साल्न्हाका चात्या 25 - धिमालपावल रोमि माहाराजाहेङ उजुर पाखे 1 फेस्तस ताइको यहुदिया माउजासो लोका सुम्नि दिनान्हुअ्सो दोङ कैसरियासो यरुसलेम हानेहि। 2 इन्ता हिलाउ मुल धामिगेलाइ रो यहुदिगेलाइको मुल द्याङगेलाइ पावलको खिलापता अभियोग लागाइहि 3 रो वासेहेङ दामाताङ सेअ्लि योजना पातेङ वासेहेङ यरुसलेमता दिङगिल्पि दोअ्तेङ बाराहाकिम फेस्तसदोफा बिम्ति पाहि। 4 कालाउ फेस्तस एम्बालाइहेङ एसा दोअ्हि, “पावलहेङ कैसरियाताङ थुनितेङ ताअ्का हि रो ताइमि बुङ मार्फाङ इन्ता हानेदोङखा। 5 नेलाइता हासुङ आगुवागेलाइ कादोफाङ हानेलि भोनु हानेलि द्वावा। यदि वा हाइ बिराइका हि पानु एम्बालाइ इन्ता दोङ उजुर पालि द्वावा।” 6 येअ्ते दिनाझोको यरुसलेमता हिकान्हुअ्सो फेस्तस कैसरियाता घुरिहि। जुम्निदिनाङ वा निसाफ पाका थामेता योम्तेङ पावलहेङ चुमालि हुकुम पिहि। 7 जेलाउ पावल थुकालि लोहि कालाउ यरुसलेमसो लोका यहुदिगेलाइ वासेहेङ चारबितिङसो गोर्हाइतेङ मारेम्फाङ फतुर लागाइहि। कुलाउ एम्बालाइ हिदि बुङ फतुर लागाइकालाइको दासि पिलि मादोहि। 8 पावल ताइको पक्छता धुइतेङ दोअ्हि, “का यहुदि नियमको खिलापता, थानको खिलापता रो रोमि बाराराजाको खिलापता हिदिङ आपराध पानाङ मान्थुघा।” 9 यहुदिगेलाइहेङ लेन्चापालि ठहरसो फेस्तस पावलहेङ दोअ्हि, “का नासेहेङ यरुसलेम दिङगिलप्याङका कालाउ इदोइ काथाको बारेता का नाङको निसाफ इन्ता दोङ पाङका, माज्याङ कुनु?” 10 कालाउ पावल दोअ्हि, “का रोमि बाराराजाको नियापाकाको आगाता जाअ्तेङ हिघा, इता दोङ काङको निया जेङलि गोयाङ। का यहुदिगेलाइको खिलापता हिदिङ मारेम्का पानाङ मान्थुघा दोअ्का काथा ना दोङ गेखेना। 11 यदि का आइन कानुनहेङ मिचिका हिघा रो ज्यानदार निङलि गोइका हिदिङ आपराध पाका हिघा पानु का सिलि बुङ त्यार हिघा। कालाउ यदि यहुदिगेलाइको कासेहेङ लागाइका दुस जातिङको मान्थुनु कासेहेङ एम्बालाइको खुरता हासु बुङ जिम्मापिलि माद्वावा। का रोमि बाराराजाकोता बिम्ति पाखा।” 12 कालाउ फेस्तस वाको मतोपिकालाइदोफा मतो पातेङ पावलहेङ दोअ्हि, “ना रोमि माहाराजाको आगाता दोङ बिम्ति पान्हा। एन्सा जेङलाउ का नासेहेङ रोमि बाराराजाकोता दोङ दिङगिलप्याङका।” फेस्तस राजा अग्रिपासदोफा मतो र्हुका 13 आसा दिनान्हुअ्सो राजा अग्रिपास रो वाको ओने बरनिकि फेस्तसहेङ दुसुलि कैसरियाता लोहि। 14 एम्बालाइ आसा दिना कैसरियाता हिकान्हुअ्सो फेस्तस एम्बालाइहेङ पावलको काथा एसापा हिम्पाहि, “इता फेलिक्सको थुनितेङ ताअ्का एमि द्याङ हि। 15 का यरुसलेम हानेका पहरता यहुदिगेलाइको मुल धामिगेलाइ रो बो आगुवागेलाइ वाको खिलापता फतुर लागाइका हिघाखे रो वासेहेङ डाँड पिलि गोयाङ दोअ्हि। 16 कालाउ का एम्बालाइहेङ दोअ्घा, ‘द्याङहेङ फतुर मालागाइपाधाउ रोमि सारकारको डाँड पिका चलन मान्थु। फतुर लागाइका द्याङ फतुर लागाइकाको आगाता ताइको काथा हिम्पालि बखत निङलिगोयाङ।’ 17 एम्बालाइ इता लोकान्हुअ्सो का माबेलोमपासिङ जुम्निङ पावलहेङ निया पाका थामेता चुमालि हुकुम पिघा। 18 पावलको बिरोधिगेलाइ वाको पाका आपाराधता फतुर लागायाङ वाला दोअ्घाघा, कालाउ एम्बालाइ इसिका हाइदोङ फतुर लागाइलि मादोहि। 19 ओबालाइकोङ धरम रो सिका इसु दोअ्का द्याङको बारेता खिनिङ एम्बालाइको पावलदोफा चेरसुका हिघाहि। पावलचाहिँ सिका इसु सिन्हुहि दोअ्तेङ जिद्दि पाघाहि। 20 इदोइ काथागेलाइको बारेता हाइदोङ मागेनामसिङ का ते हिअ्लिहाअ्लि बुङ मादोघा। एन्सा जेङलाउ का पावलहेङ ‘यरुसलेम हानितेङ नाङको नियाँ इन्ता दोङ पालाउ ज्याङ बे’ दोअ्तेङ हिअ्घा। 21 कुलाउ वा रोमि माहाराजासो नियाँ निनाको दोअ्तेङ बिम्ति पाहि रो का रोमि बाराराजाकोता मादिङल्पाधाउ वासेहेङ रेम्फा पहरा पितेङ इता दोङ ताअ्लि हुकुम पिका हिघा।” 22 इदोइ बायान हिङतेङ राजा अग्रिपास फेस्तसहेङ दोअ्हि, “कासेहेङ ताइमिङ इङकोको काथा हिङलि मन जेङहि।” फेस्तस दोअ्हि, “जुम्नि दोङ ना हिङलि निनाना।” पावलहेङ राजा अग्रिपासकोता चुमाका 23 जुम्निदिना राजा अग्रिपास रो बरनिकि बारा मानता लोहि। ओबालाइ पलटनपतिगेलाइ रो पुरको मुल द्याङगेलाइदोफा बाराजोम्काता योम्हि। फेस्तस हुकुम पिकान्हुअ्सो पावलहेङ बाराकचहरिता चुमाहि। 24 फेस्तस दोअ्हि, “राजा अग्रिपास रो इता हिका यहुदिगेलाइ झाराङ काङकोता उजुर पाका द्याङ या दोङ एइ। इदोइ द्याङहेङ सेअ्लि दोङ गोयाङ दोअ्तेङ झाराङ यहुदिगेलाइ यरुसलेमता रो इता कैसरियाता बुङ बिम्ति पाका हि। 25 कालाउ का इदोइ द्याङहेङ सेअ्लि गोइका इन्सिका हिदोङ फतुर बुङ निङलि मादोघा। कालाउ वा ताइमिङ रोमि महाराजाकोता बिम्ति पालि र्हेनाङसिङ का वासेहेङ रोमता दिङगिल्लि निधो पाघा। 26 कुलाउ का वासेहेङ फतुर लागाइका बारेता माहाराजाहेङ हाइ दोङ लेखेलि मादोघा। इदोइखातिर का वासेहेङ नेलाइको आगाता रो खास पातेङ ना राजा अग्रिपासको आगाता चुमाका हिघा। नेलाइ याको जाच पापिसुन्हा पानु का लेखेका काथा निनाङका बे दोअ्का आस ताअ्का हिघा 27 हाइदोनु हाइदोङ फतुर मातिम्पासिङ काइदिहेङ रोमि माहाराजाकोता दिङगिल्लि कासेहेङ रेम्का मालागिहि।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.