साल्न्हाका चात्या 24 - धिमालपावलहेङ बारा हाकिम फेलिक्सकोता चुमपुका 1 ना दिनान्हुअ्सो बारा धामि हननिया रो मन्डलिको आगुवागेलाइ तर्तुल्लस दोअ्का वकिलहेङ दोसाङ चुमतेङ यरुसलेमसो कैसरियाता थुकालिलोहि। एम्बालाइ पावलको खिलापता बाराहाकिकोता उजुर पाहि। 2 पावलहेङ बाराहाकिमको आगाता चुमाकान्हुअ्सो तर्तुल्लस वासेहेङ फतुर लागाइतेङ एसा दोअ्हि: “माननिय फेलिक्स, ना बुद्धिहिका बाराहाकिम हिनाङसिङ केलाइहेङ लाम्फासोङ सुबिस्ताता हिलि पिका हिन्हा। ना दोङ केलाइको मुलुकको भाअ्सिङ रेम्का काम पादोङखेना। 3 इदोइ नाङको पाका गोताङ कामहेङ केलाइ च्याबास पिन्हाखे। 4 का नाङको हेन्जा पहर मार्हुकाङका, कालाउबुङ एलोङ पोतोका बिम्ति हिङपि। 5 केलाइको नाल्का इदोइ द्याङ पिरपितेङ हिगिल्का खालको हि। इदोइ द्याङ नासरि दोअ्का हुलको नेता जेङतेङ दुनियाभरिको यहुदिगेलाइको माझाता हुल्दाङगा पातेङ हिगिल्दोङखे। 6 या थान बुङ अपुनित पालि भोदोङघाहि। इङको दोङ पहर केलाइ यासिहेङ रिमन्हाहि। [केलाइ केलाइको ताइकोङ नियममाफिक याको फतुर तिम्पालि ठहर पाका हिघान्हाहि। 7 कालाउ बुङ रोमि पलटनपति लुसियस लोतेङ बलजफ्ति यासिहेङ केलाइसो घिङतेङ चुमपुहि 8 रो केलाइहेङ नाङकोता उजुर पालि दोअ्तेङ हुकुम पिहि।] ना ताइमिङ यासिहेङ हिअ्न्हा पानु केलाइ यासेहेङ लागाइका फतुर याकोङसो गोताङ ग्याना।” 9 बो यहुदिगेलाइ बुङ इदोइ काथागेलाइ जातिङको दोअ्तेङ दासि पिहि। पावल फेलिक्सको आगाता काथा ताअ्का 10 बाराहाकिम पावलहेङ धुइलि हुकुम पिकान्हुअ्सो पावल एसा दोअ्हि, “ना हेन्जाङ बाअ्सारसो इदोइ मुलुकको नियापाका जेङका हिना। एन्सा जेङलाउ नाङको आगाता का ताइको बायान पिलि हाउसितेङ हिघा। 11 का यरुसलेमता परमेस्वरको सेवा पालि हानिका तेन्हे दिनाखान्तेङ हेन्जा जेङका मान्थु। इदोइ काथा ना ताइमिङ गेलि द्वाना। 12 एबालाइ ना कासेहेङ हिदिङ द्याङदोफा चिय्हासुतेङ हिका दुसुहि, ना थानगेलाइता ना कचहरिसाअ्गेलाइता ना पुरता हिसोङ द्याङगेलाइहेङ उत्पात माचाइलि तोल्हेका तिङका दोङ हि। 13 कालाउ एम्बालाइ कासेहेङ फतुर लागाइका दासि बुङ पिलि माद्वावा। 14 कालाउ बुङ इदोइ काथाचाहिँ का दोअ्खा, जेदोङ प्रभुको मुक्ति निङका दामाहेङ एम्बालाइ ढाटाइका दोअ्खे, इङकोङ दामाहेङ पिताइतेङ का केलाइको पुर्खाको परमेस्वरहेङ पुजिखा। कालाउ आगाधुइकालाइको लेखेका धरम किताब रो मोसाको पिका गोताङ नियमता का खान्धुर पाखा। 15 का एम्बालाइ भाइपाङ धरमाति रो कुकरमि गोताङ द्याङ सिकान्हुअ्सो आरोङ सिन्हुतावा दोअ्का आस ताअ्खा। 16 इदोङखातिर द्याङ रो परमेस्वर न्हेमिको आगाता का ताइको मनहेङ चोखो ताअ्लि भोखा। 17 “हेन्जाङ बाअ्सारन्हुअ्सो का यहुदि दादाओनेगेलाइको भाअ्सिङ दान रो परमेस्वरहेङ भेटि पिलि यरुसलेम घुरितेङ लोका हिघाखा। 18 एबालाइ कासेहेङ थानता दुसुलाउ सुदो जेङका बिधि का पुरा पालिदोपाका हिघाखा। इन्ता हिदिङ खालको चेअ्सु मान्थुघाहि ना हिदिङ मारेम्का हुल्दाङगा दोङ जेङका हिघाहि। 19 कुलाउ एसिया माउजासो लोका हेअ्मि यहुदिगेलाइ कासेहेङ थानता तिङहि। यदि एम्बालाइको काङको खिलापता हाइदोङ काथा हिनु एम्बालाइ दोङ नाङकोता लोतेङ फतुर लागाइलि दोधावा। 20 माकुनु यहुदिगेलाइको बाराकचहरिता काङको हाइ दुस निङका हि, इता हिकालाइ दोअ्ताको। 21 खालि एलोङ काथाता खिनिङ एम्बालाइ कासेहेङ दुस लागाइलि द्वावा। इङको हाइ दोअ्नु, ‘सिका द्याङ आरोङ सिन्हुतावा दोअ्का काथाता का खान्धुर पानाङसिङ नानि काङको मुद्दा चलिदोङखे’ दोअ्तेङ का बाराका गाला पातेङ र्हिकाइका हिघाखा।” 22 इदोइ प्रभुको दामाको बारेता बाराहाकिम फेलिक्सहेङ रेम्फा था हिघाहि। इदोइभाअ्सिङ वा इदोइ मुद्दाहेङ इताङ रोकितेङ दोअ्हि, “एला नेलाइको मुद्दा रोमि पलटनपति लुसियस लोकान्हुअ्सो खिनिङ फाइसाला पाप्याङका।” 23 इदोइ दोअ्तेङ फेलिक्स काप्तानहेङ “पावलहेङ रेम्फा खाङसु, वासेहेङ गोइका थोक पिपाका सानाइतिगेलाइहेङ चाहिँ मारोकेसु रो वासेहेङ हेन्जा काराइ मापासु” दोअ्तेङ हुकुम पिहि। पावल फेलिक्स रो द्रुसिल्लाको आगाता 24 आसा दिनान्हुअ्सो बाराहाकिम फेलिक्स ताइको यहुदि बेअ् द्रुसिल्लाहेङ चुमतेङ लोहि। वा पावलहेङ काइहि रो इसु ख्रिस्टहेङ खान्धुर पाका बारेता वाकोसो हिङहि। 25 कुलाउ पावल धरम कामगेलाइ पालि गोयाङ, ताइको मनहेङ बसता ताअ्लि गोयाङ रो परमेस्वरको निसापपाका दिना लोदोङखे दोअ्का काथा हिम्पालाउ फेलिक्स थितेङ दोअ्हि, “जेङहोइ, नानि इदोइ झोको ह्याको, एला ना हानेलि द्वाना। माउका निङलाउ नासेहेङ आरोङ कायाङका।” 26 फेलिक्स पावलसो टाका काउरि निनाङका बे दोअ्तेङ आस ताअ्का हिघाखे। एन्साङ वा पावलहेङ घुरिघुरि काइतेङ काथा पाघाखे। 27 इङकोन्हुअ्सो न्हे बाअ्सारन्हुअ्सो फेलिक्सको थामेता पर्किअस फेस्तस बाराहाकिम जेङतेङ लोहि, कालाउ फेलिक्स यहुदिगेलाइहेङ लेङचापापिलि पावलहेङ थुनाताङ ताअ्तेङ हानेहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.