साल्न्हाका चात्या 7 - धिमालस्तिफनसको बानाल 1 कोलाउ मुल धामि स्तिफनसहेङ हिअ्हि, “हाइ इदोइ काथा मुनासिप एइ?” 2 स्तिफनस दोअ्हि, “दादाओनेगेलाइ रो आबागेलाइ, हिङसु। केलाइको आबाखाल आब्राहामहेङ हारानता हिका लाम्फा मेसोपोटामियाता हिलाउ परमेस्वर ताइको प्रताप तिङपाका हिघाहि 3 रो वासेहेङ दोअ्का हिघाहि, ‘ना ताइको मुलुक रो ताइको खालसो ओल्हेतेङ, जेदोङ मुलुक का नासेहेङ तिङप्याङका, इन्ता हाने।’ 4 “कोलाउ आब्राहाम कल्दिगेलाइको मुलुकसो ओल्हेतेङ हारानता लोतेङ हि। वाको आबा सिकान्हुअ्सो परमेस्वर वासेहेङ इन्तासो इदोइ मुलुकता चुमपुहि, जेता एला नेलाइ हिका हिसुन्हा। 5 वासेहेङ इङको थामेता जायजात ते लाअ्पि, खोकोइ ताअ्का थामेथिकापा बुङ मापिहि। कुलाउ वाको खाल मान्थुलाउ बुङ इङको जायजात परमेस्वर आब्राहामको खालगेलाइहेङ पिलि कबोल पाहि। 6 परमेस्वर एसा दोअ्हि, ‘नाङको खाल बो मुलुकता हानितेङ हिलि गोयावा। ओबालाइ एम्बालाइहेङ बान्धाइ बान्हाइतेङ द्या साइ बाअ्सारथिकापा एरेमेरे पातेङ ताअ्तावा। 7 कुलाउ एम्बालाइ जेदोङ जात्या बान्धाइ जेङतेङ ह्यावा इङको जात्याको नियाँ का पाङका। इङकोन्हुअ्सो एम्बालाइ ओल्हेतेङलोतेङ इदोङ थामेता काङको उपासाना पावा।’ 8 परमेस्वर आब्राहामदोफा खातानाको केरा धेउहि रो वा इसहाकको आबा जेङतेङ येअ्निता इसहाकको खतना पाहि। इसहाक याकुबको आबा जेङहि, याकुब तेन्हे खालको आबा जेङहि। 9 “याकुबको चान योसेफहेङ ताइकोङ दादाओनेगेलाइ खाङलि माकिअ्तेङ मिस्र मुलुकता पिअ्गिल्हि। कुलाउ परमेस्वर योसेफदोफा हिघाहि। 10 परमेस्वर वाको गोताङ तु:सो लाअ्पातेङ मिस्र मुलुकको राजा फारोको आगाता वासेहेङ निगाहा पाहि रो आकिल पिहि। कोलाउ फारो वासेहेङ मिस्रमुलुक रो वाको गोताङ साअ्को हाकिम बान्हाइहि। 11 “इङकोन्हुअ्सो गोताङ मिस्रमुलुक रो कनानता आनिकाल लोतेङ बारका तु: जेङहि रो केलाइको खालगेलाइ आनाज मानिङहि। 12 कुलाउ याकुब मिस्रमुलुकता आनाज हि दोअ्का काथा हिङतेङ ताइको चानगेलाइहेङ लाङखेप इन्ता दिङगिल्हि। 13 न्हेखेप आनाज चोल्लि हानेलाउ योसेफ वाको दादाओनेगेलाइहेङ ताइमिहेङ नाल्पाहि रो वा ताइको खालहेङ फारोहेङ बुङ गेपाहि। 14 कोलाउ योसेफ ताइको आबा याकुबहेङ रो वाको गोताङ खाल जाइ सुमकुरितेनामि हिघाखे, झाराङहेङ मिस्रता काइगिल्हि। 15 इन्ता हानेकान्हुअ्सो याकुब रो वाको तेन्हे चानगेलाइ झाराङ मिस्रमुलुकताङ सिहि। 16 एम्बालाइको सिकाजिउ सकेमता चुमपुहि रो आब्राहाम हमोरको चानगेलाइसो टाका तिरितेङ चोलका तोमता ताअ्हि। 17 “कुलाउ जेलाउ परमेस्वर आब्राहामहेङ पाका बाचा पोङघाका पहर भेर्पा लोहि कोलाउ मिस्रमुलुकता इङको द्याङगेलाइ बर्हेलि तेङहि रो एम्बालाइको अङक हेन्जाङ जेङहि। 18 कोलाउ मिस्रमुलुकता योसेफहेङ मानाल्का भेनेङ राजा जाअ्हि। 19 वा केलाइको जात्याको खिलाप जाअ्हि। केलाइको खालगेलाइको जामालाइ साअ्सो बाहार चुमपुतेङ ताअ्लि लागाइघाखे। एसापा ताङधाराङ जोन्मेका जामालाइ झाराङ सिघाखे। 20 “इदोङ पहर मोसाको जोलोम जेङहि। वा परमेस्वरको नजरता रेम्का जामाल हिघाखे। वा सुम माहिनाथिकापा ताइको आबा आमाइको साअ्ता पोसेन्हाहि। 21 कालाउ वा बाहार थालन्हाकान्हुअ्सो फारोको चामिन्दि वासेहेङ तोल्हेतेङ चुमपुहि रो ताइकोङ चान बान्हाइतेङ पोसेहि। 22 मोसाहेङ मिस्रिगेलाइको गोताङ बिद्या पिहि रो वा ताइको कथन रो कामता सरबङहिका जेङहि। 23 “जेलाउ मोसा न्हेकुरि बाअ्सारको जेङहि, कोलाउ ताइको इस्राएलि दादा ओनेगेलाइहेङ दुसुलि लाल्सा पाहि। 24 एनि वा एमि मिस्रि एमि इस्राएलहेङ दान्हाइतेङहिका तिङहि। वा इङको इस्राएलिहेङ बान्चेपालि भोलाउ मिस्रिहेङ सेअ्हि। 25 परमेस्वर मोसासो दोङ इस्राएलिगेलाइहेङ बान्चेपालि तोम्का हि दोअ्तेङ ताइकोङ द्याङगेलाइ ग्यावा दोअ्का वा फोमपाका हिघाखे। कुलाउ एम्बालाइ इदोइ मागेहि। 26 जुम्निदिना एम्बालाइ दोङ ताताइमिता चेरसुतेङ हिका पहरता मोसा लोहि रो एम्बालाइहेङ मिलिपालि बल पातेङ दोअ्हि, ‘नेलाइते दादा ओनेता हाइपालि चेरसुतेङ हिसुखेना?’ 27 “कुलाउ हेपाइका इस्राएलि मोसाहेङ धाकालाइतेङ एसा दोअ्हि, ‘केलाइर्हुता हाकिम रो निया पाका जेङलि नासेहेङ हासु भरना पाहि? 28 आन्जि इङको मिस्रिहेङ सेअ्काभाइपा ना कासेहेङ बुङ सेअ्लि भोखेना?’ 29 इसिका उतर हिङतेङ मोसा खाअ्तेङ मिद्यान मुलुकता हानेतेङ ओसोङ हिलि तेङहि। इन्ता वाको न्हेमि चानगेलाइ जोन्मेहि। 30 “न्हेकुरि बाअ्सार दोकान्हुअ्सो सिनै आरदाङको उदादाङका थामेता ओअ्तेङहिका झालासको मेता एमि सादेलचर मोसाकोता देखाल पिहि। 31 जेलाउ मोसा इदोइ तिङहि कोलाउ वा इदोइ तिङतेङ भारभुसाइ हि। इङको खाङलिको भाअ्सिङ भेर्पा हानेलाउ परमप्रभुको इसिका गाला हिङहि, 32 ‘का नाङको खालगेलाइको परमेस्वर एइ: आब्राहाम, इसहाक रो याकुबको परमेस्वर।’ मोसा फिरलि तेङहि रो वा इङकोभारि वा खाङलिसुदाङ आँट मापाहि। 33 “कोलाउ परमप्रभु मोसाहेङ दोअ्हि, ‘नाङको खोकोइको जुता होअ्, हाइपानु जेदोङ थामेता जाअ्तेङ हिन्हा, इङको पुनित थामे एइ। 34 मिस्र मुलुकता हिका काङको राइतिको दुर्गति का तिङघा रो एम्बालाइको बिलाप बुङ हिङघा। इदोइखातिर एम्बालाइहेङ लाअ्पालि का खुअ्तेङलोका हिघा। एला लोउ, का नासेहेङ मिस्रमुलुकता दिङगिलाङका।’ 35 “यिदोङ मोसा, जाइहेङ एम्बालाइ ‘हासु नासेहेङ हाकिम रो निया पाका बान्हाइहि’ दोअ्तेङ नामन्जुर पाका हिघाखे। इङकोहेङ परमेस्वर झालासता देखाल पिका सादेलचरसो हाकिम रो भालाइपाका बान्हाइतेङ दिङगिल्हि। 36 यादोङ मिस्रमुलुकता, इका जाहादिता रो न्हेकुरि बाअ्सारथिकापा उदादाङका थामेता भारभुसाइका काम रो चिनोगेलाइ पातेङ एम्बालाइहेङ बाहार चुमाहि। 37 “इङको इङकोङ मोसा एइ, जाइ इस्राएलिगेलाइहेङ दोअ्का हिघाखे, ‘परमेस्वर कासेहेङ जाअ्पाकाभाइपाङ नेलाइको दादाओनेगेलाइको माझासो नेलाइको भाअ्सिङ एमि आगाधुइका जाअ्पावा।’ 38 इदोइ इङकोङ मोसा एइ, जाइ इस्राएलिगेलाइ सिनै आरदाङको उदादाङका थामेता जोम्लाउ एम्बालाइ दोफाङ हिघाखे। सादेलचर सिनै आरदाङता वाको दोफाङ धुइघाखे रो वा दोङ सादेलचरसो निङका सिन्हुका कथन इस्राएलिगेलाइहेङ हिङपाहि। 39 “कुलाउ केलाइको खालगेलाइ वाको काथागेलाइ मानेलि माकिअ्हि। एम्बालाइ वासेहेङ लाअ्तेङ मिस्रमुलुकताङ घुरितेङ हानेलि इछा पाहि। 40 एम्बालाइ मोसाको दादा हारुनहेङ एसा दोअ्हि, ‘केलाइको आगाआगा हानेका दिरगेलाइ केलाइको भाअ्सिङ बान्हाइपि। हाइपानु केलाइहेङ मिस्रमुलुकसो लाअ्पातेङ चुमाका इदोइ मोसाहेङ हाइ हेसा जेङहि केलाइ माग्याङ।’ 41 इङको दिनाता एम्बालाइ एलोङ बासाको पुतला बान्हाइहि। इङकोता भोक बुङ पिहि रो ताइको खुरको कामता लेङचाहि। 42 कुलाउ परमेस्वर एम्बालाइहेङ लाअ्हि रो एम्बालाइहेङ आदेलको फुरुगेलाइहेङ पुजेलि लाअ्पिहि। जाइको बारेता आगाधुइकालाइको किताबता लेखेन्हाका हि: ‘ओइ इस्राएलिगेलाइ, हाइ नेलाइ न्हेकुरि बाअ्सारथिकापा उदादाङका थामेता कासेहेङ गुपुसभोक रो भेटिगेलाइ पिसुन्हा? 43 एम्बालाइ मोलोखको पाल रो कालाउ रेफन दिरको फुरु रो नेलाइ पुजेलि बान्हाइका पुतलागेलाइ तोल्हेतेङ चुमासुन्हा। एला का नेलाइहेङ बेबिलोनसो ओदोइपार ओल्हेपागिलाङका।’ 44 “उदादाङका थामेता केलाइको खालगेलाइको थान हिघाहि। मोसाको तिङकाभाइका परमेस्वरको हुकुम बमोजिम इदोइ त्यार जेङका हिघाहि। 45 केलाइको खालगेलाइ बुङ ओबालाइको पालाता बोजात्यागेलाइको मुलुक खाबराता चुमालाउ यहोसुदोसा इङको पाल चुमाहि रो दाउदको पालाथिकापाङ इङको इन्ताङ हि। 46 राजा दाउद परमेस्वरको दाया निङतेङ वा याकुबको परमेस्वरहेङ ‘नाङको हिका थामे बान्हाइलि निनाको’ दोअ्तेङ बिम्ति पाहि। 47 न्हुअ्सो वाको भाअ्सिङ साअ्चाहिँ सोलोमन बान्हाइहि। 48 “कुलाउ खुरहोइ बान्हाइका साअ्गेलाइता बारा परमेस्वर बासा माहिखे, जेसापा आगाधुइका दोअ्का हि: 49 ‘काङको गादि सादेल एइ, रो सुमिङ काङको खोकोइ ताअ्का थामे, नेलाइको भाअ्सिङ हिसिका साअ् बान्हाइस्वाना एइ? परमप्रभु दोअ्खे, काङको माइसाका थामे हिदि एइ? 50 हाइ इदोइ गोताङ चिज काङकोङ सिरजाइका माको कुनु?’ 51 “ओइ कोर्ह्या द्याङगेलाइ, थाङका कोन्धाङ रो न्हातोङ माहिङकालाइ, नेलाइ दिनाङ पुनित हाङसाको खिलाप पासुखेना। नेलाइको खाल जिसिका पाहि नेलाइ बुङ इन्सिकाङ पासुखेना। 52 आगाधुइकालाइता हिदोइचाहिँहेङ नेलाइको खालगेलाइ मासान्ताइहि? ओबालाइ धरमाति सेवापाका लोदोङखे दोअ्कालाइ झाराङहेङ सेअ्हि। वासेहेङ नेलाइ धोका पिसुन्हा रो सेअ्सुन्हा। इङको झाराङहेङ सेअ्हि, जाइ इङको धरमाति सेवापाकाको लोका बानाल लाम्फासो दोङ हिङपाका हिघाखे। एला नेलाइचाहिँ वासेहेङ धोकापिका रो जिउसेअ्का जेङका हिसुन्हा। 53 नेलाइ सादेलचरगेलाइको खुरसो परमेस्वरको नियम निङसुन्हा, कुलाउ इङकोहेङ मामानेसुन्हा।” स्तिफनस उन्ठुइहोइ तोतेङ सेअ्न्हाका 54 जेलाउ एम्बालाइ स्तिफनको इदोइ काथा हिङहि कोलाउ एम्बालाइ चेरताम्पातेङ तासि रेअ्लि तेङहि। 55 कुलाउ वाचाहिँ पुनित हाङसासो पोङघान्हातेङ सादेलभारि खाङका खाङकाङ पाहि, कालाउ वा परमेस्वरको प्रताप रो इसुहेङ परमेस्वरको दाम्पाहा जाअ्तेङ हिका तिङहि। 56 वा दोअ्हि, “खाङसु, का सादेल हेनाका तिङदोङखा रो का द्याङको चानहेङ परमेस्वरको दाम्पाहा जाअ्तेङहिका तिङदोङखा।” 57 कुलाउ एम्बालाइ र्हिकाइतेङ ल्होहि, ताताइको न्हातोङ थुम्हि रो एम्बालाइ झाराङ वासेहेङ झाअ्मेरलाहि। 58 एम्बालाइ स्तिफनसहेङ पुर बाहार ओल्हेपातेङ चुमपुहि रो वार्हुता उन्ठुइ तोहि। दासिगेलाइ ताइको धाबागेलाइ साउल मिङ हिका एमि वाजानको खोकोइभेर्पा ताअ्हि। 59 जेलाउ एम्बालाइ स्तिफनसहेङ उन्ठुइ तोतेङ हिघाखे, कोलाउ वा पुकार पाहि, “ओइ प्रभु इसु, काङको हङसहेङ र्हुपि।” 60 वा तिर्हो थोतेङ बारा गाला पातेङ र्हिकाइतेङ दोअ्हि, “ओइ प्रभु, इदोइ कुकरमको फतुर एबालाइहेङ मालाग्याको।” दोअ्तेङ वा बायु लाअ्पिहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.