साल्न्हाका चात्या 28 - धिमालपावल माल्टा टपुता 1 एसापा सिन्हुतेङ काम्बेता लोकान्हुअ्सो इङको टपुको मिङ माल्टा हिघाहि दोअ्तेङ केलाइ गेन्हाहि। 2 इन्ताको द्याङगेलाइ हेन्जाङ मिलिसुका हिघाहि। इङको पहर वाइ लोतेङ हेन्जाङ चुङनाङसिङ एम्बालाइ मे धोतेङ केलाइहेङ एम्लि काइहि। 3 पावल एबाअ् मिसिङ जोम्पाका हिघाखे रो इङको चुमातेङ मेता जुअ्हि। मेको रापसो एलोङ पुह्याँ ओल्हितेङ लोहि रो वाको खुर्ता चोतेङ तोइन्हाहि। 4 पावलको खुर्ता चोतेङ एसापा पुह्याँ तोइन्हाका तिङतेङ इन्ताको द्याङगेलाइ एमिभेनेङदोफा इसिका काथा पालि तेङहि, “इदोइ द्याङ पाका बुङ जिउसेअ्का दोङ हिलिगोयाङ। जाहादिसो खाअ्लाउ बुङ दिर यासेहेङ बान्चिलि मापिहि।” 5 कालाउ पावल ताइको खुर फेअ्लाउ पुह्याँ मेता धिमन्हाहि। वा पावलहेङ हाइदोङ मापाहि। 6 इन्ताको द्याङगेलाइ पावल आसा इघुरिङता बिससो इमतेङ स्यावा दोअ्तेङ खाङतेङहि। कालाउ हेन्जाङ पहरन्हुअ्सो बुङ वासेहेङ हाइ दोङ माजेङहि। इदोइ तिङतेङ एम्बालाइ ताइको ठहर फेरितेङ दोअ्लि तेङहि, “या ते दिर कि हिनाउ।” 7 इङको थामेसो इङको टपुको माझि पब्लियसको मिलिङ भेर्पाङ हिघाहि। पब्लियस केलाइहेङ वाको साअ्ता बान्साचालि चुमपुहि रो केलाइ सुम्नि थिकापा वाको साअ्ता बान्सालाइ जेङतेङ हिन्हाहि। 8 इङको पहर पब्लियसको आबाहेङ मेसाधुअ्का रो मासि खोअ्का हिघाहि। पावल पब्लियसको आबाको कोठाता हानेहि कालाउ पुकार पातेङ ताइको खुर रोगाइकार्हुता ताअ्कान्हुअ्सो वा एल्हि। 9 एसापा एल्का गेतेङ इङको टपुता हिका झाराङ रोगाइकालाइ लोहि रो पावल एम्बालाइहेङ बुङ एल्पाहि। 10 एम्बालाइ केलाइहेङ हेन्जाङ मान पाहि। जेलाउ केलाइ चिजाहाजता धोलन्हाहि, कालाउ एम्बालाइ केलाइहेङ दामाता गोइका झोको आनेमानेगेलाइ बुङ चिजाहाजता ह्वाअ्पिगिल्हि। पावल माल्टासो रोम हानेका 11 सुम माहिनान्हुअ्सो केलाइ अलेक्जेन्ड्रियाको चिजाहाजता धोलन्हाहि। इदोइ चिजाहाजचाहिँ चुङदिङ माहिनाथिकापा माल्टा टपुताङ र्हुमतेङ हिघाहि। इङको चिजाहाजको आगा भागता जाउठ्या दिरको मुर्ति कोपिका हिघाहि। 12 केलाइ सुराकुसाइ दोअ्का पुरता थुकातेङ इन्ता सुम्नि थिकापा हिन्हाहि। 13 इन्तासो हानिकान्हुअ्सो केलाइ रेगियन दोअ्का पुरता थुकान्हाहि। जुम्निदिना माहेँपाहासो भेर्मा लोनाङसिङ केलाइ इतिनिखिनिङ पटिओलि दोअ्का पुरता थुकान्हाहि। 14 इन्ता केलाइ प्रभु इसुता खान्धुर पाका आधेमि दादाओनेगेलाइहेङ दुसुन्हाहि। ओबालाइ केलाइहेङ ए आथारथिकापा हिपिसु दोअ्तेङ बिनइ पानाङसिङ, केलाइ एम्बालाइदोफा ए आथार थिकापा हितेङ रोम पुरभारि दामा लाअ्न्हाहि। 15 प्रभु इसुहेङ खान्धुर पाका रोमता हिका दादाओनेगेलाइ केलाइ लोदोङन्हाखे दोअ्का हिङतेङ अप्पियस हाते थिकापा रो तिनपाटि दोअ्का थामेता केलाइहेङ दुसुलि लोहि। पावल एम्बालाइहेङ तिन्तेङसाङ लेङचातेङ परमेस्वरहेङ च्याबास पिहि। पावल रोम पुरता 16 केलाइ रोमता थुकालिलोकान्हुअ्सो पावलहेङ पलटनको जिम्माता ताइकोङ कोठा र्हुतेङ एकालाङ हिलि पिहि। 17 सुम्नि दिनान्हुअ्सो पावल रोमता हिका यहुदिगेलाइको आगुवागेलाइहेङ काइगिल्हि। एम्बालाइ जोम्का न्हुअ्सो पावल दोअ्हि, “दादाओनेगेलाइ, का केलाइको जात्या रो केलाइको पिता पुर्खागेलाइसो पातेङ लोका चलनगेलाइको खिलापता हाइदोङ मापालाउ बुङ यहुदि दादाओनेगेलाइ कासेहेङ यरुसलेमता रिम्तेङ रोमिगेलाइको खुरता सुम्पिहि। 18 रोमिगेलाइ हिअ्कान्हुअ्सो कासेहेङ लाअ्पिलि भोहि हाइदोनु एम्बालाइ कासेहेङ सेअ्लि गोइका हिदिङ फतुर मानिङहि। 19 कालाउ यहुदि दादाओनेगेलाइ कासेहेङ लाअ्पिलि मापिनाङसिङ का रोमि माहाराजा कैसरकोता बिम्ति पालि करदोङ लागेहि। कालाउ काङको ताइको यहुदि दादाओनेगेलाइको खिलापता फतुर लागाइलि गोइका हिदिङ काथा मान्थुघाहि। 20 इदोइ काथा नेलाइहेङ गिपालि रो नेलाइदोफा दुसुलि भाअ्सिङ का नेलाइहेङ इता काइका हिघाखा। हाइदोनु केलाइ इस्राएलिगेलाइको आस ताअ्का ख्रिस्टको भाअ्सिङ दोङ का एसापा झिन्झिरिहोइ धेउन्हाका हिघा।” 21 इदोइ हिङतेङ एम्बालाइ दोअ्हि, “नाङको बारेता केलाइ यहुदियासो हिदिङ चिथि निङनाङ मान्थुन्हाहि। कालाउ हिदिङ दादाओनेगेलाइ लोतेङ नाङको खिलापता हिदिङ मारेम्का काथा धुइका रो हिङपाका मान्थु। 22 कुलाउ केलाइ नाङको ठहरगेलाइ हिङलि भोन्हाखे हाइदोनु नाङको मन्डलिको खिलापता जेसोको सोङ काथा जेङका चाहिँ केलाइ गेका हिनाहि।” 23 इङकोन्हुअ्सो ओबालाइ पावलको काथा हिङलि दिना तोकिहि। तोकिका दिनाता लाम्फा खान्तेङ हेन्जा यहुदिगेलाइ जोम्तेङ पावलको हिका थामेता लोहि। इङको दिना पावल र्हिमासो दिलिमाथिकापा सादेलको सारभिको बारेता धिरपाहि। धरमकिताबता मोसा रो आगाधुइकालाइको लेखेका काथा चुमतेङ वा इसुको बारेता गेपातेङ एम्बालाइहेङ खान्धुरता चुमालि भोहि। 24 पावलको काथा हिङतेङ आधेमि खान्धुर पाहि कुलाउ आधेमि चाहिँ खान्धुर मापाहि। 25 ताताइमिताङ काथा मामिलितेङ एम्बालाइ एन्साङ इन्तासो हानेलि तोमलाउ पावल एम्बालाइहेङ एसा दोअ्हि, “पुनित हाङसा नेलाइको पुर्खालाइहेङ दोअ्का काथा जातिङको हि हाइदोनु यसैया आगाधुइकासो वा एसापा धुइहि: 26 ‘इदोइ द्याङगेलाइकोता हानेतेङ दोअ्, हिङनु ते नेलाइ हिङसुखेना, कुलाउ मागेसुखेना, खाङनु ते नेलाइ खाङसुखेना, कुलाउ मातिङसुखेना! 27 हाइदोनु इदोइ द्याङगेलाइको मन उन्ठुइ भाइका हि, एबालाइको न्हातोङ बाम्तेङ हि कालाउ एबालाइ ताइको मिँ चिम्तेङ हि! माकुनु एबालाइ तिङधावा, हिङधावा रो मनसो गेधावा। कालाउ एम्बालाइ ताइको मन काभारि घुरिपाधावा रो का एम्बालाइहेङ एल्पाधाङका।’” 28 न्हुअ्सो पावल दोअ्हि, “इदोइखातिर एला का नेलाइहेङ दोअ्लि भोखा, मुक्तिको रेम्काबानाल परमेस्वर बो जात्यागेलाइकोता पिगिल्का हि रो एम्बालाइ हिनावा।” 29 [पावल इदोइ काथा दोअ्कान्हुअ्सो, यहुदिगेलाइ ताताइमिता बादबिबाद पातेङ रो चेरसुतेङ हानेहि।] 30 पावल न्हे बाअ्सार थिकापा भाराता र्हुका साअ्ता हि। वा ताइमिहेङ दुसुलि लोका झाराङ द्याङगेलाइहेङ स्वागत पाघाखे। 31 वा माथिसिङ सादेलको सारभिको पारचार पातेङ प्रभु इसु ख्रिस्टको बारेता धिरपाघाखे रो हासु बुङ वासेहेङ मारोकिघाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.