साल्न्हाका चात्या 23 - धिमाल

¹ पावल कचहरिको चारबितिङ खान्‍तेङ दोअ्‌हि, “दादा ओनेगेलाइ, नानिको दिनाथिकापा परमेस्‍वरको आगाता का सुदो मनपातेङ बान्‍चेतेङ हिघा।”

² पावलको इदोइ काथा दोअ्‌का हिङतेङ झाराङखान्‍तेङ बारा धामि हननिया पावल भेर्पाङ जाअ्‌का द्‍याङगेलाइहेङ वाको नुइता चाउरेलि हुकुम पिहि।

³ कालाउ पावल हननियाहेङ दोअ्‌हि, “ओइ कपटि! नासेहेङ बुङ परमेस्‍वर चाउर्‍यावा। ना नियममाफिक काङको न्‍याय पालि हितेङ बुङ हाइपालि नियम मिचितेङ कासेहेङ चाउरेलि हुकुम पिखेना?”

⁴ पावलको भेर्पाङ हिकालाइ दोअ्‌हि, “हाइ ना परमेस्‍वरको ठर्‍हाइका झाराङखान्‍तेङ बारा धामिहेङ बुङ चेरखेना?”

⁵ पावल दोअ्‌हि, “दादाओनेगेलाइ, वा दोङ झाराङखान्‍तेङ बारा धामि हि दोअ्‌का कासेहेङ था मान्‍थुघाहि। ताइको द्‍याङगेलाइहेङ खाबरा पाका हाकिमको खिलापता मारेम्‍का काथा धुइलिमाएल दोअ्‌का धरमकिताबता लेखेन्‍हाका इङको काथा का गेखा।”

⁶ बाराकचहरिता सदुकि रो फरिसि मन्‍डलिको द्‍याङगेलाइ योम्‍का हि दोअ्‌का काथा गेतेङ पावल बाराका गाला पातेङ दोअ्‌हि, “दादाओनेगेलाइ, का फरिसिको चान फरिसि दोङ हिघा। सिका द्‍याङ आरोङ सिन्‍हुताङ दोअ्‌का आस ताअ्‌नाङसिङ इता काङको मुद्‌दा चलिदोङखे।”

⁷ पावलको दोअ्‌का इदोइ काथासो सदुकि रो फरिसिगेलाइ मामिलिसुतेङ न्‍हेपान्‍ति जेङतेङ खेङन्‍हाहि

⁸ हाइदोनु सदुकिगेलाइ द्‍याङ सिकान्‍हुअ्‌सो आरोङ सिन्‍हुतावा दोअ्‌का काथाता खान्‍धुर मापाघाखे कालाउ सादेलको काथाचुमाकालाइ रो हाङसागेलाइ मामामान्‍थु दोअ्‌घाखे। कुलाउ फरिसिगेलाइ चाहिँ इदोइ सुम काथाता खान्‍धुर पाघाखे।

⁹ इन्‍ता बारा गालबाजि जेङहि रो फरिसि मन्‍डलिको आधे धरममास्‍टरगेलाइ जाअ्‌तेङ एसा दोअ्‌तेङ बिरोध पालि तेङहि, “इदोइ द्‍याङता केलाइ हाइदोङ फतुर मातिङन्‍हाखे। इदोइ द्‍याङदोफा हिदिङ आत्‍मा माकुनु सादेलचरको धुइका दोङ हिनु हाइ जेङहि कुनु!”

¹⁰ एम्‍बालाइको झागारा हेन्‍जाङ बार्‍हितेङ हानेहि। झागाराता पावलहेङ तानाइतुनाइ पातेङ सेअ्‌ताङ बे दोअ्‌तेङ रोमि पलटनपति थिहि कालाउ पावलहेङ कचहरिसो ओल्‍हेपातेङ ब्‍यारेकलिअ्‌ता चुमपुसु दोअ्‌तेङ पलटनगेलाइहेङ हुकुम पिहि।

¹¹ इङकोङ न्‍हिसिङता प्रभु पावलको भेर्पाङ देखाल पितेङ दोअ्‌हि, “साहासपा, माथि! इता यरुसलेमता काङको दासि पिकाभाइपाङ ना रोमता बुङ पिलिगोयाना।”

पावलहेङ सेअ्‌लि भोका

¹² जुम्‍निदिना र्‍हिमाङ यहुदिगेलाइ जोम्‍तेङ पावलहेङ सेअ्‌लि मतो पाहि कालाउ एम्‍बालाइ एसा दोअ्‌तेङ केरा चाहि, “पावलहेङ मासेअ्‌पाधाउ केलाइ हाइ दोङ माचाङ रो चि बुङ माआमाङ।”

¹³ एसापा सेअ्‌ताङ दोअ्‌तेङ केरा चाकालाइ न्‍हेकुरि खान्‍तेङ हेन्‍जा हिघाखे।

¹⁴ इङकोन्‍हुअ्‌सो एम्‍बालाइ मुल धामिगेलाइ रो मन्‍डलिको आगुवागेलाइकोता हानितेङ दोअ्‌हि, “केलाइ पावलहेङ मासेअ्‌पाधाउ हाइ दोङ माचाङ दोअ्‌तेङ केरा चाका हिन्‍हाहि।

¹⁵ एला नेलाइ रोमि पलटनपतिहेङ ‘बाराकचहरि पाहासो पावलदोफा बो काथागेलाइ बुङ हिअ्‌लि गोइका हि’ दोअ्‌तेङ पावलहेङ ब्‍यारेकसो झिकाइपिसु। कालाउ बाराकचहरिता लोकाताङ पालाउ केलाइ वासेहेङ दामाताङ सेअ्‌ताङ।”

¹⁶ कालाउ इङको यहुदिगेलाइ पावलहेङ ढुकितेङ सेअ्‌लि भोका काथा वाको भागेना गेहि। वा ब्‍यारेकता हानितेङ मामाइहेङ हिङपाहि।

¹⁷ कालाउ पावल ओदोङघरि एमि काप्‍तानहेङ काइतेङ दोअ्‌हि, “इदोइ वाजानको रोमि पलटनपतिदोफा बिनइ चार्‍हाइलि गोइकाहि आङ, यासिहेङ वाकोता सिरपु।”

¹⁸ काप्‍तान पावलको भागेनाहेङ रोमि पलटनपतिकोता चुमातेङ दोअ्‌हि, “काइदि पावल कासेहेङ काइतेङ इदोइ वाजानको बिनइ चर्‍हाइलि गोइका हि दोअ्‌नाङसिङ यासिहेङ नाङकोता चुमापिका हिघा।”

¹⁹ रोमि पलटनपति इङको वाजानको खुर चातेङ आसा ओसो चुमपुतेङ हिअ्‌हि, “हाइ दोअ्‌लि गोइकाहि? दोअ्।”

²⁰ वाजान दोअ्‌हि, “जुम्‍नि यहुदिगेलाइ पावलहेङ बाराकचहरिता बो काथा हिअ्‌लि चुमपुलि निनाको दोअ्‌तेङ नाङकोता बिनइ पालि लोलि भोघाखे।

²¹ कालाउ ना एम्‍बालाइको काथा माहिङ! हाइपानु एम्‍बालाइता न्‍हेकुरि खान्‍तेङ बुङ हेन्‍जा यहुदिगेलाइ पावलहेङ मासेअ्‌सा हाइ दोङ माचाङ रो चि बुङ माआमाङ दोअ्‌तेङ केरा चाका हि। एम्‍बालाइ एलाङ वासेहेङ सेअ्‌लि ढुकितेङ हि रो नाङको हुकुमको आसता र्‍हुम्‍तेङ हि।”

²² इसिका काथा हिङतेङ रोमि पलटनपति जामालहेङ दोअ्‌तेङ दिङगिल्‍हि, “इदोइ काथा ना कासेहेङ दोअ्‌घा दोअ्‌तेङ हासुहेङ माहिङपा।”

पावलहेङ बारा हाकिम फेलिक्‍सकोता दिङगिल्‍का

²³ इङकोन्‍हुअ्‌सो रोमि पलटनपति न्‍हेमि काप्‍तानगेलाइहेङ काइतेङ दोअ्‌हि, “कैसरिया हानेलि न्‍हेसाइ पलटन, सुमकुरितेमि ओह्‍याँधोल्‍का रो न्‍हेसाइ खापर चुमका पलटनगेलाइ ठिक पासे। एम्‍बालाइ दिलिमा कुह्‍वा बजे दोङ हानेलि साजेलि गोयाङ।

²⁴ पावलको धोल्‍का ओह्‍याँ बुङ ठिक पासु रो वासेहेङ रेम्‍फा गोर्‍हाइतेङ बाराहाकिम फेलिक्‍सकोता चुमपुसु।”

²⁵ इदोइ दोअ्‌कान्‍हुअ्‌सो इङको रोमि पलटनपति बाराहाकिम फेलिक्‍सहेङ एलोङ चिथि लेखेहि:

²⁶ “माननिय बाराहाकिम फेलिक्‍स, का क्‍लौडियस लुसियस नासेहेङ सेउपाखा!

²⁷ पावल दोअ्‌का इदोइ द्‍याङहेङ यहुदिगेलाइ सेअ्‌लि दोअ्‌तेङ रिम्‍हि, कुलाउ याचाहिँ रोमि नागरिक हिघाहि। इदोइ काथा गेतेङ का ताइमिङ पलटन चुमपुतेङ यासिहेङ बान्‍चेपाघा।

²⁸ या हाइ बिराइका हि दोअ्‌तेङ गेलि का यहुदिगेलाइको कचहरिता बुङ चुमतेङ हानिघा।

²⁹ कुलाउ यासेहेङ ज्‍यानदार माकोनु थुनिलिगोइका हाइ दोङ आपराध का मानिङघा। वाको दोसचाहिँ एम्‍बालाइकोङ नियमको बारेता हिघाहि।

³⁰ यहुदिगेलाइ इदोइ द्‍याङहेङ सेअ्‌लि दावा भोदोङखे दोअ्‌का काथा हिङनाङ यासिहेङ नाङकोता दिङगिलदोङखा। यासिहेङ फतुर लागाइका यहुदिगेलाइहेङ बुङ नाङकोता दोङ उजुर पालि दोअ्‌तेङ हुकुम पिका हिघा।”

³¹ कप्‍तान रो पलटनगेलाइ रोमि पलटनपतिको हुकुम मानितेङ पावलहेङ चुमतेङ हानेहि। ओबालाइ पावलहेङ इङकोङ न्‍हिसिङ एन्‍टिपाट्रिस पुरथिकापा थुकापाहि।

³² जुम्‍निदिना तेका पलटनगेलाइचाहिँ पावलहेङ ओह्‍याँधोल्‍का पलटनगेलाइदोफा हान्‍हाको दोअ्‍तेङ जिम्‍मा पितेङ पलटन यरुसलेम घुरिहि।

³³ ओह्‍याँधोल्‍का पलटनगेलाइ कैसरियाता थुकातेङ पावलहेङ बाराहाकिमकोता रोमि पलटनपतिको चिथिसुदाङ जिम्‍मा पिहि।

³⁴ इङको चिथि पर्‍हेलिदोतेङ बाराहाकिम पावलहेङ हिअ्‌हि, “ना हिदोइ माउजाको हिन्‍हा?” पावल दोअ्‌हि, “का किलिकियाको हिघा।”

³⁵ कालाउ बाराहाकिम दोअ्‌हि, “एन्‍सानु नाङको उजुर पाकालाइ इता थुकालिलोकान्‍हुअ्‌सो खिनिङ नाङको काथा हिनाङका।” इङकोन्‍हुअ्‌सो बाराहाकिम पावलहेङ पहरा पितेङ हेरोदको महलता ताअ्‌लि दोअ्‌तेङ हुकुम पिहि।