साल्न्हाका चात्या 8 - धिमालमन्डलिहेङ सान्ताइका 1 स्तिफनसहेङ उन्ठुइ तोतेङ सेअ्लाउ साउल बुङ मानेका हिघाखे। इङको दिनासो यरुसलेमता हिका मन्डलिहेङ सान्ताइलि तेङहि। साल्तेङ दिङगिल्कालाइ बिना एम्बालाइ झाराङ यहुदिया रो सामरियाको माउजाभारि राइन्हाहि। 2 प्रभुको सेवापाकालाउ स्तिफनसहेङ चुमपुतेङ लिअ्हि रो वाको भाअ्सिङ बिलाप पाहि। 3 कुलाउ साउल चाहिँ मन्डलिहेङ नास पादोङघाखे। वा खान्धुरपाका वाबाल रो बेबालाइहेङ हेरतेङ चुमपुतेङ थुनाता ह्वाअ्पुघाखे। फिलिप सामरियाता 4 कोलाउ इङको राइन्हाकालाइ जेसोकोसोङ हानितेङ प्रभुको कथन पारचार पाहि। 5 फिलिपचाहिँ सामरियाको एलोङ पुरता हानितेङ इसु ख्रिस्टको बारेता पारचार पाहि। 6 फिलिपको दोअ्का कथन हिङतेङ रो वाको पाका कामगेलाइ तिङतेङ, द्याङगेलाइ वाको दोअ्का काथा रेम्फा हिङहि। 7 हाइपानु हेन्जाङ द्याङगेलाइसो मासान आत्मागेलाइ बारा गाला पातेङ र्हिकाइतेङ ओल्हेलि तेङहि। इन्ता हेन्जाङ कुज्या रो नेङगारागेलाइ बुङ एल्पाहि। 8 एसापा सामरिया पुरता हिकालाइ हेन्जा लेङचाहि। 9 सिमोन मिङ हिका एमि द्याङ इन्ता हिघाहि। इङको लाम्फासो दोङ इङको पुरता चटक तिम्पातेङ सामरियाको द्याङगेलाइहेङ भारभुसाइ पाका हिघाहि। वा ताइमिहेङ का दोङ दोअ्तेङ तुजुक पाघाखे। 10 म्हुइकासो बाराका झाराङ द्याङगेलाइ इङकोहेङ, “परमेस्वरको मुल सरबङ हिका” द्याङ दोअ्तेङ मानेघाखे। 11 एम्बालाइ इङकोहेङ मानेघाखे, हाइदोनु हेन्जाङ पहरसो इङको ताइको चटक तिम्पातेङ द्याङगेलाइहेङ भारभुसाइ पातेङताअ्का हिघाखे। 12 कुलाउ जेलाउ एम्बालाइ परमेस्वरको सारभि रो इसु ख्रिस्टको रेम्काबानाल हिङपाका फिलिपको काथाता खान्धुर पाहि, कोलाउ वाबालाइ रो बेबालाइ चिभुअ्लि र्हुहि। 13 सिमोन ताइमिङ बुङ खान्धुर पाहि, चिभुअ्लि र्हुहि रो इङको फिलिपदोफा हिघिल्लि तेङहि। फिलिपको पाका बारा चिनोगेलाइ रो भारभुसाइका कामगेलाइ तिङतेङ वा भारभुसाइ घाखे। 14 सामरियाको द्याङगेलाइ परमेस्वरको कथन र्हुहि दोअ्का हिङतेङ यरुसलेमता हिका साल्तेङ दिङगिल्कालाइ पत्रुस रो युहन्नाहेङ एम्बालाइकोता दिङगिल्हि। 15 ओबालाइ इन्ता लोतेङ एम्बालाइ पुनित हाङसा निनाको दोअ्तेङ एम्बालाइको भाअ्सिङ पुकार पाहि। 16 हाइपानु इङको पहरथिकापा एम्बालाइता हासुङर्हुता बुङ पुनित हाङसा लोका मान्थुघाहि। एम्बालाइको चिभुअ्लि प्रभु इसुको मिङता खिनिङ जेङका हिघाहि। 17 जेलाउ ओबालाइ ताइको खुर एम्बालाइर्हुता ताअ्हि कोलाउ एम्बालाइ पुनित हाङसा निङहि। 18 एला साल्तेङ दिङगिल्कालाइ खुर ताअ्लाउ पुनित हाङसा निङलिदोखे दोअ्का तिङतेङ सिमोन एम्बालाइहेङ टाका पिलि चुमाहि 19 रो एसा दोअ्हि “कासेहेङ बुङ इदोइ सरबङ पिसु रो का जाइर्हुता खुरताअ्लाउ इङको पुनित हाङसा निनाको।” 20 कुलाउ पत्रुस दोअ्हि, “नाङको टाका नादोफाङ मुअ्ताको, हाइपानु परमेस्वरको बर टाकासो चोल्लि द्वाङ दोअ्तेङ ना ठहर पान्हा। 21 नाङको इदोइता ना बाखारा हि ना खाबरा दोङ हि, हाइपानु परमेस्वरको आगाता नाङको कोन्धाङ मुनासिप मान्थु। 22 इदोइखातिर नाङको इदोइ आसाति ठहरको भाअ्सिङ कुकरम मानेतेङप्रभुहेङ पुकार पा। एन्सा पान्हा पानु नाङको कोन्धाङको इसिका ठहर माफ ज्यावा। 23 हाइपानु का तिङखा, ना खाकासो पोङघाका हिन्हा, कालाउ कुकरमको धेउन्हाकाता हिन्हा।” 24 कोलाउ सिमोन पत्रुस रो युहन्नाहेङ दोअ्हि, “नेलाइ दोङ काङको भाअ्सिङ प्रभुहेङ पुकार पापिसु रो नेलाइको दोअ्का हिदि बुङ काथा कार्हुता माल्वाको।” 25 कालाउ एम्बालाइ दासि पिलिदोकान्हुअ्सो रो प्रभुको कथन धुइकान्हुअ्सो सामरिगेलाइको हेन्जाङ देरागेलाइता रेम्काबानाल हिङपातेङ एम्बालाइ यरुसलेम घुरिहि। फिलिप रो इथियोपियाको खाजान्चि 26 इङकोन्हुअ्सो प्रभुको एलोङ सादेलचर फिलिपहेङ दोअ्हि, “ल्होतेङ माहेपाहा यरुसलेमसो गाजा हानेका दामाभारि हाने, इन्ता उदादाङका थामेको दामा हि।” 27 कालाउ फिलिप ल्होते हानेहि रो एमि इथियोपियाको हिजाडाहेङ दुसुहि। जाइ इथियोपिया मुलुकको माहारानि कन्दाकिको बारा हाकिम रो गोताङ काउरिको खाजान्चि हिघाखे। वा यरुसलेमता परमेस्वरहेङ पुजिलि हानेका हिघाखे। 28 वा घुरिलाउ ताइको बग्गिता योम्तेङ यसैया आगाधुइकाको किताब पर्हेदोङघाखे। 29 कोलाउ पुनित हाङसा फिलिपहेङ दोअ्हि, “हाने रो इङको बग्गिहेङ पिताइ।” 30 फिलिप वाकोता धाअ्तेङ हानेहि रो वासेहेङ यसैया आगाधुइकाको किताब पर्हेतेङहिका हिङतेङ वासेहेङ हिअ्हि, “ना पर्हितेङहिका काथा गेखेना?” 31 कोलाउ वा दोअ्हि, “हासुङ मादोअ्पिसिङ का हेसापा गेलि?” कालाउ वा फिलिपहेङ बग्गिता धोल्तेङ वाको दोसा योम्लि बिम्ति पाहि। 32 एला वा पर्हितेङ हिका धरम किताबको भाग इदोइ हिघाहि: “जेसापा पान्ठा सेअ्लि चुमपुन्हाखे, वा मुइसा चेकालाउको आगाता सिकापा हिखे, एन्सा दोङ वा ताइको नुइ माहेहि। 33 वा बादनाम जेङलाउ बुङ नियाँ मानिङहि। वाको खालको बाखिन हासु पाङ? हाइदोनु वाको ज्यान सुमिङसो चुमपुन्हाहि” 34 कोलाउ इङको हिजाडा फिलिपहेङ हिअ्हि, “निगाहा पातेङ कासेहेङ दोअ्, आगाधुइका इदोइ हासुको बारेता दोअ्का एइ? वाको ताइकोङ बारेता ना बो हासुङको बारेता?” 35 कोलाउ फिलिप ताइको नुइ हेतेङ धरम किताबको इदोङ भागसो वासेहेङ इसुको रेम्काबानाल हिङपाहि। 36 कालाउ ओबालाइ दामाता हानेकाहानेकाताङ आधे चि हिका एलोङ थामेभेर्पा थुकालिलोहि। इङको हिजाडा दोअ्हि, “खाङ, इता चि हि, कासेहेङ चिभुअ्लि र्हुलि हाइहोइ रोकेलि द्वावा?” 37 [फिलिप दोअ्हि, “गोताङ कोन्धाङसो दोङ खान्धुर पान्हा पानु ना चिभुअ्लि र्हुलि द्वाना।” वा दोअ्हि, “इसु ख्रिस्ट दोङ परमेस्वरको चान हि दोअ्तेङ का खान्धुर पाखा।”] 38 वा बग्गि जाअ्पालि हुकुम पितेङ फिलिप रो इङको हिजाडा न्हेमिङ चिता खुअ्हि। कालाउ फिलिप वासेहेङ चिभुअ्लि पिहि। 39 कुलाउ जेलाउ ओबालाइ चिसो बाहार ओल्हेतेङलोहि, कोलाउ प्रभुको हाङसा फिलिपहेङ चातेङ चुमपुहि। इङकोन्हुअ्सो हिजाडा फिलिपहेङ आरोङ मातिङहि रो वा लेङचातेङ ताइको दामा लाअ्हि। 40 कालाउ बुङ फिलिप अस्दोदता तिङन्हाहि रो कैसरिया माथुकापा गोताङ पुरगेलाइता रेम्काबानाल हिम्पाकाताङ हानेहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.