ पत्रुस योप्पाता हि दोअ्का हिङतेङ, “केलाइकोता माबेलोमसिङ लोपि” दोअ्तेङ वाकोता न्हेमि द्याङगेलाइ बिम्ति पालि दिङगिल्हि। 39 कोलाउ पत्रुस ल्होतेङ एम्बालाइदोफा हानेहि। इन्ता थुकाकान्हुअ्सो एम्बालाइ वासेहेङ र्हुताको कोठाता चुमपुहि। रान्दिगेलाइ खारतेङ डोरकास एम्बालाइदोफा हिलाउ थिरतेङ ताअ्का धाबागेलाइ तिम्पातेङ पत्रुसको कोरबितिङ जोम्हि। 40 कुलाउ पत्रुस एम्बालाइ झाराङहेङ बाहार दिङगिल्तेङ तिर्हो थोतेङ पुकार पातेङ इङको सिकाजिउभारि घुरितेङ दोअ्हि, “ओइ तबिता, ल्हो!” कालाउ वा मिँ हेहि रो पत्रुसहेङ तिङतेङ ल्होतेङ योम्हि। 41 पत्रुस वासेहेङ ताइको खुरहोइ चातेङ जुरुक्पा ल्होपाहि, कालाउ वा परमेस्वरको पुनित जनगेलाइ रो रान्दिगेलाइहेङ काइतेङ सितेङ बुङ सिन्हुका तबिताहेङ जिमा पिहि। 42 एला इदोइ काथा योप्पा पुरको गोताङ थामेगेलाइता चारचाराइहि रो हेन्जाङ प्रभुहेङ खान्धुर पाहि। 43 कालाउ पत्रुस हेन्जाङ दिनाथिकापा एमि सिमोन दोअ्का धालेको काम पाकादोफा योप्पाता हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.