साल्न्हाका चात्या 20 - धिमालपावल माकेडोनिया रो ग्रिसता 1 इङको खाइलाबाइला निचालाकान्हुअ्सो पावल प्रभु इसुको चात्यागेलाइहेङ जोम्पाहि रो एम्बालाइहेङ खान्धुरता बोल्यातेङ हिलि आँट पितेङ माकेडोनिया माउजाभारि हानेहि। 2 इन्ता थुकाकान्हुअ्सो पावल थामेथामेता हानितेङ प्रभुको चात्यागेलाइहेङ आँटसो पितेङ धिरपाहि। इङकोन्हुअ्सो वा ग्रिस मुलुकता लोहि। 3 वा सुम माहिन्हाथिकापा इन्ताङ हि। इङकोन्हुअ्सो पावल चिजाहाजसो सोझाङ सिरिया माउजा हानेलि ठहर पाहि। एसापा हानेलि खाङलाउ यहुदिगेलाइ वासेहेङ सेअ्लि भोदोङखे दोअ्का हिङतेङ वा तेतेङ माकेडोनिया जेङतेङ हानेलि ठहर पाहि। 4 इदोइ यात्राता भेभेनाङ मन्डलिको दादाओनेगेलाइ दोसाङ हानेहि। पावल दोसाङ हानेकालाइता बेरिया पुरता हिका पुरसको चान सोपात्रोस, थेसलोनिके पुरता हिका अरिस्तारखस रो सिकन्दस, डर्बि पुरता हिका गायस, गलातिया माउजाको तिमोथि कालाउ एसिया माउजासो लोका तुखिकस रो त्रोफिमस हिघाखे। 5 एम्बालाइ केलाइखान्तेङ लाम्फा दोङ हानेहि रो केलाइहेङ त्रोआस पुरता र्हुम्तेङहि। 6 केलाइचाहिँ लाअ्पिका पारबा मानेलिदोकान्हुअ्सो फिलिप्पि पुरसो जाहादिको दामा जेङतेङ हानेन्हाहि कालाउ नानि दिनान्हुअ्सो एम्बालाइहेङ त्रोआस पुरता दुसुन्हाहि। इन्ता केलाइ एआथार थिकापा हिन्हाहि। पावल आन्तिमखेप त्रोआस पुरता हानेका 7 सानचारबार दिलिमा केलाइ इन्ता हिका प्रभुको चात्यागेलाइदोफा प्रभुभोज चालिको भाअ्सिङ जोमन्हाहि। पावल जुम्निर्हिमा हानेलि गोइनाङसिङ वा आधारात थिकापा एम्बालाइदोफा काथापातेङ हि। 8 केलाइ जोम्तेङ हिका र्हुताको तालाता हेन्जा गिसागेलाइ जोल्तेङ हिघाखे। 9 युटिकस दोअ्का एमि वाजान झ्यालता योम्तेङ हिघाहि। पावल धुइकाताङपालाउ इङको वाजान निन्धा धुलातेङ जिम्हि। वा जिम्लाउ र्हुताको सुम तालासो लेता हुल्हि। एम्बालाइ वासेहेङ तोल्हेलि हानेलाउ वा सिलिदोका हिघाहि। 10 कालाउ पावल खुअ्तेङ वाजानर्हुता सालाल्हाङतेङ वासेहेङ खोमतेङ कोरबितिङ हिका द्याङगेलाइहेङ दोअ्हि, “नेलाइ माथिसु, इदोइ वाजान ते सिन्हुपाङ हि।” 11 इङकोन्हुअ्सो पावल र्हुताको तालाता ताङहि रो झाराङ मिलितेङ प्रभुभतेर चाहि। प्रभुभतेर चाकान्हुअ्सो वा माझेङपाधाउ एम्बालाइदोफा काथा पातेङ हि। इङकोन्हुअ्सो वा एम्बालाइसो बिदा र्हेतेङ हानेहि। 12 इन्ताको चात्यागेलाइ चाहिँ इङको वाजानहेङ सिता सिरपुहि। वाजान बान्चिकाता झाराङ लेन्चा हि। पावल त्रोआससो मिलेटसथिकापा तेतेङ हानिका 13 त्रोआससो पावलबिना केलाइ झाराङ चिजाहाजता धोल्तेङ अस्सोस पुरता हानेन्हाहि। पावल अस्सोसथिकापा तेतेङ हानेलि भोनाङसिङ वा केलाइदोफा ताइमिहेङ अस्सोसता खिनिङ चिजाहाजता धोल्लि बन्दोबस्त पाका हिघाखे। 14 केलाइ अस्सोसता थुकाकान्हुअ्सो वा बुङ लोतेङ चिजाहाजता धोल्हि रो केलाइ झाराङ मिलितेङ मितिलेने पुरता हानेन्हाहि। 15 जुम्निदिना केलाइ जाहादिको दामा जेङतेङ खियस टपुको भेर्पा रो सुम्निता सामोस टपुता थुकान्हाहि। इन्तासो भेनेङ दिना मिलेटस पुरता थुकालिलोन्हाहि। 16 पावलहेङ यरुसलेमता थुकालि हातार जेङनाङसिङ एसियाता आवायाङका दोअ्तेङ वा एफिसस पुरता मादुल्लि निधो पाहि हाइदोनु वा पेन्तिकोसको पारबाता जेथेङदो मारफाङ यरुसलेम थुकालि मन पाका हिघाहि। पावल एफिससको मन्डलिको आगुवागेलाइदोसा बिदा र्हेका 17 मिलेटस पुरसो पावल एफिसस पुरता हिका मन्डलिको आगुवागेलाइहेङ काइलिदिङगिल्हि। 18 जेलाउ एम्बालाइ थुकालिलोहि कालाउ वा एम्बालाइहेङ दोअ्हि, “एसियाता लोका दिनासोङ नेलाइदोफाङ हिलाउ का इङको दिनागेलाइ हेसापा दोपाघा इङको नेलाइ दोङ गेसुखेना। 19 यहुदिगेलाइ घुरिघुरि सानताइलाउ बुङ का नोइतेङ मिति ह्याअ्पातेङ प्रभुको सेवा पाघा। 20 नेलाइ झाराङको आगाता रो साअ् साअ्ता दुल्तेङ धिरपालाउ का नेलाइको भालाइ जेङका हिदिङ काथा मनता माम्होअ्घा। 21 का यहुदि रो बोजात्यागेलाइहेङ ताताइको कुकरम लाअ्तेङ परमेस्वरकोता घुरिसु रो केलाइको प्रभु इसुता खान्धुर पासु दोअ्तेङ पारचार पाघा। 22 “एला का पुनित हाङसासो दोअ्का मानितेङ यरुसलेम हानेदोङखा। इन्ता कासेहेङ हाइहाइ ज्याङ, का माग्याङका। 23 का इदोइझोको ते गेखा, गोताङ पुरगेलाइता थुना रो पिर यरुसलेमता भोगेलिगोयाङ दोअ्तेङ पुनित हाङसा कासेहेङ गिपाका हि। 24 कुलाउ काङको ज्यान ताइको भाअ्सिङ हिदिङ मोलको मान्थु। का इदोइझोको खिनिङ भोखा, परमेस्वर द्याङगेलाइहेङ दायापाका हि दोअ्का रेम्काबानाल पारचार पाका कामहेङ का पुरा पालि द्वाको, जेदोङ कामचाहिँ प्रभु इसु दोङ कासेहेङ आर्हाइका हि। 25 कालाउ नेलाइ जाइको माझाता का सादेलको सारभिको पारचार पातेङ लोकाहिघा, नेलाइदोफा आरोङ काङको हेअ्लाउ बुङ मादुस्वाङ दोअ्का काथा का गेखा। 26 इदोइभाअ्सिङ नानि का नेलाइहेङ दोअ्दोङखा, नेलाइता हासुङ नास जेङसुन्हा पानु कासेहेङ इङकोको दुस मालाग्याङ 27 हाइदोनु परमेस्वर केलाइको भाअ्सिङ पालिखाङका हिदिङ काथा बुङ मादाइपासिङ का नेलाइहेङ गोताङ दोअ्पिहोइका। 28 “एला नेलाइ ताइमिङ ताइको रेखदेख पासु रो पुनित हाङसा नेलाइहेङ जिम्मा पिका जेरगेलाइको बुङ रेखदेख पासु। परमेस्वरको मन्डलिको रेम्का घोका जेङसु हाइदोनु प्रभु इसु इङको द्याङगेलाइहेङ ताइकोङ हिति होपातेङ चोलका हि। 29 कालाउ का हानेकान्हुअ्सो झारको स्याइलेभाइका द्याङगेलाइ नेलाइको माझाता दुलावा रो मन्डलिहेङ पिर पिलि मालाअ्तावा दोअ्तेङ का गेखा। 30 नेलाइकोङ माझासो बुङ ढाटाइका बिद्या पिका द्याङगेलाइ ओल्ह्यावा। एम्बालाइ प्रभुको चात्यागेलाइहेङ ताइकोङ मारेम्का दामाता चुमपुलि भोकावा। 31 एन्सा जेङलाउ चालाक जेङतेङ हिसु कालाउ का सुम बाअ्सारथिकापा नितिमन्हिसिङ मिति ह्याअ्पातेङ प्रभुको एमिएमिहेङ पिका चेतानि मानिल्सु। 32 “एला का नेलाइहेङ परमेस्वरको खुर्ता जिम्मा पिदोङखा रो वाकोङ दायासो पोङघाका बानालको भरता लाअ्प्याङका, जाइसो वा नेलाइहेङ खान्धुरता बोल्याका बान्हाइलि द्वावा रो ताइको द्याङगेलाइहेङ आसिसको हकदार बान्हायावा। 33 “का हासुको सोना, रुपा रो धाबा मादिअ्घा। 34 नेलाइ ताइमिङ गेसुखेना, काङको खुरहोइ काम पातेङ कासेहेङ रो काङको सानाइतिगेलाइहेङ गोइका आनेमाने जुराइघा। 35 एसापा ‘र्हुकाखान्तेङ पिकाता हेन्जा सहसाम्पा हि’ दोङतेङ प्रभु इसु ताइमिङ दोअ्का काथाहेङ फोमपातेङ मादोका द्याङगेलाइको खाङठहर पालि दोकाझोको काम पालिगोयाङ दोअ्तेङ का गोताङ काथाता तिङपाका हिघा।” 36 इदोइ दोअ्तेङ पावल झाराङदोफा मिलितेङ तिर्हो थोतेङ पुकार पाहि। 37 एम्बालाइ झाराङ खारहि रो पावलहेङ खोम्तेङ चुमाइतेङ बिदा पाहि। 38 पावल “नेलाइ आरोङ कासेहेङ हेअ्लाउ मादुसुस्वाना” दोअ्काता एम्बालाइ हेन्जाङ मन तु:पाहि। इङकोन्हुअ्सो एम्बालाइ पावलहेङ चिजाहाजथिकापा सिरपुहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.