साल्न्हाका चात्या 26 - धिमाल1 इङकोन्हुअ्सो अग्रिपास पावलहेङ दोअ्हि, “एला नाङको काथा ताअ्लि द्वाना।” कोलाउ ताइको खुर पासारपातेङ पावल ताइमिहेङ बान्चेपालि एसापा धुइलि तेङहि, 2 “राजा अग्रिपास, यहुदिगेलाइ कासेहेङ फतुर लागाइका काथाको बारेता का नानि ताइको काथा नाङकोङ आगाता दोअ्लि निङकाता का ताइमिहेङ भाग्यमानि फोमपाखा। 3 नासेहेङ यहुदिगेलाइको गोताङ रितिथिति, बादबिबाद पाका काथाको बारेता रेम्फा गेनाङसिङ का ताइमिहेङ झन भाग्यमानि फोमपाखा। एन्सा जेङलाउ काङको काथा रेम्फा हिम्पि दोअ्तेङ का बिनइ पाखा। 4 “का ताइको मुलुकता कालाउ यरुसलेम पुरता यहुदि जात्याको माझाता दोङ बाराघा। एन्सा जेङलाउ यहुदिगेलाइ कासेहेङ जामालसो दोङ रेम्फा नाल्खे। 5 का फरिसि दोअ्का झाराङ खान्तेङ कारा धरम मन्डलिको द्याङ हिघाखा रो का इङकोङ मन्डलिता हितेङ काङको ज्यान बान्चिघाखा। एम्बालाइ मन पानु इदोइ काथाको दासि ताइमिङ बुङ दोअ्लि द्वावा। 6 परमेस्वर केलाइको पुर्खागेलाइहेङ पाका बाचाता का आस ताअ्नाङसिङ नानि का एसापा नेलाइको आगाता जाअ्का हिघा। 7 राजा अग्रिपास, इङकोङ बाचा निङका आसता केलाइ यहुदिगेलाइको तेन्हे खालगेलाइ बुङ नितिमान्हिसिङता एमन जेङतेङ परमेस्वरहेङ पुजितेङ भक्ति पाखे। का बुङ इङको आस पानाङसिङ यहुदिगेलाइ कासेहेङ फतुर लागाइदोङखे। 8 परमेस्वर सिकालाइहेङ सिन्हुपाखे दोअ्का काथाता नेलाइ हाइपालि खान्धुर पालि मादोसुखेना? 9 “का बुङ दोकाझोको नासरतको इसुहेङ बिरोध पालिगोयाङ दोअ्तेङ फोमपाका हिघाखा। 10 का यरुसलेमता एन्साङपातेङ खिलाप पाघा। का मुल धामिगेलाइसो खाबारा निङतेङ हेन्जाङ परमेस्वरको पुनित जनगेलाइहेङ थुनिपाघा। कालाउ एम्बालाइहेङ सेअ्का कामता सुदाङ साघाइका हिघाखा। 11 हेन्जाङखेप का ओबालाइहेङ इसुको बारेता मारेम्का काथा दोअ्लि लागाइघा कचहरिसाअ्गेलाइता जबरजस्ति पातेङ डाँड पिलि लागाइघा। का ओबालाइदोफा चेरताम्पातेङ बो मुलुकको पुरगेलाइता बुङ हानितेङ का ओबालाइहेङ सान्ताइघा।” पावलको मन फेरेन्हाका ( साल्तेङ दिङगिल्का ९:१-१९ ; २२:६-१६ ) 12 “एसापा एनि मुल धामिगेलाइको खाबारा रो हुकुम निङतेङ का दमस्कस पुरभारि हानेदोङघाखा। 13 राजा अग्रिपास, इङको दिना नितिमा दामाता हानेकाताङपालाउ सानेको फाइसालाम्काखान्तेङ बुङ जोहोका आदेलसो फाइसालामका का रो काङको सानाइतिगेलाइर्हुता चोल्लाउ केलाइ झाराङ भोनोता लोङन्हाहि। 14 इङको दोङ पहर हिब्रु राउता का एसा दोअ्का हिङघा, ‘साउल ओइ साउल, ना कासेहेङ हाइपालि सान्ताइखेना? सुइसुइकाता लाअ्थेन्हा पानु नासेहेङ दोङ तु:कावा।’ 15 कालाउ का हिअ्घा ‘प्रभु, ना हासु हिन्हा?’ प्रभु कासेहेङ दोअ्हि, ‘का इसु एइ, जाइहेङ ना सान्ताइखेना। 16 एला ल्हो, का नासेहेङ काङको सेबक रो दासि पिका बान्हाइलि भोखा। इदोइखातिर का नाङकोता देखाल पिका हिघा। ना काङको बारेता तिङका काथा रो का नासेहेङ न्हुअ्सो तिम्पिका काथागेलाइसुदाङ बो द्याङगेलाइहेङ हिम्पालिगोयाना। 17 का नेलाइहेङ यहुदिगेलाइ रो बो जात्यागेलाइकोता दिङगिल्दोङखा रो का नासेहेङ एम्बालाइसो जोगायाङका। 18 ना एम्बालाइको मिँ हेपितेङ एम्बालाइहेङ कितिकितिकासो फाइसालामकाता, दियाबलसको सरबङसो परमेस्वरभारि घुरिपालि गोयाना। एम्बालाइ कार्हुता खान्धुर पाखे कालाउ एम्बालाइको कुकरम मेटिन्हावा रो एम्बालाइ परमेस्वरको साल्तेङ दिङगिल्का जनगेलाइको निङका एबाखारा निनावा।’ 19 “इदोइखातिर राजा अग्रिपास, सादेलसो तिङका इदोइ दर्सनहेङ का मामानेसा हिलि मादोघा। 20 झाराङखान्तेङ लाम्फा दमस्कस रो यरुसलेमता कालाउ गोताङ यहुदिया मुलुकता रो बो जात्याको मुलुकगेलाइता बुङ हानितेङ का द्याङगेलाइहेङ ताताइको कुकरमहेङ मानितेङ परमेस्वरभारि घुरितेङ रेम्का काम पासु दोअ्तेङ पारचार पाघा। 21 एन्साङ पातेङ यहुदिगेलाइ कासेहेङ थानता रिम्तेङ सेअ्लि भोहि। 22 कुलाउ नानिको दिनाथिकापा कासेहेङ परमेस्वर दोङ खाङका हि। इङकोङखातिर का इता हिकालाइ बाराका म्हुइका झाराङहेङ दासि पितेङ जाअ्तेङ हिघा। आगाधुइकालाइ रो मोसा सुदाङ न्हुअ्सो जेङलि ल्वाङ दोअ्का काथाबाहेक का बो हेन्जा काथा हाइ बुङ दोअ्नाङ मान्थुघा। 23 आगाधुइकालाइ ख्रिस्ट पिर भोगितेङ सिलिगोयाङ, वा सिकासो सिन्हुकालाइता झाराङखान्तेङ लाङफा ज्यावा। एसापा वा ताइको फाइसालामका यहुदिगेलाइता बुङ रो बो जात्याको द्याङगेलाइता बुङ चुमावा दोअ्लिदोका हिघाखे।” 24 पावलको दोअ्का इदोइ काथा हिङतेङ फेस्तस र्हिकाइतेङ दोअ्हि, “ओइ पावल, ना उधाइहोइना! नाङको हेन्जाङ आकिलसो नासेहेङ उधाइका बान्हाइहि।” 25 पावल दोअ्हि, “माननिय फेस्तस! का उधाइका मान्थुघा, का रेम्फाङ हिघा रो सत्ते काथागेलाइ दोङ पादोङखा। 26 राजा अग्रिपास इदोइ गोताङ काथा गेखे, जाइको आगाता का माथिसिङ धुइदोङखा। हाइपानु इदोइ हिदिङ काथा वासो म्होअ्न्हाका मान्थु रो इदोइ काथागेलाइ सिकापा पाकाङ माको।” 27 पावल दोअ्हि “ना राजा अग्रिपास, हाइ ना आगाधुइकालाइहेङ खान्धुर पाखेना? एइ, ना खान्धुर पाखेना दोअ्का काथा का गेखा।” 28 राजा अग्रिपास पावलहेङ दोअ्हि, “हाइ आतुइसा पहरता ना कासेहेङ ख्रिस्टियान बान्हाइलि ठहर पाखेना?” 29 पावल दोअ्हि, “आतुइसा काथासो ज्याको ना हेन्जासो, इदोइ काङको खुरता लागाइका झिन्झिरिगेलाइ लाअ्पितेङ, ना खिनिङ माको कुलाउ नानि काङको काथा हिङका झोको झाराङ काभाइकाङ ज्याको दोअ्तेङ का परमेस्वरता पुकार पाखा।” 30 कालाउ राजा अग्रिपास, बाराहाकिम फेस्तस, बरनिकि रो एम्बालाइदोफा लोका झाराङ द्याङगेलाइ जाराकजुरुकपा ल्होहि 31 कालाउ एम्बालाइ बाहार ओल्हेतेङ ताताइमिता एसा दोअ्तेङ काथा पाहि, “इदोइ द्याङ थुनिन्हातेङ ज्यानदार निङलिगोइका हिदिङ काम पाकाङ मातिङखे।” 32 अग्रिपास फेस्तसहेङ दोअ्हि, “इदोइ द्याङ रोमि बाराराजाकोता बिम्ति पालि मार्हेका हिनु ते लाअ्पिलाउ बुङ जेङधावा!” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.