साल्न्हाका चात्या 27 - धिमालपावल रोमता हानेका 1 फेस्तस निधोपाका न्हुअ्सो केलाइ इटालिया मुलुक हानेलि वा पावल रो बो काइदिगेलाइहेङ रोमि माहाराजाको पलटनको काप्तान युलियसको जिम्मा लागाइहि। 2 केलाइ एड्रामिटेनोस पुरसो लोतेङ एसिया माउजाको हेन्जाङ घाटेगेलाइ जेङतेङ हानेलि तोम्का चिजाहाजता धोल्तेङ दामा लाअ्न्हाहि। माकेडोनिया माउजाता हिका थेसलोनिके पुरको अरिस्तारखस बुङ केलाइदोफाङ हिघाखे। 3 जुम्निदिना केलाइ सिदोन पुरता थुकान्हाहि। इङको थामेता काप्तान युलियस पावलहेङ दायातेङ ताइको सानाइति भायागेलाइकोता हानेतेङ दुसुलि रो गोइका झोको साघाइका र्हुलि बखत पिहि। 4 इन्तासो केलाइको चिजाहाज आरोङ दामा लाअ्हि। कालाउ चिजाहाजको आगापाहासो भेर्मा लोनाङसिङ केलाइ साइप्रस टपुको काम्बेसो भेर्मा छलिन्हातेङ हानेन्हेलिगोइहि। 5 किलिकिया रो पामफिलिया माउजाको काम्बेता हिका जाहादि पारातेङ केलाइ लुकिया माउजाता हिका माइरा पुरता थुकालिलोन्हाहि। 6 इन्ता काप्तान युलियस अलेक्जेन्ड्रिया पुरसो इटालिया मुलुकता हानेका चिजाहाज निङहि रो वा केलाइहेङ इङकोङ चिजाहाजता धोल्लि लागाइहि। 7 भेर्मा आगापाहासो लोनाङसिङ केलाइ हेन्जाङ दिनाथिकापा आलल्होपा आगाइतेङ बोलधाकाङ क्निडस पुरको भेर्पा थुकान्हाहि। इन्तासो भेर्मा आगाइलि मापिनाङसिङ क्रेटको आर र्हुतेङ केलाइ सालमोनेको काम्बे जेङतेङ हानेन्हाहि। 8 इन्तासो हेन्जाङ पिर निङचातेङ केलाइ लासिया पुरको भेर्पा हिका रेम्का घाटेता थुकालि लोन्हाहि। 9 इन्ता थुकालि हेन्जाङ पहर दोका हिघाहि। यहुदिगेलाइको म्हितुपाङ हिका बिसेस दिना बुङ दोका हिघाहि। चुङदिङता लोतेङहिका भेर्मासो चि जाहाजहेङ आगाइलि थिलिगोइपा हिघाहि। एन्सा जेङलाउ पावल ताइमिहेङ र्हुम्का द्याङगेलाइहेङ एसा दोअ्तेङ गावाइहि, 10 “सानाइतिगेलाइ, एला केलाइ इतासो हानेनु ते चिजाहाज रो इता हिका आनेमाने खिनिङ माको, केलाइ बुङ मुअ्लि द्वाङ दोअ्का काथा का गिका हिघा।” 11 कालाउ काप्तान युलियस पावलको दोअ्का खान्तेङ बुङ चि जाहाज चालाइका रो चि जाहाजको गिर्हिको दोअ्का काथा खिनिङ साअ्हि। 12 चुङदिङता हिलि इङको घाटे रेम्का बुङ मान्थुघाहि। एन्सा जेङलाउ हेन्जाङ द्याङगेलाइ चुङदिङता हिलि हिदि बुङ हालतसो इन्तासो हानेतेङ फोनिक्स पुरता थुकालि भोघाखे। फोनिक्सचाहिँ क्रेटको एलोङ घाटे हिघाहि। जाइ माहेँ दिहेँ रो दाहेँ दिहेँ घुरिका हि। जाहादिता दुमभेर्मा लोका 13 माहेँपाहासो आलल्होपा भेर्मा लोलि तेङहि। झाराङ द्याङगेलाइ एला केलाइ हानेलि द्वाङ दोअ्का फोमपाहि। एम्बालाइ खेअ्पातेङ ताअ्का किहाम ओल्हेपाहि रो चिजाहाजहेङ क्रेट टापुको काम्बेपाहासो चुमपुहि। 14 कालाउ एघुरिन्हुअ्सो इङको टपुपाहासो बारा दुमभेर्मा फेअ्न्हातेङ लोहि। इङकोचाहिँ दाहेँनुहेँ दोअ्का दुमभेर्मा हिघाहि। 15 जेलाउ दुमभेर्मा चिजाहाजहेङ थुम्हि, चिजाहाज दुमभेर्माको आगाता हाइदोङ पालि मादोन्हाहि। केलाइ चिजाहाजहेङ जेसो चुमपुखे चुमप्वाको दोअ्तेङ लाअ्पिन्हाहि। 16 क्लौडा दोअ्का म्हुइका टपुको माहेँपा थुकाकान्हुअ्सो टपु दुमभेर्माहेङ आसा घेपाइपिहि। इन्ता केलाइ चिजाहाजको न्हुअ्पाहा धेउका म्हुइका नाउहेङ बोलधाकाङ जोगाइलि दोन्हाहि। 17 वासेहेङ हेरतेङ बोलधाकाङ चि जाहाजलिअ्ता ह्वाअ्कान्हुअ्सो चि जाहाज चालाइकालाइ चि जाहाजहेङ दिह्यामहोइ काकारपा धेउहि। एम्बालाइ चि जाहाज लिबियाको सिरकिट दोअ्का थामेको बाल्हाता भास्याङ बे दोअ्तेङ थिहि। एन्सा जेङलाउ चिजाहाज चालाइकालाइ पाल हुल्पापिहि रो चिजाहाजहेङ भेर्माकोङ भरता लाअ्पिगिल्हि। 18 इङको थिलिगोइका दुमभेर्मा लोतेङ दोङ हिघाहि रो जुम्निदिना एम्बालाइ चिजाहाजता हिका आनेमानेगेलाइ जाहादिता थाल्पिगिल्हि। 19 इतिनिदिना चिजाहाज चालाइलि गोइका आनेमानेगेलाइ ताइकोङ खुरहोइ जाहादिता थालगिल्हि। 20 हेन्जा दिनाथिकापा केलाइ ना साने तिङन्हाहि ना फुरु दोङ तिङन्हाहि। दुमभेर्मा लोकालोकाङ पानाङसिङ आखिरता सिन्हुताङ दोअ्का केलाइको आस बुङ राम्हि। 21 एम्बालाइ उम माचाका हेन्जाङ दिना जेङका हिघाहि। कोलाउ पावल एम्बालाइहेङ लोतेङ दोअ्हि, “सानाइतिनेगेलाइ, नेलाइ काङको मतो मानितेङ क्रेटसो चिजाहाज माचालाइनु ना इसिका पिर निङचाधाङ ना हिदिङ आनेमाने नास दोङ जेङधावा। 22 कालाउ एला का बिनइ पाखा: हारेस माचासु, नेलाइता हासुको बुङ जिउ मान्हावा, खालि चिजाहाज खिनिङ मुअ्तावा। 23 का परमेस्वरको द्याङ हिघा रो वाकोङ सेवा पादोङखा। वाकोङ एमि सादेलको काथाचुमाका नानि न्हिसिङता काङको भेर्पा लोतेङ 24 कालाउ दोअ्हि, ‘ओइ पावल, माथि! ना रोमि बाराराजाको आगाता हानेलिङ गोयाना रो नाङकोङ खातिरसो परमेस्वर नादोफा हानेका झाराङहेङ बान्चिपावा।’ 25 इदोइखातिर दादा ओनेगेलाइ, नेलाइ हारेस माचासु, हाइदोनु परमेस्वरको दोअ्का इङको काथा पुरा ज्यावा दोअ्का का खान्धुर ताअ्का हिघा। 26 एला केलाइ हिदिङ टपुको काम्बेता धिनिङचाङ।” चि जाहाज धिन्हातेङ र्हाअ्न्हाहि 27 केलाइको चिजाहाज एसापा दुमभेर्माको माझाता एड्रियास जाहादिता हेङगालाइन्हाका तेद्या दिना जेङलिदोका हिघाहि। आधान्हिसिङता चिजाहाज चालाइकालाइ हिदिङ थामेको एलोङ काम्बेता थुकालि तोमन्हाहोइ दोअ्तेङ फोमपाहि। 28 एन्सा जेङलाउ ओबालाइ चिको वाङखाराका दोङलि तेङहि। दोङलाउ न्हेकुरि तेन्हिअ् मिटर झोको लेता हिघाहि। आसा ओसो थुकातेङ दोङलाउ न्हेकुरि मिटर झोको हिघाहि। 29 चि आतुइसा हिनाङसिङ ओबालाइ उन्ठुइता चिजाहाज धिन्हाङ बे दोअ्तेङ थिहि। इङकोखातिर ओबालाइ न्हुअ्पाहाको द्यालोङ किहाम हुल्पातेङ चिजाहाजहेङ जाअ्पाहि रो झेनाको दोअ्तेङ पुकार पालि तेङहि। 30 कालाउ चिजाहाज चालाइकालाइ आगापाहाको किहाम हुल्पालि आल पातेङ आतुइका नाउहेङ चिजाहाजसो हुल्पातेङ खाअ्लि भोहि। 31 कुलाउ पावल काप्तान रो पलटनगेलाइहेङ दोअ्हि, “इदोइ चिजाहाज चालाइकालाइ खाअ्नु केलाइ हासु बुङ माबान्चियाङ।” 32 इदोइ काथा हिङतेङ पलटनगेलाइ चिजाहाजता धेउतेङ ताअ्का म्हुइका नाउहेङ दिह्याम चेतेङ झोपागिल्हि। 33 झेङलितोम्का पहरता पावल इन्ता हिकालाइहेङ दोअ्हि, “चाका चिज हाइदोङलाउ बुङ चालि गोयाङ हाइदोनु नेलाइ सुर्तापातेङ माचासिङ हिका तेद्या दिना जेङलिदोहोइ। 34 एला का नेलाइहेङ बिम्ति पाखा, बान्चेलिको भाअ्सिङ हाइ ना हाइ चालि दोङ गोयाङ। माथिसु, परमेस्वरको दोअ्काभाइपाङ हासुहेङ बुङ हाइदोङ माज्याङ।” 35 इदोइ दोअ्तेङ पावल तोले र्हुहितेङ पेङहि कालाउ झाराङको आगाता परमेस्वरहेङ च्याबास पितेङ चालि तेङहि। 36 इङकोन्हुअ्सो बोगेलाइ बुङ आँट निङतेङ चाहि। 37 इङको चिजाहाजता केलाइ जाम्मा न्हेसाइ सुमकुरितेतुमि हिघान्हाहि। 38 झाराङ घाइपाङ चालिदोकान्हुसो चिजाहाजहेङ होम्पालि एम्बालाइ हिका झोको गोताङ गोहोम बुङ जाहादिता थालगिल्हि। 39 झेङकान्हुअ्सो जाहादिको हिदिङ बाल्हा हिका काम्बे तिङहि। कालाउ चिजाहाज चालाइकालाइ इङको थामेहेङ नाल्लि मादोहि। काम्बेता सारेका बालाहिका रेम्का थामे तिङतेङ एम्बालाइ चिजाहाजहेङ चुमपुलि दोनु इन्सोङ चुमपुलि भोहि। 40 एम्बालाइ किहामगेलाइता धेउका दिह्यामगेलाइ चेतेङ किहामगेलाइ जाहादिताङ लाअ्गिल्हि। इङकोन्हुअ्सो चिजाहाज चालाइका दाङसुला धेउतेङ ताअ्का दिह्यामगेलाइ बुङ खाइपिहि। कालाउ आगाको पालहेङ र्हुता तोल्हेपिहि रो भेर्मा चिजाहाजहेङ चुमपुलाउ काम्बेभारि चालाइतेङ चुमपुहि। 41 कुलाउ चिजाहाज बाल्हाको रासता धिन्हातेङ हानेलाउ आगाको भाग बाल्हाता खेअ्हि कालाउ चिजाहाजको न्हुअ्पाहाको भाग चिको छालहोइ र्हाअ्न्हालि तेङहि। 42 एन्सालाउ काइदिगेलाइ नुइतेङ खाअ्ताङ दोअ्तेङ पलटनगेलाइ एम्बालाइ झाराङहेङ सेअ्लि ठहर पाहि। 43 कालाउ काप्तान पावलहेङ सिन्हुपालि भोघाखे, एन्सा जेङलाउ वा हासुहेङ बुङ सेअ्लि मापिहि। वा नुइलि दोका झोको लाम्फा दोङ नुइतेङ काम्बेता हानेसु 44 रो बोमिचाहिँ चिजाहाजको फालागेलाइको टुकारागेलाइ चातेङ ओदोइपार पारासु दोअ्तेङ हुकुम पिहि। एसापा केलाइ झाराङ रेम्फाङ काम्बेता थुकान्हाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.