साल्न्हाका चात्या 21 - धिमालपावल यरुसलेम हानेका 1 एफिससको मन्डलिको आगुवागेलाइदोफा बिदा जेङतेङ केलाइ चिजाहाजता सोझाङ कोस दोअ्का टपु जेङतेङ जुम्निदिना रोडस टपुता थुकान्हाहि कालाउ इन्तासो पटारा पुरता थुकालिलोन्हाहि। 2 इन्ता केलाइ फोनिके माउजाथिकापा हानेका चिजाहाज निङन्हाहि रो इन्ताङ धोल्तेङ हानेन्हाहि। 3 केलाइ साइप्रस टपुको भेर्पाङ जेङतेङ इङकोकोङ माहेँपाहासो सिरिया माउजाभारि हानेन्हाहि। टुरोस पुरता आनेमाने खुअ्पालि चिजाहाज रोकेन्हालाउ केलाइ बुङ खुअ्न्हाहि। 4 कालाउ इन्ता हिका प्रभुको चात्यागेलाइहेङ दुसुलि हानेन्हाहि रो ए आथारथिकापा ओबालाइदोफाङ हिन्हाहि। पुनित हाङसासो आगुवाइ निङतेङ ओबालाइ पावलहेङ यरुसलेम मान्हेलि दोअ्हि। 5 कालाउ एआथार झोको हिकान्हुअ्सो केलाइ ओबालाइदोफा बिदा जेङतेङ हान्हेन्हाहि। इन्ताको प्रभुता खान्धुर पाका झाराङ दादाओने, बाइओने रो जामालाइ चोमालाइसुदाङ केलाइहेङ पुरको बाहारथिकापाङ सिरपुलि लोहि। केलाइ झाराङ जाहादिको काम्बेता तिर्हो थोतेङ पुकार पान्हाहि। 6 इङकोन्हुअ्सो केलाइ बिदाबारि जेङतेङ चिजाहाजता धोलन्हाहि रो ओबालाइचाहिँ ताइको साअ्भारि घुरिहि। 7 टुरोस पुरसो केलाइ टोलेमाइस पुरता थुकातेङ चिजाहाजसो खुअ्न्हाहि। केलाइ इन्ता हिका प्रभुको खान्धुर पाका दादाओनेगेलाइहेङ दुसुलि हानेन्हाहि रो एनि एम्बालाइदोफाङ हिन्हाहि। 8 जुम्निदिना इन्तासो बिदा जेङतेङ केलाइ कैसरिया पुरता थुकान्हाहि। इन्ता केलाइ रेम्काबानाल पारचारपाका फिलिपको साअ्ता हिन्हाहि। फिलिपचाहिँ साल्तेङ दिङगिल्कालाइहेङ सेवा पालि भाअ्सिङ साल्तेङ दिङगिल्का न्हिअ्मिता एमि हिघाखे। 9 वाको द्यामि बिहु माजेङका चामिन्दिगेलाइ हिघाखे। एम्बालाइकोता आगाधुइका धुइलि बारदान हिघाहि। 10 केलाइ आसा दिना फिलिपको साअ्ता हिलाउ यहुदिया माउजासो अगाबस मिङ हिका एमि आगाधुइका केलाइकोता लोहि। 11 वा पावलको तेपाना चुमतेङ ताइको खुर रो खोकोइ धेउतेङ दोअ्हि, “पुनित हाङसा एसापा दोअ्खे, यरुसलेम हानेनु यहुदिगेलाइ इदोइ तेपानाको धनिहेङ एसाङ पातेङ धेवावा रो बो जात्यागेलाइको खुरता जिम्मा प्यावा।” 12 इदोइ काथा हिङतेङ केलाइ रो इन्ता हिका झाराङ द्याङ पावलहेङ यरुसलेम मान्हे दोअ्तेङ दोअ्हि। 13 कुलाउ पावल दोअ्हि, “नेलाइ हाइपालि खारतेङ काङको मन तु:पापिसुखेना? का यरुसलेमता धेउन्हालि खिनिङ माको, कुलाउ प्रभु इसुको भाअ्सिङ सिलि बुङ त्यार हिघा।” 14 पावलहेङ रोकेलि मादोलाउ केलाइ “प्रभुको लाल्सा पुरा ज्याको” दोअ्तेङ सिपापा हिन्हाहि। 15 इङकोन्हुअ्सो केलाइ ताइको आनेमानेगेलाइ त्यार पातेङ यरुसलेमभारि दामा लाअ्न्हाहि। 16 कैसरियाको प्रभुता खान्धुर पाका आधे दादाओनेगेलाइ बुङ केलाइदोफाङ लोहि। एम्बालाइ केलाइहेङ साइप्रस टपुसो लोतेङ हिका प्रभुको पुर्ना खान्धुरि मनासोनको साअ्ता बासा हिलि सिरपुहि। पावल याकुबहेङ दुसुका 17 केलाइ यरुसलेमता थुकालाउ इन्ताको मन्डलिको दादाओनेगेलाइ लेङचातेङ केलाइको स्वागत पाहि। 18 जुम्निदिना पावल केलाइदोफा याकुबकोता हान्हेहि। इन्ता मन्डलिको झाराङ आगुवागेलाइ जोम्तेङ हिघाखे। 19 पावाल एम्बालाइहेङ दुसुहि रो वाको पाका गोताङ कामसो बो जात्याको माझाता परमेस्वर हिसिकाहिसिका कामगेलाइ पाहि, इङको गोताङ दोअ्पिहि। 20 पावलको दोअ्का हिङतेङ ओबालाइ परमेस्वरको मिङ तोल्हेहि। इङकोन्हुअ्सो ओबालाइ पावलहेङ दोअ्हि, “इता बुङ हाजार यहुदिगेलाइ प्रभुता खान्धुर पातेङ मोसाको पिका नियमहेङ एलाथिकापा बुङ मानिदोङखे। 21 एला ‘मोसाको नियम मानेलिमागोयाङ कालाउ जामालाइको खतना पालि मागोयाङ रो यहुदि चलनता चलिलिमागोयाङ’ दोअ्तेङ बोजात्याको मुलुकता हिका गोताङ यहुदिगेलाइहेङ ना धिरपादोङखेना दोअ्का काथा ओबालाइ हिङका हि। 22 एन्सानु एला केलाइ हाइ पाङ? एला पाक्का बुङ ना इता लोकाहिना दोअ्तेङ एम्बालाइ हिनावा। 23 इदोइखातिर केलाइ जेदोङ दोअ्न्हाखे इङकोङ पा, इता एला केलाइदोफा म्हितुपाङ हितेङ सुचि जेङलि भाकल पाका द्यामि द्याङ केलाइदोफा हि। 24 एम्बालाइको भाकल पाका पहर दोहोइ, एला ना एम्बालाइहेङ चुमतेङ थानता हानितेङ सुदो जेङका कामता भाग र्हु। खार्चागेलाइचाहिँ ना तिरिपि रो एम्बालाइको पुसिङ सिअ्लि लागाइ। एसापा ना नियम मानेका तिङतेङ झाराङ नासेहेङ लागाइका फतुर जातिङको माको दोअ्तेङ ग्यावा। 25 कुलाउ खान्धुर पाका बो जात्यागेलाइहेङ चाहिँ ‘मुर्तिहेङ चार्हाइका चिज, हिति, निर्घा एम्तेङ सेअ्का गुपुसको बिय्हा रो दुराचारसो खेङन्हातेङ हिसु’ दोअ्का निधो पातेङ केलाइ चिथि लेखेतेङ पिगिलन्हाहोइ।” 26 जुम्निदिना पावल इङको द्यामि द्याङगेलाइहेङ थानता चुमतेङ एम्बालाइदोफाङ म्हितुपाङ हितेङ ताइमिहेङ बुङ सुदो पाहि। इङकोन्हुअ्सो वा द्यामिको भाअ्सिङ सुद्याइको भाकल हेअ्लाउ पुरा ज्याङ रो भोक चर्हाइका दिना हेअ्लाउ दोअ्तेङ धामिहेङ दोअ्लि थानलिअ्ता दुल्हि। पावल थानता रिमनिङचाका 27 भाकल पाका एआथार जेङलि तोम्का हिघाहि कालाउ एसिया माउजासो लोका यहुदिगेलाइ पावलहेङ थानता तिङहि। एम्बालाइ द्याङगेलाइहेङ तोल्हेहि रो पावलहेङ रिम्तेङ 28 र्हिकाइतेङ दोअ्लि तेङहि, “लोसु, लोसु, इस्राएलि दादा ओनेगेलाइ, केलाइहेङ साघाइसु! एइ, इदोङ द्याङ जेसोकोसोङ हानितेङ केलाइ इस्राएलिगेलाइको खिलापता धुइका, नियम मामानेलि रो थानता पुजा बुङ मापालि दोअ्तेङ धिरपाका यिदोइ एइ। इदोइ खिनिङ माको, या बोजात्याको द्याङगेलाइहेङ थानता दुल्पातेङ इदोइ चोखो थामेहेङ बुङ आखेका बान्हाइपिका हि।” 29 एम्बालाइ एफिसससो लोका त्रोफिमसहेङ पावलदोफाङ पुरता तिङका हिघाखे रो पावल वासेहेङ थानलिअ्ताङ चुमाहि दोअ्तेङ फोमपाका हिघाखे। 30 इदोइ काथासो पुरभारि खाइला बाइला जेङहि रो द्याङगेलाइ चारबितिङसो इन्ता लोहि। एम्बालाइ पावलहेङ हेरपुतेङ थानलिअ्तासो बाहार ओल्हेपाहि कालाउ थानको फिनु गिअ्पिहि। 31 एम्बालाइ पावलहेङ सेअ्लि तोम्का हिघाखे। इङको पहर दोङ गोताङ यरुसलेम पुरता हुल्दाङगा जेङदोङखे दोअ्का बानाल रोमि पलटनपतिको न्हातोङता थुकाहि। 32 वा ओदोङघरि पलटन रो काप्तानगेलाइ चुमतेङ धाअ्तेङ द्याङगेलाइको जोम्काभारि हानेहि। रोमि पलटनपतिहेङ लोका तिङतेङ द्याङगेलाइ पावलहेङ दान्हाइलि लाअ्हि। 33 रोमि पलटनपति पावलहेङ रिम्हि रो न्हेलोङ झिन्झिरिहोइ धेउलि लागाइहि कालाउ द्याङगेलाइहेङ हिअ्हि, “इदोइ हिताको द्याङ? या हाइ पाहि?” 34 कालाउ जोम्तेङ हिका द्याङगेलाइ आधेमि ए थोक आधेमि भेनेङ थोक दोअ्तेङ र्हिकाइहि। एसापा रोमि पलटनपति झागाराको खास काथा गेलिङ मादोहि। एन्सा जेङलाउ वा पावलहेङ पलटन हिका थामेता चुमपुलि हुकुम पिहि। 35 पलटनगेलाइ पावलहेङ चुमपुतेङ हानेलाउ द्याङको चेप्रेचेअ्का ओबालाइहेङ पिताइतेङ हानेहि। पाइर्होसो र्हुता हानेलि तोम्लाउ द्याङगेलाइ पावलहेङ सेअ्लि भोहि। एन्सा जेङलाउ द्याङगेलाइसो बान्चेपालि पलटनगेलाइ वासेहेङ फुतेङ चुमपुहि। 36 इङको पहरथिकापा बुङ “वासेहेङ सेअ्लि गोयाङ!” दोअ्तेङ र्हिकाइतेङ द्याङगेलाइ पावलहेङ पिताइदोङ घाखे। पावल ताइको बारेता दोअ्का 37 ब्यारेकलिअ्ता दुल्लि तोमलाउ पावल रोमि पलटनपतिहेङ ग्रिक राउता दोअ्हि, “का नाङकोदोफा एलोङ बिम्ति पालि द्वाङका बे?” पलटनपति दोअ्हि, “ए, ना ग्रिक राउ बुङ गिका हिना? 38 हाइ ना इङकोङ मिस्रि माको, आसा बाअ्सार लाम्फा जाइ उल्का माचाइका द्या हाजार डाकुगेलाइहेङ झारता चुमपुका हिघाहि माको?” 39 पावल दोअ्हि, “माको, का ते किलिकिया माउजाको टार्सस पुरता जोलमजेङका यहुदि हिघा। का इङकोङ मिङ चलिका पुरको एमि नागरिक हिघा। दाया पातेङ कासेहेङ इदोइ द्याङगेलाइको आगाता एलोङ काथा धुइलि पि।” 40 रोमि पलटनपति हुकुम पिहि कालाउ पावल पाइर्होता जाअ्तेङ खुरको टिपनिहोइ द्याङगेलाइहेङ सिपापा हिलि दोअ्हि। द्याङगेलाइ सिपापा हिकान्हुअ्सो पावल हिब्रु राउता धुइलि तेङहि: |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.