साल्न्हाका चात्या 22 - धिमाल

¹ “आबाआमाइगेलाइ रो दादाओनेगेलाइ, नेलाइको आगाता काङको भाअ्‌सिङ दोअ्‌लि गोइका काथा एला हिङसु।”

² पावल हिब्रु राउता धुइका हिङतेङ झाराङ द्‍याङगेलाइ सिपापा हि। कालाउ पावल दोअ्‌हि,

³ “का किलिकियाको टार्सस पुरता जेङका यहुदि हिघा। कुलाउ का इदोङ यरुसलेम पुरता बारातेङ मास्‍टर गमलिएलको कोल्‍हेता बाराघा। केलाइको पिता पुर्खासो दोङ मानेतेङ लोका धरमकिताबको बिद्‌या का रेम्‍फा धिरका हिघा। नानि नेलाइ परमेस्‍वरहेङ जेथे हाउसाइका तिम्‍पासुन्‍हा, का बुङ इङकोझोकोङ हाउसाइका हिघाखा।

⁴ का प्रभुको मुक्‍तिको दामाता लागिका द्‍याङगेलाइहेङ सिलितोम्‍पाङ सान्‍ताइका हिघाखा। का वाबालाइ रो बेबालाइहेङ रिम्‍पातेङ थुनिलि लागाइका हिघाखा।

⁵ इदोइ काङको दोअ्‌का काथा जातिङको दोअ्‌तेङ झाराङखान्‍तेङ बारा धामि रो केलाइको बाराकचहरिको सदस्‍यगेलाइ बुङ दोअ्‌लि दोस्‍वाना। ओबालाइ दोङ कासेहेङ दमस्‍कसता हिका यहुदि दादाओनेगेलाइको मिङता चिथिगेलाइ पिहि रो इङको चिथिगेलाइता कासेहेङ प्रभु इसुता खान्‍धुर पाका जनगेलाइहेङ रिम्‍का खाबरा पिका हिघाहि। इदोइखातिर एम्‍बालाइहेङ यरुसलेमता चुमातेङ साजाइ पिलिको भाअ्‌सिङ का दमस्‍कस हानेघा।

ताइमि फेरेन्‍हाका पावल द्‍याङगेलाइहेङ हिम्‍पाका

⁶ “जेलाउ का दमस्‍कसभेर्पा थुकालि तोम्‍लाउ माझादिना जेङका हिघाहि, सादेलसो एक्‍कासि एलोङ चोहोचोहोका जोल्‍का कार्‍हुता चिल्‍काहि।

⁷ का भोनोता लोङघा। इङको दोङ पहर का एसा दोअ्‌का एलोङ गाला हिङघा, ‘साउल, ओइ साउल, ना कासेहेङ हाइपालि सान्‍ताइखेना?’

⁸ का दोअ्‌घा, ‘प्रभु, ना हासु हिन्‍हा?’ वा दोअ्‌हि, ‘का नासरतको इसु एइ, जाइहेङ ना सान्‍ताइदोङखेना।’

⁹ कादोफा हिकालाइ फाइसालाम्‍काहेङ ते तिङहि कुलाउ धुइकाको गालाचाहिँ मागेहि।

¹⁰ का दोअ्‌घा, ‘प्रभु, एला का हाइ पाङका?’ प्रभु कासेहेङ दोअ्‌हि, ‘ल्‍होतेङ दमस्‍कस पुरता हाने, परमेस्‍वर नासेहेङ आर्‍हाइका कामगेलाइको बारेता नासेहेङ इन्‍ता दोङ दोअ्‌प्‍यावा।’

¹¹ इङको चिल्काका फाइसालामकासो का मिँ तिङलि मादोका जेङका हिघाखा इदोङखातिर काङको सानाइतिगेलाइ कासेहेङ थोङतेङ दमस्‍कस थुकापाहि।

¹² “इङको पुरता हननिया मिङ हिका एमि द्‍याङ हिघाखे। वा मोसाको पिका नियम मानेका धरम द्‍याङ हिघाखे रो दमस्‍कसता हिका यहुदिगेलाइ झाराङ वासेहेङ मानिघाखे।

¹³ इङकोङ द्‍याङ काङकोता लोतेङ काङको भेर्पा जाअ्‌तेङ दोअ्‌हि, ‘साउल ओने, आरोङ तिङका जेङ।’ वा एन्‍सा दोअ्‌तेङसाङ का मिँ तिङका जेङघा रो वासेहेङ तिङघा।

¹⁴ इङकोन्‍हुअ्‌सो वा कासेहेङ दोअ्‌हि, ‘ना केलाइको पुर्खाको परमेस्‍वरको लाल्‍सा गेलि दो दोअ्‌तेङ दोङ वा नासेहेङ साल्‍का हि। ना धरम सेवक इसुहेङ तिङलि निङन्‍हा रो वाको नुइसो धुइका काथाहेङ हिङलि निङन्‍हा।

¹⁵ हाइदोनु ना वाको दासि जेङतेङ ताइमिको तिङका रो हिङका काथा झाराङ द्‍याङगेलाइहेङ हिङपालि गोयाना।

¹⁶ एन्‍सानु एला हाइपालि बेलोम पालि? ल्‍हो रो चिभुअ्‌लि र्‍हु कालाउ इसुको मिङता ताइको कुकरमसो चोखाइन्‍हा।’

¹⁷ “इन्‍तासो का यरुसलेम घुरिघा, कालाउ थानता पुकार पाकापाताङ दर्सन तिङघा।

¹⁸ प्रभु कासेहेङ एसा दोअ्‌हि, ‘मार्फा पातेङ यरुसलेमसो ओल्‍हे, हाइपानु ना काङको बारेता पिका दासि इताको द्‍याङगेलाइ माहिङप्‍यावा।’

¹⁹ का दोअ्‌घा, ‘प्रभु, काङको बारेता एम्‍बालाइ गोताङ काथा गेखे, का गोताङ कचहरिसाअ्‌ता हानितेङ नासेहेङ खान्‍धुर पाकालाइहेङ दान्‍हाइतेङ थुनिघा।

²⁰ नाङको दासि पिका स्‍तिफनसहेङ हितिहोपाङ दान्‍हाइतेङ सेअ्‌लाउ का इन्‍ताङ हिघाखा रो का बुङ वासेहेङ सेअ् दोघाखा। वाको बायु र्‍हुकालाइदोसा मिलितेङ एम्‍बालाइको धाबा र्‍हुम्‍तेङ हिघाखा।’

²¹ कालाउ प्रभु दोअ्‌हि, ‘ना हाने, का नासेहेङ दुरेदुरेथिकापा बो जात्‍यागेलाइकोता दिङगिलदोङखा।’”

²² जेलाउ पावल बोजात्‍यागेलाइकोता हानेका काथा हिङहि, कालाउ एम्‍बालाइ र्‍हिकाइतेङ दोअ्‌लि तेङहि, “यासेहेङ सेअ्‌लिङ गोयाङ! एला या सिन्‍हुपा हिलि योग्‍यको मान्‍थु!”

²³ एसापा जोसता लोतेङ एम्‍बालाइ ताताइको गुअ्‌का खाइतेङ आदेलभारि धुला थाल्‍तेङ र्‍हिकाइलि तेङहि।

²⁴ इदोइ तिङतेङ रोमि पलटनपति लिअ्‌ता चुमपुतेङ पावलहेङ छरि लागाइलि हुकुम पितेङ दोअ्‌हि “यासेहेङ छरि लागाइलाउ या यहुदिगेलाइ हाइपालि चेरताम्‍पाका हिघाहि दोअ्‌तेङ दोअ्‌तावा बे?”

²⁵ पलटनगेलाइ छरि लागाइलि धेउलि तोमलाउ पावल भेर्पाङ जाअ्‌का काप्‍तानहेङ दोअ्‌हि, “हाइ रोमि नागरिकहेङ फतुर मालागाइसिङ छरि लागाइलि निङखे? हाइ रोमि कानुनता एसाङ पालि दोअ्‌का हि?”

²⁶ काप्‍तान रोमि पलटनपतिकोता हानितेङ इदोइ काथा हिङपातेङ दोअ्‌हि, “ना हाइपालि भोदोङखेना? ना गेखिना? इदोइ द्‍याङ ते रोमि नागरिक कि हिनाउ!”

²⁷ इदोइ काथा हिङतेङ रोमि पलटनपति लिअ्‌ता दुल्‍तेङ पावलहेङ हिअहि, “हाइ ना जातिङकोङ रोमि नागरिक हिन्‍हा?” पावल दोअ्‌हि, “एइ!”

²⁸ रोमि पलटनपति दोअ्‌हि, “का ते हेन्‍जा टाका तिरितेङ रोमि नागरिक जेङका हिघा।” पावल दोअ्‌हि, “काचाहिँ जोलोमसोङ रोमि नागरिक हिघा।”

²⁹ इसिका हिङतेङसाङ पावलहेङ हिअ्‌लि लोका द्‍याङगेलाइ पासाइहि। पावल रोमि नागरिक हिकाहिकाताङ एसापा झिन्‍झिरिहोइ धेउलि लागाइकाता इङको रोमि पलटनपति बुङ थिहि।

पावल बाराकचहरिको आगाता

³⁰ यहुदिगेलाइ पावलहेङ हाइपालि फतुर लागाइहि, इङको काथा रोमि पलटनपति गेलि भोघाखे। एन्‍सा जेङलाउ जुम्‍निदिना वा मुल धामिगेलाइ रो बाराकचहरिको झाराङ सदस्‍यगेलाइहेङ काइतेङ कचहरि पालि हुकुम पिहि रो पावलहेङ थुनासो ओल्‍हेपातेङ झाराङको आगाता जाअ्‌पाहि।